Read Car_Nicobarese I. CHÖNGÖ 4 Bible Online

I. CHÖNGÖ 4 - Car_Nicobarese bible

I. CHÖNGÖ 4

¹Yĕh pöchö, Ō Israĕl, hangihtöre tö në chöngö tö në inkaha fālen inrē, në inköptö meh tö chu, öm la-evṙen tö u; hòṅ meh aṅ, ngaich kuhēthötre amīnu tö ngam panam ngam kahëtö ngam Mā Tēv yik muvöhngö yīö, nö in yīö.

²Uh yī-ö min ṙūöten hol ngam ṙô ngam tinöölô yīö tö chu, ui rēhĕn min hakūöṅnngö e hòṅ yīö köp tö në Chöngö ngam Mā Tēv, ngam Tēv yīö ngam tinöölô yīö tö chu.

³Meuk tī ngam Mā Tēv nun minë mat yīö nö ngaich tö kūö Pēalpiôr: pòn ṙòkhöre yik tarik tamömrit Pēalpiôr, ngaich an ngam Mā Tēv, ngam Tēv yīö, nö mihôiṅ tö cha nö ṙā-ang ellōn yīö.

⁴Ṙòkhöre pöri yī-ö aṅ töngamuh öi mahaköpngöre im Mā Tēv ngam Tēv yīö.

⁵Yĕh meuk, ngaich chin haköpten yīö tö në Chöngö inkaha fālen inrē, sā tinöölô Chu tö ngam Mā Tēv ngam Tēv chu, hòṅ yīö min ngatī la-en ellōn ngam panam ngam kū-ö yīö kuhēthötre öi kē e nö aminre.

⁶Lökten haköpö u la-evṙen inrē tö u; tön mikah meh an angū-ö mikah elmat meh inrē i kūö vē tarik, vē hamang në Chöngö min, ngaich ngö ṙô, Kô ön ngih tökiröng pumnāmö tarik nö tö akaha tö-akaha elmat inrē nö tarik.

⁷Isuh ṙöng ap tökiröng pumnāmö tarik, öp tö Tēvu tö töröhta nö in cha, nö sā ngam Mā Tēv ngam Tēv hī nö röhta yē hī havëken ò?

⁸Isuh ṙöng ap tökiröng pumnāmö tarik, tö-aṅhāṅv in tö chöngö inkaha fālen inrē öp tö ngatī lanöökö nö sā ngih chöngö, ngih ṙahatö chu töngamuh i kūö yīö?

⁹Höng haṙēmngenre man, kalē-ĕlōn haköpöre, hòṅ meh öt vaichngö tö nuk tö ngaich nö meūkö tö meh, hòṅ u nö öt ṙāngö ngam ellōn meh i rô-ò ten meh aṅ; mikaktölōn yip kūön meh pöri tö u, yip kūön yip kūön meh inrē.

¹⁰Ik sakāmö hē yīö sökhaka i Hōrep i kūö ngam Mā Tēv ngam Tēv yīö, hē ngam Mā Tēv nö ngö ṙô tö chu, Hamūltö yip tarik in chu, hòṅ chu vīten cha nö hang në ṙô chu, hòṅ cha nö haköptöre nö pa-ekūö tö chu i rô-òtö në sakāmö cha nö iyöng kūö ngam panam, hòṅ cha inrē nö haköptö yip kūönre.

¹¹Ngaich hē yīö haröhtöre ngaich sökhaka elkatòh ngam rôngö; ngaich ngam rôngö nö ökngö tökūö tameūiyö nö söl ellōn ngam haliöngö, kumröön tö singūlö, taṙul, tökufëi singūlö inrē.

¹²Ngaich ngam Mā Tēv nö vë-ekūö yīö nö löknyö ellōn kūö ngam tameūiyö: hang pööiny ṙô yī-ö, hö-ö pöri maheūṅkuvö; höng hang pööinyṙô yī-ö.

¹³Ngaich vē-eny nang yīö anga-aṅ tö ngam kinlēḵngô ò, ngam tinöölô yīö tö ò nö hateūngi, anū-ö në tösöm chöngö; ngaich kūichö u anga-aṅ nö i mat nuk töhet tömitāk ihong.

¹⁴Ngaich hē e ngam Mā Tēv nö tölṙô chu haköpten yīö tö në chöngö inkaha fālen inrē, hòṅ yīö la-evṙen tö u im panam kū-ö yīö havāngngöre: kē-ĕ u nö aminre.

