Read Car_Nicobarese T. YÔHAN 1 Bible Online

T. YÔHAN 1 - Car_Nicobarese bible

T. YÔHAN 1

¹Mi-im raneh An ngam Ṙô; hol ngam Tēv An ngam Ṙô; Tēv An inrē ngam Ṙô.

²Anga-aṅ mi-im raneh, nö hol ngam Tēv.

³Vahīlö Ò në taṙòkhöre chehen; öt hĕng hang, töt vahīlö Ò, nö i në tövīlöngö.

⁴In Ò an ngam nômö; ngam nômö nö Hanātö tarik.

⁵Yang ngam Hanātö nö el sinngūlö; ngaich ngam sinngūlö, nö öt kô tö e.

⁶Hĕng taka ök umuh tarik tahīntö ngam Tēv, ök töminënyu tö Yôhan.

⁷Ang-aṅ yamih nö eū-a; pòn hōtu nö ameūkö ngam Hanātö, hôiṅ ṙòkhöre, lökten in ò, ṙātö ellōnre.

⁸Röön anga-aṅ an Hanātö, yih pöri anga-aṅ nö ameūkö ngam Hanātö.

⁹Tökô-en An nö Hanātö, maha-athölö nö i tarik, vē yamih nö ing panam, nö ṙòkhöre.

¹⁰Ing panam Anga-aṅ; lökten Ò ngih panam nö vīlöngö; ngaich öt akahakūö ngih panam tö Ò.

¹¹Yih Anga-aṅ nö ing Anga-aṅre; ngaich vē Anga-aṅ Ò nö öt hōḵen Ò.

¹²I tum taka vē hamôḵen Ò pöri, kē-ĕkūö cha Anga-aṅ tö kanô-òṅ nö vīngöre nö kūön ngam Tēv, cha-a yip ṙamātö ellōnre nö i Mine-eny Ò.

¹³Yip töfötnyuvö, röön aṅ i mahām, öt rēhĕn nö lōn ngam alaha, öt rēhĕn nö lōn tarik; aṅ i ngam Tēv pöri.

¹⁴Ngaich ngam Ṙô nö vīngöre nö tarik; ngaich iyöng in hī, tööḵlö tö hanāngenlōn kanô-en inrē. Ngaich meuk kanôlò Ò ayī-ö, sā kanôlò ngam töng hĕng maneuk kūön ngam Tēv.

¹⁵Eūken Ò Yôhan, nö ngö ṙô nö pōitô, Anga-aṅ Ön Ngòh ṙô chu, ngaich urĕh tö chu; pòn mu-urĕh tö chu.

¹⁶Pò hī ṙòkhöre teūngen tö inlōnti, tömörit tö inlōnti, aṅ im tanööḵlö Ò.

¹⁷Pò ngam chöngö nö lökten in Môsös, nö kētu; inlōnti, kanô-en inrē, yih nö lökten in Yēsū Kristū.

¹⁸Rö-ö nö hĕng tak tarik mameuk ngam Tēv nö ngaich. Ngam töng hĕng maneuk Kūön, ngam mi-im Yöng, Anga-aṅ vame-eny.

¹⁹Hē yik Yahūti nö tīnngö yik kūönṙô, yik kūön Lēvī inrē, nö ṙā-ang Yerūsalem, nö hatönö Yôhan, nö ngö ṙô, Achīö öm me-eṅ?

²⁰Ngaich ngih ṙô Yôhan nö halööknyôre, öt mahangre, Rö-ö chin Chū-ö Kristū.

²¹Ngaich hatönan cha-a nö ngö ṙô, Asuh pöri? Ēlaicha ömeh? Ngaich ngö ṙô anga-aṅ, Hö-ö chin. Ngam pròfĕt öm me-eṅ? Hö-ö, ngö anga-aṅ nö sapṙô cha.

²²Ngaich lökten cha nö ngö ṙô tö ò; Achīö öm me-eṅ? Hòṅ ih sapṙô yip tamīnngöre. Sitih ṙô öm töre?

²³Ngaich ngö ṙô anga-aṅ, Chū-ö chin ṙô öp hamūḵa nö el-inchōn, Hachipkö talöökö ngam Mā Tēv, sā ṙô ngam pròfĕt Isayā.

²⁴Aṅ i yik Feresī yik tötīni.

²⁵Ngaich hatönan cha-a, nö ngö ṙô tö ò, Kūöyòh pömri me-eṅ vōk, yĕm öt Kristū, öt rēhĕn öm Ēlaicha, öt rēhĕn öm ngam pròfĕt?

²⁶Ngaich ngö ṙô Yôhan nö sapṙô cha, Aṅtī tö mak chin Chū-ö vōk. Hĕng tak pöri Ap samökhaka nö el ṙôngö yīö, Ap tötmikahkūö yīö.

²⁷Anga-aṅ Ap mu-unôichrit Chu; sönen Chū-ö öt rēhĕn kô luhnyö nup rehen kunröpö Ò.

²⁸I Petenī hē nun anū-ö, lāmuh tö Yôtön, i chūök Yôhan nö vōk.

²⁹Im huṙöich anga-aṅ meūkö Yēsū nö yihtöre nö in ò; ngaich ngö ṙô, Yĕh meuk, ngam pököre ngam Tēv, ngam kamëḵngö tökööl ngih panam.

