Read Car_Nicobarese T. YÔHAN 10 Bible Online

T. YÔHAN 10 - Car_Nicobarese bible

T. YÔHAN 10

¹Tökô-ò ṙô Chin tö yīö. Ngòh tötkumhēthötre nö lökhötkūö inkūp ngam kinlōngö minë pököre. Tahëngö talöökö pöri nö yôkhöt, mu-ulāyö an anga-aṅ, tötūmu inrē.

²Yōm minë pököre an anga-aṅ, ngam kumhēthötre nö lökhötkūö inkūp.

³Anga-aṅ tölöpnyukūö tö ngam yōm inkūp; hang ṙô ò minë pököre: minënyu ṙô anga-aṅ inrē, nö havëkö minë pököre ò, ngaich hachōḵoiny u.

⁴Yē ò nö ṙòkhöre tī, tö minë pököre, urēhĕkūö u ngaich anga-aṅ; ngaich tömrit ò minë pököre; pò u nö akaha el nang tö ṙô ò.

⁵Öt hōḵ anū-ö nö tömrit tahëng; falngöre pöri, nö ṙā-ang in ò; pòn öt akaha elnang tö ṙô yip tahëng.

⁶Angū-ö ön ngih inchōḵoṙô Yēsū tö cha; öt akaha el nang pöri cha-a tö u, minë ṙô Ò tö cha.

⁷Lökten Yēsū nö hēk nö ngö ṙô tö cha, Tökô-ò ṙô Chin tö yīö, Chū-ö Chin inkūp minë pököre.

⁸Ṙòkhöre yip mu-urĕh tö Chu, nö mu-ulāyö, tötūmu inrē; öt hang ṙô cha pöri në pököre.

⁹Chū-ö Chin inkūp; ngòh kumhēthötre nö lökhöt in Chu, hayöökaṙen min anga-aṅ; ngaich kuhēt hötre, kunyī-inyre inrē, ngaich kôtökūö tö nya-aṅkūöre.

¹⁰Höng yamih pöri ngòh mu-ulāyö nö ulāyö, fëlhanga inrē. Yih Chū-ö, hòṅ cha nö nômu, ṙuhölre ṙôken angū-ö.

¹¹Chū-ö Chin tö-akaha Yōmpököre. Pòkūö në pököre, ngòh tö akaha Yōm nö kēḵngö nômöre.

¹²Ngòh töreushu, rö-ö nö yōm, öt tö pökörevö; ngaich hē ò nö meuk ngam am aṅ el-inchōn nö yihtöre, ṙā-ang tö minë pököre, ngaich falngöre. Ngaich ngam am aṅ el-inchōn nö kāpö u, ngaich pirātngö u.

¹³Kūö re anga-aṅ nöng töreushu, lökten ò nö öt chumkūöṙen tö minë pököre.

¹⁴Chū-ö Chin tö-akaha Yōmpököre. Akahakūö chin tö nup Chū-öre; akahakūö nup Chū-ö inrē tö Chu.

¹⁵Sā ngam Yöng nö akahakūö tö Chu; akahakūö Chū-ö inrē töm Yöng.

¹⁶Kēḵngö nômöre Chin kūö në pököre. Pökörevö Chin tö tahëng; nup töt aṅ ngih kiteūm. Anū-ö nup inrē hachōkūö Chu, ngaich hang ṙô Chu min anū-ö; ngaich hĕng kiteūm nö elkatòh ngam töhĕng tak Yōmpököre.

¹⁷Lökten An ngam Yöng nö hāngenlōn tö Chu; pò Chu kēḵngö nômöre; hòṅ Chu kē-ĕ e hēk.

¹⁸Öt hĕng tak kamëḵngö e, nö ṙā-ang in Chu; kēḵngö e pöri Chū-ö kahngenre. Mihôiṅ Chin kēḵngö e; mihôiṅ öich kē-ĕ e hēk. Angū-ö an chöngö taneūngen Chu, aṅ im Yöng.

¹⁹Ngaich hēk yik Yahūti nö harēvngöre, kūö në ṙô.

²⁰Ngaich maṙôngö yik tö ngö ṙô, aṅ in cha, Sī-u aṅ in An; kulō-ov inrē; kūöyòh öi hang ṙô Ò?

