Read Car_Nicobarese I. CHÖNGÖ 27 Bible Online

I. CHÖNGÖ 27 - Car_Nicobarese bible

I. CHÖNGÖ 27

¹Ngaich Môsös tö yip mā Israĕl inrē nö tölṙô yik tarik, nö ngö ṙô, Köpötī tö në chöngö në tinöölô yīö tö chu i ngih sakāmö.

²Ngaich angū-ö min ip sakāmö hē yīö havāngngöre tö Yôtön im panam ngam kahëtö ngam Tēv ngam Mā Tēv meh nö in meh, ngaich më-eṅ asöklö tökiröng ihong, ngaich lūöp alaha u tö inpan:

³Ngaich më-eṅ kūich në ṙô ngam chöngö i mat u, yē meh kiröönngöre im panam kahëtö ngam Tēv meh nö in meh ngam Mā Tēv, panam töhëmö aṅkūö tö aṅteh höni inrē, sā ṙô ngam Mā Tēv, ngam Tēv yik muvöhngö yīö nö kilēḵngôre nö in yīö.

⁴Ngaich min angū-ö hē yīö vāngngö tö Yôtön, asöklö në ihong min yī-ö, në tinöölô yīö tö chu i ngih sakāmö, i kui öp rung Ēpôl ngaich lūöp alaha u tö inpan.

⁵Ngaich umuh tī më-eṅ vīlö tahāklö ngam Tēv meh ngam Mā Tēv, ihong tahāklö: uh më-eṅ öm chehetī tö vët vī-i u.

⁶Vīlö ngam tahāklö ngam Tēv ngam Mā Tēv meh tö nup tökumëngṙòng ihong: hòṅ meh föng tökētu i kui ò im Tēv meh ngam Mā Tēv:

⁷Kētö tökētu më-eṅ inlām, ngaich nyā-aṅvkūö umuh, ngaich ṙāmölōn më-eṅ i kūö ngam Tēv ngam Mā Tēv meh.

⁸Ngaich më-eṅ kūich nup ṙô ngih chöngö i nup ihong nö löökö kinūchö.

⁹Ngaich Môsös tö yip kūönṙô yip Lēvī nö vë-ekūö yip Israĕl nö ṙòkhöre, nö ngö ṙô, Hachēvngenre, Ō Israĕl, hangihtöre inrē; hēten tö ngih man sakāmö öm vītöre tarik ngam Tēv meh ngam Mā Tēv.

¹⁰Lökten man hang ṙô ngam Tēv ngam Mā Tēv meh, la-evṙen inrē tö në inchöngten në chöngö ò inrē, në tinöölô yīö tö chu i ngih sakāmö.

¹¹Ngaich Môsös nö tölṙô yik tarik ik sakāmö angū-ö, nö ngö ṙô,

¹²Vē yin min tösökhaka i kui ap rung Kerisim nö hakôlò vē tarik, yē yīö ngaich vāngngö tö Yôtön; Sumōn, Lēvī, Yūta, Isakār, Penyamin inrē.

¹³Ngaich vē min tösökhaka nö i kui öp rung Ēpôl ramūtngövah; Rūpön, Kāt, Asēr, Sepulön, Tën, Naftatī,

¹⁴Ngaich yip Lēvī min nö sap ṙô, nö ngö ṙô tö yip tarik Israĕl nö pōitô.

¹⁵Tötkôlò öp tarik öp vamī insātēv hēk vamī mās insātēv, në sinòkkūö ngam Mā Tēv vahīṙen kuntī tarik, ngaich hayūni chūök nö asöklöng: ngaich ṙòkhöre ṙô yip tarik min nö ngö ṙô nö sap ṙô, Āmen.

¹⁶Töt kôlò öp anga-aṅ ṙamātö ëāṅvö nö ranghö öp yöngre kikōnyö hēk öp yöng ò kikānö. Ngaich ṙòkhöre ṙô min yip tarik nö ngö ṙô Āmen.

¹⁷Tötkôlò öp anga-aṅ kamëngö minkahngö kūö panam holre: Ngaich ṙòkhöre ṙô min yip tarik nö ngö ṙô, Āmen.

¹⁸Tötkôlò öp anga-aṅ mahalō-ongkūö tötmeuk tö talöökö. Ngaich ṙòkhöre ṙô min yip tarik nö ngö ṙô, Āmen.

¹⁹Tötkôlò öp anga-aṅ öp lamöinyngö inkaha fālen aṅ tahëng, kūön yōich, kikānö tafīösi inrē. Ngaich ṙòkhöre ṙô min yip tarik nö ngö ṙô, Āmen.

²⁰Tötkôlò öp anga-aṅ öp ṙamôlngöre nö i pīhö öp yöngre kikōnyö; pò ò nö fehlö hilā öp yöngre kikōnyö. Ngaich ṙòkhöre ṙô min yip tarik nö ngö ṙô, Āmen.

²¹Tötkôlò öp anga-aṅ öp ṙamôlngöre nö i töng ṙeūla. Ngaich ṙòkhöre ṙô min yip tarik nö ngö ṙô Āmen.

²²Tötkôlò öp anga-aṅ ṙamôlngöre nö i kanānöre, öp kūön öp yöng ò kikōnyö, hēk kūön öp yöng ò kikānö. Ngaich ṙòkhöre ṙô min yip tarik nö ngö ṙô, Āmen.

²³Tötkôlò öp anga-aṅ öp ṙamôlngöre nö i kikānö yöng pīhöre. Ngaich ṙòkhöre ṙô min yip tarik nö ngö ṙô, Āmen.

²⁴Tötkôlò öp anga-aṅ öp mu-ulaikö tīre nö fël holre. Ngaich ṙòkhöre ṙô min yip tarik nö ngö ṙô, Āmen.

²⁵Tötkôlò öp anga-aṅ öp kamë raneushöre nö fëlngö töt akahaṙa tarik. Ngaich ṙòkhöre ṙô min yip tarik nö ngö ṙô, Āmen.

²⁶Tötkôlò öp anga-aṅ öp töt mahaköp nuk ṙô ngih Chöngö nö la-evṙen tö u. Ngaich ṙòkhöre ṙô min yip tarik nö ngö ṙô, Āmen.