Read Car_Nicobarese T. YÔHAN 12 Bible Online

T. YÔHAN 12 - Car_Nicobarese bible

T. YÔHAN 12

¹Yih Ang Yēsū nö i Petenī tafūöl sumkam urēhĕkūö ngam Paska, i chūök Lāsörös, ök hachohlö Yēsū, nö ṙā-ang i yip tökapah.

²Halankaṙen nya-aṅkūö ngaich Anga-aṅ; Mārta mameuk ṙen nya-aṅkūö, ūichhak Lāsörös nö holkūö yik nyamā.

³Hĕng paôn ök kahëḵ Mariā tötahūsa tavī-i, tö pōi ṙāi; ngaich fòh röön. Yēsū, ngaich chūt röön Ò tö keūyöre. Ngaich ngam patī nö löpngö ël tö tinhūṅsö.

⁴Hĕng tak ök aṅ i yik haköptö Ò ang Yūtā Iskaryôt, ök tö hòṅ kēḵngen Ò, tö ngö ṙô,

⁵Kūöyòh öng ngih tötahūsa tavī-i nö öt inyihiyö, nö lūöi höt ṙòng tö rupīö; ngaich kētu nö i yāich?

⁶Ṙô ò angū-ö öt kūö ò nö chumkūöṙen tö yāich; tön pò ò nö mu-ulāyö, ngaich īnu tök inyul rupīö; ngaich nöng kēḵ nup tö chaphötvö aṅ e,

⁷Ngaich ngö ṙô Yēsū, Hökngen ò, nö haköpkö e hanöng saha öp sakāmö inulngö Chu.

⁸Örheūheu yin yī-ö holtuṙah tö yāich, rö-ö pöri Chū-ö örheūheu in yīö.

⁹Akahalōn yik töng tarīka aṅ i yik Yahūti tö Ò nö umuh; yihtöre cha-a ngaich, öt höng kūö Yēsū tön pò cha nö hòṅ meukkūö Lāsörös inrē, ök hachohlö Ò nö ṙā-ang i yip tökapah.

¹⁰Ve-ekūöre yik mākūö kūönṙô, pòn hòṅ kumpaha Lāsörös inrē;

¹¹Pòn pòkūö ò nö maṙôngö yik Yahūti ṙamāngenre, ngaich ṙātö ellōnre nö in Yēsū.

¹²Ngaich im huṙöich, maṙôngö yik tarik, yamih nö im paratīn, ngaich hē cha nö hāngö Yēsū nö yih nö i Yerūsalem,

¹³Kēḵ rōi kachūr cha-a ngaich; ngaich kiröönngöre nö höngkūö Ò; ngaich ngö ṙô, nö pōitô, Hōsanna, tökôlò An ngam yamih nö i Mine-eny ngam Mā Tēv, ngam Rācha Israĕl.

¹⁴Kôtökūö Ang Yēsū tök kūön köttö, ūichlöre ngaich nö i uk ò; sā kinūichngö e, nö ngö,

¹⁵Um pa-ekūö, me-eṅ kikānö, kūön Siyôn, yĕh meuk, ngam Rācha meh nö yih; ūichhaka nö i uk kūön köttö.

¹⁶Öt akahalōn sin nö urĕh yik haköptö Ò; hē Yēsū pöri nö hapōilöngö ngaich fēḵĕlre cha-a tö u, nö kinūichngö Ò tö cha inrē nö ngatī tī tö Ò,

¹⁷Eūkömatre yik tömaṙôngö mi-in Ò, hē Ò nö haveḵnyen Lasörös nö ṙā-ang el anūlö, nö hachohlen ò, nö ṙā-ang i yik tökapah.

¹⁸Angū-ö inrē lökten yik tö maṙôngö nö höngkūö Ò, pò cha nö hang ök tī Ò minkahngö.

¹⁹Lökten yik Feresī nö ngö ṙô tö höö, Yēsū meuk, öt kanô-òṅre yin, ngaich ön ngih panam nö tömrit Ò.

²⁰Rēvre yik umuh Tahëng mihëṅṙö tarik, i yik yamih nö ve-ekūötēv, nö im paratīn.

²¹Yihtöre cha-a nö in Filip, ök aṅ Petsaita i Kelelī, ngaich ve-ekūö ò, nö ngö ṙô, Mā hòṅ meukkūö Yēsū in.

²²Yihtöre ang Filip, nö ve-eny nang Antaru; ngaich nā Antaru, nāṅ Filip, nö yihtöre nö ve-eny nang Yēsū,

²³Ngaich ngö ṙô Yēsū tö cha, Yih an ngam ṙētak, hē ngòh Kūö Tarik nö hapōilöngö.

²⁴Tökô-ò ṙô Chin tö yīö, Yē ngam kulöl saīny nö fuk el tumlat, nö öt chahū-uyö; ngaich höngngöh angū-ö, min nöng kahngenre. Yē e pöri nö chahū-uyö, ngaich pōyen ṙòng.