²¹Ngaich rēvre yik töngö ṙô. Hö-ö nun në, nö ṙô tö sī-u aṅ in. Kô-òren ṙöng ang ngòh sī-ö nö löpnyökūö mat vē tötmeuk?

²²Hē e ök paratīn Tinfömlö, i Yerūsalem; laneūichö angū-ö hē e.

²³Ngaich lök ël ök töhet chūök Ang Yēsū; ël ök rittūi, tö Sòlòmön minënyi.

²⁴Yihtöre yik Yahūti, nö kiteūmtöre nö in Ò, ngaich ngö ṙô, I rô-òten Öm Me-eṅ kitöngkölōn ih? Halöökṙôre Man yēḵ; ve-eny nang ih, yē Meh Öm Me-eṅ Kristū.

²⁵Ngaich ngö ṙô Yēsū, nö sapṙô cha, Ngaich chin ve-eny nang yīö; ngaich rö-ö yī-ö ṙātö ellōnre. Eūken Chu nun inrē në la-en Chu, i mine-eny ngam Yöng Chu.

²⁶Öt ṙātö ellōnre pöri yī-ö; pò yīö öt aṅ i në pököre Chu.

²⁷Hang ṙô chu, nun në pököre Chu; akahakūö Chū-ö inrē tö u: tömrit Chu anū-ö inrē,

²⁸Ngaich kē-ĕkūö u Chū-ö tö ngam nômö tö-örheūheu-aṅ ngaich öt hōḵ min anū-ö nö ötkôlò; öt hĕng tak min fumlinynyö u, nö ṙā-ang eltī Chu.

²⁹Mööḵlö tī An ngam Yöng Chu nö kē-ĕkūö Chu, tö taṙòkhöre. Öt hĕng tak tökô nö filinynyö u, nö ṙā-ang eltī ngam Yöng.

³⁰Hĕng An Āyö, tö ngam Yöng.

³¹Ngaich yik Yahūti nö kēḵ ihong nö hēk, nö hòṅ kulehan.

³²Ngaich ngö ṙô Yēsū tö cha, Pōyen nuk tölöök la-en Chu, hameuktö Chu in yīö, aṅ im Yöng. Öp yòh öp in u, lökten yīö hòṅ kulehe Chu?

³³Ngaich yik Yahūti nö ngö ṙô, nö sapṙô Ò, Rö-ö in kūö tölöök la-en, hòṅ kulehe Meh; tön kūö ötlinëkô; pò Meh Me-eṅ, höng tarik, ngaich vī-ire Öm Tēv.

³⁴Ngaich ngö ṙô Yēsū nö sapṙô cha, Röh öng nö ngö kinūichngö nö im chöngö yīö, Ngö ṙô Chin, Yī-ö yin tēv.

³⁵Yē cha nö tēv invëka, yip lööṙö ngam Tēv, (ngaich ngam töhet līpöre nö öt finlalken;)

³⁶Ngö ṙô yī-ö tö Ò, ngam ahetlö ngam Yöng, ngaich tīntu nö ing panam, Ötlēkôre Mana; pò Chu ngö ṙô, Kūön ngam Tēv Chin Chū-ö?

³⁷Ui ṙātö ellōnre in Chu, yē Chu öt la-evṙen tö në la-en ngam Yöng.

³⁸Yē Chu pöri la-evṙen tö u, pòrô yī-ö öt ṙātö ellōnre in Chu; ṙātö ellōnre pöri i nëla-en; hòṅ yīö haköp. Akahalōn inrē tö ngam Yöng nö in Chu, im Yöng Chū-ö inrē.

³⁹Ngaich hēk cha-a nö hòṅ kēḵ an; ngaich öt kô-òngvah Anga-aṅ tö tī cha.

⁴⁰Kiröönngöre Anga-aṅ nö hēk nö chuh lāmuh tö Yôtön, i chūök Yôhan nö vōk nö urĕh; ngaich höngngöh nö u muh.

⁴¹Maṙôngö yik yamihtöre nö in Ò; ngaich ngö ṙô cha-a, Öt tī-ivö ök Yôhan tö minkahngö; kô-en pöri nö ṙòkhöre nuk ṙô Yôhan tö ngòh tarik.

⁴²Ngaich maṙôngö yik umuh ṙamātö ellōnre nö in Ò.