Read Car_Nicobarese I. CHÖNGÖ 5 Bible Online

I. CHÖNGÖ 5 - Car_Nicobarese bible

I. CHÖNGÖ 5

¹Ngaich Môsös nö havëten yip Israĕl nö ṙòkhöre, ngaich ngö ṙô tö cha, Ō Israĕl, hangihtöre yin tö në chöngö në inkaha fālen inrē nö ṙô chu el nang yīö töngamuh, hòṅ yīö haköpö u, ngaich köpen la-evṙen tö u.

²Vītö kinlēḵngô An ngam Mā Tēv ngam Tēv hī nö in hī nö i Hōrep.

³Öt in yik muvöhngö hī an ngam Tēv nö vīten ngih kinlēḵngô, tön in hī, ayī-ö takô, öi töṙòkhöre ihih aṅ i ngih sakāmö.

⁴I kūö yīö ṙô An ngam Mā Tēv nö vë-ekūö yīö nö i kui ngam rôngö löknyö ellōn kūö ök tameūyö,

⁵(Sökhaka chū-ö ihôi ngam Mā Tēv tö yīö hē e öich hameuktö ngam ṙô ngam Mā Tēv in yīö: pò yīö pa-ekūö tökūö ök tameūyö, ngaich öt peūlöre öi i kui ap rôngö); nö ngö ṙô.

⁶Chū-ö chin Mā Tēv Meh öich Tēv meh, öich kamënyen meh ṙā-ang ap panam Aikup, ṙā-ang el ap patī inkövö.

⁷Uh man tēvu tö tahëng i kūö chu.

⁸Uh man vī tēvre tö insā, tö insā nup latulöng el halīöngö, hēk inrē tö insā nup lataṙeū töng tumlat, hēk inrē tö insā nup aṅ el mak elkatòh ngih tumlat:

⁹Uh më-eṅ sōntöre in u, uh rēhĕn lök la-en u; tön Mā Tēv meh chin öich Tēv meh tökalē-ĕlōn, öich Tēv, chöhkö tökööl yik muvöhngö chin in yip kalvī cha, ip linūöi chap finën chap cha inrē yip tösumrīktö chu;

¹⁰Hameuk tö miṙēlōn i tököṅnyu, in cha yip töhāngen tö chu tököptī inrē tö në chöngö chu.

¹¹Uh man höng töl kē minë-eny ngam Mā Tēv ngam Tēv meh: tön rö-ö an min nö töt fāluṙen tö tī ngam Mā Tēv ngam tötöl nö kē minënyö ò.

¹²Haköpkö ngam anôilö sakāmö, haköpö e nö het, sā inchöngten meh tö ngam Mā Tēv ngam Tēv meh.

¹³Tafūöl sumkam më-eṅ la-evṙen, öm la-evṙen tö nup la-en meh nö ṙòkhöre:

¹⁴Anôilö ngam Mā Tēv meh pöri ngam sinātö sakāmö ngam Tēv meh: uh më-eṅ la-evṙen tö yô-òv hē e, më-eṅ un rēhĕn öp kikōnyö kūön meh, un rēhĕn ngam kikānö kūön meh, un rēhĕn ngam kikōnyö kūön alaha meh, un rēhĕn ngam kikānö kūön alaha meh, un rēhĕn ap kōiny nuā meh, un rēhĕn ap köttö meh, un rēhĕn nö hĕng nòng aṅ i nup nūa meh, un rēhĕn ap aṅ tahëng ap mī-in meh; hòṅ ap kūön alaha meh, tap kikānö kūön alaha meh inrē nö sā meh nö heūheure.

¹⁵Hòṅ köpölōn më-eṅ inrē tö meh misī kūön alaha ip panam Aikup, ngaich ngam Mā Tēv ngam Tēv meh nö kēnyen meh ṙā-ang in e nö aṅtī töminhôiṅyö kël töteuthaka: lökten ngam Mā Tēv ngam Tēv meh nö hachöngten meh haköpkö ngam anôilö sakāmö.

¹⁶Milēḵṙen man tö yöngre kikōnyö tö yöngre kikānö inrē, sā inchöngten meh tö ngam Mā Tēv ngam Tēv meh; hòṅ nup sakāmö meh nö marô-òten, hòṅ meh öm lööktöhëchṙen, i kūö ap panam ap kahëtö ngam Mā Tēv nö in meh ngam Tēv meh.

