Read Car_Nicobarese I. CHÖNGÖ 8 Bible Online

I. CHÖNGÖ 8 - Car_Nicobarese bible

I. CHÖNGÖ 8

¹Haköp nup inchöngten nö ṙòkhöre, la-evṙen tö u nup tinöölô chu töngamuh, hòṅ yīö aṅ, ṙūöhölre ṙôngö inrē, ngaich kiröönngöre kē ngam aminre panam ngam kinlēḵngô ngam Mā Tēv nö in yik muvöhngö yīö.

²Köpölōn yī-ö inrē tö nup talöökö nup talöökö tī ngam Mā Tēv nö hachō-o yīö el tönyalnyi i në töfën anāi samyeūheu, pò ò nö hòṅ miṙēngen yīö, nö kalaha yīö, pòn hòṅ akahalōn, tö ellōn yīö, yē yīö hō haköp në chöngö ò hēk yēi rö-ö.

³Miṙēngen yīö ngaich anga-aṅ, ngaich hökngen yīö kapahare, ha-aṅlen yīö ngaich tömanna, öp öt mikahkūö yīö, öt rēhĕn nö mikahkūö yik muvöhngö yīö; pòn hòṅ mikahtölōn yīö anga-aṅ tö tarik nö öt höng kūö ròti nö aṅ, tön kūö nup lamöknyö elvāng ngam Mā Tēv ön ngòh tarik nö aṅ.

⁴Öt köinyngö nup inyut meh nö i alaha meh, öt rēhĕn ngam ukröön meh nö yöl, i në töfën anāi samyeūheu.

⁵Ngaich ngëichkö e më-eṅ ellōnre, tö e nö sā tī ngòh tarik nö chökṙen kūön re, ngatī ngam Tēv meh ngam Mā Tēv nö chökṙen meh.

⁶Haköp në chöngö ngam Tēv re man ngam Mā Tēv, lök el minë talöökö ò, pa-ekūö inrē tö ò.

⁷Tön kēten meh an ngam Tēv meh ngam Mā Tēv, nö i tölöök panam, panam töhëmlö mak, chūök töpöklö mak tö-aṙū, lamöklö el achāṙö kui rung inrē.

⁸Panam maita pārli inrē, vāin, anychir chōn anār inrē; panam tavī-i òliv höni inrē;

⁹Panam chūök meh nyā ròti töthō nö iyāich, öt hēngö hanāten man tö chehen in e; panam nup ihong tösā vët löknyö el nup rung e më-eṅ kô-òren ul mās.

¹⁰Nyā-aṅvkūö min më-eṅ ngaich tööḵngen, ngaich hakôlò ngam Tēv re ngam Mā Tēv tökūö ngam tölöök panam ngam kakëtö ò nö in meh.

¹¹Haṙēmngenre hòṅ meh öt vaichngö tö ngam Tēv meh ngam Mā Tēv? öm öt köp tö në inchöngten aṅ in ò, inkaha fālen, në chöngö ò inrē, në tinöölô meh tö chu töngamuh:

¹²Hòṅ meh öt höng keuheūthëkūö nyā-ngaich tööḵngen, mānlö nup patī inrē tövai ngaich iyöng ël u:

¹³Yē nup chehen meh töṙeūla nö ṙūölöre ṙôken, nup rupīö meh humlum meh inrē nö ṙūölöre ṙôken ṙūölöre ṙôken inrē nup töng chehen meh;

¹⁴Tāilö min ngaich öp ellōn meh, ngaich më-eṅ vaichngö tö ngam Tēv re ngam Mā Tēv, ngam kamënyen meh ṙā-ang ap panam Aikup, ṙā-ang el ap patī inkövö;

¹⁵Ngam mahachō-o meh nö lök el öp tökiröng pinhë-eṅkūö inrē tönyalnyi, i chūök nup pēch tameūyö ka-ëp inrē, i chūök öp töyal tumlat chūök töt mākuvö; ngam kamënyö mak meh nö ṙā-ang in öp ihong fanak tameūyö;

¹⁶Öp maha-aṅlen meh el tönyalnyi tö manna, ök töt mikahkūö yik muvöhngö yīö,; pòn hòṅ miṙēngen meh anga-aṅ hòṅ kalaha meh inrē, nö mikahten meh ip lā-unôich:

¹⁷Ngaich ngö Ṙô më-eṅ ellōnre, Ngam minhôinyö chu an kumlēḵ kël chu inrē tö teūngen töng kanôlò chu.

¹⁸Köpölōn pöri më-eṅ tö ngam Tēv meh ngam Mā Tēv, tön anga-aṅ an kamëtö minhôiṅyö meh öm kē kanôlòre; pò ò nö hòṅ haköpngö ngam kinlēḵngö ò nö in yik muvöhngö yīö, sā e ing töngamuh.

¹⁹Ngaich yē meh min vaichngö ngam Tēv meh ngam Mā Tēv tömrit nup tahëng tēv, ngaich lök la-en u, salāmö u inrē vë-enynang meh chin töngamuh tö yīö min öthō öt lëlngö.

²⁰Sā yik pumnāmö tarik yik halëlngö ngam Mā Tēv i kūö yīö, ngatī lanëlngö yī-ö min; pò yīö öt hòṅ hang ṙô ngam Tēv yīö ngam Mā Tēv.