Read Car_Nicobarese T. YÔHAN 13 Bible Online

T. YÔHAN 13 - Car_Nicobarese bible

T. YÔHAN 13

¹Urēhĕkūö ngam Paska paratīn akahalōn ang Yēsū tök ṙētakre nö yih hē Ò nö ṙāngö ngih panam, nö chuh im Yöng. Hāngenlōn Anga-aṅ tö yik Anga-aṅ re ing panam; hāngenlōn Anga-aṅ tö cha, nö söl ik manā-aṅ.

²Ha-eheten tī ngam sī-ö nö kēhöt ellōn Yūtā Iskaryôt, ök kūön Simōn, nö kēḵngen Ò.

³Akahalōn Yēsū tö ngam Yöng nö kētö taṙòkhöre nö eltī Ò, tö Ò inrē nö yamih, nö ṙā-ang im Tēv; ngaich chuh im Tēv.

⁴Ngaich hē ngam nyina-aṅ, Anga-aṅ nö choholre, ṙātö nuk hilāre Anga-aṅ, ngaich kēḵ ök chanūt ngaich nyëk ṙatre.

⁵Asënyö mak ngaich Anga-aṅ nö ël ök chūök mak; ngaich söich röön yik haköptöre; chūtö u ngaich, nö aṅtī tö ök chanūt nyanëkṙat Ò.

⁶Yihtöre anga-aṅ nö in Sīmōn Pītör, ngaich ngö ṙô Pītör tö Ò, Mā; söich röön chu Ömeh?

⁷Ngaich ngö ṙô Yēsū, nö sapṙô ò, Öt akahalōn man töngamuh, tö ngih la-en Chu; uhē-ĕren man min akahalōn.

⁸Ngaich ngö ṙô Pītör tö Ò, Uh takô Man yēḵ söich röön chu. Ngaich ngö ṙô Yēsū, nö sapṙô ò, Yē Chu öt söichö meh, öt mi-in Chu me-eṅ.

⁹Ngaich ngö ṙô Pītör tö Ò, Mā, uh chĕi nöng minë röön chu; në kuntī chu, kui chu inrē.

¹⁰Ngö ṙô Yēsū tö ò, Löök ön ngòh tö keuheūtö kaha nö vōk; höng minë kalröön tö hòṅ söichö. Löök yin yī-ö; rö-ö pöri ṙòkhöre.

¹¹Pòn akahalōn Anga-aṅ tök kamëḵngöre: lökten Ò nö ngö ṙô, Rö-ö yin ṙòkhöre löök.

¹²Keuheūthë tī Anga-aṅ nö söich röön cha, ngaich kēḵ nuk hilāre, ūichngöre hēk; ngaich ngö ṙô tö cha, Akahalōn öi tö tī Chu tö yīö?

¹³Mahaköphöti, Mā, ngö yin ṙung tö Chu, öi huveū-eu ṙô pò Chu ngatī.

¹⁴Yē Chu Chū-ö Öich Mā, Mahaköphöti inrē, Öich söich röön yīö, hòṅ kö ngatī-i yin yī-ö söich röön höö.

¹⁵Mahachōten yīö Chin, hòṅ yīö ngatī, sā tī Chu tö yīö.

¹⁶Kô-ò ṙô Chin tö yīö Öt pōyö ön ngòh mahalenṙen tö ngam yöngṙenre; ngatī ngòh tötīni nö öt pōyö tö ngam tamīngöre.

¹⁷Akahalōn yin yih ngaich tö u; tökôlò yin, yē yīö la-evṙen tö u.

¹⁸Rö-ö Chin ṙôten yīö ṙòkhöre. Akahalōn Chin tö yik katöllöre; kinheūṅtngö ṙô ngam töhet līpöre an, Ngòh nyamā nya-aṅkūö Chu, ngaich kichöötlö röönre nö lā-al Chu.

¹⁹Töngamuhöten Chin ve-eny nang yīö, urēhĕkūö yanihih e; hòṅ e yē e nö yih, ngaich ṙātö ellōn re yī-ö, tö Chu Öich Anga-aṅ.

