Read Car_Nicobarese I. CHÖNGÖ 34 Bible Online

I. CHÖNGÖ 34 - Car_Nicobarese bible

I. CHÖNGÖ 34

¹Ngaich ang Môsös nö ṙā-ang nup panam töṙa-ākūö panam Mô-āp nö yônlö nö i kui öp rôngö Nipō, nö el kui Piskē, öp törònglö nö i Yerikō. Ngaich ngam Mā Tēv nö hameukhömat ò tö nup panam Kilīöt, tölngö kūö Tën;

²Keuheūtlöre inrē Naftalī, töp panam Ifrēm Mānāsē inrē, ṙòkhöre panam Yūta inrē, söl lamuh tö ngam mai,

³Lā lòhngö ngam töṙā-akūö inrē achāṙö Yerikö, öp elpanam nup tösā tö-ôkö, söl i Sō-an.

⁴Ngaich ngö ṙô ngam Mā Tēv tö ò, Ngih ön yih panam kinlēḵngô chu in Aprahām Isāk, Yāköp inrē öich ngö ṙô, Kētö e chin min ip kūön meh: höng hameukhömat meh chin tö e hòṅ meh kôta mat meūkö e, hö-ö pöri më-eṅ havāngngöre umuh.

⁵Lökten Môsös ök tarik ngam Mā Tēv nö kapah nö umuh im panam Mô-āp, sā ṙô ngam Mā Tēv.

⁶Lāpngen ò ngaich acha-aṅ nö el achāṙö öp panam Mô-ap öp tö kamlö nö i Petpiôr: öt tarīk pöri tö akahakūö töp anūlö ò söl i ngih sakāmö.

⁷Hēngòng nët anāi samyeūheu ṙēti ang Môsös hē ò nö kapah; öt paṙeūma elmat anga-aṅ, öt rēhĕn ök kumlēḵ nö kūönngöre.

⁸Lūöi anai sakāmö yik kūön Israĕl nö peūnyö Môsös nö el nup töṙā-akūö panam Mô-āp: ngaich keuheūten nup sakāmö pineūnyö miṙīvlōn tö Môsös.

⁹Ngaich ang Yôsuā ök kikōnyö kūö Nön tö tööḵlö tö mikah; pò Môsös nö ṙātö eltire nö i kui ò: hang ṙô ò ngaich yik tarik kūön Israĕl ngaich taūngen nö sāṙô ngam Mā Tēv nö tölṙô Môsös.

¹⁰Öthĕng tak pròfĕt hēk tösā Môsös nö tö taköllöng nö kui Israĕl hēngen tö e, ök mikahakūö ngam Mā Tēv nö i kūö ò;

¹¹I nup minkahngö pinngangkūö inrē, nup tahīntö ngam Mā Tēv nö in ò nö la-evṙen i panam Aikup, in Fërō, in yik tarik ò nö ṙòkhöre, i nup panam ò inrē nö ṙòkhöre;

¹²Nup minhôiṅyö kël inrē, i nup tökiröng pinhë-eṅkūö inrē nup tī Môsös nö i kūö yik kūön Israĕl.