Read Car_Nicobarese I. CHÖNGÖ 24 Bible Online

I. CHÖNGÖ 24 - Car_Nicobarese bible

I. CHÖNGÖ 24

¹Yē öp tarik nö kē pīhöre, ngaich pīhövö tö ò, ngaich angū-ö min, yē ò nö öt hāngenlōn tö ò, pòn kôtökūö anga-aṅ tö nup tötlēn in ò, ngaich kūich līpöre öp ṙināngen ò anga-aṅ, ngaich kētö e nö eltī ò, ngaich tīnngörit ò nö ṙā-ang el patī ò.

²Ngaich yĕn ngaich anga-aṅ nö kiröönngöre nö ṙā-ang el patī ò, kô-òren ngaich anga-aṅ nö pīhövö tö tahëng kikōnyö.

³Yē öp mu-unôich kikōnyö pīhö ò nö surīkhen ò, ngaich kūichtö līpöre ṙināngö nö in ò, ngaich kētö e nö eltī ò, ngaich tīnngörit ò nö ṙā-ang el patī ò; hēk, yē ngam mu-unôich pīhö ò nö kapah, ök kamë an nö pīhöre;

⁴Ngaich öp mu-urĕh kikōnyö pīhö ò, tamīnngörit ò, kô-òren nö kē an nö hēk nö pīhöre, tökinheūten ò nö ngaich nö hachōichi, pò e angū-ö nö sinòkkūö nö i kūö ngam Mā Tēv: uh më-eṅ vīten ngam panam nö köölö fālen, ngam kahëtö ngam Tēv meh nö in meh ngam Mā Tēv nö amin meh.

⁵Yē öp tarik nö kē tufömngöre pīhöre, un kiröönngöre anga-aṅ nö in yip kumyung, un rēhĕn nö kētu töng la-en nö in ò: hĕng samyeūheu anga-aṅ nö i patī re nöng kahngenre, haṙamlōn öp pīhöre inrē öp kahë ò.

⁶Öt tarīku min kamë öp kinṙīöt atra ihong hēk öp latulöng chap ò ihong nö kinlēḵngô: pòn ngaich anga-aṅ nöng kamë nômö tarik.

⁷Yĕn hĕng tak öp tarik tökôti nö ulāingö kūön holre i Israĕl, sā tīre anga-aṅ tö ò tö töhakövö, inyihngen ò; kumpaha min anga-aṅ mu-ulaiya; ngatī min më-eṅ kavalngö tötlöök ṙā-ang el ṙôngö meh.

⁸Haṙēmngenre tö ngam yeūnyö invah, ṙēmen öm haköp, sā nup ṙô yip kui yip Lēvī nö haköpten meh: sā tinöölô meh tö cha, ngatī yī-ö haköpken e.

⁹Köpölōn tö tī ngam Tēv Meh nö in Mariam ngam Mā Tēv, nö el talöökö hē yīö ṙā-ang Aikup.

¹⁰Yē meh kētö tö haṙūöngö ip holre nup töng sitih töhaṙūöngö, uh më-eṅ kuhēthötre el patī ò öm kē-ĕre ip chūök kinlēḵngô.

¹¹Höng sökhaka më-eṅ el kahôyö, ngaich kēnyö ngam chūök kinlēḵngô anga-aṅ nö el kahôyö nö in meh ngam tarik tö kētu haṙūöng tö meh.

¹²Yē öp tarik nö yāich, uh më-eṅ haṙòh tö kui öp chūök kinlēḵngô ò:

¹³Havantö öp chūök kinlēḵngô më-eṅ in ò i maneut tö ngam tavūöi, hòṅ ò nö haṙòh nö el kinṙumre, ngaich hakôlò meh: ngaich tölöök min angū-ö nö i kūö ngam Tēv ngam Mā Tēv meh.

¹⁴Um hakihten öp tarik re töhaṙāyö la-en öp yāich töhāṅten inrē, yĕn pòrô ang nö aṅ i mak alaha meh, hēk aṅ tahëng el ngam panam meh el kinlōngö inkūp meh:

¹⁵Kē-ĕkūö ò tö nup ṙāi alaha ò nö la-evṙen ip sakāmö ò, un rēhĕn ngam tavūöi nö hōḵtu nö sipti nö i kui e; pò ò nö yāich; ngaich in e ellōn: hòṅ ò min nö öt lā-al meh nö peuinyhökūö ngam Mā Tēv, ngaich tökööl angū-ö nö in meh.

¹⁶Un kumpaha yip kikōnyö yöng nö ṙënngen yip kūön, un rēhĕn më kūön nö kumpaha tökūö fālen yip kikōnyö yöngre: kö kumpaha yin vē tarik nö i tökööl re.

¹⁷Un löinyngö inkaha fālen aṅ tahëng, un rēhĕn i kūön yōich; un rēhĕn kē kinṙum öp tafīösi kikānö nö kinlēḵngô:

¹⁸Köpölōn pöri më-eṅ tö meh misī hakövö i Aikup ngaich ngam Tēv meh ngam Mā Tēv nö ṙānyen meh ṙā-ang in e: lökten chin tölṙô meh öm ngatī la-en.

¹⁹Yē meh uvòhlö sāinyre el panô-òṅre, ngaich vaichngen öp töhĕng ramnāyö el panô-òṅ um kiröönngöre hēk kē-ĕ e: lumnööṙö aṅ tahëng öp angū-ö, kūön yōich, kikānö tafīösi inrē: hòṅ ngam Tēv meh ngam Mā Tēv nö hakôlò vahīṙen eltī meh.

²⁰Yē meh föttö ṙòng öp ôlīv chōn meh, um hēk reunglöre i minë pak: lumnööṙö aṅ tahëng nup anū-ö, kūön yōich, kikānö tafīösi inrē.

²¹Yē meh hamūl ṙòng vāin el ap panò-òṅ meh um hēk chap unôichritre: lumnööṙö aṅ tahëng nup anū-ö, kūön yōich, kikānö tafīösi inrē.

²²Köpölōn më-eṅ inrē töre misī hakövö ip panam Aikup: lökten chin tölṙô meh öm ngatī la-en.