Read Car_Nicobarese I. CHÖNGÖ 18 Bible Online

I. CHÖNGÖ 18 - Car_Nicobarese bible

I. CHÖNGÖ 18

¹Öt minchöḵ-övö öt rēhĕn nö amīnu nö in Israĕl min, yip kūönṙô yip Lēvī, ṙòkhöre inrē yip miyöngö Lēvī: nyā-aṅvkūö cha-a min tö nup tökētu nö im Mā Tēv nö lökten i kūö tameūyö nup amin ò inrē.

²Öt amīnu min cha-a nö in yip mak alaha cha: ngam Mā Tēv an amin cha, sā ṙô ò nö ngaich tö cha.

³Angū-ö ön min ngih lumnööṙö yip kūönṙô aṅ in yip tarik, aṅ in cha yip kamëtö tökētu, yē ò nö kōiny nuā hēk sīṅp, kē-ĕkūö ngam kūönṙô cha-a tö ngam kūö kël, nët arëkūö inrē, puhū inrē.

⁴Kē-ĕkūö ò më-eṅ tö nup lanòh ṙòng sāiny meh, vāin meh, tavī-i meh, nup raneh sanôi sīṅp meh inrē.

⁵Tön katöllen ò an ngam Tēv ngam Mā Tēv meh nö ṙā-ang yip miyöngö meh nö ṙòkhöre, nö sökhaka nö meukṙen i mine-eny ngam Mā Tēv katöllen ò tö yip kikōnyö kūön ò inrē nö örheūheu.

⁶Yē öp Lēvī nö yih nö ṙā-ang el nup töng inkūp kinlōngö meh i Israĕl nö ṙòkhöre, i chūök ò nö rahëichtaṙen nö iyöng, yih inrē anga-aṅ nö holtölōnre nö im chūökö atöllö ngam Mā Tēv;

⁷Ngaich anga-aṅ min nö meukṙen nö i minë-eny ngam Tēv ò ngam Mā Tēv, nö sā yip holre Lēvī nö la-evṙen, yip tösökhaka nö i kūö ngam Mā Tēv.

⁸Ngaich a-cha-a min nö ngatī minchöḵ-ö tö nyā-aṅkūö, nö holre tö nup yamih i innyihngö nup ṙamā-angrit yöng ò inlānen.

⁹Yē meh min yih ip panam kahëtö ngam Tēv meh nö in meh ngam Mā Tēv, uh më-eṅ haköptöre la-evṙen tö nup sinòkkūö aṅ in yip pumnāmö tarik.

¹⁰Un hĕng tak nö kôti in meh öp vamīten kikōnyö kūönre hēk kikānö kūönre nö tūönkūöm tameūyö, un hĕng tak kamëken chinòng alaha un hĕng tak maharūnöre nö vë-eny yanīhi mu-unôich hēk un hĕng tak tumkökṙôre tö tinkökö milūönö, (mahachū), hēk tömilūönö,

¹¹Hēk vamīngen, hēk mahatöntöre nö i ma-alaha, hēk tö taṙông, hēk lamökten i ma-alaha nö ve-eny mu-unôich.

¹²Pò öp töngatī la-en tö në nö sinòkkūö ngam Mā Tēv: pòn kūö në töngatī sinòkkūö ngam Tēv meh ngam Mā Tēv nö ahōngen cha nö ṙā-ang i kūö meh.

¹³Hateūngöre më-eṅ im Tēv meh ngam Mā Tēv.

¹⁴Pò vē pumnāmö tarik vē amin meh min, nö hamang ṙô cha yip maharūnöre nö vë-eny yanihih mu-unôich chamòng alaha inrē: hö-ö pöri ngam Tēv meh ngam Mā Tēv nö halöngten meh, më-eṅ ngatī vahīṙen.

¹⁵Hĕng taka ap min pròfĕt hachohlö ngam Tēv ngam Mā Tēv meh nö in meh, nö ṙā-ang elṙôngö meh, aṅ in yip mak alaha meh, tö sā chu; hang ṙô ò min yī-ö;

¹⁶Sā nup lōn meh i Hōrep im Tēv meh ngam Mā Tēv hē sakāmö ök inmūlö, öi ngö ṙô, Uh chin hēk hangṙô ngam Tēv ngam Mā Tēv, chu uh öich rēhĕn hēk meuk ngih tökiröng tameūyö, hòṅ chu öt kapah.

¹⁷Ngaich ngam Mā Tēv nö ngö ṙô tö chu, Huveū-euṙô yip tö ap ṙô cha nö ngaich

¹⁸Hachohlö pròfĕt chin min in cha aṅ i yip mak alaha cha, tösā meh; ngaich elvāng ò, ngaich anga-aṅ min nö keuheūtnyöre ṙô nö in cha tö nup tinöölô ò tö chu.

¹⁹Ngaich min angū-ö, tö öp töthamang në ṙô chu në ṙô ò min nö i minë-eny chu, havëkö e chū-ö min in ò.

²⁰Öp pròfĕt pöri, öp töṙô-òv min tö töhĕng ṙô i mine-eny chu nöng kanahngenre, nup töt tinöölô ò tö chu nö ṙô-òv, hēk öp töṙô-òv i minë-eny nup tahëng tēv, kapah min anga-aṅ pròfĕt.

²¹Ngaich yē meh ngö ṙô ellōn re, Sitih mikahlōn öi min tö öp ṙô öp töt ṙahônyö ngam Mā Tēv?

²²Yē öp pròfĕt nö ṙô-òv nö i minë-eny ngam Mā Tēv, yē nup ṙô ò nö öt tömrit nup ṙô ò, öt rēhĕn nö taichtökūö, ngaich anū-ö nö öt ṙô ngam Tēv, höng kamahngôre ngaich ngam pròfĕt: uh më-eṅ pa-ekūö tö ò.