Read Car_Nicobarese T. YÔHAN 18 Bible Online

T. YÔHAN 18 - Car_Nicobarese bible

T. YÔHAN 18

¹Keuheūthë ṙô Ang Yēsū tö u; kiröönngöre ngaich Anga-aṅ nö holtö yik haköptöre; nö havāngngö ök kun töhëm mak Kītrōn, nö ik panô-òṅ, i chūök Ò nö kuhēthötre, Anga-aṅ tö yik haköptö Ò inrē.

²Akahakūö ang Yūtā, ök kamëḵngen Ò, tö e; pòn ṙōl heuh Yēsū nö in e, nö holtö yik mahaköp.

³Keuheūthëṙen ang Yūtā nö ngôṅ yik kumyung yik tösökhak inrē; yihtöre ngaich nö in e, nö kanrīöṙu, tanyukngu, aṅhaṅv tī inrē.

⁴Akahalōn Ang Yēsū tö nup taṙòkhöre yamihen Ò; kunyī-inyre ngaich, ngaich ngö ṙô tö cha,

⁵Achīö ap chahöh yīö? Chöhö Yēsū in, öp aṅ Nāsaret, ngö ṙô cha-a, nö sapṙô Ò. Ngaich ngö ṙô Yēsū tö cha, Chū-ö Chini. Sökhak inrē nö in cha, ang Yūtā, ök kamëḵngen Ò.

⁶Hē Yēsū nö ngö ṙô tö cha, Chū-ö Chini, heūlngöre cha-a ngaich; ngaich afukngöre nö el tumlat.

⁷Ngaich hēk Anga-aṅ nö hatönö cha, nö ngö ṙô, Achīö ap chahöh yīö? Chöhö Yēsū in, öp aṅ Nāsaret, ngö ṙô cha-a.

⁸Ngaich ngö ṙô Yēsū, Ngaīchô Chin taheui tö yīö, tö Chu Öich Chū-ö, Yē yīö chöhö Chu, hökngen vē yēḵ nö kiröönngöre.

⁹Kinheūṅtngen ngam ṙô Ò an angū-ö, töngö, Öt hĕng hang tak tö löhlö tö tī Chu, i yip kahë tö Meh in Chu.

¹⁰Hē e ang Sīmōn Pītör nö hōknyö ök sanëtre, ngaich fang ök mahalanṙen mākūö kūönṙô; ngaich tökngö tī tök lahāmö nang ò. Malkös minënyi ök mahalanṙen.

¹¹Ngaich ngö ṙô Yēsū tö Pītör, Hayulhöt ngam sanëtre man; sōtu ṙöng Öich òkkūö ngam kulah, ngam kahëtö ngam Yöng Chu?

¹²Ngaich yik kumyung, ök yöngṙen cha, tö yik tösökhaka inrē, aṅ i yik Yahūti, nö kē-ĕ Yēsū, ngaich nyëkan.

¹³Ngaich kēḵngen Ò nö urĕh nö in Annas; yöng pīhö Kaifas anga-aṅ. Ök mākūö kūönṙô ik samyeūheu angū-ö.

¹⁴Anga-aṅ Kaifas, famëḵlö yik Yahūti tö e nö tölöök, yĕn hĕng tak öp tarik tökapah, töpòkūö vē taṙòkhöre tarik.

¹⁵Tömkörit Yēsū ang Sīmōn Pītör, ngatī inrē ök tahëng mahaköp. Mikahkūö ök mākūö kūönṙô ök anga-aṅ mahaköp; kuhēthötre anga-aṅ nö anònghöt Yēsū nö el patī ök mākūö kūönṙô.

¹⁶Höng sökhak pöri Pītör nö lā-uk, nö i kūö inkūp. Lökten ök tahëng mahaköp, ök mikahkūö ök mākūö kūönṙô, nö kunyī-inyre, ngaich ve-ekūö ök kikānö yōmkūö inkūp, ngaich ngô-òṅ Pītör nö kuhēthötre.

¹⁷Ngaich ngö ṙô ök yōmkūö inkūp kikānö tö Pītör. Me-eṅ man röh inrē tö hĕng tak aṅ i yip mahaköp i ngòh tarik? Ngaich ngö ṙô anga-aṅ, Rö-ö chin.

¹⁸Ngaich yik mahalanṙen, yik tösökhak inrē, nöng sökhaka, hameui tameūyö tö ta-ök; pò e nö laneūchö. Ngaich hameūyöre cha-a; in cha inrē ang Pītör nö sökhaka, nö hameūyöre.

¹⁹Ngaich ngam mākūö kūönṙô nö hatönö Yēsū tö yip mahaköp in Ò, töp ṙô Ò inrē inköphöti.

