Read Car_Nicobarese I. CHÖNGÖ 11 Bible Online

I. CHÖNGÖ 11 - Car_Nicobarese bible

I. CHÖNGÖ 11

¹Lökten man hāngenlōn tö ngam Tēv ngam Mā Tēv meh, haköp tinölôre tö ò, nup chöngö ò inrē, tö nup inkaha fālen inrē aṅ in ò, nup hachöngten ò inrē, örheūheu.

²Akahalōn yin yēḵ i ngih sakāmö tö chu öt vë-ekūö yip kūön yīö yip töt akahalōn, yip töt mameuk chinökṙen tö ngam Tēv yīö ngam Mā Tēv, ṙôkö ò, kumlēḵ kël ò, ngam töteuthak inrē kël ò,

³Nup minkahngö ò, tö nup la-en ò inrē, nup tī ò nö ellōn Aikup in Fërō öp rācha aṅ Aikup, in öp panam ò inrē nö ṙòkhöre;

⁴Tö tī ò inrē tö yik kumyung aṅ Aikup tö nuk kōra cha tö nuk inröl cha inrē; tö tī ò inrē nö tiṙēichlö ngam Töngāṅv Mai hē cha nö lū-u yīö, tö tī ngam Mā Tēv inrē nö halëlngen cha söl i ngih sakāmö;

⁵Tö tī ò inrē tö yīö el tönyaṅlnyi, hanöng saha yīö sölta i ngih chūökö.

⁶Tö tī ò inrē, in Tātān, Apiram inrē, nak kikōnyö kūön Ēlīāp öp kikōnö kūön Rūpön; tö inlahen ngam tumlat nö vā-alkūö re, ngaich ngeūkten cha, tö yik aṅ patī cha, tö nuk rūkui cha, ṙòkhöre inrē nuk tö-aṅ tamömkörit cha, nö el ṙôngö yik aṅ Israĕl:

⁷Meūkö u pöri minë mat yīö nö ṙòkhöre nup tökiröng la-en ngam Mā Tēv kahëken ò.

⁸Lökten yin haköp në inchöngten nö ṙòkhöre në tinölô yīö tö chu i ngih sakāmö, hòṅ yīö ngëḵ, kuhēthötre ngaich kēḵ ngam panam nö amin yīö, ngam kū-ö yīö havāngngöre kē-ĕ e nö amin yīö;

⁹Hòṅ yīö min marô-òten sakāmö im panam kinlēḵngô ngam Mā Tēv nö in yik muvöhngö yīö nö kētö e nö in cha i yip kūön cha inrē, panam töhëmö aṅkūö tö aṅteh, hönī inrē.

¹⁰Pò ap panam öp kū-ö meh kē-ĕ e nö amin meh, rö-ö ap nö tösā ap panam Aikup öp ṙeūngö yīö meutnyi i chūök meh teūich tö kulöl, ngaich aṅtī tö kunröönre öm hamākö e, sā panô-òṅ pāchī;

¹¹Ap panam pöri kū-ö yīö kē-ĕ e nö amin yīö, törūngu ap nö panam tö achāṙuvö inrē amòk mak kumṙah ngam halīöngö:

¹²Panam ap tö hakūökaṙen tö ngam Tēv meh ngam Mā Tēv; örheūheu nup mak ngam Tēv meh ngam Mā Tēv nö i kui löktökūö ranehtökūö samyeūheu söl i kinheūṅtö samyeūheu.

¹³Ngaich mīnö angū-ö, yē yīö min haṙēmngenre hang në hachöngten chu në tinölô yīö i ngih sakāmö, öi hāngenlōn tö ngam Tēv yīö ngam Mā Tēv, lök la-en ò inrē keuheūttö ellōnre keuheūttö nômre inrē,

¹⁴Ngaich chū-ö min kētö kumṙah ngam panam ip ṙetak e, ngam mu-urĕh kumṙah tö ngam manā-aṅ inrē, hòṅ meh hamūl sāiny re, vain re, tavī-ire inrē.

¹⁵Kētö kiyôp meh chin min el nup panô-òṅ meh nö nyā-aṅkūö nup nuā meh, tööḵngen min më-eṅ inrē nyā-avkūö.

