Read Car_Nicobarese I. CHÖNGÖ 7 Bible Online

I. CHÖNGÖ 7 - Car_Nicobarese bible

I. CHÖNGÖ 7

¹Hē ngam Mā Tēv ngam Tēv yīö nö kēhöt meh im panam ngam kū-ö meh kiröönngöre ön kē-ĕ e nö amin meh, ngaich ahōnyö yip töpōyen min pumnāmö tarik i kūö meh, yip Hitāit, Kirkesait, Amôrait, Kanā-an, Perisait, Hivait, Yēpusait, sat pumnāmö tarik tökiröng tökalēḵ tö meh inrē;

²Ngaich hē ngam Mā Tēv ngam Tēv meh min nö kēten cha nö in meh, ngaich fëlö cha më-eṅ; keuheūtngö vah cha min më-eṅ; um vī kinlēḵngô in cha, um rēhĕn hameuktö miṙēlōn in cha:

³Um rēhĕn hapīhö in cha; un kētu ap kūön meh kikānö nö ip kūön ò kikōnyö, un rēhĕn ap kūön ò kikānö nö kē-ĕ tö meh nö pīhö kūön meh kikōnyö.

⁴Tön havööngökūö ap kikōnyö kūön meh min anga-aṅ nö i tinöömörit chu, pòn hōtu cha-a nö lök la-en tahëng tēv; ngaich min ngam tanānyö ngam Mā Tēv nö tōttörekūö nö in meh, ngaich anga-aṅ min nö ka-euitī nö halëlngen meh.

⁵Ngö inlahen tī pöri yī-ö min tö cha; tīṙōlngö nup tahāklö cha yip min, pinyeny tīre inrē likukngö nup töfën mireṙö machööḵlö, kūöltö ap Asērim cha inrē haṙāpngö nup insātēv cha inrē nö i kūö tameūyö

⁶Tön töhet man më-eṅ öm tarik im Mā Tēv ngam Tēv meh: katöllen meh an ngam Mā Tēv ngam Tēv meh öm tö tohngöre tarik ò, öm ṙā-ang i vē tarik nö ṙòkhöre aṅkūö ngih panam.

⁷Öt in yīö tī an ngam Mā Tēv tö ngam hanāngenlōnre tö yīö, öt rēhĕn nö atöllen yīö nö kūö yīö öi mötlö ṙôngö tö tahëng tarik; pò yīö manā-angkūö ṙôngö i vē taṙòkhöre tarik:

⁸Kūö ngam Mā Tēv pöri nö hāngenlōn tö yīö, kūö ò inrē, nö haköp öp töchūöku kinlēḵngô ò, in yik muvöhngö yīö, angū-ö lökten ngam Mā Tēv nö aṅtī tö minhôiṅyö këlre, nö ṙānyen yīö ṙā-ang el öp patī inkövö, ṙā-ang eltī Fërō ap rācha aṅ Aikup.

⁹Akahalōn yin lökten tö ngam Mā Tēv ngam Tēv yīö, Angā-aṅ an Tēv; tökô-en nö Tēv, ngam tököp tö kinlēḵngô miṙēlōn inrē in cha yip töhāngenlōn tö ò mahaköp në chöngö ò inrē söl i tököṅnyu tumköl chap;

¹⁰Havahal inrē nö i kūö cha yip tö sumrīk tö ò, nö halëlngen cha: öt hāṅten an min nö in ò ngam tö sumrīk tö ò, i kūö ò tī an min nö kētö invahal.

¹¹Lökten man haköp ngam inchöngten, në chöngö inrē, tö në inkaha fālen, në hinôtö meh i ngih sakāmö, öm la-evṙen tö u.

