Read Car_Nicobarese I. CHÖNGÖ 28 Bible Online

I. CHÖNGÖ 28 - Car_Nicobarese bible

I. CHÖNGÖ 28

¹Ngaich angū-ö min, yē meh sin haṙēmngenre tö ṙô ngam Tēv meh ngam Mā Tēv, öm haköpkö në Chöngö ò öm la-evṙen tö në tinöölô meh tö chu i ngih sakāmö, hòṅ ngam Tēv meh ngam Mā Tēv nö latulöng tī tö meh i kui taṙòkhöre pumnāmö tarik aṅ ngih tumlat:

²Ṙòkhöre min në inkôlò nö yih nö i kui meh kôlò inrē nö in meh, yē meh min hang ṙô ngam Tēv re ngam Mā Tēv.

³Tökôlò man yēḵ min el panam, tökôlò man yēḵ min inrē el panô-òṅ.

⁴Tökôlò ap yēḵ min ṙòng ngam alaha meh, ṙòng ngam tumlat meh, ṙòng ap nuā meh, ṙanūölö ṙôken kan nuā meh inrē, nup kūön nup chehen meh inrē.

⁵Tökôlò ap yēḵ min kuvôkö meh tap chūök tī meh kirāich atra.

⁶Tökôlò man yēḵ min ip hē meh kuhēthötre, tökôlò man yēḵ min inrē ip hē meh kunyī-inyre.

⁷Vīten ap tökunyaha elmat an min ngam Mā Tēv öp samöklöre nö lā-al meh nö ötkô tö meh: hēngö talöökö yip min nö yih nö lā-al meh, ngaich sāta talöökö min nö falngöre.

⁸Hōtö ngih inkôlò an ngam Mā Tēv nö in meh nö el nup sök meh, i nup töng vahīṙen kuntī meh inrē; hakôlò meh min anga-aṅ inrē im panam ngam kahëtö ngam Tēv meh nö in meh ngam Mā Tēv.

⁹Hāköpi man min tö ngam Mā Tēv öm tarik ò töhet, sā ṙô ò nö in meh nö chūöku ṙô nö kilēḵngô re nö in meh; yē meh min köptī tö në Chöngö ngam Tēv meh ngam Mā Tēv, lök el në talöökö ò inrē.

¹⁰Ngaich ṙòkhöre min vē tarik aṅ ngih tumlat nö meūkö meh min minë-eny tö minë-eny ngam Mā Tēv öm havëka; ngaich cha-a min nö pa-ekūö tö meh.

¹¹Ngaich ngam Mā Tēv min nö vīlen meh pōyen nö urāngen, i ṙòng ngam alaha meh, i ṙòng nuā meh, i ṙông ngam tumlat meh inrē, im panam ngam kahëtö ngam Mā Tēv meh nö in meh nö chūökūṙô nö in yik muvöhngö meh.

¹²Löpnyökūö ngam chūök tölöök chehen ngam halīöngö an ngam Mā Tēv min nö in meh nö kētö kumṙah ngam panam meh ip hē re, hakôlò nup vahīṙen minë kuntī meh inrē: ngaich më-eṅ min kētö töhaṙūöngö i töṙōl pumnāmö tarik, ngaich hö-ö më-eṅ haṙūöng.

¹³Vīlen meh ngam Mā Tēv inrē min öm kui, rö-ö öm lamrit: höng lātulönghöre min më-eṅ, öt lātaṙeū; yē meh min hang nup Chöngö ngam Tēv meh ngam Mā Tēv, nup tinöölô meh tö chu i ngih sakāmö, nö haköpkö meh la-evṙen inrē tö u;

¹⁴Uh më-eṅ kānngöre ṙā-ang i nup ṙô nup tinöölô meh tö chu i ngih sakāmö, öm kān hāmö hēk kān tavē, öm tömrit nup tahëng tēv ngaich lök la-en u.

¹⁵Ngaich pöri angū-ö min, yē meh öt hang ṙô ngam Tēv ngam Mā Tēv meh, öm la-evṙen haköpken në inchöngten aṅ in ò tö në Chöngö ò inrē në tinöölô meh tö chu i ngih sakāmö; ngaich ṙòkhöre min në öt inkôlò nö teunghö kui meh, ngaich kô-òngvah më-eṅ:

¹⁶Töthakôlöng ṙô ap yēḵ min elpanam, töthakôlöng ṙô inrē më-eṅ min elpanô-òṅ.

¹⁷Töthakôlöng ṙô ap yēḵ min kuvôkö meh tap chūök tī meh inrē kirāich atra.

¹⁸Töthakôlöng ṙô ap yēḵ min ṙông ngam alaha meh, ṙòng ngam tumlat meh, ṙanūölö ṙôken kan nuā meh, nup kūön ò inrē.

