Read Car_Nicobarese I. CHÖNGÖ 16 Bible Online

I. CHÖNGÖ 16 - Car_Nicobarese bible

I. CHÖNGÖ 16

¹Haköpkö ngam chingëṅt Apip, haköpkö ngam pāsköl im Tēv meh ngam Mā Tēv; tön im chingëṅt Apip ngam Tēv ngam Mā Tēv meh nö kēnyen meh ṙā-ang Aikup tö hatööm.

²Ngaich kētö tökētu më-eṅ ngam pāska im Tēv meh ngam Mā Tēv, tö nuā tö sīṅp inrē, ip chūökö atöllö ngam Mā Tēv min nö vīten ngam minë-enyre nö iyöng u muh.

³Uh më-eṅ nyā tö-aföhlöng rôtī öm kā an; sat sumkam më-eṅ nyā töt aföhlöng rôtī öm kā an, öp rôtī inkihten; pò meh kurāten köpölōn tö ngam sakāmö hē meh kunyī-inyre ṙā-ang ap panam Aikup i rô-òtö sakāmö meh aṅ.

⁴Un meūkö nö in meh tö-aföhlöng rôtī nö sat sumkam i nup tölngökūö panam meh; un rēhĕn nup alaha, tökētu tö meh tö harap im raneh sakāmö, nö hĕng mitööm nö ngöhaka nö söllö peuheū.

⁵Uh më-eṅ kētö tökētu ngam pāska öm lā-ël inkūp kinlōngö meh, ngam kahëtö ngam Tēv meh nö in meh ngam Mā Tēv:

⁶Ip chūökö pöri atöllö ngam Tēv ngam Mā Tēv meh min nö vīten öp minë-enyre nö iyöng in e, in e më-eṅ kētö tökētu ngam pāska tö harap, i maneutti ngam tavūöi, ip hē meh kunyī-inyre ṙā-ang Aikup.

⁷Harāngö ò më-eṅ ngaich kā an ip chūökö atöllö ngam Tēv ngam Mā Tēv meh: ngaich ip peuheū më-eṅ kuhēthötre el nup inrūkui meh.

⁸Tafūöl sumkam kūö më-eṅ nyā töt aföhlöng rôtī: ngaich im sinātö sakāmö öp inmūlö im Tēv ngam Mā Tēv meh; uh më-eṅ la-evṙen hē e.

⁹Sat afta kaheūk me-eṅ: löktökūö im hē meh rultökūö kanötre im tösökhak sāiny: hē e ranulten më-eṅ kaheuk tösat afta.

¹⁰Haköp ngam tökiröng nyinā-aṅ minë afta im Tēv ngam Mā Tēv meh nö holtö nup töha-eh tī meh i kanahanglōn tökētu aṅ eltī meh, öp kahëtö meh, insātī ngam Tēv ngam Mā Tēv meh nö hakôlò meh:

¹¹Ngaich ṙāmölōn më-eṅ i kūö ngam Tēv ngam Mā Tēv meh, më-eṅ töp kikōnyö kūön meh, töp kikānö kūön meh, töp kikōnyö tarik meh, töp kikānö tarik meh, töp Lēvī inrē nö el inkūp kinlōngö meh, töp aṅ tahëng, töp kūön yōich, töp tafīösi kikānö, yip më-el ṙôngö meh, ip chūökö atöllö ngam Tēv meh min ngam Mā Tēv nö vīten ngam minë-enyre nö iyöng in e.

¹²Hòṅ meh köpölōn tö meh misī töhakövö i Aikup: haköpkö e më-eṅ la-evṙen inrē tö në chöngö.

¹³Sat sumkam më-eṅ haköpkö ngam tökiröng nyinā-aṅ inrūkui, unôichrit meh hamūlhanga ṙā-ang el chūök sinôngö sāiny ṙā-ang el chūök kinrān vain inrē:

¹⁴Ngaich ṙāmölōn më-eṅ im tökiröng nyinā-aṅ, më-eṅ töp kikōnyö kūön meh, töp kikānö kūön meh, töp kikōnyö tarik meh, töp kikānö tarik meh, töp Lēvī, töp aṅ tahëng, töp kūön yōich, töp kikānö tafīösi yip la-ël kinlōngö meh.

¹⁵Sat sumkam më-eṅ haköpkö ngam tökiröng nyinā-aṅ im Tēv meh ngam Mā Tēv ip chūökö atöllö ngam Mā Tēv min: pò ngam Tēv meh min ngam Mā Tēv nö hakôlò nup töṙūöhölre min in meh, i nup la-en minë kuntī meh, ngaich më-eṅ mīnö keuheūtlöre ṙāmölōn.

¹⁶Ṙòkhöre yip kikōnyö in meh min nö lūöi heuh i töhĕng, samyeūheu nö hameuktöre nö i kūö ngam Tēv meh ngam Mā Tēv ip chūökö atöllö ò min; ip tökiröng nyinā-aṅ töt aföhlöng rôtī, ip tökiröng nyinā-aṅ afta, ip tökiröng nyinā-aṅ inrūkui inrē: uh cha-a nö hameuktöre nö i kūö ngam Mā Tēv nöng chanlööpṙen:

¹⁷Kö hòṅ kē-ĕti yip sā kanô-òṅre, sā öp inkôlòre tö ngam Tēv meh ngam Mā Tēv öp kahëtö ò nö in meh.

¹⁸Vīlö ma-akah fālen më-eṅ yöngṙen inrē la-ël nup inkūp kinlōngö meh, nup kahëtö ngam Tēv ngam Mā Tēv meh nö in meh, sā tum miyöngö yīö: ngaich cha-a min nö akah fālen yip tarik ip töchip inkaha fālen.

¹⁹Uh më-eṅ löinyngö inkaha fālen: um atöltenvö tö tarik: um rēhĕn kē pinlööṙö raneushö: tön tilupngömat tö-akaha öp pinlööṙö raneushö; ngaich harīkngö kaha ngam ṙô töchip inrē.

²⁰Tömrit nup töchip më-eṅ nö ṙòkhöre, hòṅ meh aṅ, amīnu inrē töm panam ngam kahëtö ngam Tēv meh ngam Mā Tēv nö in meh.

²¹Um teūichtö Asera töng sitih mihëṅṙö ngam chōn nö i taseū tahāklö ngam Tēv ngam Mā Tēv meh, öp vahīlö meh min.

²²Uh më-eṅ rēhĕn asöklö machööḵlö; öp surīkhö ngam Tēv ngam Mā Tēv meh.