Read Car_Nicobarese I. CHÖNGÖ 31 Bible Online

I. CHÖNGÖ 31 - Car_Nicobarese bible

I. CHÖNGÖ 31

¹Ngaich kiröönngöre Môsös nö ṙô tö në ṙô nö in yik Israĕl.

²Ngaich ngö ṙô ò tö cha, Hēngòng nët anāi samyeūheu ṙēti chin ngaich i ngih sakāmö; ngaich chin rö-ö kô kunyi-inyre kuhēthöt re inrē: ngaich ngö ṙô ngam Mā Tēv tö chu inrē, Hö-ö man më-eṅ havāngngöre tö ngih Yôtan.

³Ngam Tēv meh an min ngam Mā Tēv urēhĕkūö meh nö havāngngöre; anga-aṅ öp min ma-ahatngö vē pumnāmö tarik nö i kūö meh, ngaich më-eṅ min amīnu tö cha: Yôsuā ap min mahavāngngöre nö urēhĕkūö meh, sā ṙô ngam Mā Tēv nö ngaich.

⁴Ngaich ngam Mā Tēv min nö tinī-iv tö cha sā tī ò tö Sihòn Ôk inrē, nak rācha aṅ Amôr, tök panam cha inrē; ök tö-ahöti tö ò.

⁵Ngaich ngam Mā Tēv min nö kēten cha nö i kūö meh, ngaich yī-ö min tinī-iv tö cha sā nup inchöngten nup tinöölô yīö tö chu.

⁶Ngëtöhëch hangë alahare inrē, un pa-ekūö, unrēhĕn rāilö alaha tö cha: tön ngam Tēv meh an ngam Mā Tēv, anga-aṅ an kumrööngöre nö in meh; öt hō an nö öt teunglen tī tö meh, öt rēhĕn nö ṙāngen meh.

⁷Ngaich Môsös nö havëten Yôsuā, ngaich ngö ṙô tö ò nö i kūö yik Israĕl, Ngëtöhëch hangë alahare inrē: tön kiröönngöre man hol vē tarik ip panam öp kinë-eṅkūö cha tö ngam Mā Tēv nö chūöku ṙô nö in yik muvöhngö cha: ngaich vīten cha më-eṅ min nö amīnu tö e.

⁸Ngam Mā Tēv, anga-aṅ kumröönngöre nö urēhĕkūö meh; in meh an min, öt hō an min nö öt teunglentītö meh, öt hō nö rāngen meh: um pa-ekūö, um rĕhĕn ngāng alaha.

⁹Ngaich Môsös nö kūich ngih chöngö, ngaich kētö e nö in yik kūönṙô kikōnyö kūön Lēvī, yik kameun ök kasòng chöngö ngam Mā Tēv, in yik minṙöinylen inrē aṅ Israĕl.

¹⁰Ngaich Môsös nö tölṙô cha, nö ngö ṙô, i kinheūtö tösat samyeūheu, ip hē ngam samyeūheu ṙinānyö, ip tökiröng sakāmö inrūkui,

¹¹Hē Israĕl nö ṙòkhöre nö yih nö hameuktöre nö i kūö ngam Tēv ngam Mā Tēv meh ip chūökö atöllö ò min, vë-ekūö ngih chöngö më-eṅ min i kūö Israĕl nö ṙòkhöre nö elnang cha.

¹²Hamūl yip tarik, kikōnyö kikānö inrē tö yip kunkūöṅnö, aṅ tahëng inrē ap lama-ël inkūp kinlōngö meh, hòṅ cha nö hang, hòṅ cha inrē nö haköp, pa-ekūö inrē tö ngam Tēv meh ngam Mā Tēv, la-evṙen inrē nö haköp kö në ṙô ngih chöngö;

¹³Hòṅ yip kūön cha, yip töt akahalōn, nö hang haköptöre inrē nö pa-ekūö tö ngam Tēv meh ngam Mā Tēv, hanöng saha rô-òten yīö iyöng im panam ngam kū-ö yīö havāngngöre tö Yôtön öi kē-ĕ e nö amin yīö.

¹⁴Ngaich ngö ṙô ngam Mā Tēv tö Môsös, Yĕh meuk, yih nup sakāmö meh öm hòṅ kapah: havëten Yôsuā, umuh nā-aṅ inrē el rūkui manūlö, hòṅ chu kētö chöngö in ò. Kiröönngöre ngaich nā Môsös nāṅ Yôsuā, ngaich umuh cha-a el rūkui manūlö.

¹⁵Ngaich meūkö ngam Mā Tēv nö el rūkui el öp tökufëi taṙūl: ngaich ngam tökūfëi taṙūl nö söktöhech nö i kui inkūp ök rūkui.

