Read Car_Nicobarese I. CHÖNGÖ 6 Bible Online

I. CHÖNGÖ 6 - Car_Nicobarese bible

I. CHÖNGÖ 6

¹Ngih ön yih, nö chöngö, inkaha fālen inrē, ngam hachöngten ngam Mā Tēv, ngam Tēv yīö nö haköpten yīö hòṅ yīö la-evṙen tö u ip panam kū-ö yīö kiröönngöre öi kē-ĕ e nö aminre:

²Hòṅ yīö pa-ekūö tö ngam Mā Tēv ngam Tēv yīö, ngaich haköp nup chöngö ò nup hachöngten ò, nup tinöölô meh tö chu, më-eṅ töp kūön meh kikōnyö, töp kūön öp kūön meh kikānö inrē, i rò-òtö nup sakāmö meh aṅ nup sakāmö meh min nö ṙūötu rô-òten.

³Lökten, Ō Israĕl, hangihtöre, haköpken e öm la-evṙen tö e; hòṅ e min nö lööken nö in meh, hòṅ yīö inrē ṙūölöre ṙôken, sā ṙô ngam Mā Tēv, ngam Tēv yik muvöhngö yīö nö kilēḵngôre nö in yīö, ip panam töhëmö aṅ kūö tö aṅteh hönī inrē.

⁴Hangihtöre, O Israĕl: ngam Mā Tēv ngam Tēv hī höng hĕng tak an nö Mā Tēv:

⁵Hāngenlōn man tö ngam Mā Tēv ngam Tēv meh keuheūttö kuilōnre, keuheūt tö nômöre, keuheūttö kumlēḵre inrē.

⁶El kuilōn meh nun min në ṙô në hinôtö meh tö chu töngamuh:

⁷Haṙēmngenre man haköpten yip kūönre tö u, kakken u inrē in cha yē meh ūichhaka el pati re, yē meh inrē el talöökö kiröönköre, yē meh inrē hulalhakaṙen, yē meh inrē chōholre.

⁸Nyëktö u min më-eṅ inrē nö i kël meh i māl meh ihôi mat meh inrē nö inköpkö lōnmeh.

⁹Ngaich kūichtö u më-eṅ i kaha nup machööḵlö inkūp nup patī meh, i kaha nup inkūp lökhöt inrē.

¹⁰Ngaich min hē ngam Mā Tēv ngam Tēv meh nö kēhĕt meh el ngam panam ngam ṙô ò nö chūöku ṙô nö in yik muvöhngö yīö, in Aprahām, in Isāk, in Yāköp inrē, nö kē-ĕkūö meh; tökiröng tölöök inrē elpanam nup töt vahīlö meh.

¹¹Patī inrē tööḵlö tö tölöök chehen, nuk töt hatööḵlöngö tö meh, chūök mak inrē töhulhötvö, nuk töt hulhötvö tö meh, panô-òṅ vāin, chōn ôliv inrē nuk töt teūichtu tö meh, nyā-aṅvkūö man min ngaich tööḵngen;

¹²Ngaich ṙēmen më-eṅ hòṅ meh öt vaichngö tö ngam Mā Tēv, ngam kamënyen meh ṙā-ang ip panam Aikup, ṙā-ang el ap patī inkövö.

¹³Pa-ekūö man tö ngam Mā Tēv ngam Tēv meh; höng anga-aṅ inrē lahök la-en meh, i minë-eny ò më-eṅ inrē chūöku ṙô.

¹⁴Hö-ö yin min tömrit tahëng tēv, nup aṅ i nup tēv yip tarik yip mahavīlen yīö;

¹⁵Pò ngam Mā Tēv ngam Tēv meh, ellōn meh nö tökalē-ĕ kumnyahlōn nö Tēv; hòṅ ngam lanīnö ngam Mā Tēv ngam Tēv meh, nö öt öktikūö nö in meh, ngaich halëlngen meh anga-aṅ ṙā-ang i kūö ngih tumlat.

¹⁶Uh yin kalah ngam Mā Tēv ngam Tēv yīö, sā yīö misī kalahan i Massah.

¹⁷Hòṅ harēmngenre yin haköp nup inchöngten aṅ in Mā Tēv nup inmeuktö tökô-en inrē aṅ in ò, tö nup chöngö ò, nup tinöölô meh tö ò.

¹⁸La-evṙen më-eṅ inrē töp tö huveū tölöök inrē nö i kūö ngam Mā Tēv: hòṅ e min nö lööken nö in meh, hòṅ meh kiröönngöre kē aminre tö ngam tölöök panam ngam kinlēḵngen yik muvöhngö yīö tö ngam Mā Tēv.

¹⁹Öm kuringnyö yip tökunyahaṅ elmat tö meh nö ṙā-ang i kūö meh, sā ṙô ngam Mā Tēv.

²⁰Yē öp kūön meh min kikōnyö nö ngö ṙô nö hatönö meh, Asuh ön në minkahngö kanô-en, në chöngö inrē, tö në inkaha fālen, në tinöölô meh tö ngam Mā Tēv ngam Tēv hī?

²¹Ngaich ngö ṙô min më-eṅ töp kūönre kikōnyö, töhakövö in īhö misī tö Fërō i Aikup; ngaich holtö kumlēḵ këlre ngam Mā Tēv nö kēnyen ih ṙā-ang Aikup:

²²Hameuktö minkahngö ngam Mā Tēv pinngangkūö inrē tökiröng töchökhu i kui Aikup, i kui Fërō, i kui ih:

²³Ngaich kēnyen ih angā-aṅ ṙā-ang umuh, pòn hòṅ kēhĕtnen ih anga-aṅ, nö kētö ngam panam nö in ih ngam kinlēḵngen yik muvöhngö ih tö ò.

²⁴Ngaich töölô īhö tö ngam Mā Tēv öi la-evṙen tö në chöngö öi pa-ekūö tö ngam Mā Tēv ngam Tēv hī, pò hī hōtu lööken örheūheu, hòṅ ò nö ṙapken hī aṅ, sā ngih töngamuh.

²⁵Ngaich lanöökö min angū-ö nö in ih, yē ih öi kēken nuk inchöngten i kūö ngam Mā Tēv ngam Tēv hī, sā hinôtö hī tö ò.