Read Car_Nicobarese T. YÔHAN 11 Bible Online

T. YÔHAN 11 - Car_Nicobarese bible

T. YÔHAN 11

¹Ngaich hĕng taka ök umuh tarik tövahavö, Lāsörös, aṅ Petenī, i tuhēt nak kanānö ò, nāṅ Mariā, Mārta inrē.

²Anga-aṅ ök Mariā, famòh alaha ngam Mā tö tötahūsa tavī-i, chūt röön Ò inrē tö keūyöre, tö kanônyuvö tök tövahavö Lāsörös.

³Lökten nak kanānö ò, nö tīnngö vame-eny nang Ò, nö ngö ṙô, Mahaköphöti; vahavö ap hol Meh.

⁴Ngaich ngö ṙô Yēsū, hē Ò nö hāngö e, Rö-ö ap vah nö kinpaha; tön kanôlò ngam Tēv, hòṅ ngam Kūön ngam Tēv nö kôlò nö in e.

⁵Töhāngenlōn Ang Yēsū tö nāṅ Mārta, tö kahëmre, Lāsörös inrē.

⁶Hē Ò nö hāngan nö vahavö, ngaich nët sumkam Anga-aṅ nöngngöh nö i chūökre.

⁷Ngö ṙô Anga-aṅ tö yik mahaköp, nö unôich, Ta-a, töi chuh Yūtā hēk.

⁸Ngaich ngö ṙô yik mahaköp tö Ò, Rappī; hòṅ kulehe Meh yip Yahūti fömngöre; ngaich hēk hòng Me-eṅ hòṅ chuh in e.

⁹Ngaich sapṙô cha Yēsū, nö ngö ṙô, Röh öng nö nët sīön köṅny ṙô i tö hĕng sakāmö? Öt fukngö ön ngòh tarik yĕn kiröönngöre tö sakāmö; pò ò nö meuk ngam Hanātö ngam panam.

¹⁰Fukngö pöri ngòh tarik, yĕn kiröönngöre tö hatööm; pòn öt in ò ngam Hanātö.

¹¹Keuheūthëṙô Anga-aṅ, ngaich ngö ṙô tö cha, Haṙòh ap hol hī, Lāsösrös, hòṅ kiröönngöre Chū-ö, Öich kilanglen ò.

¹²Ngaich ngö ṙô yik mahaköp tö Ò, Lööken ap min, yē ò nöng haṙòh.

¹³Ṙôtö kinpaha ò pöri Yēsū, ngaich ṙôten ò Anga-aṅ nöng heūheure nö haṙòh, tö lōn cha.

¹⁴Lökten Yēsū nö halöökṙôre, nö ngö ṙô tö cha, Kapah ap Lāsörös.

¹⁵Ṙāmölōn Chū-ö töre öt umuh, töpò kūö yīö; hòṅ yīö ṙātö ellōnre, Ta-a, töi ngaich Chuh in ò.

¹⁶Ngö ṙô Tômös, ök tö Titimös invëka, tö yik holre mahaköp, Ta-a, töi in ayī-ö inrē; hòṅ hī anòngngen Ò kapah.

¹⁷Chalô Ang Yēsū ngaich kôtökūö tö ò nö ngaich nö fën hata sumkam nö el anūlö.

¹⁸Höng nët mëil rôvat ap Petenī tö Yērusalem;

¹⁹Maṙôngö yik Yahūti Yamihtöre nö in nā Mārta, nāṅ Mariā, nö mahaṙamkölōn cha, pò ök kanônyö cha nö kapah.

²⁰Hē Mārta nö hāngö Yēsū nö yih, ngaich kiröönngöre Anga-aṅ nö höngkūö Ò; höngngöh pöri Mariā nö i patī.

²¹Ngaich ngö ṙô Mārta tö Yēsū, Mā; öt hōḵ ök öre kanônyö chu nö kapah, yē Meh ihih.

²²Akahalōn chinri tö Meh kô-òren kē-ĕvkūö tö ngam Mā, tö nup töng havëkö Meh im Tēv.

²³Ngaich ngö ṙô Yēsū tö ò, Choholre ap min kanônyö meh, nö aṅ nö hēk.

²⁴Ngaich ngö ṙô Mārta, nö sapṙô Ò, Akahalōn Chin tö ò min nö choholre nö aṅ, hē öp invanlö ip manā-aṅ sakāmö.

²⁵Ngaich ngö ṙô Yēsū, Chū-ö Chin invanlö, nômö inrē. Ngòh ṙamātö ellōnre nö in Chu, pòrô anga-aṅ nö kapah, sönen anga-aṅ nö aṅ.

²⁶Yē ngòh töngngöh ṙamātö ellōnre nö in Chu, öthēṙu min nö kapah, Ṙātö ellōnre öm tö e?

²⁷Ngaich ngö ṙô anga-aṅ tö Ò Hòṅ, Mā; ngaich chin ṙātö ellōnre tö Meh Öm Kristū, Öm Kūön ngam Tēv, Öm yamih ing panam.

²⁸Keuheūthëṙö anga-aṅ tö e, ngaich kiröönngöre, nö hiṙeūtkôre nö have-erö ök kahëmre Mariā; nö ngö ṙô, Ihih Ap Mahaköphöti; havëken meh Apa.

²⁹Iṙūö choholre anga-aṅ, hē ò nö hāngö e; ngaich chuh in Ò.

³⁰Ṙòngmö im chūökre Ang Yēsū nö meūkökūö tö Mārta; öl nö kuhēt nö im tuhet,

³¹Ngaich yik Yahūti, yik me-el patī, nö mahaṙamkölōn ò, nö tömkörit ò, hē cha nö meūkö Mariā nö ka-eūyen nö hōklöre, ngaich kiröönngöre; chamuh kui kupah anga-aṅ tö lōn cha, nö harāmöre nö umuh.

