Read Car_Nicobarese I. CHÖNGÖ 1 Bible Online

I. CHÖNGÖ 1 - Car_Nicobarese bible

I. CHÖNGÖ 1

¹Në nun ṙô, ṙô Môsös nö vë-ekūö yik Israĕl nö el tönyaṅlnyi lā muh tö Yôtön, i Arapa lā i Suf, i hôi Paran tö Tòfet, Lēpan, Aseròt, Taisahap inrē.

²Kahuk sīön sumkam rô-òl röön nö ṙā-ang Hōrep nö lök ip rung Sē-ir nö söl Kātēs Pörnia.

³Ngaich angū-ö im finën anāi samyeūheu; im kinhuk sīönö chingëṅt, im raneh sakāmö ngam chingëṅt, ang Môsös nö vë-ekūö yik kūön Israĕl, nö asā nuk taṙòkhöre kahëtö ngam Mā Tēv nö in ò chöngö nö in cha;

⁴Tökinheūten ò nö mihôiṅ tö Sīhòn rācha aṅ Amôr, ök mī-iyöng Hespòn, Ôk inrē rācha aṅ Pēsan ök mi-iyöng Astaròt i Etrei:

⁵Lā muh tö Yôtön i panam Mō-āp, ang Môsös nö rĕhtenre nö ahangnyö ngam chöngö, nö ngö ṙô,

⁶Vë-ekūö hī an ngam Mā Tēv ngam Tēv hī nö i Hōrep, nö ngö ṙô, Marô-òten yin ngaich iyöng in ngih rôngö:

⁷Havöökūöre yin, öi ngaich kirööngöre, kuṙòh chuh im törūngu panam yip aṅ Amôr, i nup chūökö inrē töröhta nö in e, i Arapa, im törūngu panam, im lā taṙeū panam, lā lòhngö, röhta i kuyāyö ngam mai, i panam yip Kanā-an, Lepanön inrē, tölngö ngam tökiröng tahël, ngam tahël Yufratīs.

⁸Yĕh meuk, i kūö yīö tī chin tö ngam panam: kuṙòh amīnu yin ngaich tö ngam panam ngam ṙô ngam Mā Tēv nö kilēḵngôre nö in yik yöng yīö, in Aprahām, in Isak, in Yāköp inrē, nö kētö e nö in cha in yip kūön cha inrē unôichrit cha.

⁹Ngaich vë-ekūö yīö chū-ö hē e, öich keun lumngan yīö.

¹⁰Maṙôngö tī an ngam Mā Tēv tö yīö ngam Tēv yīö, yĕh meuk, ngaich yin töngamuh sā minë taneūsömat ngam halīöngö tö ṙôngöre.

¹¹Ngam Mā Tēv, ngam Tēv yik muvöhngö yīö, növīlen yīö köṅnyu tum van ṙôken öi pōyen, hakôlò yīö inrē, sā ṙô ò nö kilēḵngôre nö in yīö!

¹²Sitih kanô-òṅ öich hĕngkūö keun lumngam yīö tö në linā-alkūö inrē tö yīö?

¹³Kēḵ tarik yin tö akahaṙa, tö-akaha-elmat inrē, mikahkūö yīö inrē, asā nup miyöngö yīö, hòṅ chu vīlen cha nö yöngkūö yīö.

¹⁴Ngaich sapṙô chu yī-ö, öi ngö ṙô, Tölöök an ngam ṙô meh nö la-en ih.

¹⁵Lökten chu ngaich kēḵ yöng kūö yīö i miyöngö yīö, tö tö-akahaṙa tarik, mikahkūö inrē, ngaich vīlen cha nö yöngkūö yīö, mākūö tököṅnyu; mākūö töṙôngö, mākūö tö taneui anāi, mākūö tösöm, yöngṙen inrē, nö asā miyöngö yīö,

¹⁶Ngaich chū-ö inrē kētö chöngö hē e, in yip ma-akah fālen, öich ngö ṙô, Hang nup chöönyö yin in yip hanöng kisānö yīö, chīpen akah fālen ngam tö hĕng tak tarik nö im holre, ngam töt aṅ panam ò inrē mī-in ò.