²⁵Löhöl tī ön ngòh tö nômöre, ngòh tö hāngenlōn tö e; ngòh tötahāngenlōn pöri töng nômöre, nö ing panam, ngaich haköpngö e anga-aṅ min nö im nômö tö-örheūheu-aṅ

²⁶Yĕn tarīkuvö tö hòṅ lök la-en Chu, hökngen ò yēḵ nö tömrit Chu; ngaich i chūök Chu, in e min ngam kūön Chu inrē. Yĕn tarīkuvö tö hòṅ lök la-en Chu, hakôlöng ṙô min anga-aṅ tö ngam Yöng.

²⁷Haṙīvö ellōn Chin töngamuh. Sitih inlahen Öich min? Kayöngö; laklen Chu i ngih ṙētak.

²⁸Kūö e Chinri yih i ngih ṙētak. Kayöngö; hakôlò ngam Mine-enyre Man. Hē e, ök ṙô lamöktö el halīöngö, tö ngö, Ngaich Chin hakôlò e; hēk min inrē Öich hakôlò e,

²⁹Hāngö e yik tömaṙôngö samökhaka; ngaich kunṙôkö, tö ṙô cha, Rēvre yik tö ngö ṙô,

³⁰Ve-evkūö An tö ma-ahānga. Ngaich ngö ṙô Yēsū, Rö-ö an ngam ṙô nö pòkūö Chu nö yih: tön pòkūö yīö.

³¹Ngih ön ngaich kinṙôkken ngih panam; ngaich ön min ngòh mākūö panam nö ahōṙi.

³²Ngaich Chū-ö yē Chu hatamlöngö, ṙā-ang el tumlat, Öich tūöktö taṙòkhöre tarik nö in re.

³³Ṙô Ò ön angū-ö nö hameuktö inlahen kinpahare min nö kapah.

³⁴Ngaich yik tömaṙôngö nö ngö ṙô tö Ò, Töt chanūhuvṙen Öp Kristū, nö hāngö tö ih, nö im chöngö. Kūöyòh Öm ngö ṙô, Hatamlöngö Ön min ngòh Kūön tarik?

³⁵Ngaich ngö ṙô Yēsū tö cha, Höng rahëchtören an ngam Hanātö nö in yīö. Kiröönngöre yin i saha yīö īnu töm Hanātö, hòṅ ngam sinngūlö nö öt kô-òl nö in yīö. Öt akahalōn ön tökū-öre, ngòh kumröönngöre nö lök el sinngūlö.

³⁶I saha yīö īnu töm Hanātö, ṙātö ellōnre im Hanātö; hòṅ yīö kūön ngam Hanātö. Keuheūthëṙô Yēsū tö u, kiröönngöre ngaich, nö hayunngöre tö cha.

³⁷Pòrô Anga-aṅ nö pōyen la-en tö minkahngö nö i kūö cha, ngaich cha-a nö öt ṙātö ellōnre nö in Ò;

³⁸Nö kinheūṅtngö ṙô ngam pròfĕt Isayā tö ngih tö ngö, Mā; achīö öp ṙamātö ellōnre nö i në ṙô ih? In chīö ang ngam Mā Tēv nö hameuktu?

³⁹Ngih ön inrē lökten cha nö öt kô nö ṙātö ellōnre, ṙô Isayā nö hēk,

⁴⁰Tilupngö mat cha Anga-aṅ, hangëḵngö ellōn cha inrē; pòn sōtu nup mat cha nö meuk, sōtu nö akaha ellōn inrē, ngaich havöölökūöre; ngaich halanken cha Chū-ö.

⁴¹Ṙô Isayā nun anū-ö; pò ò nö meuk kanôlò Ò, ngaich ṙôten Ò anga-aṅ.

⁴²Maṙôngö pöri yik aṅ i yik mā, ṙamātö ellōnre nö in Ò; kūö yik Feresī pöri cha-a nö öt ve-eny e, pòn sōḵ nö ahōṙi, nö ṙā-ang ik māṅre;

⁴³Pò cha nö hāngenlōn tö kanôlò aṅ i tarik, mööḵlö tö kanôlò aṅ im Tēv.

⁴⁴Ngaich pōitô Yēsū, nö ngö ṙô, Ngòh ṙamātö ellōnre nö in Chu, öt ṙātö ellōnre nö in Chu, tön im tamīnten Chu.

⁴⁵Ngòh mameūkö chu, ngaich meuk ngam tamīnten Chu inrē.

⁴⁶Hanātö Chin Chū-ö yih ing panam; hòṅ ngòh ṙamātö ellōnre nö in Chu, nö öt ngöh nö el sinngūlö,

⁴⁷Yĕn tarīkuvö hamang ṙô Chu, ngaich öt haköpö e, öt kahòkken ò Chū-ö, pò Chu öt yih, kahòkken ngih panam tön mahayööken ngih panam.

⁴⁸Ngòh samôḵen Chu, öt hōḵo në ṙô Chu inrē, hĕng öp kamhòkken ò, ngih ṙô ṙahônyö Chu, angū-ö min kamhòkken ò, ip manā-aṅ sakāmö,

⁴⁹Pò Chu öt kahngenre ṙô-òv tö e; tön ngam Yöng, ngam tamīnten Chu Anga-aṅ kamëtö chöngö Chu, ṙô Chu inrē ahānga.

⁵⁰Akahalōn Chin, tö ngam nômö tö-örheūheu-aṅ nö i inköpö ngam chöngö, lökten Chu ṙô-òvö, sā ṙô ngam Yöng nö tölṙô Chu.