²⁰Tökô-ò ṙô Chin tö yīö, Ngòh hamôḵòṅ tahīntö chu, hōḵen Chu anga-aṅ, ngòh hamôḵen Chu, hōḵo ngam tamīnten Chu.

²¹Keuheūthë ṙô Yēsū tö e, ngaich haṙivö ellōn Anga-aṅ ngaich hameukhöti, nö ngö ṙô, Tökô-ò ṙô Chin tö yīö, Hĕng taka öp tö yīö, kamëḵngen Chu min.

²²Kö ngëichkökūö höö yik mahaköp, öt akahalōn tö ök ṙô Ò tarik.

²³Ranghen Yēsū nö lahāmö, hĕng tak ök mahaköp, ök hanāngen lōn Ò.

²⁴Lökten Sīmōn Pītör nöng inlavah nö ve-ekūö ò, Ve-eny nang ih man, tö öp ṙô Ò.

²⁵Harôntöre anga-aṅ nö in Yēsū, ngaich ngö ṙô Yēsū, ngaich ngö ṙô, Mā; achīö apa?

²⁶Ngaich ngö ṙô Yēsū, nö sapṙô ò, Anga-aṅ öp kaheḵekūö Chu min tö ngih kasumtö Chu ròtī. Keuheūthë tī Anga-aṅ nö kasumtö e, ngaich kē-ĕ e; kētö e ngaich nö in Yūta Iskaryôt.

²⁷Kuhēthötre Sātan ngaich nö in ò, tö kinheūṅtökūö ò nö nyā. Ngaich ngö ṙô Yēsū tö ò, Ka-eūyen man ngaich töp la-enre.

²⁸Öt hĕng tak tarik aṅ i yik nyamā, tö-akahalōn tö lökten Yēsū nö ngatī ṙô tö ò.

²⁹Rēvre yik tö ngö lōn, tö Yēsū nö ngö ṙô tö ò, Havah nup tö-öltöre man in hī, ing paratīn; hēk, ma-alōntö yāich anga-aṅ, tö lōn cha; pò Yūtā nö īnu tök inyul rupīö.

³⁰Keuheūthëkūö anga-aṅ tö ngam ròtī, iṙūö kunyī-inyre ngaich; hatööm angū-ö nö ngaich.

³¹Ngaich hē ò nö ngaich nö kiröönngöre; ngö ṙô Ang Yēsū, Ngaich ön ngòh Kūön Tārik nö hapōilöngö, in Ò inrē ngam Tēv nö hapōilöngö.

³²Hapōilen Ò An min ngam Tēv nö in re; iṙūö hapōilen Ò An min.

³³Yī-ö nyīö; höng rahëchtören Chin in yīö. Chöhö Chu yin min; ngaich sā ṙô Chu tö yik Yahūti, Ip kū-ö Chu kiröönngöre, öt kô yī-ö in; ngatī ṙô Chin tö yīö töngamuh.

³⁴Hĕng ön ngih tufömngöre chöngö, kahëtö Chu in yīö, Hāngenlōn yin tö höö; sā hanāngenlōn Chu tö yīö, ngatī yī-ö kö hāngenlōn tö höö.

³⁵In e inkaha yin min tö taṙòkhöre tarik, öi mahaköp in Chu, yē yīö kö hāngenlōn tö höö. (Mt 26.31-35; Mk 14.27-31; Lk 22.31-34)

³⁶Ngaich ngö ṙô Sīmōn Pītör tö Ò, Chuh yih Ömeh? Ngaich ngö ṙô Yēsū, nö sapṙô ò, Öt kô man in Chu töngamuh, ip kū-ö chu kiröönngöre, Unôich man min tömkörit Chu.

³⁷Ngaich ngö ṙô Pītör tö Ò, Mā kūöyòh öich öt kô in Meh töngamuh. Kô-òren chin kapah töpòkūö Meh.

³⁸Ngaich ngö ṙô Yēsū tö ò, Kô-òren öm kapah töpòkūö Chu? Tökô-òṙö Chin tö meh, Öl nup min hayöm nö takeūk hanöng saha meh lūöi heuh ṙô mahngen Chu.