¹⁶Ngaich ngih ṙô ngam Mā Tēv tö Môsös, Yĕh meuk, haṙòh man min in yip muvöhngö meh; ngaich choholre min vē tarik, ngaich tömrit tötohtöre tēv ngam panam, ngam chūök cha nö kiröönngöre nö in cha, ngaich rāngen chu min, ngaich piyāingö ngam kinlēḵngô chu ngam vahīten chu in cha.

¹⁷Ngaich min öp tanānyö chu ip sakāmö angū-ö nö tōttörekūö nö lā-al cha, ngaich chu-ö min ṙāngen cha, ane inrē hayunngökūöre min chū-ö tö cha, ngeūṅki min cha-a inrē, pōyen nup min tötlöök kanihngen inrē yamihtöre nö i kui cha; lökten cha min nö ngö ṙô ip sakāmö angū-ö, Röh ön në tötlöök nö yih nö i kui hī, pò ngam Tēv hī nö öt in hī?

¹⁸Kô-en chin min hayunngökūöre ip sakāmö kūö nup tötlöök nup la-en meh min, tökūö yīö havööngökūöre i tahëng tēv.

¹⁹Yĕh lökten, kūich ngih yin tinkökö yīö, haköptö yip kūö Israĕl tö e inrē chaphöt e elvāng cha, hòṅ ngih tinkökö nö mahameukhöti nö lā-in chu nö lā-al yip kūön Israĕl.

²⁰Pò chu hē chu ngaich kēhĕtnen cha ip panam ngam kinlēḵngô chu in yik muvöhngö chu, töhëmö aṅkūö tö aṅteh höni inrē; keuheūtökūö cha-a min ngaich nö nyā-aṅvkūö hatööḵngen re inrē, kirönglöre alaha ngaich; hē e cha-a min nö havööngökūöre nö i tahëng tēv lök la-en u inrē ngaich öt mikūöṙen tö chu, piyaingö ngam mikinlēḵngô chu inrē.

²¹Ngaich angū-ö min, hē nup tötlöök kanihngen inrē nö yih nö i kui cha, ngaich ngih tinkökö min nö hameukhötī nö i kūö cha nö sā mameuk; pò e min nö öt vāchiyö nö ṙā-ang elvāng yip kūön cha: pò chu akahalōn tö chanöh ellōn cha nup tahömken cha, uroh ing töngamuh, urēhĕkūö chu kēten cha im panam ngam ṙô chu kilēḵngôre.

²²Lökten Môsös nö kūich ngih tinkökö ik sakāmö angū-ö, ngaich haköpten yik kūön Israĕl tö e.

²³Ngaich kētö chöngö Yôsuā anga-aṅ ök kikōnyö kūön Nön, nö ngö ṙô, Ngëtöhëch hangë alahare inrē: tön kētö vē kūön Israĕl man min im panam ngam kinlēḵngô chu in cha: ngaich chū-ö min holtöṙah meh.

²⁴Ngaich angū-ö, hē Môsös nö keūheūtötī nö kūich ṙô ngih chöngö nö i mat līpöre, hanöng saha u nö keuheūten,

²⁵Ngaich Môsös nö tölṙô yik Lēvī, yik kameun ök kasòng chöngö ngam Mā Tēv, nö ngö ṙô,

²⁶Kē ngih līpöre ngam chöngö, ṙātö e i kaha ngam kasòng chöngö ngam Tēv meh ngam Mā Tēv, hòṅ e nö umuh nö inmeuktö fālen meh.

²⁷Tön akahalōn chin tö meh ma-ahôngen, tö ngam tökeh likeun meh inrē: yĕh meuk, ṙòngmö aṅ chin in yīö i ngih sakāmö, ngaich yī-ö ahôngen ngam Mā Tēv: ngaich hönlöre unôichrit öp kinpaha chu?

²⁸Hamūltö yip minṙöinylen in chu nö ṙòkhöre i miyöngö yīö, yip yöng kūö yīö kiyung inrē, hòṅ chu elnang cha ṙô tö në ṙô, havëkö ngam halīöngö inrē tö ngam tumlat nö mameuk nö lā-al yīö.

²⁹Tön akahalōn chin tö yīö keuheūtngöre tī min hachōichngöre unôichrit kinpaha chu, öi kānngöre tö ngam talöökö ngam tinöölô yīö tö chu; ngaich palā-aiṙen yī-ö min kūö tötlöök i nup unôich sakāmö; pò yīö min la-evṙen tö tötlöök i ngam Mā Tēv, öi harunnyö tanānyö ò lökten i la-en minë kuntī yīö.

³⁰Ngaich Môsös nö vëhöt elnang yip tömūlhak Israĕl tö në ṙô ngih tinkökö, hanöng saha u nö keuheūtlöre.