Read Car_Nicobarese I. CHÖNGÖ 22 Bible Online

I. CHÖNGÖ 22 - Car_Nicobarese bible

I. CHÖNGÖ 22

¹Umhöng meuk öp kōiny nuā öp mak alaha meh hēk öp sīṅp ò nö lō-ongkūö, ngaich hayunngöre më-eṅ tö u: kēten u më-eṅ hēk ip mak alaha meh.

²Yē öp mak alaha meh nö öt röhta nö in meh, hēk yē meh öt akahakūö tö ò, ngaich kēten ò më-eṅ nö i patī meh, ngaich in meh anga-aṅ min hanöng saha öp mak alaha meh nö chöhan, ngaich havanten ò më-eṅ in ò hēk.

³Ngati tī inrē më-eṅ töp köttö ò; ngatī tī më-eṅ inrē töp hilā ò; ngati tī më-eṅ inrē tö töng chatngen chehen öp mak alaha meh, nup töchatngen tö tī ò, ngaich kôtī tö tī meh: uh më-eṅ hayunngen u.

⁴Uh më-eṅ höng meuk öp köttö hēk öp kōiny nuā öp mak alaha meh inrē nö fukngö nö i taseū talöökö, ngaich hayunngöre më-eṅ tö u: haṙūötken ò më-eṅ hachohlen u hēk.

⁵Öp kikānö min öt chehen tö chehen kikōnyö, öt rēhĕn öp kikōnyö min nö chehen tö hilā kikānö: pò öp töngatī nö sinòkkūö ngam Tēv meh ngam Mā Tēv.

⁶Yē öp fôngö chehechōn nö amahtuṙen nö i kūö meh el talöökö, i ṙōi töng chōn hēk el tumlat, nö aṅtö kūön hēk uhöö, ngaich öp yöng nö tiṙul haka nö i kui nup kūöṅnö, hēk i kui nup uhöö, uh më-eṅ kē ngam yöng nö holtö kūön:

⁷Hökngen ngam yöng man nö kiröönngöre, lahë pöri më-eṅ kē ngam kūön nö in meh; hòṅ e nö lööken nö in meh, hòṅ meh inrē ṙūötuṙen sakāmö.

⁸Yē meh mānlö tufömngöre patī, ngaich vīlö rananglö kui e më-eṅ, hòṅ meh ötkētö mahām i kui ngam patī meh, yĕn hĕng tak öp tö suktöre tarik nö löktö in e.

⁹Um teūich tö nët kangen kulöl el panô-òṅ vāinre: hòṅ nup ṙòng min nö töhet öp kulöl taheūich tö meh, nup ṙanūölö ròng aṅ ngam panô-òṅ vāin.

¹⁰Uh mah kirus öm lā-alre tī tö tö köiny nuā tö köttö inrē.

¹¹Uh man hayūtöre tö tökatēhĕ alaha tö sanôi sīṅp linen inrē.

¹²Yē meh vītö tökupātö ta-īö tanā nö i minë töfën lā taseū hilā meh öp kinṙum meh.

¹³Yĕn kē pīhöre öp tarik töhĕng tak, ngaich kuhēthötre nö in ò, surīkhen ò inrē,

¹⁴Ngaich hakeunlen ò tö nup sumrōngkūö falngen ò, ngaich kētö töt löök minë-eny in ò, nö ngö ṙô, Kē ngòh chin kikānö, ngaich hē chu haröhtöre in ò, ngaich ötkôtökūö chū-ö in ò tö minkahngö rinëlö ò:

¹⁵Ngaich ngam kikōnyö yöng ngam kikānö, tö ngam kikānö yöng ò, nö kēnyö nup minkahngö rinëlö ngam kikānö nö in yip mā ngam elpanam nö i kūö inkūp:

¹⁶Ngaich öp kikōnyö yöng ngam kikānö nö ngö ṙô tö yip mā, Kētö ngòh kūönre chin kikānö nö pīhö ngòh tarik, ngaich anga-aṅ nö kunyahāṅ elmat tö ò;

¹⁷Yĕh meuk inrē, hakeunlen ò an tö sumrōngkūö fālen, nö ngö ṙô, Ötkôtökūö chin ing kūön meh kikānö tö minkahngö rinëlö, ngaich në yih minkahngö rinëlö ngam kūön chu kikānö. Ngaich cha-a nö hanyāknyö ap hilā nö i kūö yip mā ngam elpanam.

