Read Car_Nicobarese I. CHÖNGÖ 15 Bible Online

I. CHÖNGÖ 15 - Car_Nicobarese bible

I. CHÖNGÖ 15

¹I kinheūṅten tösat samyeūheu ṙā-anyi më-eṅ.

²Ngih ön yih inlahen tī meh ṙā-anyi: Ṙòkhöre vē kamëtö töhaṙūöngö min nö ṙānyö nup tīre töhaṙūöngö töp hol ò; uh anga-aṅ min nö hateungngö e nö ip holre ip mak alaha ò inrē; pòn ahangka nö ngaich ngam ṙinānyö tö ngam Mā Tēv.

³Kô-òren më-eṅ hateungngö e i aṅ tahëng pumnāmö: nup më-eṅ meh pöri ip mak alaha meh ṙā-ang tīre më-eṅ;

⁴Öt yāichuvö pöri min in meh nö umuh; (pò ngam Mā Tēv nö kô-en min nö hakôlò meh im panam kahëtö ngam Tēv ngam Mā Tēv meh nö in meh öm aminu tö e;)

⁵Yē meh höng haṙēmngenre hang ṙô ngam Tēv ngam Mā Tēv meh, öm la-evṙen tö nup i ngih chöngö ngam tinöölô meh tö chu i ngih sakāmö öm haköpkö u.

⁶Pò ngam Tēv ngam Mā Tēv meh nö hakôlò meh min, sā ngam kinlēḵngô ò nö in meh: pōyen yip min pumnāmö tarik mahaṙūöng nö in meh, hö-ö pöri më-eṅ haṙūöng; pōyen hayöng man min tö pumnāmö tarik, hö-ö pöri cha-a nö hayöngö meh.

⁷Yē meh holtuṙah tö yāich tarik, hĕng tak aṅ i yip mak alaha meh, la-ël inkūp ngam kinlōngö meh im panam meh kahëtö ngam Mā Tēv ngam Mā Tēv meh nö in meh, uh më-eṅ hangëṅngö ellōnre, um rēhĕn tilup eltīre im yāich mak alaha meh:

⁸Lingāṅnyö eltīre pöri më-eṅ in ò, kētö haṙūöng ò më-eṅ sā ṙôken hanāten ò öp lōn ò.

⁹Ṙēmen un töchōichu ellōn meh, öm ngö ṙô, Röhta an ngam sinātö samyeūheu, ngam hē ṙīnānyö; ngaich kunyaha elmat më-eṅ tö ngam mak alahare, ngaich öt kē-ĕkūö ò; ngaich anga-aṅ nö peunyhökūö ngam Mā Tēv nö lā-al meh, ngaich in meh angū-ö nö kanöölö.

¹⁰Hòṅ kē-ĕkūö ò man, ngaich um haṙivlōn ellōnre yē meh kē-ĕkūö ò: tön kūö e an ngam Tēv ngam Mā Tēv meh nö hakôlò meh i nup la-en meh, i nup töng chūök tī meh inrē ṙātö tīre,

¹¹Pòn öt hētu yāich nö ṙākenre nö i kūö ngam panam: lökten chin ngö ṙô tölṙô meh, Luvënyökūö ellōnre man im mak alahare, ngam töhāṅten, im yāich meh inrē, im panam meh.

¹²Yē ap mak alaha meh, Hīprū nö tarik, hēk Hīprū nö kikānö, nö inyihtu nö in meh, ngaich lök la-en meh nö tafuöl samyeūheu; ngaich im sinātö samyeūheu më-eṅ hökngen ò nö kiröönngöre un ṙāyu nö ṙā-ang in meh.

¹³Yē meh hökngen ò nö kiröönngöre nö öt ṙāyu nö ṙā-ang in meh, uh më-eṅ hökngen ò nö kiröönngöre nö öt kūmuṙen:

¹⁴Meukṙen ò më-eṅ tö nuā ò, ṙā-ang ël öp chūök sanông sāiny meh, ṙā-ang ël öp kinrān vain meh inrē: sā tī ngam Tēv ngam Mā Tēv meh nö hakôlò meh ngatī ap tī meh kē-ĕkūö ò.

¹⁵Köpölōn më-eṅ töre misī töhakövö ip panam Aikup ngaich ngam Tēv ngam Mā Tēv meh nö ṙānyen meh: lökten chin tölṙô meh tö e ing sakāmö.

¹⁶Ngaich mīnö angū-ö yĕn ngö ṙô anga-aṅ tö meh, Hö-ö chin hòṅ ṙāngen meh; kūö ò nö hāngenlōn tö meh, kūö ò nö lēn nö in meh;

¹⁷Ngaich kē lanòknang më-eṅ, tufunngö nang ò i kaha ngam inkūp, ngaich tarik meh min anga-aṅ nö örheūheu. Ngati tī inrē më-eṅ tö ngam töhakövö kikānö.

¹⁸Öt kihngen man min tö e, yē meh hökngen ò nö kiröönngöre nö öt ṙāyu nö ṙā-ang in meh; pò ò nö ngaich nö tafūöl samyeūheu nö lök la-en meh nö nët höl tī tö raneushö ngòh tö haṙāyö kamūönkūö: ngaich hakôlò meh min ngam Tēv ngam Mā Tēv meh i nup la-en meh.

¹⁹Ṙòkhöre nup lanòh kōiny törööchnyu tö nup sīṅp meh nuā meh inrē nö töhòṅ ahetlöng nö im Tēv meh ngam Mā Tēv: un vītu la-en öp lanòh kōiny nuā, un rēhĕn nö kamööpi sanôi ap lanòh sīṅp.

²⁰Kā an më-eṅ i kūö ngam Tēv meh ngam Mā Tēv kaheuk samyeūheu ip chūökö tö-atöllöng min tö ngam Mā Tēv, më-eṅ tö yip aṅ patī meh inrē.

²¹Yē ò nö pitōtuvö, tökaròk, hēk tötmeuk, nup töng höng yanô-òv ò, uh më-eṅ kēten ò im Tēv meh ngam Mā Tēv.

²²Kā an më-eṅ la-ël inkūp ngam kinlōngö meh: töthet töhet inrē hĕngrekūö nö kā an, sā kasēlē, hāt inrē.

²³Höng uh pöri më-eṅ kā mahām ò; ṙöstö e më-eṅ el tumlat nö sā mak.