Read Car_Nicobarese T. YÔHAN 16 Bible Online

T. YÔHAN 16 - Car_Nicobarese bible

T. YÔHAN 16

¹Ngāchô Chin tö u in yīö, hòṅ yīö min öt kavē-ĕre.

²Hakösiṙen yin min tö yip māṅre. Yih an ngam ṙētak, tö yip famëlngen yīö min nö tö la-en tö la-en ngam Tēv, tö lōnre.

³Ngatī tī yip min; pò cha nö öt akahakūö tö ngam Yöng, öt rēhĕn tö Chu.

⁴Ngāichô Chin tö u in yīö, hòṅ yīö köpölōn tö u, nö ṙô chu tö yīö, Yĕn yih ap ṙētak u. Rö-ö Chin ṙô-òv tö yīö tö u, ik raneh; pò Chu in yīö.

⁵Kiröönngöre Chin töngamuh i ngam tamīnten Chu; öt hĕng tak tö yīö mahatönö Chu, Chuh yih Öm Me-eṅ.

⁶Pò Chu pöri ṙô-òv tö yīö tö në, haṙīvö ellōn yin.

⁷Kô-ò ṙô pöri Chū-ö tö yīö; kanôlò yīö an yē Chu kiröönngöre; pò Chu yē Chu öt kiröönngöre, öt yih min ngam Mahangëken nö in yīö. Yē chu pöri kiröönngöre, tīnten Ò min Chū-ö nö in yīö.

⁸Ngaich Anga-aṅ, yē Ò nö yih, nö hameukhömat ngih panam min tö tökööl, lanöökö, kinṙôka inrē.

⁹Tökööl, pò cha nö öt ṙātö ellōnre nö in Chu.

¹⁰Lanöökö, pò Chu chuh im Yöng; ngaich öt meūkö Chu yī-ö.

¹¹Kinṙôka, pò ngam mā ngih panam nö ngaich nö kahòkkaṙen.

¹²Pōitöre ṙô chin tö yīö; öt kô pöri yī-ö töngamuh kē-ĕ u.

¹³Yĕn yih pöri Anga-aṅ, ngam Töhet Fanöinylö kanô-en, hachōkūö yīö min Anga-aṅ, i nup taṙòkhöre kanô-en; pòn öt kahngôre min Anga-aṅ; tön nup töhāngö tö Ò, anū-ö min ṙô Ò. Ngaich Anga-aṅ min nö ahangken yīö tö nup yamih.

¹⁴Hapōilen Chu An min; pò Ò min nö aṅ in Chu kahëḵ; ngaich ahangka min nö in yīö.

¹⁵Ṙòkhöre nup chehen im Yöng nö Chū-ö; lökten Chin ngö ṙô, tö Ò min nö kēḵ aṅ in Chu, ngaich ahangken yīö min tö e.

¹⁶Rehëchhangkūö, ngaich yi-ö öt meūkö Chu; ngaich hēk rahëchhangkūö, ngaich yi-ö min meūkö Chu; pò Chu Chuh im Yöng.

¹⁷Lökten nö rēvre yik mahaköp nö in Ò, tö ngö ṙô tö höö, Asuh öng ngih ṙô Ò nö in hī, Rahëchhangkūö, ngaich yī-ö öt meūkö Chu; ngaich hēḵ rahëchhangkūö, ngaich yī-ö min meūkö chu; ane inrē, Pò Chu chuh im Yöng?

¹⁸Lökten cha-a nö ngö ṙô, Asuh öng ngih ṙô Ò, Rahëchhangkūö? Öt akaha elnang in tö ṙô Ò.

¹⁹Akahalōn ang Yēsū tö cha nö hòṅ hatönö Ò; ngaich ngö ṙô Anga-aṅ tö cha, Hatöntöre öyih, in höö, tökūö ngih ṙô Chu, Rahëchhangkūö, ngaich yī-ö öt meūkö Chu, ngaich hēk rahëchhangkūö, ngaich yī-ö min meūkö Chu?

²⁰Tökô-ò ṙô Chin tö yīö, tö yīö min peuny harāmöre inrē; ṙāmölōn pöri min ngih panam, havāngtöre pöri min ngam miṙivlōn yīö, nö im ṙanāmölōn.

²¹Haṙivlōn ön ngòh kikānö, yē ò nö hòṅ kayôḵ; pòn yih ngam ṙētak ò. Yē ngam nyīö pöri nö ngaich nö kayôḵnyu: öt köpölōn anga-aṅ tö ngam chanöököre, kūö ṙanāmölōnre tö tarik nö fötnyu nö ing panam.

²²Ngatī miṙivlōn yin yī-ö; meukkūö yīö pöri Chū-ö min hēk; ngaich ṙāmö ellōn min yī-ö; öt hĕng tak min kamëḵngö ngam ṙanāmölōn, nö in yīö,

²³Öt havëkuvö yin min in Chu, hē e. Tökô-ò ṙô Chin tö yīö, Yē yīö min havëkuvö im Yöng, kētö e min Anga-aṅ nö in yīö, nö i Mine-eny Chu.

²⁴Ölu yin havëkuvö i Mine-eny Chu. Havë-a; ngaich teūngen min yī-ö; hòn hateūngi ngam ṙanāmölōn yīö.

²⁵Anū-ö nun ṙô Chu inchōḵovṙô tö yīö. Yih pöri nö ngaich ngam ṙētaka, hē Chu öt ngöhören inchōḵovṙô tö yīö; halöökṙôre pöri, ve-eny nang yīö tö ngam Yöng.

²⁶Ip sakāmö angū-ö min, yī-ö have-a i Mine-eny Chu. Rö-ö Chin ṙô-òv tö yīö, tö Chu min ve-ekūö ngam Yöng töpòkūö yīö.

²⁷Pò ngam Yöng nö hāngenlōn tö yīö; pò yīö hāngenlōn tö Chu, ane inrē ṙātö ellōnre tö Chu ṙamā-ang im Yöng.

²⁸Ṙā-ang im Yöng Chin, ngaich yih ing panam. Hēk Chin ṙāngö ngih panam, ngaich chuh im Yöng.

²⁹Yĕh meuk; ngö ṙô yik mahaköp nö in Ò; möl Man halöökṙôre; Öm öt inchōḵovṙô.

³⁰Ngaich in akahalōn tö Meh tökeuheūttöre mikahlōn; öt kusīknyô tarik Man, nö hatönö Meh. In e in ṙātö ellōnre tö Meh ṙamā-ang im Tēv.

³¹Ngaich Yēsū nö ngö ṙô tö cha, Ngaich öi ṙātö ellōnre?

³²Yĕh meuk; yih an ngam ṙētak; hôṅ; ihih an ngaich, hē yīö min pirātī; höng kö kahngenre; ngaich ṙāngen Chu min, höng hĕng taka. Rö-ö pöri Chū-ö höng hĕng taka, pò ngam Yöng nö holtöṙah Chu.

³³Ṙô Chu nun në tö yīö, hòṅ yīö in Chu kumchikṙen. Kihngen yin min ing panam; ui pa-ekūö pöri; ngaich Chin mihôiṅ töng panam.