Read Car_Nicobarese I. CHÖNGÖ 21 Bible Online

I. CHÖNGÖ 21 - Car_Nicobarese bible

I. CHÖNGÖ 21

¹Yĕn hĕng tak öp tökôti nö fëli kinpaha nö hulalhaka nö el kahôyö nö im panam ngam kahë tö ngam Tēv meh, nö in meh ngam Mā Tēv nö amin meh öi öt akahakūö töp famëlngen ò:

²Ngaich yip mā meh tö yip ma-akaha fālen inrē, ngaich cha-a min nö kalah rôvat nup elpanam nup mahavīlö ngam töfëli:

³Ngaich angū-ö min, ngam elpanam ngam töröhta nö im töfëli tarik, ngaich yip mā aṅ ngam elpanam nö kē kōiny kun nuā, aṅ i nup nuā, öp tö öl nö lā-evṙen öp tö öl inrē nö tūök nö i kaneun inröl;

⁴Ngaich yip mā ngam elpanam min nö kētö öp kōiny kun nuā nö el achāṙö töhëm mak öp tötrēhĕn nö teūichtu aṅ, ngaich likölngö likeun ngam kun kōiny nuā nö umuh el achāṙô

⁵Ngaich yip kūönṙô yip kikōnyö kūön Lēvī nö yihtöre min; pòn acha-a atöllö ngam Tēv meh ngam Mā Tēv nö meukṙen ò, hakôlò inrē nö i minë-eny ngam Mā Tēv; ngaich sā ṙô cha min öp kinīlö ṙô tumhöt inrē, ngaich ngatī:

⁶Ngaich ṙòkhöre yip mā ngam elpanam angū-ö, yip töröhta nö im töfëli tarik, nö söichngö tīre min nö lātulöng tī tö ngam tö lireūki likeun kun kōiny nuā nö el achāṙö:

⁷Ngaich cha-a min nö ngö ṙô, Hö-ö nun në eltī ih nö kitaknyö ngih mahām, ötrēhĕn në mat ih nö meūkö e.

⁸Ō Mā Tēv, aṙēlö vē tarikre man Israĕl, vē töṙānyu tö meh, un hökiṙen inrē mahām töt akahaṙa nö ngöh nö el ṙôngö vē tarik meh Israĕl. Ngaich aṙēlöng cha-a min tö ngam mahām.

⁹Ngati tī më-eṅ min kavalngö mahām töt akaha nö ṙā-ang elṙôngö meh, yē meh la-evṙen min tö ngam tölöök i kūö ngam Mā Tēv.

¹⁰Yē meh kiröönngöre im kinyūngö lā-al yip tökunyāhaṅelmat tö meh, ngaich ngam Tēv ngam Mā Tēv meh nö kēten cha nö eltī meh, ngaich më-eṅ kēngen cha nö töhakövö,

¹¹Ngaich meuk öp tövai kikānö aṅ i yip töhakövö ngaich më-eṅ lōṅu tö ò, öm hòṅ kē an nö pīhö meh;

¹²Ngaich më-eṅ kēten ò i patīre: kuhākngö keūiyöre min anga-aṅ, ṙatngökūö kinsòhre inrē;

¹³Ngaich anga-aṅ min nö luhngö ök hilāre hē ò nö kē-ĕ nö ṙā-ang in ò, ngaich hĕng chumngëṅtö nö sanòkngö öp yöng ò kikōnyö töp yöng kikānö: unôichrit e më-eṅ kuhēthötre in ò ngaich öm pīhö ò, pīhö meh inrē min anga-aṅ

¹⁴Ngaich angū-ö min, yē meh öt hāngenlōn tö ò, ngaich më-eṅ hökngen ò nö kiröönngöre ip kū-ölōn ò; uh pöri inyihngen ò nö rāi tö rupīö, uh më-eṅ sā tīre tö töhakövö tö ò, sā meh ngaich miṙēngen ò.

¹⁵Yē öp tarik nö nët tak pīhö, hĕng tak öp lālö, ngaich töt lālö öp tahëng, ngaich nëtre taka cha-a nö kūönu tö tī ò, tö ngam lālö tö ngam tötlālö inrē ngaich yē öp kikōnyö nyīö lanòh nö kūön öp tötlālö:

¹⁶Ngaich angū-ö min, ip sakāmö hē ò nö vīten yip kikōnyö kūönre nö amīnu tö nup tö ōt in ò, uh anga-aṅ nö vīten öp kikōnyö lanòh kūön ngam lālö nö mu-urĕhlöng tö ngam lanòh kikōnyö kūön ngam tötlālö:

¹⁷Akah ngam lanòh pöri min anga-aṅ, ngam kikōnyö kūön ngam tötlālö, nö tumôl tīre nö kē-ĕkūö ò i nup töt aṅ in ò: tön ranehlö kumkēḵ ò an anga-aṅ; ngaich lumnööṙö ò, anga-aṅ an tö lumnööṙu tö minā-aṅ ngam lanòh.

¹⁸Yē öp tarik nö kūönu tökikōnyö töp töt hanlēnen ma-ahôngen inrē, öp töt hamang ṙô yöngre tö kikōnyö, hēk hangṙô öp yöngre kikānö, pòrô cha-a nö chökṙen ò öthō anga-aṅ nö hang ṙô cha:

¹⁹Ngaich ngam yöng ò min kikōnyö töm yöng ò kikānö inrē nö kētö tīre nö in ò, ngaich kēten ò nö in yip mā elpanam ò, ip inkūp öp chūök ò;

²⁰Ngaich ngö ṙô min cha-a, töthanlēnen ön ngòh kūön ai kikōnyö; ma-ahôngen inrē, öt hòṅ hangṙô ai an; tumṙōllen an, mihīyōi-aṅ inrē.

²¹Ngaich ṙòkhöre tī min yip tarik aṅ elpanam ò nö kulehan tö ihong hòṅ ò nö kapah; ngati tī min më-eṅ kavalngö tötlöök ṙā-ang el ṙôngö meh; ngaich ṙòkhöre min yip aṅ Israĕl nö hang; ngaich pa-ekūö.

²²Yĕn hĕng tak öp tarik tököölö fālen öp mi-im kinpaha, ngaich kumpahaivah anga-aṅ, ngaich seūlen ò më-eṅ i rōi chōn:

²³Öt ngöh min öp alaha ò nö i rōi chōn nö hĕng mitööm, lāpngen ò pöri më-eṅ im sakāmö angū-ö; (Pòn töt kôlò anga-aṅ nö im Tēv ngam tökiseūti;) hòṅ meh öt hachōichngö ngam panamre ngam kahëtö ngam Tēv meh ngam Mā Tēv nö in meh nö amin meh,