¹²Ngaich mīnö kūö yīö hang në inkaha fālen, ngaich köptī, la-evṙen inrē tö u, ngaich ngam Mā Tēv min ngam Tēv yīö nö haköpngö ngam kinlēḵngô nö in yīö tö ngam miṙēlōn ngam tökilē-ĕyö tö ò nö in yik muvöhngö yīö:

¹³Ngaich anga-aṅ min nö hāngenlōn tö yīö, hakôlò yīö, ṙūölö ṙôngö yīö inrē: hakôlò nup ṙòng ngam alaha yīö inrē min anga-aṅ ngam tumlat yīö, sāiny yīö, vāin yīö, tö nup ṙòng tavī-i yīö inrē tö nup töṙūölöre ṙôken inrē kan nuā yīö tö nup kūön nup chehen yīö, im panam kinë-eṅkūö yīö ngam ṙô ò nö kilēḵngôre nö in yik muvöhngö yīö.

¹⁴Tö mötlö inkôlò yin min tö vē taṙòkhöre tarik: öt kikōnyuvö min hēk kikānö in yīö tötmikūönlö, hēk in nup chehen yīö töṙeūla.

¹⁵Kēngö nup invah an min ngam Mā Tēv nö ṙā-ang in yīö nö ṙòkhöre, öt hĕng nup min tötlöök invah aṅ Aikup, nup mikahlōn yīö, nö ṙātu nö i kui yīö, ikui yip taṙòkhöre pöri min tösumrīk tö yīö nö ṙātu angū-ö.

¹⁶Keuheūtngövah yip tarik man yip kahëtö ngam Tēv yīö nö in meh ngam Mā Tēv; um aṙē-ĕ elmat tö cha: um rēhĕn lök la-en nup tēv cha tön angū-ö an min tinngöp meh.

¹⁷Yē yīö min ngö ṙô ellōnre, Maṙôngö yin vē pumnānö tarik tö ih, sitih kanô-òṅ öi ahōngen cha?

¹⁸Uh yin pa-ekūö tö cha: köpölōn yin tö tī ngam Tēv yīö ngam Mā Tēv nö in Fërō, in yip aṅ Aikup inrē nö ṙòkhöre;

¹⁹Nup yöng kinlaha tömeūkö tö minë mat yīö nö ngaich, nuk minkahngö, pinngangkūö inrē, kumlēḵ kël, ngam töhateutnyu kël inrē, aṅtī ngam Tēv meh ngam Mā Tēv nö kēnyen, yīö; ngati tī an ngam Tēv yīö min ngam Mā Tēv nö in yip tarik nö ṙòkhöre yip pinhë-eṅkūö yīö.

²⁰Hēk inrē ngam Tēv yīö ngam Mā Tēv nö tīntö kilamta-ō nö in cha, hanöng saha yip tö-ōtren nö lëlngö nö i kūö u, ngaich hayunngö u.

²¹Uh man pa-ekūö tö cha: tön el ṙôngö meh an ngam Tēv meh ngam Mā Tēv, tökiröng nö Tēv, pinhë-eṅkūö inrē.

²²Rahëich rahëichhang an ngam Tēv meh min ngam Mā Tēv nö ahōngö yip pumnāmö höng hĕng tum tī nö ahatngen cha, hòṅ nup töṙeūla aṅ el inchōn nö öt ṙūölöre ṙôken nö in meh.

²³Ngam Tēv meh pöri min ngam Mā Tēv kamëten cha nö in meh, ngaich min më-eṅ mihôiṅ tö cha öm pōihang vah tī, hanöng saha cha nö keuheūtngörevah.

²⁴Kēten yip rācha min anga-aṅ nö el tī meh, ngaich më-eṅ min vītö nup minë-eny cha nö hatngö nö el katòh ngam halīöngö: öt tarīku min tökô nö sökhaka nö i kūö meh, hanöng saha meh hatngö tī tö cha.

²⁵Haṙāpi min tö tameūyö tö yīö nup insātēv cha: uh më-eṅ yikngö rupīö hēk humlum nup i alaha u, um rēhĕnkē-ĕ u nö chehenre, hòṅ meh öt tingöphötre in u: tön sinòṅkkūö ngam Tēv meh an angū-ö ngam Mā Tēv:

²⁶Uh më-eṅ kēhöt sinòṅkūö el patīre, öm kētöre sā u nö tö kētu: sā-òkhö uh man nö ṙòkhöre sōḵo u inrē nö ṙòkhöre; tön tökētu an angū-ö nö i insātēv.