¹⁷Uh yin atöltuṙen tö tarik i inkaha fālen; hĕngren i tökiröng hang ṙô cha tö tökūönö inrē; uh yin pa-ekūö tö kūö tarik; tön aṅ im Tēv an ngam inkaha fālen: kētö öp chöönyi in chu öp tökihngen nö in yīö, ngaich hāngö e min Chū-ö.

¹⁸Ngaich hē e chū-ö tölṙô yīö tö nup taṙòkhöre hinôten yīö la-en.

¹⁹Ngaich kiröönngöre ayī-ö ṙā-ang Hōrep ngaich lök el öp tökiröng pinhe-eṅkūö inrē tö nyaṅlnyi öp maheuṅk yīö el talöökö öp törūngu panam yip aṅ Amôr, sā chöngö ngam Mā Tēv, ngam Tēv hī nö tölṙô hī; sölta ngaich ayī-ö i Katēs Pörnia.

²⁰Ngaich ngö ṙô chū-ö tö yīö, Ngaich yin sölta im törūngu panam yip aṅ Amôr, ngam kahëtö ngam Mā Tēv, ngam Tēv hī nö in hī.

²¹Yĕh meuk, ngam Mā Tēv yīö nö ngaich nö ṙātö ngam panam nö i kūö yīö: kuṙòh, kē-ĕ e nö amin yīö, sā ṙô ngam Mā Tēv nö in yīö, ngam Tēv yik muvöhngö yīö; un pa-ekūö, un rēhĕn rötngö rāi.

²²Ngaich yī-ö yihtöre in chu öi ṙòkhöre, öi ngö ṙô, Hökngen ih tīnngö tarik urēhĕkūö ih, hòṅ cha nö chöh ngam panam, ngaich kumtö ṙô hēk nö in ih, töp talöökö löklö ih min peūhlöre, nup elpanam inrē nup lööṙö ih min.

²³Ngaich ṙāmölōn chū-ö tö e; ngaich nët sīön tak kahë chū-ö tö tarik in yīö, hĕng tak i töhĕng miyöngö:

²⁴Ngaich cha-a nö kiröönngö re nö peūlöre nö im rôngö, ngaich sölta nö el achāṙö Eskòl, ulāikö matre ngaich nö ngëichkö e.

²⁵Ngaich cha-a nö kē ṙòng chōn ngam panam nö eltīre, ngaich kumtö u nö in ih ngaich kumtö ṙô nö hēk nö in ih, nö ngö ṙô, Tölöök öp panam ap kahëtö ngam Mā Tēv, ngam Tēv hī, nö in hī

²⁶Sönngenre yī-ö sōḵ kiröönngöre, ahôngö chöngö ngam Mā Tēv pöri ngam Tēv yīö:

²⁷Siṙöh ṙôre yī-ö el nup inrūkui re, öi ngö ṙô, Kūöre an ngam Mā Tēv nö surīkhen hī, kēnyen hī an ṙā-ang öp panam Aikup, öi kētu, el tī yip aṅ Amôr nö halëlngen hī.

²⁸Chuh in e öi pökeh ayī-ö? Tön ngaich yih vē hol hī nö piṙööingö ellōn hī, nö ngö ṙô, Tökiröng yip tarik marôlö inrē tö hī, ngaich nup elpanam inrē nö kiröng söllö rô-òl kui kinlōngö nö el halīöngö; ane inrē īhö umuh meuk yip kikōnyö kūön Anakim.

²⁹Ngaich ngö ṙô chū-ö tö yīö, Un vöö, un rēhĕn pa-ekūö tö cha.

³⁰Ngaich ngam Mā Tēv ngam Tēv yīö nö kiröönngöre nö urēhĕkūö yīö, anga-aṅ an min kumyunglen yīö, sā nuk tī ò i Aikup tö pòkūö yīö nö i kūö minë mat yīö;

³¹El tönyaṅlnyi inrē in e më-eṅ ngaich meuk tī ngam Mā Tēv, ngam Tēv meh nö tētö meh, sā tī tarik nö tēt kūön re, i nup talöökö tölökö tö yīö, hanöng saha yīö sölta ngaich i ngih chūök.