¹⁹Töthakôlöng ṙô man yēḵ hē meh kuhēthötre, töthakôlöng ṙô yēḵ inrē hē meh kunyi-inyre.

²⁰Tīntö öt inkôlò meh an min ngam Mā Tēv, öt kanô-òṅ kumyung, vinëkö, i nup töng chūök minë kuntī meh nö kētö tīre nö la-evṙen, hanöng saha meh hatngö, hanöng saha meh inrē ka-euingen lëlngö; kūö vahīṙen meh tö tötlöök, nup lökngen meh ṙāngen Chu.

²¹Vīlö invah an min ngam Mā Tēv nö köp nö in meh, hanöng saha tī ò nö keuheūtngöre vah tī tö meh ṙā-ang im panam, öp kū-ö meh kiröönngöre öm kē-ĕ e nö amin meh.

²²Tī tö unhööpö an min ngam Mā Tēv nö in meh, anūövö, chanök elranūmö, ṙanāchö tö sā kūö tameūyö, sanët, kuföt inngehngö tamāp chōn; ngaich lū-u meh min anū-ö hanöng saha meh ngaich lëlngö.

²³Mās ngam i kui meh min halīöngö vët ngam tumlat min nö elkatòh meh.

²⁴Vītu min ngam kumṙah ngam panam meh tö ngam Mā Tēv nöng pinṙōngö pitung: suktöre min angū-ö nö i kui meh nö ṙā-ang el halīöngö, hanöng saha hanatngö meh.

²⁵Vīten meh an ngam Mā Tēv min ötkô tö yip lā-alre: hēngö talöökö më-eṅ kunyi-inyre lā-al cha, ngaich sātö talöökö falngöre ṙā-ang i kūö cha; ngaich më-eṅ min höng kavalka i në pūlngö ngih tumlat.

²⁶Ngaich ap tökapah alaha meh min nö nyā-aṅkūö nup chehechōn el ngam kuföt, töṙeūla inrē el tumat ngaich öt hĕng tak min ma-ahōngö u.

²⁷Aṅtī tö seh aṅ Aikup an min ngam Mā Tēv nö chökhuti tö meh, aṅtī tö ahāṅha alaha, aṅtī tö tölōlnyivah, aṅtī tö kiyös, nup töt lane-enṙen nö in meh.

²⁸Aṅtī tö kintūönyen an min ngam Mā Tēv nö chökhutī tö meh, aṅtī töpinngangkūö ellōn inrē

²⁹Ngaich më-eṅ min ṙēpa tö el sakāmö, sā tötmeuk nö ṙēpa nö el singūlö, ngaich hö-ö min më-eṅ kôlò i nup talöökö meh: höng töng hakihtuṙen min më-eṅ tö-örheūheu inrē ha-āchiṙen, ngaich öt hĕng tak min umuh mahayööken meh.

³⁰Mikahngö pīhöre man min, ngaich ṙōlngöre min öp tahëng tarik nö in Ò: mānlö patī min më-eṅ, ngaich rö-ö më-eṅ iyöng ël e: teūichtö aṅ panô-òṅ vāin min më-eṅ, ngaich hö-ö pöri nyā ṙòng u.

³¹Fëli min öp kōiny nuā meh nö i kūö meh, ngaich më-eṅ öt kā an; kīlö min öp köttö meh nö ṙā-ang i kūö meh, ngaich rö-ö min nö hvantu nö in meh: kētu min öp sīṅp meh nö in yip tö kunyahaelmat tö meh, ngaich öt hĕng tak mahayööken më-eṅ.

³²Kē-ĕyö min nö i tahëng tarik yip kūön kikōnyö kūö meh kikānö inrē, höng hatīöna min më-eṅ, ngaich öt kô-ò alaha tökūö lōnre tö cha i ṙô-òtö ngam sakāmö: öt kanô-òṅvö min më-eṅ eltī re.

³³Nup ṙòng aṅ ngam tumlat meh, ṙòkhöre nup vahīten meh nö nyā-aṅyö min tö yip pumnāmö tarik töt mikah kūö meh; höng töng hakihtuṙen min më-eṅ örheūheu kiröpi inrē:

³⁴Ngaich lökten min öm katūöyaṙen kūö mineūkö u tö minë mat meh nup maheuṅk meh min.

³⁵I kui kinmônö meh tī an min ngam Mā Tēv nö chökhutī tö meh, i kalröön inrē, tö nup töchökhu seh, nup töt lane-enṙen nö in meh, löktö kintāl elröön meh söl el chalòng kui meh.

³⁶Ngaich min ngam Mā Tēv meh nö kēten meh, öp rācha meh inrē öp haūchlö ò nö i kui meh, nö ip pumnāmö tarik töt mikahkūö meh, më-eṅ öt rēhĕn yik muvöhgö meh; ngaich in e më-eṅ min lök la-en tahëng tēv, chōn ihong inrē.