¹⁷Uh man kumpahangvah tarik.

¹⁸Um rēhĕn asĕha.

¹⁹Um rēhĕn ulāya.

²⁰Um rēhĕn sūöchkö mat re tö fālen holre.

²¹Um rēhĕn yikngö pīhö holre; um rēhĕn lōnu tö patī holre, töp taṙeū ò, hēk kūön alaha ò kikōnyö, hēk kūön alaha ò kikānö, öp kōiny nūa ò, hēk ap hol meh.

²²Anū-ö nun në ṙô ngam Mā Tēv nö vë-ekūö yiö ṙòkhöre öi tömūlhaka i kui ngam rôngö löknyö ellōn kūö ap tameūyö, löknyö el taṙul, löknyö el ök tökufëi sinngūlö inrē, nö pōitô; ngaich anga-aṅ nö öt tōpnyö ṙôken u. Ngaich kūichö u anga-aṅ i mat nuk tönët tömitāk ihong, ngaich kētö u nö in chu.

²³Ngaich hē yīö hang ök ṙô nö löknyö ellōn ök sinngūlö, hē ngam rôngö nö hūṙökūö tö tameūyö, ngaich yī-ö haröhtöre yihtöre in chu, ṙòkhöre yik mākūö yip miyöngö yīö, tö yip minṙöinylen yīö inrē;

²⁴Ngaich ngö ṙô yī-ö, Yĕh meuk ngam Mā Tēv ngam Tēv hī nö hameuktö ngam vanāyöre nö in hī tö ngam ṙôkö ò inrē, ngaich in hang ṙô ò löknyö ellōn kūö ngam tameūyö: meuk in ngaich i ngih sakāmö tö ngam tēv nö vë-ekūö tarik, ngaich anga-aṅ nö aṅ.

²⁵Lökten kūöyòh öi min ayī-ö kapah? Pò ngih min tökiröng tameūyö nö haṙāpngen hī: yē hī min hēk hang ṙô ngam Mā Tēv ngam Tēv hī, kapah min ayī-ö.

²⁶Achīö ṙöng ap in vē tarik nö ṙòkhöre tö-aṅ, öp hamang ṙô ngam tö-aṅ Tēv nö löknyö el kūö tameūyö ṙô nö kahôka, nö sā hī ayī-ö?

²⁷Kuṙòh haröhtöre man më-eṅ, hang nup ṙô ngam Mā Tēv min nö ṙô-òv, ngam Tēv hī ngaich ṙô-òv pömchö in ih ṙòkhöre, tö nup ṙô ngam Mā Tēv nö in meh, ngam Tēv hī; ngaich min īhö hangö u, ngaich la-evṙen tö u.

²⁸Ngaich ngam Mā Tēv nö hang nuk ṙô yīö, hē yīö vë-ekūö chu; ngaich ngö ṙô ngam Mā Tēv tö chu, Hang nup ṙô vē tarik chin, nuk ṙô cha nö in meh: huvēu-en ṙô yik tö nuk ṙô re.

²⁹Ngatī tal öre öp ellōn in cha, hòṅ cha öre nö pa-ekūö tö chu, ngaich örheūheu nö haköp në chöngö chu, hòn löök nö in cha nö örheūheu, in yip kūön cha inrē!

³⁰Kuṙòh ngö ṙô tö cha, Havan yin i nup rūkui yīö.

³¹Sökhak pöri më-eṅ ihih in chu, hòṅ chu ṙônyö nup taṙòkhöre chöngö in meh, nup chöngö, inkaha fālen inrē, nup haköptö meh min in cha, hòṅ cha nö la-evṙen tö u ip panam kahëtö chu in cha nö amin cha.

³²Haköpkö u yin min öi la-evṙen sā hinôtö yīö tö ngam Mā Tēv ngam Tēv yīö: hö-ö yin min kānngöre lā hāmö hēk lā tavē.

³³Lök ël nup talöökö yin min hinôtö yīö tö ngam Mā Tēv ngam Tēv yīö, hòṅ yīö aṅ, ngaich lööken min angū-ö nö in yīö, hòṅ yīö min marô-òten im panam ngam amin yīö min.