³²Sönngenre yī-ö i ngih öt ṙātö ellōnre i ngam Mā Tēv ngam Tēv yīö,

³³Ngam tö ngaich nö el talöökö nö urēhĕkūö yīö, nö chöhlö chūök yīö öi vītö rūkuire, i tameūyö tö hatööm, nö hameuk tö talöökö yīö kiröönngöre, i taṙul tö sakānö.

³⁴Hē ngam Mā Tēv nö hang nuk ṙô yīö, ngaich tainy, kilēḵngôre ngaich nö chūöku ṙô, nö ngö ṙô.

³⁵Öt hĕng tak min tö kô-òngrit aṅ i vē tarik aṅ ngih tötlöök tūmö nö meuk öp tölöök panam, öp ṙô Chu chūökö ṙô kilēḵngô re öich kē-ĕkūö yip muvöhngö yīö,

³⁶Höng Kalĕp öp kikōnyö kūön Yefuneh, meūkö e öp min anga-aṅ; in ò tī Chin min kētö ngam panam ngam töröönka kui tö ò, in yip kūön ò inrē: pòn keuheūt tö ellōnre anga-aṅ nö tömrit ngam Mā Tēv.

³⁷Līn inrē ngam Mā Tēv nö in chu tö pòkūö yīö, nö ngö ṙô, Hö-ö man inrē më-eṅ min chuh in e:

³⁸Yôsuā ngam kikōnyö kūön Nön, ngam i kūö yīö nö sökhaka, chuh in e an min anga-aṅ: ṙūöhöl alaha ò yin: tön anga-aṅ an min tötī-iv tö e nö amin Israĕl.

³⁹Hēk inrē më kun kūönö kūön yīö, më ṙô yīö nö pô famël, më kūön yīö inrē, më tö-öl nö akahakūö tö tölöök hēk tötlöök i ngih sakāmö, cha-a yin min chamuh in e, in cha tī chū-ö min inrē kētö e, ngaich cha-a min nö amin tö e.

⁴⁰Havöökūöre pöri yī-ö, kiröönngöre el ngam tönyaṅlnyi lök el ngam talöökö chamuh im Töngāṅv Mai.

⁴¹Ngaich sapṙô chu yī-ö öi ngö ṙô, Köölö fālen in ngaich i ngam Mā Tēv, ngaich in hōḵ kiröönngöre im kinyūngö, sā nup chöngö ngam Mā Tēv tö ih, ngam Tēv ih. Ngaich yī-ö kö hamöplö ṙatre tö aṅtī re i kinyūngö, ngaich hòṅ peūlöre i kui ngam rôngö.

⁴²Ngaich ngö ṙô ngam Mā Tēv tö chu, Ngö ṙô man tö cha Un peūlöre, un rēhĕn kiyung; tön öt in yīö chin; öt kô yin min i kūö yip lā-al re.

⁴³Ngati ṙô chū-ö tö yīö, ngaich rö-ö yī-ö hang; ahôngö chöngö ngam Mā Tēv pöri, kahanglōnre inrē, ngaich peūlöre i kui ngam rôngö.

⁴⁴Ngaich yip Amôr, yip mī-iyöng kui ngam rôngö, nö kunyī-inyre nö lā-al yīö, ngaich lū-u yīö, höng sāpi, ngaich mihôiṅ tö yīö i Sēir, sölngö nö uroh nö i Hôrmah.

⁴⁵Havan yī-ö ngaich, ngaich peuiny i kūö ngam Mā Tēv; hö-ö pöri ngam Mā Tēv nö hang ṙô yīö, ötrēhĕn nö kētö elnang re nö in yīö.

⁴⁶Lökten yīö ṙōl sumkam iyöng Katĕs, sā tūmö nup sakāmö yīö iyöng in e.