Read Car_Nicobarese I. CHÖNGÖ 9 Bible Online

I. CHÖNGÖ 9 - Car_Nicobarese bible

I. CHÖNGÖ 9

¹Israĕl, hangihtöre: hòṅ havāngngö kui Yôtan man ing töngamuh, öm kiröönngöre ömīnu tö yip pumnāmö tarik, tökiröng, tökalēḵ tö meh, elpanam tökiröng, tösöl el halīöngö rô-òl kui kinlōngö.

²Tökiröng tarik tömarôlòng inrē, yip kūön Anakim, yip mikahlōn meh, yip ahang meh tö ngö el nang, Chiāp tökô nö sökhaka nö i kūö yip kūön Anak?

³Lökten yin ahakalōn ing töngamuh, tö ngam Tēv meh ngam Mā Tēv nö anga-aṅ mu-urēhĕkūö meh nö havāngngöre nö sā töṙāpngökūö tameūyö, anga-aṅ an min mahalëlngen cha, anga-aṅ min inrē tumṙeūten cha nö i kūö meh: ngaich lökten meh ahōnyen cha, vīten cha nö ka-eūyen nö hatngö, sā ṙô ngam Mā Tēv tö meh.

⁴Uh pömchö ngö ṙô ellōnre, tökinheūtötī ngam Tēv meh ngam Mā Tēv nö kuringnyen cha ṙā-ang i kūö meh, Kūö lanöökö chu ngam Mā Tēv nö kēten chu amīnu tö ngih panam: ngaich kūö öt lanöököre vē pumnāmö tarik nö ahōṙiyö tö ngam Mā Tēv nö i kūö meh.

⁵Öt kūö lanöökö meh, hēk öt kūö chaniplö ellōn meh töp lökten meh kiröönngöre öm kē ngam panam cha nö amin, kūö öt lanöökö cha pöri vē pumnāmö tarik ngam Tēv meh ngam Mā Tēv nö ahōngen cha nö i kūö meh, pòn hòṅ haköpngö ngam ṙô angā-aṅ tökilē-ĕyö tö ngam Mā Tēv nö in yik muvöhngö yīö, in Aprahām in Isāk, in Yāköp inrē.

⁶Lökten yin akahalōn tö ngam Tēv yīö ngam Mā Tēv nö öt kētö ngih tölöök panam amin yīö nö kūö lanöökö yīö; pò yīö tarik tökehe likeun.

⁷Köpölōn, um vaichngö, töre harunnyö lanīnö ngam Tēv meh ngam Mā Tēv nö el tönyalnyi: löktökūö ik sakāmö hē meh kukunyī-inyre ṙāngö ngam panam Aikup, hanöng saha yīö sölta ihih, ma-ahôngen ngam Mā Tēv yin.

⁸I Hōrep (Sīnāi) yī-ö inrē harunnyö lanīnö ngam Mā Tēv, ngaich ngam Mā Tēv nö hòṅ halëlngen yīö i lanīnöre.

⁹Hē chu yônlö ngaich i kui ngam rôngö öich kē minë tömitāk ihong, ngam kinlēḵngô ngam Mā Tēv nö in yīö, ngaich fën anāi sumkam fën anāi mitööm inrē chū-ö i kui ngam rôngö: öt nyā rôti öt òk mak öich rēhĕn.

¹⁰Ngaich ngam Mā Tēv nö kētö minë tönët tömitāk ihong nö in chu tökūichö mat tö kuntī ngam Tēv; i mat u nö asā-a nup ṙô nö kūichö, nup ṙô ngam Mā Tēv nö in yīö i kui ngam rôngö löknyö ellōn kūö ök tameūyö ik sakāmö inmūlöre.

¹¹Ngaich hē kinheūten nup töfën anāi sakāmö fën anāi hatööm inrē, ngaich ngam Mā Tēv nö kētö nuk tönët tömitāk ihong nö in chu, nuk tö mitāk ihong ngam kinlēḵngô.

¹²Ngaich ngö ṙô ngam Mā Tēv tö chu, chōholre ka-eūyen man yônti ṙā-ang ihih; tön hachōichngöre yip tarik meh yip kahënyö meh nö ṙā-ang Aikup: ka-eūyen yip nö kānngöre tö ngam talöökö ngam tinöölô cha tö chu; vī insā tēv yip tö töhaṙöichö mās.