¹⁵Lökten yin haṙēmngenre takô: tön rö-ö yin misī maheūṅku tö tösā yô-òv ik sakāmö ngam Mā Tēv nö vë-ekūö yīö nö i Hōrep löknyö ellōn kūö ök tameūiyö:

¹⁶Hòṅ yīö öt hachōichngöre öi vī insātēvre tö tösā insā, tösā kikōnyö hēk tösā kikānö,

¹⁷Tösā töṙeūla nup mī-ing panam, tösā nup tösanëôku chehechōn kumteū nö el taṙul,

¹⁸Tösā nup ṙameūla nö el tumlat, tösā kāḵ el mai lataṙeū töng tumlat:

¹⁹Hòṅ meh öt môklökūöre el halīöngö, ngaich meuk ngam tavūöi töm chingëṅt tö minë taneūsömat, ṙòkhöre inrē nup el halīöngö ngaich tūöki më-eṅ ngaich salāmö u, lök la-en u inrē, minë minchööḵö yip tarik nö ṙòkhöre tö ngam Mā Tēv nö elkatòh ngam halīöngö.

²⁰Kē-ĕ yīö pöri ngam Mā Tēv, ngaich kēnyen yīö ṙā-ang i kūö ök vët tameūyö, ṙā-ang Aikup, pòi hōtu tarik ò, öi amin ò, sā yīö töngamuh.

²¹Hēk inrē ngam Mā Tēv nö līn nö in chu kūö yīö, ngaich chūöku ṙô anga-aṅ nö kilēḵngôre tö chu öt havāngngöre lāmuh tö Yôtan, tö chu inrē öt kuhēthötre im tölöök panam ngam kahëtö ngam Mā Tēv nö in yīö ngam Tēv yīö nö amin yīö:

²²Hōtu pöri chū-ö kapah i kūö ngih panam, sōḵtu öich havāngngöre lāmuh tö Yôtan: havāngngöre pöri min yī-ö, ngaich kē ngam tölöök panam nö amin yīö.

²³Haṙēmngenre pöichö, hòṅ yīö öt vaichngö tö ngam kinlēḵngô ngam Mā Tēv ngam Tēv yīö, ngam ṙô ò nö in yīö, ngaich vī insātēvre yī-ö tö tösā nup sinôḵngen yīö tö ngam Mā Tēv ngam Tēv yīö.

²⁴Pò ngam Mā Tēv ngam Tēv yīö nö tameūiyö töṙāpngökūö, Tēv tökalē-ĕlōn.

²⁵Yē meh min kūönuvö, yip nyīö inrē nö kūönuvö, ngaich marô-òten yī-ö min im panam, ngaich hachōichngöre min yī-ö vī insātēv inrē nö sā nup yô-òv, ngaich la-evṙen yī-ö min tö tötlöök i kūö ngam Mā Tēv ngam Tēv yīö, öi harunnyö lanīnö ò:

²⁶Havëtö ngam halīöngö chin tö ngam tumlat inrē nö mameuk nö lā-al yīö töngamuh, tö yīö min öt rô-òtuṙen keuheūtngöre vah lëlngö ṙā-ang i kūö ngam panam ngam kū-ö yīö havāngngöre kē-ĕ e nö aminre lāmuh tö Yôtön: rö-ö yin min ṙōl sumkam i kūö e, keuheūtngöre vah pöri min öi halëli.

²⁷Pirāti yin min tö ngam Mā Tēv i vē pumnāmö tarik, öt ṙōl tak min yī-ö ṙātu i vē pumnāmö tarik, ip chūök tī ngam Mā Tēv nö hachōngen yīö.

²⁸Ngaich in e yī-ö min lök la-en nup tēv, nup vahīṙen kuntī tarik, chōn ihong inrē, nup töt rēhĕn nö meuk, öt rēhĕn nö hang, öt rēhĕn nö nyā, öt rēhĕn nö tong.

²⁹Yē yīö pöri min löktö in e chöh ngam Mā Tēv ngam Tēv yīö, chöhan keuheūt tö kuilōnre keuheūttö nômöre inrē.

³⁰Hē meh el kanihngen, ngaich teunghö kui meh min anū-ö në, i nup lā unôich sakāmö meh öm havantöre im Mā Tēv ngam Tēv meh, ngaich hang ṙô ò:

³¹Pò ngam Mā Tēv ngam Tēv meh, nö tö-aṙē-ĕlōn nö Tēv; öt hōḵ an nö öt teunglen tī tö meh, öt rēhĕn nö halëlngen meh, öt rēhĕn nö vaichngö tö ngam kinlēḵngô in yik muvöhngö yīö ngam kinlēḵngô ò nö chūöku ṙô nö in cha.

³²Yĕh hatöntöre töngamuh tö nuk tö ngaichngen sakāmö, nuk mu-urēhĕkūö yīö, löktökūö ngam sakāmö hē tī ngam Tēv nö vīlö tarik nö i kūö ngih panam, löktökūö manā-angkūö ngam halīöngö söl im tahëng, yĕn töngāichu tökiröng tösā ngih, hēk yĕn tö ngaich nö hāngö tösā ngih?