¹⁶Haṙēmngenre më-eṅ, hòṅ meh öt hachīlö tö ellōn re ngaich kānngöre më-eṅ, ngaich lök la-en tahëng tēv, ngaich salāmö u;

¹⁷Ngaich tōttöre kūö ngam lanīnö ngam Mā meh, ngaich anga-aṅ nö löpngökūö ngam halīöngö, hòṅ e nö öt kumṙah ngaich ngam tumlat inrē nö öt sīöplö ṙòng; ngaich yī-ö ka-euingen lëlngö ṙā-ang im tölöök panam ngam kahëtö ngam Mā Tēv nö in yīö.

¹⁸Lökten yin hòṅ ṙātö në ṙô chu ellōn yīö i nômö yīö inrē; nyëklö u yī-ö inrē nö minkahngö nö i kël re, i māl yīö inrē i hôi minë mat yīö.

¹⁹Hòṅ haköpten u yī-ö inrē in yip kūön yīö; kakkö u, yē meh ūichhak el patī re, yē meh inrē kiröön el talöökö, yē meh ṙōlhaka, yē meh inrē chōholre.

²⁰Kūichngö u inrē më-eṅ i kaha nup machööḵlö inkūp patī re i kui nup inkūp kinlōngö meh inrē.

²¹Hòṅ nup sakāmö meh nö ṙuöhlöre ṙôken, nup sakāmö yip kūön meh inrē, nö im panam ngam ṙô ngam Mā Tēv nö kilēḵngôre nö in yik muvöhngö yīö nö kē-ĕkūö cha, sā nup sakāmö minë halīöngö lā tulöng töng tumlat.

²²Pò yīö yē yīö haṙēmngenre haköp në inchöngten në tinöölô yīö tö chu, öi la-evṙen tö u; öi hāngenlōn tö ngam Tēv ngam Mā Tēv yīö, öi lök el nup talöökö ò nö ṙòkhöre, haköpngöre inrē in ò;

²³Ngaich möl min ngam Mā Tēv nö ahōngö vē pumnāmö tarik nö ṙòkhöre nö ṙā-ang i kūö yīö, ngaich yī-ö min inrē amīnu tö vē pumnāmö tarik tökiröng kalēḵ inrē tö yīö.

²⁴Ṙòkhöre nup törööntu elröön yīö nö amin yīö min: löktökūö im tönyalnyi, i Lepenön inrē, löktökūö im tahël, ngam tahël Yufritīs kūöngö meh min ngam lā sūng mai.

²⁵Öt tarīku min tökô nö sökhak nö i kūö yīö: ngam Tēv yīö an min ṙamātö ngam pinhë-eṅ yīö i kui nup panam töröönka ël tö yīö, sā ṙô ò nö ngaich tö yīö

²⁶Yĕh meuk, i kūö yīö tī chin i ngih sakāmö ṙātö inkôlò öt inkôlò inrē;

²⁷Ngam inkôlò, yē yīö min hang në inchöngten aṅ im Tēv ngam Mā Tēv yīö, në tinöölô yīö tö chu i ngih sakāmö:

²⁸Öt inkôlò inrē, yē yīö min öt hang në inchöngten re aṅ im Tēv ngam Mā Tēv yīö, kānngöre pöri ṙā-ang el ngam talöökö ngam tinöölô yīö tö chu, öi tömrit nup tahëng tēv, nup öt mikahkūö yīö.

²⁹Ngaich min angū-ö, hē ngam Tēv min ngam Mā Tēv yīö nö kēten yīö im panam ngam kū-ö yīö kiröönngöre kē-ĕ nö amin yīö; ngaich më-eṅ min ṙātö ngam inkôlò i kui ngam rôngö Kerisim, ngaich i kui ngam rôngö Ēpôl ngam öt inkôlò.

³⁰Röh nup anū-ö nö lā muh tö Yôtön lāmuh tö talöökö maneutti ngam tavūöi i panam yip aṅ Kanā-an yip mī-iyöng Arāpā, lākūö Kilkāl i nup ōk i Môreh?

³¹Hòṅ havāngngöre yin lā muh tö Yôtön öi kirööngngöre kēḵ ngam panam nö amin yīö ngam tökilē-ĕyö tö ngam Tēv ngam Mā Tēv yīö nö kē-ĕkūö yīö, ngaich amīnu yī-ö min tö e, iyöng in e inrē.

³²Ngaich yī-ö min la-evṙen tö në chöngö në inkaha fālen inrē në ṙahātö chu i kūö yīö i ngih sakāmö.