Read Car_Nicobarese I. CHÖNGÖ 25 Bible Online

I. CHÖNGÖ 25 - Car_Nicobarese bible

I. CHÖNGÖ 25

¹Yē öp kinīlö ṙô nö i tarik, ngaich cha-a nö yihtöre nö im inkaha fālen, ngaich yip kamhôka nö akah fālen cha; ngaich cha-a nö lā im tölöök, ngaich asachkö ngam tötlöök.

²Ngaich angū-ö min, yē ngam tötlöök tarik nö tö hòṅ fōho, ngaich ngam ma-akah fālen nö hōten ò nö ṙōlngöre nö fōho nö i kūö ò sā öp öt lanöökö ò, nö tumhötvö.

³Höng fënhöt anāi tumhöt tī anga-aṅ, un saṙaklöng kūö tī: hòṅ ò nö öt saṙaklöng kūö tī, nö mötlö tumhöt tī nö fōhan, ngaich öp hol meh nö sā töt akaha tölōn meh.

⁴Un hayūlö kūö ap kōiny nuā yĕn röönnyö ṙòng sāiny.

⁵Yĕn holtöṙahre yip mak alahare, ngaich hĕng hang tak tö cha tökapah, öt kūönu tö kikōnyö, ngaich ngam pīhö ngam tökapah min nö öt pīhövö nö el kahôyö tö aṅ tahëng: öp mak alaha ök pīhö ò pöri min kumhëthötre nö in ò, ngaich kē an nö pīhöre, ngaich la-en tö la-en ök pīhö ò nö in ò, ök mak alaha ò:

⁶Ngaich angū-ö min, tö öp lanòh kayônyö ò min nö mī-i minë-eny öp mak alaha ò kupah, hòṅ öp minë-eny min nö öt sichngöre nö in Israĕl.

⁷Yē öp tarik nö sōḵ nö kē öp pīhö ök mak alahare, ngaich öp pīhö ök mak alaha ò min nö chuh kūö inkūp in yip mā, nö ngö ṙô, Sōḵ ap mak alaha ök pīhö chu nö hachohlö minë-eny ök mak alahare in Israĕl, sōḵ öp nö la-en tö la-en ök pīhö chu nö in chu ök mak alaha ò.

⁸Ngaich yip mā elpanam ò nö havëten ò min ngaich ve-ekūö ò: ngaich yēḵ ò nö söklöre, nö ngö ṙô Öthāngenlōn chin kē an;

⁹Ngaich yihtöre nö in ò ngam pīhö ök mak alaha ò nö i kūö yip mā, ngaich hōknyö kunröpö ò nö ṙā-ang i röön ò, ngaich kösngö elmat ò; ngaich sapṙô min anga-aṅ, nö ngö ṙô, Ngatī inlanken ön ngòh tarik töt mamānlö patī mak alahare.

¹⁰Ngaich kaheūkö min öp minë-eny ò nö in Israĕl, Nö patī ò öp tö hōknyu kunröpö.

¹¹Yē tarik nö lā-alkūö höö, ngaich öp pīhö ngam töhĕng tak nö ṙūötöre nö ṙānyö ngam pīhöre nö ṙā-ang eltī ngam famëlan, ngaich kētö tire anga-aṅ, nö kē ngam kinkōnyö ò;

¹²Ngaich më-eṅ rökngö kël ò, um aṙē-ĕ-elmat.

¹³Um aṅhaṅv el sāk tö töṙōlkangen kinlah lumngan, tökiröng tökūöṅnö inrē:

¹⁴Um aṅhaṅv el patī tö töṙōlkangen kinlah rôta, tökiröng tökūöṅnö inrē:

¹⁵Öp töteung tölöök kinlah lumngan angū-ö mi-in meh, öp töteung tölöök kinlah rôta angū-ö mi-in meh, öp töteung tölöök kinlah rôta angū-ö mi-in meh: hòṅ minë sakāmö meh nö marô-òten nö im panam kahëtö ngam Tēv meh ngam Mā Tēv.

¹⁶Pòn ṙòkhöre yip tö ngatī la-en, ṙòkhöre yip töt chīpö la-en, nö sinòkkūö ngam Tēv meh ngam Mā Tēv.

¹⁷Köpölōn tö tī Amelek nö in meh nö el talöökö, hē yanihih meh ṙā-ang Aikup;

¹⁸Tö inlahen ò nö höngkūö meh nö ektalöökö, ngaich fël yik lamā unôich meh, ṙòkhöre yik töt kalē-en lā-unôich meh, hē meh öm tayē cheingö inrē; ngaich öt pa-ekūö anga-aṅ tö ngam Tēv.

¹⁹Lökten an mīnö, hē ngam Tēv meh ngam Mā Tēv nö in yip mahavīlen meh tökunyahāṅ elmat tö meh, im panam kahëtö ngam Tēv meh nö in meh ngam Mā Tēv nö amin meh öm kē-ĕ e, hòṅ meh sichngö kanöpölōn tö Amelek nö ṙā-ang el katòh ngam halīöngö; um vaichngö.