Read Car_Nicobarese I. CHÖNGÖ 12 Bible Online

I. CHÖNGÖ 12 - Car_Nicobarese bible

I. CHÖNGÖ 12

¹Në nun chöngö inkaha fālen inrē, në haköpkö yīö min nö la-en yīö im panam tökilē-ĕyö kinëtī nö in yik muvöhngö yīö tö ngam Mā Tēv, ngam Tēv yik mavöhngö yīö, kētö e nö in yīö nö amin yīö, i rô-òtö nup sakāmö yīö öi aṅ i kūö ngih tumlat.

²Keuheūtngöre vah tī yī-ö min piyāingö nup chūökö, nup chūök yip pumnāmö tarik nö lök la-en nup tēvre nup amin yīö, nup mi-ikui tömarô-òl kui rôngö, i kui rung inrē, elkatòh rōi tö-uhāvö rōi chōn inrē:

³Tirōlngö nup tahāklö u yī-ö min, pinyeny tīre likölngö nup tösā machööḵlö insā, haṙāpngö nup Asērim cha i kūö tameūyö; kūöltö nup insā tēv cha yī-ö inrē; piyāingö nup minë-eny u yī-ö nö ṙā-ang ip chūök u.

⁴Rö-ö pöri yī-ö ngati tī tö ngam Tēv ngam Mā Tēv yīö.

⁵Ip Chūökö pöri öp katöllö ngam Tēv, ngam Mā Tēv yīö aṅ i yip miyöngö yīö ṙòkhöre nö chūök minë-eny ò, chöh öp elyöngö ò yī-ö; ngaich in e min yī-ö yihtöre:

⁶Kētö nup töföngö min yī-ö in e, nup tökētu tö yīö inrē nup töhĕng i tösöm tī yīö inrē, nup töhatāilöng tökētu aṅ eltī yīö, nup tö chūöku kinlēḵngô yīö inrē, nup kanahanglōn yīö tökētu, tö nup lanòh sīṅp yīö nuā yīö inrē:

⁷Ngaich in e yī-ö min nyā-aṅvkūö i kūö ngam Tēv ngam Mā Tēv yīö, ngaich ṙāmölōn yī-ö min i nup chūök tī yīö ṙātö tīre, yī-ö tö yip aṅ patī yīö, i nup inkôlò yīö tö ngam Tēv ngam Mā Tēv yīö.

⁸Uh yī-ö min tömken nup la-en hī ihih i ngih sakāmö, öi höng kö kahngenre tö nup töchip tö el matre:

⁹Tön öl yin sölta im haneūheu im aminre inrē, ngam kahëtö ngam Tēv nö in meh ngam Mā Tēv meh.

¹⁰Hē yīö pöri havāngngöre tö Yôtan, ngaich iyöng im panam tī ngam Tēv ngam Mā Tēv yīö, nö amin yīö, ngaich kētö haneūheu yīö anga-aṅ ṙā-ang in yip lā-al yīö mahavīlen yīö, hòṅ yīö iyöng öt pinlānguṙen:

¹¹Ngaich angū-ö öp chūökö atöllö ngam Tēv ngam Mā Tēv yīö min, nö chūök öp minë-eny ò min nö iyöng umuh; löö in e tī yī-ö kētö nup tinöölô yīö tö chu; nup töföngö tökētu, nup tökētu tö yīö, nup tī yīö töhĕng i tösöm, nup tö hatāilöng eltī yīö tökētu, ṙòkhöre nup atöllö yīö tö chūöku kinlēḵngô nup kinlēḵngô tö chūöku in Mā Tēv:

¹²Ngaich yī-ö min ṙāmölōn i kūö ngam Tēv ngam Mā Tēv yīö, yī-ö, yip kikōnyö kūön yīö, yip kikānö kūön yīö, yip tarik yīö kikōnyö, yip tarik yīö kikānö, yip Lēvī lamā ël inkūp meh, pòn tö rö-ö anga-aṅ nö minchöḵ-övö öt rēhĕn nö amīnuvö nö hol kūö yīö.

¹³Haṙēmngenre yī-ö ui kētö töföngö tökētu öi höng meuk chūökre:

¹⁴Ip chūök pöri min atöllö ngam Mā Tēv ip töhĕng miyöngö in yīö, in e më-eṅ kētö töföngö tökētu, in e më-eṅ vī nup tinöölô meh tö chu nö ṙòkhöre.

¹⁵Kô-òren pöri më-eṅ ṙatnyö likeun ngaich kā alaha inrē lā-ël nup inkūp kinlōngö meh, sā öp kanahanglōn meh, sā tī ngam Tēv ngam Mā Tēv meh nö hakôlò meh tö nup kahëtö ò nö in meh: in e yip töthet töhet inrē nö kô-òren nö nyā-aṅvkūö, tö kasēlē, hāt inrē.

¹⁶Uh pöri yī-ö kā ngam mahām; ṙösngö e më-eṅ el tumlat nö sā mak.

