Read Car_Nicobarese I. CHÖNGÖ 2 Bible Online

I. CHÖNGÖ 2 - Car_Nicobarese bible

I. CHÖNGÖ 2

¹Havöökūöre īhö ngaich, ngaich kiröönngöre el ngam tönyaṅlnyi lök ip talöökö ngam Töngāṅv Mai, sā ṙô ngam Mā Tēv tö chu: ngaich ṙōl sumkam īhö havī ngam rung Sēir.

²Ngaich ngö ṙô ngam Mā Tēv nö vë-ekūö chu,

³Ngaich yin marô-òtö röön havī ngam rôngö: havöökūöre yin kū-ötö lā kapā.

⁴Töl ṙô më tarik më-eṅ ngö ṙô, Hòṅ lök kūöngö panam yip hanöng kisānöre yin yip kūön Isô, yip mi-iyöng Sēir; ngaich min cha-a nö pa-ekūö tö yīö; lökten yin haṙēmngenre:

⁵Ui lā-alkūö cha; tön rö-ö chin kē-ĕkūö yīö töp panam cha, hö-ö, öt rēhĕn nö sā rôta röön rinöönkö kui e: pò chu ngaich kētö öp rung Sēir nö amin Isô.

⁶Havah nyā-aṅkūöre yin min in cha ṙāi tī tö rupīö, hòṅ yīö nyā-aṅvkūö; havah makre yī-ö min inrē in cha ṙāi tī tö rupīö, hòṅ yīö òk.

⁷Pò ngam Mā Tēv ngam Tēv yīö nö hakôlò nup vahīṙen yīö nö ṙòkhöre: akahalōn an tö yīö lök el ngih tökiröng tönyaṅlnyi: in yīö an ngam Mā Tēv ngam Tēv yīö i në tö fën anāi samyeūheu; hö-ö yin hanātuṙen.

⁸Ngaich chö-ö kūöre īhö ṙā-ang yip hanöng kisānöre yip kūön Isô yip mi-iyöng Sēir ṙā-ang ap talöökö Arāpa, ṙā-ang Ēlat ṙā-ang Ēsī-ònkīpör inrē. Havöökūöre īhö ngaich lök im talöökö ngam tö nyaṅlnyi i Mô-āp.

⁹Ngaich ngö ṙô ngam Mā Tēv tö chu, Un hakihtuṙen Mô-āp, ui rēhĕn lā-al cha i kinyūngö: tön rö-ö chin kē-ĕkūö meh tö ngam panam ò nö amin meh; pòch ngaich tī kēten Ār nö amin yip kūön Lòt.

¹⁰(Iyöng umuh yik Ēmim misī, tökiröng tarik, maṙôngö inrē, tömarôlòng, sā yip Anakim:

¹¹Sā Anakim; Ēmin pöri cha-a tö ṙô aṅ Mô-āp.

¹²Iyöng Sēir yip inrē misī Hōr, ngaich pöri yik kūön Isô nö i chūök cha; ngaich keuheūtngöre vah tī tö cha nö i kūö cha, iyöng in e cha-a ngaich nö ṙënngen cha; sā tī Israĕl tö ngam panam amin ò, ngam kahëtö ngam Mā Tēv nö in cha.)

¹³Chōholre yin, havāngngö kui ngam töhëm mak Sērĕt. Ngaich havāngngöre īhö tö ngam töhëmmak Sērĕt.

¹⁴Ngaich nuk sakāmö rô-òtö röön ih ṙā-ang Katēs Pörnia, hanöng saha ih vāngngöre ip töhëm mak Sērĕt nö lūöi anāi hevhöre samyeūheu; hanöng saha yip tumköl chap yik kumyung tarik, nö keuheūtngöre vah nö el ngam elyöngö, sā ṙô ngam Mā Tēv nö in cha nö chūöku ṙô.

¹⁵Lā-al cha inrē ngam kël ngam Mā Tēv, nö halëlngen cha nö ṙā-ang i kūö ngam elyöngö, hanöng saha cha nö keuheūtngöre vah.

¹⁶Ngaich, yē yip kumyung tarik nö ṙòkngöre vah nö kapah in yik tarik,

¹⁷Ngaich vë-ekūö chu ngam Mā Tēv, nö ngö ṙô,

¹⁸Havāngngöre man töngamuh, lā muh tö Aī, ngam kūöngö panam Mô-āp:

¹⁹Yē meh ngaich röhta lāmuh in yip kūön Amön, un hakihtuṙen cha-a, unrēhĕn nö lālöng kūö: tön rö-ö chin kē-ĕkūö meh tö ngam panam yip kūön Amön nö amin meh: pò chu ngaich kētö e nö amin yip kūön Lòt.