²⁰Ngaich ngö ṙô Yēsū tö ò, Höng hangāṅlnyöṙô re Chin ing panam; el chūök vine-eṅkūötēv Chin haköphöti, el ngam töhet chūök inrē, i chūök vē Yahūti nö ṙòkhöre nö mūl. Rö-ö Chin ulāikôre.

²¹Kūöyòh Öm hatönö Chu Hatön yip hamang ṙô Chu man yēk, tö ṙô Chu tö cha. Akahalōn yin vē tö ṙô Chu.

²²Ngaich hē Ò nö ngatī ṙô, hĕng tak ngaich ök tösökhak, famôhan, nö ngö ṙô, Ngatī ṙô Öm sapṙô ngam mākūö kūönṙô?

²³Ngaich ngö ṙô Yēsū tö ò, Yē Chu Öich chōchö ṙô, ngaich ameūkö ngam tö chōich. Yē Chu pöri löökô, kūöyòh öm fōhoh Chu?

²⁴Ngaich ang Annas nö tīnngen Ò, nöng nyëkö, nö in Kaifas, ök mākūö kūönṙô.

²⁵Höng sökhak ang Pītör nö hameūyöre; ngaich ngö ṙô cha-a tö ò, Röh öm me-eṅ inrē, mahaköp in Ò? Mahangre ngaich anga-aṅ, nö ngö ṙô, Rö-ö Chin Chū-ö.

²⁶Hĕng tak ök aṅ i yik mahalanṙen ök mākūö kūönṙô, hanöng kisānö ök töfāngi nang tö Pītör, töngö ṙô, Röh öich meūkö meh, hol Ò, el panô-òṅ?

²⁷Mahangre hēk ang Pītör; ngaich iṙūö takeūk hayöm.

²⁸Ngaich kēḵngen Yēsū cha-a, nö ṙā-ang in Kaifas, nö i patī mahayöng. Ka-euilökūö angū-ö tö peuheū. Öt kuhēthötre cha-a nö el patī mahayöng; pòn sōtu nö kuvīö, kūö nyinā-aṅ ngam paska.

²⁹Lökten Pailĕt nö kunyī-inyre nö in cha, ngaich ngö ṙô, Asuh ap falngen ngòh tarik, vahënyö yīö?

³⁰Ngaich ngö ṙô cha-a nö sapṙô ò, Yē ngòh tarik öre nö tötchōchö la-en, ngaich öt kēten Ò öre ihö in meh.

³¹Ngaich ngö ṙô Pailĕt tö cha, Kēḵ An yin yī-ö; kahòkken Ò kahngenre, asā ngam chöngöre. Ngaich ngö ṙô yik Yahūti tö ò, Öt kô in ihö kumpah tarik.

³²Hòn kinheūṅten ngam ṙô Yēsū, ngam ṙô Ò nö hameūktö inlahen kinpahare Anga-aṅ.

³³Kuhēthötre hēk ang Pailĕt, nö el patī mahayöng; ngaich havëten Yēsū, ngaich ngö ṙô tö Ò, Rāchakūö Yahūti Öm Me-eṅ?

³⁴Ngaich ngö ṙô Yēsū, nö sapṙô ò, Höng kahngôre öm tö e? Vënyu nang ṙöng öm tö tahëng tö inlahen Chu.

³⁵Ngaich ngö ṙô Pailĕt, Yahūti Öich Chū-ö? Yip aṅ panam Meh, tö yip mākūö kūönṙô inrē, kamëten Meh nö in chu. Asuh ap falngen Meh?

³⁶Ngaich ngö ṙô Ang Yēsū, Öt aṅ ngih panam an ngam pūlngö Chu; yē e öre nö aṅ ngih panam, ngaich kô-òren yip mahalanṙen nö kiyung, hòṅ Chu öt kētu i vē Yahūti. Rö-ö pöri ngam pūlngö Chu nö aṅhih.

³⁷Ngaich ngö ṙô Pailĕt tö Ò, Rācha Man chēi Me-eṅ röh? Ngaich ngö ṙô Yēsū, nö sapṙô ò, Rācha Chin ngaich, sā ṙô meh. Ameūkö ngam kanô-en Chin; lökten Chu fötnyu; kūö e inrē Öich yih ing panam. Ṙòkhöre vē aṅ im kanô-en, nö hangṙô Chu.

³⁸A Ngaich ngö ṙô ang Pailĕt. Asuh öng ngam kanô-en? b Keuheūthë ṙô anga-aṅ tö e; ngaich kunyī-inyre nö hēk nö i yik Yahūti; ngaich ngö ṙô tö cha. Öt maheūṅku chin tö falngen in Ò.

³⁹Tö hĕng tak lahuhlö pöri Chū-ö, hē el paska; pò e nö ngatī. Hōten chu öi öich luhlö ngòh Rāchakūö Yahūti?

⁴⁰Ngaich hūḵa cha-a, nö ngö ṙô, Röön Anga-aṅ; Parapas pöri Tötūmu ök Parapas.