Read Car_Nicobarese I. CHÖNGÖ 23 Bible Online

I. CHÖNGÖ 23 - Car_Nicobarese bible

I. CHÖNGÖ 23

¹Ngòh tö hanyahka tökūö ihong, hēk tökngö öp kinkōnyö ò, öt kuhēthötre min nö im inmūlö im Mā Tēv.

²Öt kuhēthötre min nö im inmūlö im Mā Tēv ngòh kūön tötpinīhö; söl im sinömköl chap min nö öt hĕng tak yip aṅ in ò nö kuhēthötre im manūlö im Mā Tēv.

³Aṅ amön, hēk aṅ Mô-āp im Mā Tēv; söl i sinömköl chap nö öt hĕng tak aṅ in cha kumhēt hötre im manūlö ngam Mā Tēv nöng örheūheu:

⁴Pò cha nö öt höngkūö yīö nö el talöökö nö kumtö nyā-aṅkūö mak inrē, hē yīö yih ṙā-ang Aikup; kūö cha inrē nö haṙāyö Pēlam nö lā-al yīö ök kikōnyö kūön Piōr aṅ Pitōr i Mesepōtamia, nö rūtngen yīö.

⁵Ngaich pöri ngam Tēv ngam Mā Tēv meh nö öt hang ṙô Pēlam; havāngtö ngam rinūtngen pöri ngam Tēv meh ngam Mā Tēv nö inkôlò meh, pòn hāngenlōn ngam Tēv ngam Mā Tēv meh tö meh.

⁶Uh man chöh lanāmö in cha un rēhĕn öp kanôlò cha i ṙô-òtö sakāmö meh örheūheu.

⁷Uh man sa-òkhö aṅ Ītöm, tön mak alaha meh an: um saòkhö aṅ Aikup; pò meh misī öt aṅ ngam panam ò.

⁸Yip kūön linūöichap töfötnyu nö in cha kô-òren nö kuhēthötre nö i manūlö im Mā Tēv.

⁹Yē meh kiröönngöre öm chuh elyöngö kumyung lā-al yip tökunyahāṅ elmat tö meh, ṙūöhöngre më-eṅ tö nup tötlöök.

¹⁰Yĕn hĕng tak öp in yīö tarik, öp töt het tökūö inlahenre im hatööm, kunyī-inyre anga-aṅ ngaich nö ṙā-ang el öp elyöngö kumyung, öt yih anga-aṅ nö el ngam chūök kumyung:

¹¹Ane pöri, yĕn ngaich nö harap, vōköre ngaich anga-aṅ tö mak: ngaich sipti ngam tavūöi, yih ngaich anga-aṅ nö el ngam chūök kumyung.

¹²Chūöku më-eṅ inrē lā-uk ngam elyöngö kumyung, öp löknyö meh chuh elkahôyö:

¹³Sanël tumlat inrē in meh hol nup aṅtī meh; ngaich yē meh röichngöre elkahôyö, ngaich ul më-eṅ aṅtīten tö ò ip invantöre ngaich hölngö kui ngam ikūöchōn meh:

¹⁴Pò ngam Tēv meh ngam Mā Tēv nö kiröön nö ellōn ngam elyöngö kumyung nö ṙā-nyen meh, nö kētö yip lā-al meh inrē nö in meh; lökten ngam elyöngö meh nö töhet: hòṅ ò nö öt meuk töthet nö in meh, ngaich havööngörekūöre tö meh.

¹⁵Un kētu tö meh nö ip mā ò öp mameutngö tarik ò nö chuh in meh:

¹⁶Iyöng in meh anga-aṅ, elṙôngö meh ip chūökö atöllö ò min el kinlōngö ngam inkūp meh, ip chūök lōn ò tölöök: un hakihtuṙen tö meh.

¹⁷Öt kikānuvö min mi-inyihköre aṅ i yip kikānö kūön Israĕl, öt rēhĕn min nö hĕng tak chamô-òṅ kikōnyö in yip kikōnyö kūön Israĕl.

¹⁸Un kētu nup ṙāi innyihkö kikānö, hēk raneushö am, nö el patī ngam Tēv meh ngam Mā Tēv nö i kinlēḵngô töchūöku: tön nëtre nun anū-ö nö sinòkkūö ngam Tēv ngam Mā Tēv meh.

¹⁹Uh man kētö töhaṙūöngö rupīö ip mak alaha meh nö ṙāyu inṙūöngka; ṙāi inṙūöngkö rupīö, ṙāi inṙūöngkö nyā-aṅkūö, ṙāi inṙūöngkö töng chehen nup töṙāyu inṙūöngka:

²⁰Ip aṅ tahëng pumnāmö man kētö töṙāyu inṙūöngka; im mak alaha meh pöri um kētö töṙāyu inṙūöngka: hòṅ ngam Tēv ngam Mā Tēv meh nö hakôlò nup la-en minë kuntī meh, ip panam kū-ö meh nö amin meh.

²¹Yē meh chūöku ṙô kilēḵngôre im Tēv ngam Mā Tēv meh, um ahākenre kētö e: tön hòṅ īnu an ngam Tēv ngam Mā Tēv meh tö e nö aṅ in meh; tökööl an min nö in meh.

²²Yē meh pöri ma-inngenre öt chūöku ṙô, öt tökööl min angū-ö nö in meh.

²³Öp tö ngaich nö löknyö minuh meh la-evṙen më-eṅ haköpö e inrē; sā ngam töchūöku kinlēḵngô me im Tēv ngam Mā Tēv meh, tökētu kanahanglōn, ngam kinlēḵngô meh nö löknyö elvāng meh.

²⁴Yē meh yih el panô-òre më-eṅ nyā ròng nup vāin hatööngenre ip lōnre; uh pöri chaphölö el chūök chehenre.

²⁵Yē meh lök el chūök sāiny ngam hol meh nup tösökhakaṙen, kô-òren më-eṅ köich nup ṙòng; uh pöri öm kētökūö kanöt i nup tösökhaka sāiny ngam hol meh.