Read Car_Nicobarese T. YÔHAN 15 Bible Online

T. YÔHAN 15 - Car_Nicobarese bible

T. YÔHAN 15

¹Chū-ö Chin tökô-en vāin; ngam Yöng Chu An vamī panô-òṅ.

²Ngih pak in Chu tötṙônguvö, fāngi angū-ö tö Ò; ngih pak töṙônguvö ahatlöng tö Ò, pòn hōtu nö ṙuhölre ṙòng.

³Ngaich yih yī-ö ahatlöngö, kūö ngam ṙô Chu tö yīö,

⁴Höngngöh yin in chu; in yīö Chū-ö inrē. Sā ngam pak nö öt kô nö kahngenre nö ṙôngu, yē e nö öt ngöh nö im vāin, ngatī yī-ö öt kô, yē yīö öt ngöh in Chu.

⁵Chū-ö Chin vāin; pak yin yī-ö. Ngòh töngngöh nö in Chu, in ò Chū-ö inrē, anga-aṅ tö pōyen ṙòng; pò yīö öt kanô-òṅvö, yē yīö köhngen tö Chu.

⁶Yĕn hĕng tak ngòh tötngöh nö in Chu, fāngi anga-aṅ nö sā pak, ngaich nyangngö; hamūlö ngaich, kavalhötvö nö i kūö tameūyö; ngaich ṙāpngö.

⁷Yē yīö ngöh in Chu, ngöh minë ṙô Chu inrē nö in yīö, havë-a yī-ö tö nup töng lōnre; ngaich kô-òren yī-ö teūngen tö u.

⁸I ṙôken ṙòng yīö i yīö mahaköp in Chu inrē, ngam Yöng Chu nö eū-eu.

⁹Sā ngam Yöng nö hāngenlōn tö Chu, ngatī Chū-ö inrē hāngenlōn tö yīö; höngngöh yin im hanāngenlōn Chu tö yīö.

¹⁰Yē yīö haköp në chöngö Chu, höngngöh min yī-ö im hanāngenlōn Chu; sā Chu Chū-ö haköp në chöngö ngam Yöngre ngaich höngngöh im hanāngenlōn Ò tö Chu.

¹¹Ngāchô Chin tö yīö tö u, hòṅ ngam ṙanāmölōn Chu nö in yīö, hòṅ ngam ṙanāmölōn yīö inrē nö teungta.

¹²Ngih ön chöngö Chu, Hāngenlōn yin tö höö sā hanāngenlōn Chu tö yīö.

¹³Öt hĕng tak tömööḵlö hanāngenlōntö ngih, tö ngòh kamëḵngö nômöre töpòkūö holre.

¹⁴Hol chu yin yī-ö, yē yīö la-evṙen tö nup tinöölô yīö tö Chu.

¹⁵Rö-ö Chin ngöhöreṙô kūönkūö ngö tö yīö; pò ngòh kūönkūö nö öt akahalōn tö la-en ngam yöngṙenre, pò Chu Chū-ö ngaich mikahtölōn yīö tö nup taṙòkhöre ahang Chu im Yöng.

¹⁶Rö-ö yin yī-ö kamtöllen Chu; Chū-ö Chin kamtöllen yīö, ngaich hōten yīö kiröönngöre, öi ṙônguvö; ngaich höngngöh ngam ṙòng yīö; hòṅ nup havëkö yīö min i Mine-eny Chu, im Yöng, nö kētu nö in yīö min tö Ò.

¹⁷Kē-ĕkūö yīö Chin tö në chöngö, hòṅ yīö kö hāngenlōn tö höö.

¹⁸Yē ngih panam nö surīkhen yīö, akahalōn tö e nö surīkhen Chu, urēhĕkūö e nö surīkhen yīö.

¹⁹Yē yīö öre aṅ ngih panam, hāngenlōn öre ngih panam tö aṅkūöre. Kūö yīö pöri öt aṅ ngih panam, pò Chu katöllen yīö ing panam; lökten ngih panam nö surīkhen yīö.

²⁰Köpölōn tö ṙô Chu tö yīö Rö-ö ön ngòh kūönkūö nö pōyö tö ngam yöngṙenre. Yē cha nö öthakôlò Chu, öt hakôlò yīö min cha-a inrē; yē cha nö haköp ṙô Chu, haköp ṙô yīö min cha-a inrē.

²¹Tī cha pöri min në, nö in yīö, tö pòkūö Mine-eny Chu; pò cha nö öt akahakūö tö ngam tamīnten Chu.

²²Yē Chu öre Öich öt yih, Öich ve-ekūö cha, öt tököölu in öre cha-a. Ngaich pöri cha-a töngamuh nö öt huveū-euṙô tö kūö nup tököölre.

²³Ngòh tö sumrīk tö Chu, tö sumrīk tö ngam Yöng Chu inrē.

²⁴Yē Chu öre öt ngaichngö tī tö në la-en, Öich in cha, në la-en töthĕng tak nö ngaich; ngaich öt tököölu in öre cha-a. Tön ngaich pöri cha-a nö hĕnghöre meuk, hĕnghöre surīkhen Chu, töm Yöng Chu inrē.

²⁵Ngaich keuheūten ngam ṙô, tökūichiyö im chöngö cha tö ngö, Öt löknyu chööḵnyi cha-a nö surīkhen Chu.

²⁶Hē ngam Mahangëken pöri nö yih, ngam tahīntö Chu in yīö nö ṙā-ang im Yöng, ngam Töhet Fanöinylö kanô-en; ngam lamöknyö im Yöng, Anga-aṅ min ameūken Chu.

²⁷Eū-a yī-ö inrē, pò yīö in Chu tök ranehten.