¹³Hēk inrē ngam Mā Tēv nö ngö ṙô tö chu, Meuk vē tarik chin ngaich, yĕh meuk, tarik yin tö kehe likeun;

¹⁴Hökngen chu hòṅ chu halëlngen cha, sichngö minë-eny cha inrē ṙā-ang elkatòh ngam halīöngö: ngaich vīlen meh chū-ö min pumnāmö tarik tökalēḵ tökiröng tö cha inrē.

¹⁵Havöökūöre chū-ö ngaich, ngaich yônti ṙā-ang kui ngam rôngö, ngaich ngam rôngö nö hūkūö tö tameūyö: ngaich nup tömitāk i hong ngam kinlēḵngô nö aṅngöre lā-a nö eltī chu.

¹⁶Ngaich ngëicha chū-ö, ngaich meuk, tö yīö köölö fālen im Tēv yīö ngam Mā Tēv; vī insātēvre yī-ö ngaich tö mās: ka-eūyen yī-ö ngaich kānngöre tö ngam talöökö hinôtö yīö tö ngam Mā Tēv.

¹⁷Kē nup tönët chū-ö ngaich tö mitāk ihong, ngaich kavalngö u nö rā-ang el në tö nët eltī chu, ngaich likukngö u i kūö yīö.

¹⁸Afukngöre chū-ö ngaich i kūö ngam Mā Tēv, sā re ik raneh, fën anāi sakāmö fën anāi hatööm inrē: öt nyā rôtī öt òk mak rēhĕn; kūö nup tökööl yīö nuk kanöölö fālen yīö, öi la-evṙen tö tötlöök i kūö ngam Mā Tēv, öi harunnyö lanīnö ò.

¹⁹Pò chu pa-ekūö tö ngam lanīnö ngam töṙāich inrē kumnyahlōn, ngam lanīnö ngam Mā Tēv nö in yīö nö hòṅ halëlngen yīö. Hang ṙô chu pöri ngam Mā Tēv ik hē e inrē.

²⁰Līn ngam Mā Tēv inrē nö in Āròn nö hòṅ fëlngen ò: vë-elkui Āròn pöri chū-ö inrē ik hē e.

²¹Kē ngam tökööl yīö chū-ö ngaich, ngam kūön nuā vahī yīö, ngaich föngngen ò chū-ö i kūö tameūyö, ki sichngen ò inrē tö röönre, tilöönö ò nö pihīöyö, hanöng saha ò nö sā pinhīöyö pitung: ngaich hōngngö nuk pitung ò chū-ö nö el öp tö hëmti mak ṙamā-ang kui ngam rôngö.

²²I Tapēra inrē, i Massah, i Kīprōthata-ava inrē yī-ö harunnyö lanīnö ngam Mā Tēv.

²³Ngaich hē ngam Mā Tēv nö tīnngen yīö ṙā-ang Katespārnia, nö ngö ṙô, Kuṙòh kē aminre tö ngam panam ngam kahëtö chu in yīö; ngaich yī-ö ahôngen chöngö ngam Tēv yīö, ngam Mā Tēv, öt ṙātö ellōnre yī-ö inrē in ò, öt rēhĕn hang ṙô ò.

²⁴Löktökūö ök sakāmö hēten tö chu akahakūö tö yīö öi ahôngen ngam Mā Tēv.

²⁵Lökten chu afukngöre i kūö ngam Mā Tēv i minë töfën anāi sakāmö fën anāi hatööm inrē öich afukngöre; pò ngam Mā Tēv tö ṙô re nö hòṅ halölngen yīö.

²⁶Ngaich vë-ekūö ngam Mā Tēv chū-ö, öich ngö ṙô, Ō Mā Tēv, un halëli yin vē tarik meh vē amin meh vē ṙahānyö meh lökten i ṙôkö meh, vē kahënyö meh ṙā-ang Aikup holtö minhôiṅyö këlre.

²⁷Köpölōn tö yik tarikre, Aprahām, Isāk, Yāköp inrē un ngëichkö nganë-eṅ minôṙô vē tarik, un rēhĕn im öt lanöökö cha un rēhĕn i tökööl cha:

²⁸Hòn öt ngö ṙô ap töṙā-ayö panam ṙeū-eung ih kēnyu tö meh, Kūöre an ngam Mā Tēv nö ötkô nö kēten cha nö ip panam öp ṙô ò nö kilēḵngôre nö in cha, kūö re inrē nö kunyaha elmat tö cha, kēnyen cha anga-aṅ nö kumpaha cha nö el tönyalnyi.

²⁹Sönen cha-a nö tarik meh amin meh inrē, më kahënyö meh iyöng minhôinyö meh ane inrē im töhateutnyu kël meh.