²⁰(Angū-ö an inrē tö-eūka nö panam Refēm iyöng in e yik misī Refēm; Samsumim pöri cha-a tö ṙô yip aṅ Amön;

²¹Tarik tökiröng, tömaṙôngö, tömarôlö inrē, tö sā Anakim; ngaich pöri cha-a nö ötkô tö tī ngam Mā Tēv nö i kūö cha; ngaich cha-a nö i chūök cha, ngaich iyöng in e nö ṙënngen cha:

²²Sā tī ò nö chö-öinyten yik kūön Isô, yik mi-iyöng Sēir, hē ò nö öt kô-ò tī tö yik Hōr nö i kūö cha; ngaich i chūök cha acha-a, ngaich iyöng in e nö ṙënngen cha söl ing töngamuh:

²³Ngaich yik Avim yik mi-iyöng el tuhēt, nö töl ngö i Kāsa nö öt kô tö yik Keftòrim, yik ṙamā-ang Keftòr, nö mihôiṅ tö cha, ngaich iyöng in e nö ṙënngen cha.)

²⁴Chōholre yin, kiröönngö röönre ngaich, havāngngöre inrē tö ngam achāṙö Arnòn; yĕh meuk, kētö eltī meh chin ngaich, tö Sīhòn öp aṅ Amör, rācha aṅ Hespòn, töp panam ò inrē: rultöre man ngaich kē-ĕ e, lā-alkūö ò i kinyūngö.

²⁵I ngih chin sakāmö kētö kui vē tarik tö ngam vanööṙö tö meh ngam pinhë-eṅkūö inrē tö meh, vē taṙòkhöre elkatòh ngam halīöngö, yip tönghamang ineūkö meh min, ngaich kichëyöre min, halöinyöre ellōn nö chök inrē tö pòkūö meh.

²⁶Ngaich tīnngö ma-aṅhānga chū-ö ṙeū-eung el tö nyaṅlnyi i Kētēmōt nö löö in Sihòn ök rācha Hespòn, nö kumtö ṙô lanāmö, nö ngö ṙô,

²⁷Hökngen chu man lök el ngam panam meh: höng lök el ngam tökiröng chin min talöökö, öt hōḵ chin rēhĕn kānköre lā hāmö, öt rēhĕn lā tavē.

²⁸Inyīhikūö chu më-eṅ tö nyā-aṅkūö ṙāi tö rupīö, hòṅ chu nyā-aṅvkūö; kē-ĕkūö chu tö mak ṙāi rupīö, hòṅ chu òk; höng halöngten chu lök muh höng kiröön,

²⁹Sā tī yip kūön Isô tö chu yip mī-iyöng Sēir, yip aṅ Mô-āp inrē yip mī-iyöng Ār; hanöng saha chu vāngngö tö Yôtön ip panam kahëtö ngam Mā Tēv nö in ih, ngam Tēv ih.

³⁰Ngaich pöri Sīhòn ök rācha Hespòn nö öt halöngten ih lök in ò: pò ngam Mā Tēv ngam Tēv yīö nö hangë-eng ellōn ò, vīhöt ellōn ò inrē nö ahôngen, pò ò nö hòṅ kēten ò nö el tī yīö, sā e ing töngamuh.

³¹Ngaich ngö ṙô ngam Mā Tēv tö chu, Yĕh meuk, rĕhtenre chin ngaich kēten Sīhòn tö ngam panam ò inrē i kūö yīö: rultöre ngaich kē-ĕ e, hòṅ yīö amin tö ngam panam.

³²Kunyī-inyre ngaich Sīhòn nö lā-al ih, ṙòkhöre yik tarik ò inrē, nö kiyung nö i Yahas.

³³Ngaich ngam Mā Tēv nö kēten ò nö i kūö īh; ngam Tēv ih, ngaich ī-hö mihôiṅ tö ò, tö yip kikōnyö kūön ò, yik tarik ò inrē nö ṙòkhöre.

³⁴Kē nup el panam ò inrē ī-hö nö ṙòkhöre hē e, ngaich keuheūtngöre vah tī piyāingö tö-aṅhaṅv el panam, tö yik kikānö nyīö inrē tökūönö; öt hĕng tit tak tö-ōtre tö tī īh;

³⁵Höng nuk nuā pôḵ hī tökē-ĕ tö hī, holre tö nup chehen aṅ nup el panam tö kē-ĕ tö hī.

³⁶Löktökūö Arō-er, öp i taseū öp achāṙö Arnòn, löktökūö öp elpanam inrē öp el achāṙö, söl Kilīöt, öt hĕng tit elpanam tö yahlö rô-òl chūök tö hī: ṙòkhöre anū-ö nö kētu nö i kūö hī tö ngam Mā Tēv, ngam Tēv hī:

³⁷Höng im panam yip kūön Amön yī-ö öt haröhtöre; i kui öp tahël Yapök inrē nö ṙòkhöre, nup el panam nup rung panam inrē, ip töng chūök ngam Mā Tēv nö sōten hī, ngam Tēv hī.