Read Car_Nicobarese I. CHÖNGÖ 29 Bible Online

I. CHÖNGÖ 29 - Car_Nicobarese bible

I. CHÖNGÖ 29

¹Në nun ṙô ngam kinlēḵngô, ngam tinöölô Môsös tö ngam Mā Tēv nö in yik kūön Israĕl ip panam Mô-āp, nö hol ngam kinlēḵngô vahīlö ò nö in cha nö i Hōrep.

²Ngaich Môsös nö havëtö yik Israĕl nö ṙòkhöre, ngaich ngö ṙô tö cha. Ngaich yin meuk nup ṙô ngam Mā Tēv nö i kūö yīö nö in Fërō ip panam Aikup, in yip tarik ò inrē nö ṙòkhöre, in nup i panam ò inrē nö ṙòkhöre;

³Nup maheuṅk minë mat yīö tökiröng kinlaha, nup minkahngö, nup tökiröng inrē pinngangkūö:

⁴Hö-ö pöri ngam Tēv nö kētö ellōn yīö öi akahalōn, öt kētö mat yīö öi meuk, öt kētö nang yīö inrē öi hang, söl i ngih sakāmö.

⁵Ngaich chin fën anāi samyeūheu el tönyalnyi hachō-o yīö: öt köinyngöre nun minë hilā yīö i alaha yīö, minë kunröpö yīö inrē nö öt köinyngöre nö i kunröön yīö.

⁶Hö-ö yin nyā-aṅvkūö tö rôti, öt rēhĕn òk vāin hēk tökalēḵ tö-ôkö; hòṅ yīö akahakūö tö chu Tēv yīö öich Mā Tēv.

⁷Ngaich hē yīö misī sölta i ngih chūökö, kunyī-inyre ngaich Sihòn ök rācha aṅ Hespòn Ôk inrē ök rāch aṅ Pāsan, nö lā-al hī nö kiyung, ngaich mihôiṅ ayī-ö tö cha:

⁸Kē panam cha ngaich ayī-ö, ngaich kētö e nö amin yip Rūpön, yip Kāt inrē, ròngtī inrē öp miyöngö Manasē.

⁹Lökten haköp në ṙô ngih kinlēḵngô, la-evṙen inrē tö u, hòṅ yīö kôlòṙen i nup vahīṙen.

¹⁰Sökhak yin öi ṙòkhöre i ngih sakāmö i kūö ngam Tēv yīö ngam Mā Tēv; yip makūö yīö, miyöngö, minṙöinylö yīö, yöng kūö yīö kiyung inrē, höng ṙòkhöre inrē tarik Israĕl,

¹¹Yip kun kūön yīö, pīhö yīö aṅ tahëng inrē ellōn ngam elyöngö meh, löktökūö ap kamūöl ngòh meh söl ip famòk mak meh:

¹²Hòn meh kuhēthötre im kinlēḵngô ngam Tēv meh ngam Mā Tēv, im töchūöku kinlēḵngô ò inrē, vahī ngam Tēv ngam Mā Tēv meh nö in meh i ngih sakāmö:

¹³Pòn hòṅ haköpngen meh anga-aṅ nö in re i ngih sakāmö öm tarik, ngaich anga-aṅ inrē nö Tēv meh, sā ṙô ò nö ngaich nö in meh, sā ṙô ò inrē ngaich nö kilēḵngô nö in yik muvöhngö yīö, in Aprahām, in Isāk, in Yāköp inrē.

¹⁴Öt rēhĕn chin höng in meh öich vītö ngih kinlēḵngô ngih töchūöku inrē kinlēḵngô;

¹⁵Tön in ò ngam tösökhaka nö ihih nö hol hī i ngih sakāmö i kūö ngam Tēv hī ngam Mā Tēv, ane inrē in ò öp töt mi-ihih nö hol hī i ngih sakāmö:

¹⁶(Pò yīö akahalōn tök inlahen hī iyöng panam Aikup; tö inlahen hī inrē yih lök elṙôngö pumnāmö tarik yik chahööḵngö yīö;