¹⁷Uh më-eṅ nyā-aṅvkūö lā-ël öp inkūp kinlōngöre tö nup sāiny tī meh töhĕng i tösöm, hēk vain meh, hēk tavī-i meh, hēk nup lanòh sīṅp meh hēk nuā meh, un rēhĕn nup chūök ṙô meh kilēḵngôre, un rēhĕn nup kanahanglōn meh tökētu aṅ eltī meh:

¹⁸Nyā-aṅ u pöri më-eṅ i kūö ngam Tēv ngam Mā Tēv meh ip chūökö atöllö ngam Tēv ngam Mā Tēv meh, më-eṅ, töp kikōnyö kūön meh, töp kikānö kūön meh, töp kikōnyö tarik meh, töp kikānö tarik meh, töp Lēvī inrē lā-ël öp inkūp ap kinlōngö meh. Ṙāmölōn më-eṅ i kūö ngam Tēv ngam Mā Tēv meh i nup chūök tī meh ṙātö eltīre.

¹⁹Ṙēmen më-eṅ tö re hòṅ meh öt ṙāngö ngam Lēvī hanöng saha rô-òten meh aṅ i kūö ngam panam re.

²⁰Hē ngam Tēv ngam Mā Tēv meh min nö ṙūönyö ṙôkti kūöngö panam meh, sā ṙô ò nö kilēḵngôre nö in meh, ngaich ngö ṙô min më-eṅ, Kā alaha chin min, kūö ap lōn meh nö hòṅ kā alaha; kā alaha më-eṅ ngaich, sā ṙôken lōnre.

²¹Yē ap chūökö atöllö ngam Tēv ngam Mā Tēv meh ap chūök minë-eny ò nö ṙātu nö yaha rôvat tö meh, ngaich më-eṅ ṙātnyö likeun aṅ i nup sīṅp meh aṅ i nup nuā meh inrē, nup kahëtö ngam Mā Tēv nö in meh, sā ṙô chu ngaich töl ṙô meh, nyā-aṅvkūö më-eṅ ngaich lā-ël nup inkūp kinlōngö meh, sā ṙôken lōn meh.

²²Sā kūö meh kā kasēlē hāt inrē, ngatī kūö më-eṅ nyā-aṅvkūö: Hĕng re kūö öi nyā-aṅvkūö tö yip töthet töhet inrē.

²³Köpölōn pöri më-eṅ töre um kā mahām: tön nômö an ngam mahām; uh më-eṅ kā ngam nômö nö hol ngam alaha.

²⁴Uh man kā-a e; ṙösngen e pöri më-eṅ el ngam tumlat nö sā mak.

²⁵Uh man kā-a e; hòṅ meh löök in e, tö yip kūön meh inrē unôichrit meh, yē meh min la-evṙen töp töchip i kūö ngam Mā Tēv.

²⁶Höng nup töhet in meh, nup töchūöku kinlēḵngô inrē, anū-ö kum meh, ngaich chuh ip chūökö ap atöllö ngam Mā Tēv min:

²⁷Ngaich më-eṅ kētö nup töföngö tökētu tö meh, ap alaha mahām inrē, nö el ngam tahāklö ngam Tēv meh: ngaich ngam mahām nup tökētu tö meh min nö ṙöslöngö nö el ngam tahāklö ngam Tēv ngam Mā Tēv meh, ngaich kā nup alaha më-eṅ.

²⁸Haköpkö, hang në ṙô inrē në tinöölô meh tö chu, hòṅ e nö lööken nö in meh, in yip kūön meh inrē unôichrit meh nöng örheūheu, yē meh la-evṙen tö tölöök töchip inrē i kūö ngam Tēv ngam Mā Tēv meh.

²⁹Hē ngam Tēv meh min ngam Mā Tēv nö rökngö yip pumnāmö tarik nö ṙā-ang i kūö meh, ip kū-ö meh kiröönngöre kē-ĕ cha nö amin meh, ngaich më-eṅ amīnu tö cha, ngaich iyöng el panam cha;

³⁰Haṙēmngenre më-eṅ hòṅ meh öt tingöpö öm tömrit cha, tökinheūṅten cha nö piyāyiyö nö ṙā-ang i kūö meh; uh më-eṅ inrē ngö ṙô hatönken nup tēv cha, Sitih inlahen aich vē pumnāmö tarik nö lök la-en nup tēvre? hòṅ ngatī tī chin chū-ö min.

³¹Uh man ngatī inlahen im Tēv ngam Mā Tēv meh: pòn keuheūtlöre sinòkkūö im Mā Tēv, nup surīkhö ò, nö tī cha nö i nup tēv cha; tön urōsen yip kikōnyö kūön cha yip kikānö inrē kūön cha nö föngö tö cha i kūö tameūyö i nup tēv cha.

³²Nup töng tinölô meh tö chu, anū-ö haköpkö meh öm la-evṙen um ṙūötö ṙôken u, um rēhĕn hakūönhanga in u.