Read Car_Nicobarese T. YÔHAN 14 Bible Online

T. YÔHAN 14 - Car_Nicobarese bible

T. YÔHAN 14

¹Uh yin röingö ellōn. Ṙātö ellōn re yin im Tēv; in chu inrē.

²Pōyen nup chūökö i patī ngam Yöng Chu. Yĕn öt ngatī öre, ngaich ve-eny nang yīö Chū-ö; tön kiröönngöre Chin halēnkö chūök yīö.

³Ngaich yē Chu kiröönngöre, halēnkö chūök yīö; yih Chū-ö min hēk, ngaich kē-ĕ yīö in re.

⁴Akahalōn yin tö ngam talöökö, kū-ö Chu kiröönngöre.

⁵Ngaich ngö Ṙô Tômas tö Ò, Öt akahalōn in töp chahuhu Meh; Sitih kanô-òṅ öi akahalōn tö ngam talöökö?

⁶Ngaich Yēsū nö ngö ṙô tö ò, Chū-ö Chin Talöökö, Kanô-en, Nômö inrē. Öt hĕng tak yamihtöre nö im Yöng, höng lökten in chu.

⁷Yē yīö akahakūö tö Chu, ngaich yī-ö öre akahakūö töm Yöng inrē. Töngamuhöten yin akahakūö tö Ò; ngaich yin meūkan.

⁸Mā; ngö ṙô Filip; hameukhömat ih man tö ngam Yöng; ngaich ngāichölōn īhö.

⁹Ngaich Yēsū nö ngö ṙô tö ò, Röh Öich ngaich marô-òten in yīö, ngaich öl hòng me-eṅ akahakūö tö Chu Filip? Ngòh mameūkö Chu, ngaich meuk ngam Yöng inrē. Sitih öm ngö ṙô Hameukhömat ih töm Yöng?

¹⁰Öt ṙātö ellōnre ömeh tö Chu im Yöng, in Chu inrē ngam Yöng? Rö-ö Chin kahngôre tö nup ṙô Chu tö yīö: ngöh pöri ngam Yöng nö in Chu, ngaich la-evṙen Anga-aṅ tö në la-en re.

¹¹Ṙātö ellōnre yin in Chu tö Chu im Yöng, in Chu inrē ngam Yöng, ngaich yĕn rö-ö, ṙātö ellōnre pöri tökūö në la-en.

¹²Tökô-òṙô Chin tö yīö, Ngòh ṙamātö ellōn re nö in Chu, la-evṙen min anga-aṅ inrē tö në la-en Chu; mötlö ṙôkö la-en min anga-aṅ tö në, pò Chu chuh im Yöng.

¹³Nup töng havëkö yīö i Mine-eny Chu, kēkö u Chū-ö min; hòṅ ngam Yöng nö ha-öinyö nö im Kūön.

¹⁴Yē yīö havëkuvö i Mine-eny Chu kēkö u Chū-ö min la-evṙen chū-ö min tö u.

¹⁵Yē yīö hāngenlōntö Chu, haköp në chöngö Chu min yī-ö.

¹⁶Ngaich ve-ekūö ngam Yöng Chū-ö min; ngaich kētö tahëng Mahangëken min Anga-aṅ, hòṅ Ò nö örheūheu nö holtöṙah yīö;

¹⁷Ngam [Töhet] Fanöinylö kanô-en, ngam töt kô nö kahëḵ ngih panam; pò e nö öt meūkan, öt rēhĕn nö akahan. Akahakūö pöri yī-ö tö Ò, pò Ò nö höngngöh nö hol yīö, ellōn yīö inrē.

¹⁸Öt ṙāngen yīö Chin, höng kayööyaṙen.

¹⁹Yih Chin min in yīö. Rahëchtören ngaich ngih panam nö öt ngöhöre mat nö meūkö Chu; meūkö Chu pöri yī-ö. Pò Chu aṅ, aṅ yī-ö min inrē.

²⁰Im sakāmö angū-ö min yī-ö akahalōn tö Chu im yöngre, in Chu yī-ö, in yīö Chū-ö inrē.

²¹Ngòh tö-īnu tö në chöngö Chu, ngaich haköpö u, anga-aṅ an tö hāngenlōn tö Chu. Anga-aṅ ngam töhāngelōn tö Chu, hanghuṙen min tö ngam Yöng Chu; ngaich hāngenlōn Chū-ö min tö ò, ngaich hameuktöre Öich in ò.

²²Ngö ṙô ang Yūtā tö Ò, (rö-ö nö Iskaryöt,) Mā; Sitih Öm höng in ih hameuktöre, ngaich rö-ö ing panam?

²³Ngaich ngö ṙô Yēsū tö ò, Yĕn tarīkuvö tö hāngelōn tö Chu, haköp ngih ṙô Chu min anga-aṅ; ngaich hāngenlōn ngam yöng chu tö ò; ngaich yihtöre min āyö in ò, ngaich iyöng in ò.

²⁴Ngòh töt hāngenlōn tö Chu, öt haköp në ṙô Chu. Ngam ṙô ahang yīö, rö-ö an nöng ṙô Chu, tön ṙô ngam Yöng ngam tamīnten Chu.

²⁵Ṙô Chu nun në tö yīö i saha Chu ṙòngmöng ngöh hol yīö.

²⁶Ngam Mahangëken pöri ngam Töhet Fanöinylö, ngam tahīntö ngam Yöng min nö i Mine-eny Chu, Anga-aṅ min mahaköpten yīö tö taṙòkhöre, ane inrē fēḵlen yīö tö taṙòkhöre, ane inrë fēḵlen yīö tö nup ṙô Chu tö yīö.

²⁷Ṙā-akūö yīö Chin tö ngam kumchikṙen. Kētö ngam kumchikṙenre Chin in yīö. Öt sā tī ngih panam Chin kē-ĕkūö yīö. Uh yin röiyö ellōn; Ui rēhĕn pa-ekūö lōn.

²⁸Hang ṙô Chu yin ngaich tö yīö, Kiröönngöre Chin; ngaich yih min in yīö. Yē yīö hāngenlōn tö Chu, ṙamölōn yī-ö öre, pò Chu chuh im Yöng; pò ngam Yöng nö mööḵlö tö Chu.

²⁹Ve-eny nang yīö Chin ngaich töngamuh, urēhĕkūö yanihih e; hòṅ yīö ṙātö ellōnre, yē e nö ngaich nö yih.

³⁰Rö-ö Chin kô iṙuhö ṙô ve-ekūö yīö, pò ngam mā ngih panam nö yih. Rö-ö an nö törahëchyen nö in chu.

³¹Yih pöri anga-aṅ, hòṅ ngih panam nö akahalōn tö Chu hāngenlōn töm Yöng; ngaich sā ngam Yöng; nö tölṙô Chu, ngatī Chū-ö Choholre; ta-a töi ngaich.