³³Tarīku hòng tö ngaich hamang ëlô ngam Tēv nö ṙô-òv nö löknyö ellōn kūö tameūyö, nö tö sā yīö ngaich hang, ngaich aṅ inrē?

³⁴Hēk inrē kalahtenre ang ngam Tēv nö kiröönngöre nö kē pumnāmö tarik nö ṙā-ang i tahëng pumnāmö tarik, nö lökten i inṙööingö, lökten i kinyūngö, lökten i minhôiṅyö kël, lökten i tökiröng pinheṅ-eṅkūö; nö sā nuk tī ngam Mā Tēv ngam Tēv yīö nö i Aikup tö pòkūö yīö nö i kūö minë mat yīö?

³⁵Yī-ö yin töhameukhumat tö e, pò yīö hōtu akahalōn tö ngam Mā Tēv nö anga-aṅ Tēv; öt hōlu an tö tahëng.

³⁶Löktö el halīöngö anga-aṅ nö vīten meh hang ṙô ò, pò ò nö hòṅ haköpten meh: ngaich i kui ngih panam anga-aṅ nö vīten meh meuk ök tökiröng tameūyö ò; ngaich hang nuk ṙô ò löknyö ellōn ök tameūyö.

³⁷Kūö re anga-aṅ nö hāngenlōn tö yik muvöhngö yīö, lökten anga-aṅ nö atollö yip kūön cha unôichrit cha, ngaich kēnyen yīö öi ṙā-ang Aikup, hol tö yöng minhôiṅyöre;

³⁸Nö ahōngö yik pumnāmö tarik nö i kūö yīö tökiröng tökalēḵ tö yīö, nö kēhĕtnen yīö, nö kē-ĕkūö yīö tö panam cha nö amin yīö, sā e ing töngamuh.

³⁹Akahalōn yēḵ lökten töngamuh, ṙāḵtö e inrē ellōn yīö, tö ngam Mā Tēv nö anga-aṅ Tēv el halīöngö lātulöng i kui ngih panam inrē lā taṙeūḵ; öt tahënguvö.

⁴⁰Haköp nup chöngö ò yī-ö, nup chöngö ò, nup tinöölô yīö tö chu töngamuh, hòṅ yīö lööken, tö yip kūön yīö inrē unôichrit yīö, hòṅ yīö inrē ṙūötuṙen sakāmö i kūö ngam panam ngam kahëtö ngam Mā Tēv ngam Tēv yīö nö urāḵngen nö in yīö.

⁴¹Ngaich Môsös nö haköhngen nuk el panam lūöi lā muh tö Yôtan lā maneutlö ngam tavūöi;

⁴²Pòn hōtu öp tökapaha tī tö tarik nö fëlhanga nö afalngöre nö in e, öp tö-amahaiṙen nö kapaha tī nö fël öp holre, rö-ö sin nö tökunyāhaṅ elmat tö ò misī; ngaich afalngöre anga-aṅ nö hēngö chūök i në el panam ngaich iyöng in e nö aṅ:

⁴³Në yih minë-eny u, Pēsör el tönyaṅlnyi ip töṙā-akūö panam, lööṙö yip aṅ Rūpön; Ramòt inrē i Kilīöt, lööṙö yip aṅ Kāt; Kōlan inrē i Pāsān, lööṙö yip aṅ Manāsē.

⁴⁴Angū-ö ön ngih chöngö töṙātu tö Môsös nö i kūö yik kūön Israĕl:

⁴⁵Anū-ö nun në inmeuktö kanô-en, në chöngö inrē, në inkaha fālen inrē, nö ṙô Môsös nö in yip kūön Israĕl, hē cha nö ṙā-ang Aikup;

⁴⁶Lā muh tö Yôtan, el achaṙö lā i Pĕtpiôr, i panam Sihòn öp rācha yik aṅ Amôr, ök mi-iyöng Hespòn, ök tötkô tö tī Môsös tö tī yik kūön Israĕl inrē hē cha nö ṙā-ang Aikup;

⁴⁷Ngaich chā-a nö kēḵ ngam panam ò nö aminre, panam Ôk inrē ök rācha aṅ Pāsān, nak tönët tak rācha aṅ Amôr, lā muh tö Yôtan lā maneutlö ngam tavūöi;

⁴⁸Löktökūö Arōer, öp mī-i taseū achāṙö Arnòn, söl ip rung Siyôn (angū-ö an Hermòn),

⁴⁹Keuheutlöre Arapā lā chuhöt lā muh tö Yôtan, söl ip mai Arapā, el katòh paneūti Piskē.