Read Car_Nicobarese I. CHÖNGÖ 13 Bible Online

I. CHÖNGÖ 13 - Car_Nicobarese bible

I. CHÖNGÖ 13

¹Yĕn hĕng tak ap pròfĕt, chamôhòlre nö el ṙôngö yīö, hēk öp hameūv heūvö, ngaich kētö minkahngö anga-aṅ nö in meh hēk pinngangkūö,

²Ngaich ap minkahngö hēk ap pinngangkūö nö teungtökūö, ngaich löknyô ò nö vë-ekūö meh, nö ngö ṙô, Tā-a töi tömrit tahëng tēv nup töt mikahkūö meh, öi lök la-en u inrē:

³Uh më-eṅ hang në ṙô öp pròfĕt anga-aṅ, hēk ap hameūv heūvö: tön kalaha meh an ngam Tēv meh ngam Mā pòn hòṅ akahalōn yē meh hāngenlōn tö ngam Tēv meh ngam Mā Tēv öm keuheūttö ellōnre keuheūttö nômöre inrē.

⁴Tömrit ngam Tēv re më-eṅ ngam Mā Tēv, pa-ekūö tö ò, haköp në chöngö ò, hang ṙô ò, lök la-en ò, haköpngöre inrē in ò.

⁵Öp pròfĕt pöri, hēk ap hameūv heūvö, kumpaha min anga-aṅ; pò ò nö ṙôtö inhôngen ngam Tēv meh ngam Mā Tēv, ngam kamënyen meh ṙā-ang ip panam Aikup, ngaich ṙānyen meh ṙā-ang el ap patī inkövö nö hōten meh kānngöre tö ngam talöökö tinöölô meh tö ngam Tēv ngam Mā Tēv meh öm lök in e Ngati tī më-eṅ min kavalngö ngam tötlöök nö ṙā-ang el ṙôngö meh.

⁶Yē ap hanönglöknyö meh kikōnyö, kikōnyö kūön ap yöng meh kikānö, hēk kūön meh kikōnyö, hēk kūön meh kikānö, hēk ap pīhö meh takô, hēk ap hol, ap tösā lōn meh, nö ulāikenre nö haṙöingen meh nö ngö ṙô, Tā-a töi lök la-en tahëng tēv nup öt mikahkūö meh, öt rēhĕn nö mikahkūö yik muvöhngö meh;

⁷Aṅ i tēv vē tarik vē mahavīlen yīö, röhta nö in yīö, hēk marôvat tö yīö, löktökūö manā-ang kūö ngam tumlat;

⁸Um hō in ò, um rēhĕn hang ṙô ò; um rēhĕn aṙē-ĕ elmat tö ò; um rēhĕn ṙālen ò, un rēhĕn hayunngen ò;

⁹Kumpahang vah ò pöri më-eṅ öm kô-òtī; öp kël meh mu-urĕhtö tī nö in ò nö kumpahan, ngaich unôichtötī nup kël yip taṙòkhöre tarik.

¹⁰Kulehan më-eṅ tö ihong, hòṅ ò nö kapah; pò ò nö lukkenre nö tūökngen meh nö ṙā-ang el talöökö ngam Tēv ngam Mā Tēv meh, ngam kamënyen meh ṙā-ang ap panam Aikup, ṙā-ang el ap patī inkövö.

¹¹Hòn ṙòkhöre aṅ Israĕl nö hang, pa-ekūö inrē ngaich öt hēk min nö ngatī la-en tö töngatī ötlanöökö tösā ngih nö elṙôngö yīö.

¹²Ngaich yē meh hang öm vënyu nang tö inlahen öp töhĕng aṅ i nup elpanam meh, nup kahëtö ngam Tēv meh nö in meh ngam Mā Tēv nö chūök meh inyöng, nö ngö ṙô,

¹³Ngaich yik yô-òv tötlöök nö kiröönngöre nö ṙā-ang el ṙôngö yīö, ngaich nötūökngö yik aṅ elpanam cha, nö ngö ṙô, Tā-a töi lök la-en tahëng tēv, nup ötmikahkūö yīö;

¹⁴Ngaich hatöntöre më-eṅ, chöh inrē, haṙēmngenre öm hatön; ngaich yē e nö tökô-en, nö öt kintöngulōn nö in e, tö töngatī sinòkkūö nö ngaich nö kēkaṙen;

¹⁵Ngaich më-eṅ ötkô öt fëlhanga öm aṅtī tö fël ahatngen e nö keuheūtngöre, tö yip aṅ e nö ṙòkhöre tö nup nuā, öm aṅtī tö fël.

¹⁶Ngaich më-eṅ hamūl nup pôḵ meh in e nö ellōn ngam talöökö, ngaich föngtökūö ngan elpanam tö tameūyö nö im Tēv ngam Mā Tēv meh, keuheūtlöre nup töng pôḵ meh: ngaich anū-ö min nö örheūheu nöng fônghaka; öt hēk min anū-ö nö vīlöng.

¹⁷Öt hĕng min nup tökētu chehen tököp nö eltī meh: hòṅ ngam Mā Tēv nö havööngökūö ngam tanānyöre, ngaich hameuktö miṙēlōnre nö in meh, aṙē-ĕlōn inrē tö meh, ṙūölö ṙôngö meh inrē, sā ṙô ò nö kilēḵngôre nö chūökuṙô nö in yik muvöhngö yīö;

¹⁸Yē meh min hang ṙô ngam Tēv ngam Mā Tēv meh, öm haköp në chöngö ò, në tinöölô meh tö chu i ngih sakāmö, öm la-evṙen tö tölöök ikūö ngam Tēv ngam Mā Tēv meh.