¹⁷Ngaich yī-ö inrē meuk nup sinòkkūö in cha, insātēv cha, chōn ihong, rupīö humlum, nup mi-in cha:)

¹⁸Hòn öt ngatī nö in yīö kikōnyö tarik, hēk kikānö tarik, hēk mupīhö, hēk miyöngö öp töhavööṙikūö ellōn i ngih sakāmö nö ṙā-ang im Tēv hī ngam Mā Tēv, nö kiröönngöre nö lök la-en nup tēv yip pumnāmö tarik; hòṅ yīö öt aṅhaṅvin tö rĕh tökumtö tö-angū-öṅ tö-angūövö chōn inrē;

¹⁹Ngaich angū-ö min hē ò nö hang në ṙô ngih ötinkôlò, ngaich hakôlòre min anga-aṅ nö ellōnre, nö ngö ṙô, Īnu chin min tö lanāmö, pòrô öich lök im nganë-eṅ el-lōnre, öich ṙūöten hinyōyre holre tö ngam inṙehe nômö:

²⁰Öt aṙēlen ò an min ngam Mā Tēv, ngaich pöri min öp lanīnö ngam Mā Tēv öp lanīnö kumlēḵlōn ò inrē lullöre kūö nö ip tarik, ngaich ṙòkhöre nup öt inkôlò tökūchi i mat ngih līpöre nö hulalhaka min nö i kui ò, ngaich ngam Mā Tēv min nö sichngö öp minë-eny ò nö ṙā-ang elkatòh ngam halīöngö.

²¹Hakôhngen ò min inrē ngam Mā Tēv nö im tötlöök in yip miyöngö aṅ Israĕl, sā nup öt inkôlò im kinlēḵngô ngam tökūichi nö i mat ngih līpöre ngam chöngö:

²²Ngaich yip mu-unôichngöre yanihih, kūön yīö samīöplö min nö unôichrit yīö, yip aṅ tahëng pumnāmö inrē yih min nö ṙā-ang tömarôvat panam, ngaich ngö ṙô, hē cha nö meuk nup tölëlngökūö invah im panam, nup invah inrē nup tī ngam Mā Tēv nö vīten e nö vāhav;

²³Tö ngam panam inrē nö keuheūtngöre nö ihong nö tameūyö, sāl inrē, töhūkūö, öt töteūichtu aṅkūö, öt rēhĕn nö ṙôngu, ötrēhĕn nö sīöp kiyôp nö umuh, sā tinṙōlngö Sôtöm Kômòrā, Atmā, Sapōim inrē, nup tiṙōlngö ngam Mā Tēv im tanānyö ò, lanīnö ò inrē:

²⁴Uroh min nö ṙòkhnyöre ṙô pumnāmö tarik nö ngö ṙô, Kūöyòh öng ngih panam? Asuh ap löknyö ṙanāchö ngam tökiröng tanānyö?

²⁵Ngaich tarik min nö ngö ṙô, Pò cha nö ṙāngö ngam kinlēḵngô ngam Mā Tēv, ngam Tēv yik muvöhngö cha, ngam vahītö ò nö in cha hē ò nö kēnyen cha nö ṙā-ang panam Aikup:

²⁶Ngaich kinröönngöre nö lök la-en tahëng tēv, ngaich salāmö u, nup tēv töt mikahkūö cha, nup töt kahëtö ò nö in cha:

²⁷Lökten ngam tanānyö ngam Mā Tēv nö tōttöre kūö nö i ngih panam, nö kētö kui e tö nup taṙòkhöre rinūtngövah tökūchiyö i mat ngih līpöre:

²⁸Ngaich ngam Mā Tēv nö i tanānyöre nö teuklen cha nö ṙā-ang im panam cha, i lanīnöre inrē, i tökiröng inrē tahëng panam, sā e i ngih sakāmö.

²⁹Aṅ im Tēv hī ngam Mā Tēv nup tönyatngö: nup töhameuktu pöri aṅ in hī tö yip kūön hī örheūheu, hòṅ hī la-evṙen tö nup ṙô i ngih chöngö.