³⁰Anga-aṅ An ṙô chu, Hĕng taka ap tarik yamih nö unôich tö chu, ngaich urĕh tö chu; pòn mu-urĕh tö chu.

³¹Öt akahakūö Chū-ö tö Ò sin. Yih chin Chū-ö vōk aṅtī tö mak, pòn hōtu Anga-aṅ nö hameuktu nö i yip Israĕl.

³²Eū-a inrē Yôhan, nö ngö ṙô, Meuk ngam Töhet Fanöinylö chin, nö sā nyö-öṅ, nö ṙā-ang el halīöngö; ngaich i kui Ò Anga-aṅ nöngngöh.

³³Öt akahakūö chin sin tö Ò; ngö ṙô pöri Ap tamīnngen chu vōk, öich aṅtī tö mak, Ngam töng meūkö aṅ kui tö meh, tö ngam Töhet Fanöinylö nö yônti, ngaich höngngöh nö i kui Ò, Anga-aṅ An vamôk nö aṅtī tö ngam Töhet Fanöinylö.

³⁴Ngaich Chū-ö meuk eū-a tö Ò nö Anga-aṅ Kūön ngam Tēv.

³⁵Hēk im huṙöich sökhaka ang Yôhan, nët tak inrē nak haköptö ò.

³⁶Ngaich hatīönken Yēsū anga-aṅ, hē Ò nö kiröönngöre, ngaich ngö ṙô, Yĕh meuk ngam pököre ngam Tēv.

³⁷Hang ṙô ò nak tö nët tak mahaköp, ngaich tömrit Yēsū.

³⁸Havöölökūöre Yēsū, ngaich meūkö cha nö tömrit Ò; ngaich ngö ṙô tö cha, Asuh ap lōn nāṅ? Ngaich ngö ṙô cha-a tö Ò, Rappī (ngam tö ngö Mahaköphöti), iyöng yih Öm?

³⁹Ngaich ngö ṙô Anga-aṅ tö cha, Ta-a, hòṅ nāṅ min meuk. Yihtöre cha-a, ngaich meuk chūök Ò nöngngöh. In Ò cha-a, ngaich nöngngöh im sakāmö; finën köṅny ṙô angū-ö, tö harap.

⁴⁰Hĕng tak ök aṅ i nak tö nët tak hamang ṙô Yôhan ngaich tömrit Yēsū, ang Antarū, ök kahëm Sīmōn Pītör.

⁴¹Urĕh anga-aṅ nö chöh ök mëmre Sīmōn; ngaich ngö ṙô tö ò, Kôtökūö an tö Mesayā, (ngam tö ngö Kristū;)

⁴²Ngaich ngôṅten ò anga-aṅ nö in Yēsū. Hatīönken ò ngaich Yēsū; ngaich ngö ṙô Sīmōn man me-eṅ, kūön Yôna; Kīfös invëka man min, (ngam töngö Pītör).

⁴³Im huṙöich Anga-aṅ nö hòṅ chuh Kelelī, ngaich kôtökūö tö Filip; ngaich ngö ṙô Yēsū tö ò, Ta-a, in Chu.

⁴⁴Aṅ Petsēitā ök Filip, aṅ panam nāṅ Antarū, nāṅ Pītör.

⁴⁵Kôtökūö ang Filip tö Netenīĕl, ngaich ngö ṙô tö ò, Kôtökūö in ngaich, tö ngam ṙô Môsös nö im chöngö, ṙô yik pròfĕt inrē, Yēsū ngam aṅ Nāsaret, kūön Yôsĕf.

⁴⁶Ngaich ngö ṙô Netenīĕl tö ò, Tölööku hòng kô-òren, ṙamā-ang Nāsaret? Ngaich ngö ṙô Filip tö ò, Ta-a, ngëicha.

⁴⁷Meūkö Netenīĕl Ang Yēsū, nö yihtöre nö in Ò; ngaich ngö ṙô, Yĕh meuk, ngòh kūön Israĕl takô, ngam töt aṅhaṅv-in tö michīl.

⁴⁸Ngaich ngö ṙô Netenīĕl tö Ò, Sitih mikahkūö Öm tö chu? Ngaich ngö ṙô Yēsū nö sapṙô ò, Meūköm Chin, hē meh elkatòh ap anychīr chōn, urēhĕkūö ṙô Filip nö havëken meh.

⁴⁹Ngaich Netenīĕl nö ngö ṙô tö Ò. Rappī; Kūön ngam Tēv Man; Rāchakūö Israĕl Man.

⁵⁰Ngaich Yēsū nö ngö ṙô tö ò, Ṙātö ellōnre ömeh, pò chu ngö ṙô tö meh, Meūkö meh Chin, elkatòh ap anychīr chōn? Möḵlö maheuṅk man min tö u.

⁵¹Ngaich hēk ngö ṙô Anga-aṅ tö ò, Tökô-ò ṙô Chin tö meh, meuk ngam halīöngö man min nö löpnyörekūö; ngaich yip ma-ahānga, aṅ im Tēv nö yônlö, yônti inrē nö i kui ngòh Kūön Tarik.