Read Car_Nicobarese I. CHÖNGÖ 20 Bible Online

I. CHÖNGÖ 20 - Car_Nicobarese bible

I. CHÖNGÖ 20

¹Yē meh kiröönngöre im kinyūngö öm lā-al yip tökunyāhaṅ elmat tö meh, ngaich meuk nup kōra, inröl inrē, yip tarik inrē nö maṙôngö tö meh, uh më-eṅ pa-ekūö tö cha: tön in meh an ngam Tēv meh ngam Mā Tēv, ngam kamënyen meh ṙā-ang ngam panam Aikup.

²Ngaich min angū-ö yē yīö ṙūöhtöre im kinyūngö, tö yip kūönṙô min nö yihtöre nö vë-ekūö yip tarik,

³Nö ngö ṙô tö cha, Hangihtöre, Ō Israĕl, ṙūötöre yin i ngih sakāmö öi haröhtöre im kinyūngö lā-al yip tökunyāhaṅ elmat tö yīö: uh yin öt kalē-ĕ ellōn; ui pa-ekūö, ui rēhĕn kichëyöre, ui rēhĕn pa-ekūö tö cha;

⁴Pò ngam Tēv ngam Mā Tēv nö anga-aṅ kumröönngöre nö hol meh, nö kiyunglen meh lā-al yip tö kunyāhaṅ elmat tö meh, nö hayööken meh.

⁵Ve-ekūö yip tarik ngaich yip yöngṙen kumyung, nö ngö ṙô, Chiāp tarik mamānlö tufömngöre patī, ngaich öi nö ahetlö e? Hökngen ò kuṙòh nö havan patīre, tön kapah min anga-aṅ nö im kinyūngö, ngaich ahetlöng min angū-ö tö tahëng tarik.

⁶Chiāp tarik inrē umuh öp tameūich nö el panô-òṅ vāin, ngaich öl nö nyā ṙòng u? Hökngen ò kuṙòh nö havan patīre, tön kapah öp min nö i kinyūngö ngaich nyā-aṅ ṙòng anū-ö tö tahëng tarik.

⁷Chiāp tarik inrē umuh öp mumkahngö pīhöre, ngaich öl nö kē an? Hökngen ò kuṙòh nö havan patīre, tön kapah ap min nö i kinyūngö, ngaich kē-ĕ anga-aṅ tö tahëng tarik.

⁸Vë-ekūö yip tarik yip yöngṙen kumyung nö ṙūönyôre, ngö ṙô cha-a min, Chiāp tarik umuh öp tö pa-ekūö töt kalē-ĕ ellōn inrē? hökngen ò kuṙòh nö havan patīre, hòṅ ap mak alaha ò nö öt paṙööyi ellōn.

⁹Ngaich min angū-ö, yĕn ngaich nö keuheūtöṙô yip yöngṙen kumyung nö in yip tarik ngaich cha-a min nö vīlö yöngkūö yip tömaṙôngö nö i kui yip tarik.

¹⁰Yē meh haröhtöre ip elpanam öm kiyūngö e, ngaich ahangkö lanāmö in e.

¹¹Ngaich min angū-ö, yē e nö sapṙô meh tö lanāmö ngaich löpnyökūö meh, ngaich min angū-ö, tö yip tarik yip tökôti min nö ël e nö kamëtö masūl nö in meh, lök la-en meh inrē.

¹²Ngaich yē e nö öt vī lanāmö nö in meh, hòṅ kiyung pöri nö lā-al meh, ngaich më-eṅ havīlen e:

¹³Yē ngam Tēv meh ngam Mā Tēv nö kēten e nö eltī meh, ngaich më-eṅ keuheūtngövah kikōnyö fëlngen cha aṅtī tö sanët:

¹⁴Yip kikānö pöri, tö yip tö kun kūöṅnö, tö nup nuā, ṙòkhöre inrē nup el ngam elpanam, ṙòkhöre nup chehen ël e, kē-ĕ u më-eṅ nö pôḵ meh nö chehen meh: nyā-aṅvkūö më-eṅ inrē tö nup aṅ i yip tö kunyāhaṅ elmat tö meh pôḵ meh, nup kahëtö ngam Tēv ngam Mā Tēv nö in meh.

¹⁵Ngati tī më-eṅ min tö nup el panam nup tömaṙôvat tö meh, nup töt aṅ el panam vē pumnāmö tarik.

¹⁶Yip aṅ el nup panam vē tarik pöri, yip kahëtö ngam Tēv ngam Mā Tēv meh nö in meh nö amin meh, uh më-eṅ hēngö ṙahālö tö nup mu-uhôm;

¹⁷Keuheūngöre vah tī pöri fëlngen cha, yip Hitait Amôrait, Kanā-an, Përisait, Hīviat, tö yip Yēpus; sā tinöölô meh tö ngam Tēv ngam Mā Tēv meh:

¹⁸Hòṅ cha nö öt haköpten meh öm la-evṙen tö nup sinòkkūö vahīken cha, nup tī cha nö i nup tēv cha; ngaich yī-ö min köölö fālen im Tēv yīö ngam Mā Tēv.

¹⁹Yē meh marô-òten havīlö öp elpanam öm kiyūngö e öm hòṅ kē-ĕ e, uh më-eṅ halëlngö nup chōn öm kētö kūö hanīöng in u; tön nyā-aṅkūö meh nup nö kô-òren, uh më-eṅ kūöltö rööntö u; tarik ṙöng ang ngam chōn el kahôyö töp lökten e nö hòṅ havīlöng tö meh?

²⁰Höng nup chōn mikahkūö meh tötnyā-aṅkūö, anū-ö töhalëli kūöltu inrē tö meh; ngaich vītö rananglöre më-eṅ lā-al ngam el panam ngam kumyūngö meh, hanöng saha fanukngö e.