³⁷Kētöre min më-eṅ pinngangkūö, inchō-oṙô, kūöngô, in yip tarik nö ṙòkhöre chūöktī ngam Mā Tēv min nö kēngen meh.

³⁸Pōyen kum man min tö kulöl öm chuh el öp panô-òṅre, ngaich höng kūöṅnen hamūlpöri min; pò u min nö keuheūt tökūö hāyö.

³⁹Teūichtö vāin man min el panô-òṅ ngaich haṙūötken u, hö-ö pöri min më-eṅ rēhĕn hamūl ṙòng vāin; pò öp kata-ëm min nö nyāngö u.

⁴⁰Keuheūtngöre chūök nup ôlīv chōn meh nö i kūöngö ngam panam meh, hö-ö pöri min më-eṅ hacham alahare tö tavī-i; pò nup ôlīv meh min nöng pitūḵngö ṙòngre.

⁴¹Hakūöntö nyīö kikōnyö man min nyīö kikānö inrē hö-ö pöri min cha-a nö kūön meh; pò cha min nö chuh el inkövö.

⁴²Ṙòkhöre nup chōn meh tö nup ṙòng ngam tumlat meh inrē nö amin hāyö min.

⁴³Öp aṅ tahëng më-el ṙôngö meh min nö ṙūö ṙūöhölre nö lātulöng tö meh; ngaich më-eṅ min ṙūöṙūötöre lātaṙeū.

⁴⁴Kētö tö haṙūöngö min anga-aṅ nö in meh, ngaich rö-ö më-eṅ min kētö töhaṙūöngö in ò: kui ap min anga-aṅ ngaich më-eṅ lamrit.

⁴⁵Ṙòkhöre nun min në öt inkôlò nö teunghö kui meh, fachūṙö meh, kô-òl nö in meh, hanöng saha meh hakngö; pò meh öt hangṙô ngam Tēv ngam Mā Tēv meh, öm haköp në inchöngten aṅ in ò tö në Chöngö ò inrē në tinöölô meh tö ò:

⁴⁶I kui meh nun min nö minkahngö pinngangkūö inrē, örheūheu min nö i kui öp kūön meh:

⁴⁷Pò meh öt holtö ṙanāmölōnre lök la-en ngam Tēv meh ngam Mā Tēv, öt holtö kumchiklōnre inrē, tökūö tanë-eṅre tötaṙòkhöre chehen:

⁴⁸Lökten man kūön alaha yip tö kunyahaelmat tö meh yip tahīntö ngam Mā Tēv min nö lā-al meh, i neūkö, inṙehe nômö, linchôyö, hanāten inrē tö taṙòkhöre chehen: hakeunlen meh an min tö vët kaneun nö i likeun meh, hanöng saha hanatngö tī ò tö meh.

⁴⁹Kētö pumnāmö tarik an min ngam Mā Tēv nö ṙā-ang tö maṙôvat nö lā-al meh, ṙā-ang ip manā-angkūö ngam tumlat, sakūö matēṙö nö kiteū; pumnāmö tarik yip tötmikah elnang meh ṙô min;

⁵⁰Tötānyö kūö pumnāmö tarik öp tötmikūöṙen tö tököiny tarik öt rēhĕn nö aheuk tö nyīö:

⁵¹Ngaich anga-aṅ min nö kā kūön nup nuā meh, nyā ṙòng ngam tumlat meh, hanöng saha meh hatngö: öt ṙālöng min nö in meh sāiny, vāin, hēk tavī-i, öp ṙanūölö ṙôken kan nuā meh, hēk nup kūön nup chehen meh, hanöng saha tī ò nö lëlngö tī tö meh.

⁵²Ngaich anga-aṅ min nö harah kūö meh i kūö nup inkūp meh nö ṙòkhöre, hanöng saha nup kinlōngö meh tömarô-òlkui nö taṙööli, nup chūök inyönglen meh, keuheūtngöre chūök im panam meh: ngaich anga-aṅ min nö havahkūö meh i nup inkūp meh nö ṙòkhöre, keuheūtngöre chūök im panam meh ngam kahëtö ngam Tēv ngam Mā Tēv meh nö in meh.

⁵³Ngaich më-eṅ mīnö kā lamöknyö alahare, alaha kūön meh kikōnyö kūön meh kikānö inrē yip kahëtö ngam Tēv meh nö in meh ngam Mā Tēv; i inrahakūö ane inrē i kanihngen, öp tī ngam lā-al meh min nö hakihten meh.

⁵⁴Öp tarik min tö ayālö alaha in yīö tötkalĕ-en inrē, vööngö ellōn anga-aṅ nö ip mak alahare, töp pīhöre takô tö yip chööḵṙen kūön ò yip tö ōtren nö in ò:

⁵⁵Ngaich lökten ò min nö öt kahë-ev kūö tö cha tö alaha yip kūön ò tö yip kahā ò min, pò ò nö öt ōtre chöökūö tö ò; ip inrahngökūö kanihngen inrē, öp tī öp lā-al meh min nö hakihten meh, nö el nup inkūp meh.