¹⁸Ngaich yip mā ngam elpanam nö kē ngam tarik ngaich chökṙen ò;

¹⁹Ngaich acha-a min nö kē ṙënngen fālen ò hēngòng siköl rupīö, ngaich kētö u nö ip kikōnyö yöng ngam kikānö, pòn kētö tötlöök anga-aṅ minë-eny nö i kui rēlö aṅ Israĕl: ngaich anga-aṅ min nö pīhö ò; öt ṙāngen ò anga-aṅ i rô-òtö sakāmöre.

²⁰Yē ngih pöri nö tökô-en, nö ötkôti nup minkahngö rinëlö nö im kikānö:

²¹Ngaich cha-a min nö kēnyem ngam kikānö nö ip inkūp patī öp yöng ò kikōnyö, ngaich yip tarik aṅ ngam elpanam nö kulehan tö ihong, hòṅ ò nö kapah pò-ò nö kulō-ov inlahen nö in Israĕl, nö asāken mi-iyihköre, kikānö nö i patī öp yöngre kikōnyö: ngatī më-eṅ kavalngö tötlöök ṙā-ang el ṙôngö meh.

²²Yĕn hĕng tak öp tarik tökôtī nö ṙōlhaka nö ip kikānö töpīhövö, ngaich nëtre taka cha-a nö kumpaha töm kikōnyö muhulalhaka nö im kikānö, ngam kikānö inrē: ngatī më-eṅ kavalngö tötlöök ṙā-ang in Israĕl.

²³Yĕn hĕng tak öp kikānö öp rēlö tö mikahayö tö pīhöre ngaich hĕng tak öp tarik tökôtökūö tö ò nö elpanam, ngaich ṙōlngöre nö in ò;

²⁴Ngaich yī-ö kēten cha nyöre im inkūp kinlōngö ngam elpanam, ngaich kulehe cha min yī-ö tö ihong hòṅ cha nö kapah: ngam kikānö, pò ò nö öt ayôṙa, nöng lā-el ngam elpanam ngam kikōnyö inrē, pò ò nö miṙēngö ngam pīhö ngam holre: ngatī më-eṅ kavalngö töt löök ṙā-ang el ṙôngö meh.

²⁵Yē ngam kikōnyö pöri nö kôtökūö tö ngam tömikahāyö, ngam kikōnyö nö kilöönan, ngaich ṙōlngöre nö in ò: ngaich höng ngam kikōnyö min tökapah ngam ṙamôlngöre nö in ò:

²⁶Uh pöri më-eṅ tī-iv im kikānö; öt tö köölu umuh im kikānö mi-im kinpaha: pòn sā öp tarik chamôhòlre nö lā-al ap holre, ngaich kapaha tī tö ò, ngatī ön ngih fālen;

²⁷Pòn kôtökūö anga-aṅ töm kikānö nö el kahôiṙen, ngaich ayôra ngam kikānö ngam tömikahayö, ngaich öt hĕng tak mahayööken ò.

²⁸Yĕn hĕng tak öp tarik tö kôtökūö töp rēlö kikānö, öp tötmikahāyö, ngaich kētö tīre nö in ò, ngaich ṙōlngöre nö in ò, ngaich kôtī cha-a;

²⁹Ngaich ngam kikōnyö ngam muhulalngöre nö in ò min nö kē-ĕkūö ap yöng ngam kikānö kikōnyö tö tötaneui siköl rupīö, ngaich pīhö ò min anga-aṅ, pòn ngaich anga-aṅ nö miṙēngen ò; Öt ṙā-ayö anga-aṅ tö ò i rô-òtö sakāmö ò.

³⁰Ngòh tarik ötkô nö kē pīhö yöngre kikōnyö, ötkô inrē nö fehlö kinfan ap yöngre kikōnyö.