³²Hē Mariā nö yihtöre nö i chūök Yēsū; ngaich meūkan; ngaich afukngöre nö i röön Ò, nö ngö ṙô, Mā; öt hōḵ öre kanônyö chu nö kapah, yē Meh ihih.

³³Hē Yēsū nö meūkan nö peuny, peuny inrē yik Yahūti hol ò; afil uhôṅmöre ngaich Anga-aṅ nö haṙivlōn.

³⁴Ngaich ngö ṙô Anga-aṅ, Isuh tī öi ulngen ò? Ngaich ngö ṙô cha-a tö Ò, Mā; ta-a, meuk Man.

³⁵Taṙēchköṅny mak mat ngaich Yēsū.

³⁶Ngaich ngö ṙô yik Yahūti, Yĕh meuk; i ṙôkö hanāngenlōn Ang tö ò!

³⁷Ngaich ngòh tarik, ngòh lamöpnyökūö mat tötmeuk, nö tī-ivö tök tarik nö öt kapah?

³⁸Hēk Ang Yēsū nö afil unhôṅmöre; ngaich yihtöre nö ik anūlö. Höng kinluhu öku; hĕng ök ihong i kūö e,

³⁹Ngaich ngö ṙô Yēsū, Kēḵngö ngam ihong yin. Ngaich ngö ṙô Mārta tö Ò, ök kanānö ngam tökapah, Mā; hangeūtu takô an nö ngaich; pòn ngaich nö fën hata sumkam.

⁴⁰Ngaich ngö ṙô Yēsū tö ò, Röh Öich ngö ṙô tö meh, Yē meh ṙātö ellōnre, ngaich meuk ngam kanôlò ngam Tēv min me-eṅ?

⁴¹Ngaich cha-a nö kēḵngö ök ihong; ngaich môklökūöre Yēsū, nö ngö ṙô, Kayöngö; ha-öinyö Meh Chin, pò Meh hang ṙô Chu.

⁴²Akahalōn Chin tö Meh tö-örheūheu hang ṙô Chu; kūö vē tömaṙôngö pöri samökhaka, nö havīlen Chu, Öich ngatī ṙô; hòṅ cha nö ṙātö ellōnre tö Chu öich tīntu tö Meh.

⁴³Keuheūthëṙô Anga-aṅ tö e, ngaich ngö ṙô, nö pōitô nö hūḵa, Lāsörös; kunyī-inyre man.

⁴⁴Ngaich ngam tökapaha nö kunyī-inyre; nyëk hak kël kalröön inrē, tö nuk inṙung. Haṙūngi ök kūö ò inrē, tö kun hilā. Ngaich ngö ṙô Yēsū tö cha, Luhlen ò, hökngen ò nö kiröönngöre.

⁴⁵Maṙôngö yik Yahūti yik yamih nö in Maṙiā, ṙamātö ellōnre nö in Ò, hē cha nö meuk tī Ò.

⁴⁶Rēvre pöri tö cha, chamuh i yik Feresī, ngaich ve-eny nang cha tö tī Yēsū.

⁴⁷Lökten yik mākūö kūönṙô, yik Feresī inrē, nö hamūl yik kamhôṅka; ngaich ngö ṙô, Sitih inlahen öi, tö ngòh tarik nö pōihöl tö minkahngö?

⁴⁸Yē Ò min nö hökiṙen tö hī, nö ngatī; ṙòkhöre min vē tarik nö ṙātö ellōnre nö in Ò; ngaich yip aṅ Rōma min nö yih, nö kēḵngö ngih panam hī, vē tarik hī inrē.

⁴⁹Hĕng tak ök umuh, aṅ in cha, Kaifas, ök mākūö kūönṙô ik samyeūheu angū-ö, töngö ṙô tö cha, Höng öt akaha yin.

⁵⁰Öt rēhĕn yin afēḵa tö e nö tölöök, yĕn hĕng hang tak öp tarik tökapah, töpòkūö vē tarik, hòṅ cha nö öt keuheūngöre nö ötkôlò.

⁵¹Öt ṙô ò an angū-ö nö kahngôre; tön pò ò nö mākūö kūönṙô ik samyeūheu angū-ö, ngaich ve-eny tö Yēsū nö hòṅ kapah tö pòkūö yik tarik.

⁵²Öthöng pòkūö yik tarik, tön hōtu Anga-aṅ inrē nö hamūl yip kūön ngam Tēv nö hĕng, yip töparāta.

⁵³Hēten tö e, cha-a ngaich nö ve-ekūöre nö hòṅ kumpahan.

⁵⁴Lökten Ang Yēsū nö öt hangāṅlkenre nö kiröönköre nö i yik Yāhūti ṙuhöngre pöri Anga-aṅ nö i tavat, röhta ip tönyalnyi, ip panam Ifrēm. In e Anga-aṅ ngaich nöngngöh, nö holtö yik mahaköp.

⁵⁵Ngaich ngam Paska yik Yahūti nö röhten; ngaich maṙôngö yik aṅ ngam panam, chamuh Yerūsalem, urēhĕkūö ngam paska, nö halööklöre.

⁵⁶Ngaich cha-a nö chöhö Yēsū; ngaich ngö ṙô tö höö, hē cha nö sökhaka nö ël ök töhet chūök, Sitih lōn öi? Yih Öp min nö ing paratīn?

⁵⁷Ngaich yik mākūö kūönṙô, yik Feresī inrē, nö kētö chöngö; hōtu ngòh tarik nö hameuktö chūök Ò, yē ò nö akahalōn; hòṅ cha nö kēḵ An.