⁵⁶Öp kikānö min in yīö, tö ayālö alaha töt kalĕ-en inrē, öp tötkô nö ṙātö kintāl elröönre nö el tumlat tökūö öt kumlĕ-enre inyālö alahare inrē, vööngö elmat min anga-aṅ nö ip pīhöre takô, ip kikōnyö kūönre, ip kikānö kūönre inrē;

⁵⁷Ip lālö öp kūön ò inrē öp lamöknyö hôi takeun ò, ip kūön ò inrē kayônyö ò min; pò ò min nö kā-a u nö ulāiken re tökūö ranö-ö taṙòkhöre: ip inrāhakūö ip inkihten inrē öp tī öp lā-al meh min nö hakihten meh nö el minë inkūp meh.

⁵⁸Yē meh öt hòṅ la-evṙen haköpkö në ṙô ngih chöngö në tö kūichiyö nö i mat ngih līpöre, hòṅ meh pa-ekūö tö ngih tökôlò pinhë-enkūö inrē minë-eny, TĒV MEH NGAM MĀ TĒV;

⁵⁹Ngaich min ngam Mā Tēv nö vī nup tölëlngökūö invah meh nö pinngangkūö, tölëlngökūö invah ap kūön meh, ngam tökiröng tölëlngökūö invah, nö tömarô-òten min, töchökhu nö invah, nö tömarô-òten.

⁶⁰Ngaich i kui meh tī min anga-aṅ nö hēk tö në invah aṅ Aikup nö ṙòkhöre, në pinhë-eṅkūö meh; köpngö min anū-ö nö in meh.

⁶¹Nup invah inrē, nup tölëlngökūö invah, nup tötkūichö nö i mat ngih līpöre, chöngö, anū-ö min kahëtö ngam Mā Tēv nö i kui meh, hanöng saha meh min hatngö.

⁶²Ngaich më-eṅ min höng öt ṙōltit tak tö ōtre, öi tö sā ṙôken taneūsömat ngam halīöngö tö ṙôngöre misī; pò meh öt hang ṙô ngam Tēv ngam Mā Tēv meh.

⁶³Ngaich angū-ö min nö sā ngam Mā Tēv nö ṙāmölōn nö vītö tölöök nö in yīö, nö ṙūölö ṙôngö yīö; ngatī min ngam Mā Tēv nö ṙāmölōn nö in yīö nö vīten yīö lëlngö, nö ahatngen yīö, ngaich yī-ö min nyòklöngö ṙā-ang ip panam öp kū-ö yīö kiröönngöre kē-ĕ e nö amin yīö.

⁶⁴Ngaich min ngam Mā Tēv nö pirātngen yīö i taṙòkhöre tarik, löktökūö öp tö hĕng manā-angkūö ngam tumlat söl ip tahëng manā-angkūö ngam tumlat; ngaich umuh më-eṅ min lök la-en tahëng tēv nup töt mikahkūö meh öt rēhĕn nö mikahkūö yik muvöhngö yīö, chōn ihong inrē.

⁶⁵Öt kôtökūö min më-eṅ tö lanööṙenre in vē pumnāmö tarik, öt chūöku ṙainātö kintāl elröön min më-eṅ umuh: kē-ĕkūö meh, pöri min ngam Mā Tēv nö umuh tö kinchëyöre ellōn, pinṙeūmtömat, ane inrē lanëvngö inrē tökūö miṙivlōn.

⁶⁶Ngam nômö meh min inrē nöng kilölhaka nö in meh nöng katöngaṙen, pa-ekūö min më-eṅ tö hatööm sakāmö inrē, öt hēngö nyanatlö min ngam nômö meh:

⁶⁷Ngö ṙô min më-eṅ tö peuheū, Sòk ön öre ngih nö harap yē lōn ngam Tēv! Ngaich harap ngö ṙô min më-eṅ, Sòk ön öre ngih nö peuheū yē lōn ngam Tēv! Kūö öp pinhë-eṅkūö ngam ellōn meh öp pinhë-eṅkūö meh min, kūö öp mineūkö tö minë mat meh inrē töp maheuṅk meh min.

⁶⁸Ngaich ngam Mā Tēv min nö hēk nö kēten meh i Aikup öm chōngu, löktö ip talöökö, öp ṙô chu tö meh öich ngö ṙô, Hö-ö man min meūkö e hēk: ngaich in e më-eṅ min inyihngöre i yip lā-al meh öm töhakövö kikōnyö töhakövö kikānö inrē, ngaich öt hĕng tak mahavaha meh.