Read Car_Nicobarese I. CHÖNGÖ 10 Bible Online

I. CHÖNGÖ 10 - Car_Nicobarese bible

I. CHÖNGÖ 10

¹Hē e ngam Mā Tēv nö ngö ṙô tö chu, Faslö tömitāk man ihong nët sā nuk lā urĕh, ngaich yônlö in chu i kui ngam rôngö vī kasòng pömchö inrē nö chōn.

²Hòn chu kūich mat nup tömitāk ihong tö nup ṙô mi-imat nuk raneh tömitāk nuk tölikūki tö meh ngaich chaphöt u min më-eṅ el ap kasòng chöngö.

³Lökten chu vī kasòng chöngö tö chōn sittim faslö tömitāk ihong inrē nët sā nuk raneh, ngaich yônlö öich i kui ngam rôngö, aṅhaṅv eltī tö nuk tönët tömitāk ihong.

⁴Kūich ngaich anga-aṅ nö i mat nuk tömitāk ihong, sā nuk raneh tökūichö, minë tösöm chöngö, minë ṙô ngam Mā Tēv nö in yīö i kui ap rôngö löknyö ellōn kūö tameūyö ik sakāmö inmūlöre: ngaich kētö u ngam Mā Tēv nö in chu.

⁵Havöökūöre chū-ö ngaich, yônti ṙā-ang kui ngam rôngö, ngaich chaphöt nuk tömitāk ihong el öp kasòng chöngö öp vahī chu; ël e nup asā tinöölô chu tö ngam Mā Tēv.

⁶(Ngaich yik Israĕl nö kiröönngöre nö ṙā-ang Piròt, Peniya-akan nö chuh Môsara: in e ngaich Aròn nö kapah, in e ngaich nö lāpi; ngaich Ēliāsör ök kikōnyö kūön ò nö ṙënngen ò nö mameukṙen nö el chūök kūönṙô.

⁷Ṙā-ang in e cha-a nö kiröönngöre nö chuh Kutkōtā; ṙā-ang Kutkōtā inrē nö chuh Yòtpata öp panam töhëmö aṅ kūö tö mak.

⁸Hē e ngam Mā Tēv nö haköhngen öp miyöngö Lēvī, nö keun öp kasòng chöngö kinlēḵngô ngam Mā Tēv, nö sökhak nö i kūö ngam Mā Tēv nö meukṙen ò hakôlò minë-eny ò inrē söl ing töngamuh.

⁹Lökten Lēvī nö öt minchöḵ-övö öt rēhĕn nö amīnu nö in yik hanöng kisānöre; ngam Mā Tēv an amin ò, sā ṙô ngam Tēv nö in ò, ngam Mā Tēv).

¹⁰Hangöhngöre chū-ö i kui ngam rôngö, sāre ik raneh, fën anāi sakāmö fën anāi hatööm inrē: ngaich hang ṙô chu ngam Mā Tēv inrē hē e; öt hòṅ halëlhangen ngam Mā Tēv.

¹¹Ngaich ngö ṙô ngam Mā Tēv tö chu, Chōholre, urēhĕkūö më tarik kiröönngöre; hòṅ cha nö kē aminre töp panam, ap ṙô chu kilēḵngôre in yik muvöhngö cha öich kētö e in cha.

¹²Yĕh pöchö töngamuh, Israĕl, suh ap hinôtö meh tö ngam Tēv ngam Mā Tēv meh, tön hōtu man pa-ekūö tö ngam Tēv ngam Mā Tēv meh, lök el nup talöökö ò, hāngenlōn tö ò, lök la-en ngam Tēv ngam Mā Tēv meh, keuheūttö ellōnre keuheūttö nômöre inrē,

¹³Haköp nup inchöngten aṅ im Mā Tēv, nup chöngö Ò inrē, nup tinöölô meh i ngih sakāmö pò meh hōtu lööken?

¹⁴Yĕh meuk, halīöngö ngam Tēv ngam Mā Tēv meh an ngam halīöngö minë halīöngö, ngam tumlat, holtö nup taṙòkhöre aṅkūö e.

¹⁵Kūö ngam Mā Tēv nö tökuchīkölōn nö in yik muvöhngö yīö nö hāngenlōn tö cha, atöllö yip kūön cha inrē unôichrit cha, öi yī-ö tulöng tö taṙòkhöre tarik, sā e i ngih sakāmö.

¹⁶Lökten yin tunyinyngö fanöinylöre, ui ngöhören kehe likeun.

¹⁷Tön ngam Tēv meh an Mā Tēv, anga-aṅ an Tēv vē tēv, Mā vē mā inrē, tökiröng nö Tēv tökalēḵ, pinhë-eṅkūö inrē, ngam töt atöltuṙen tö tarik.

¹⁸Anga-aṅ an töteung i inkaha fālen kūön yōich tafīösi inrē, hāngenlōn inrē tö aṅ tahëng, nö kētö nyā-aṅkūö ò hilā ò inrē.

¹⁹Lökten yin yī-ö hangenlōn tö aṅ tahëng: tön aṅ tahëng yin misī ip panam Aikup.

²⁰Pa-ekūö man tö ngam Tēv ngam Mā Tēv meh; anga-aṅ lahök la-en meh; in ò më-eṅ inrē haköpngöre, i minë-eny ò inrē öm chūöku ṙô.

²¹Anga-aṅ an ineū-euṅ meh, Tēv meh an inrē, nö tötī-iv nö in meh tö në tökiröng pinhë-eṅkūö inrē, nup tö ngaich nö meūkö tö minë mat meh.

²²Chuh Aikup yik misī muvöhngö meh nöng sat anāi tum tak nö tarik; ngaich töngamuh ngam Tēv ngam Mā Tēv meh nö vīlen meh sā taneūsömat ngam halīöngö tö ṙôngöre.