Read Car_Nicobarese T. YÔHAN 19 Bible Online

T. YÔHAN 19 - Car_Nicobarese bible

T. YÔHAN 19

¹Ngaich Pailĕt nö kē-ĕ Yēsū, ngaich fōhan.

²Ngaich yik kumyung nö vī sapīöv Ò tö tö chökhukūö, ngaich sumpīövlen Ò. Hayutlen Ò inrē tök laturë hilā.

³Yihtöre cha-a nö in Ò, ngaich ngö ṙô, Rāchakūö Yahūti; Salām. Ngaich cha-a nö fōhan.

⁴Kunyī-inyre hēk ang Pailĕt, ngaich ngö ṙô tö cha, Yĕh meuk, kēḵnyö ngòh tarik chin in yīö, hòṅ yīö akahalōn tö chu öt kanôtukūö tö falngen in Ò.

⁵Kunyī-inyre Ang Yēsū nöng sapīövu tö nuk töchökhukūö, inyūtu tök laturë hilā inrē. Ngaich ngö ṙô Pailĕt tö cha, Meuk ngam tarik?

⁶Ngaich hē më mākūö kūönṙô, yik tösökhak inrē, nö meūkan, ngaich hūḵa cha-a nö ngö ṙô, Harāten Ò! Harāten Ò! Ngaich ngö ṙô Pailĕt tö cha, Kahngenre yin kēḵ An, harāten Ò ngaich, tön rö-ö chin kanôtukūö tö falngen in Ò.

⁷Ngaich ngö ṙô yik Yahūti, nö sapṙô ò, Chöngu in īhö; hòṅ kumpaha Anga-aṅ nö ip chöngö ih; pò Ò nö vī-ilre nö Kūön ngam Tēv.

⁸Ngaich hē Pailĕt nö hāngö e, ṙuhölre pinhe-eṅkūö anga-aṅ.

⁹Kuhēthötre hēk anga-aṅ nö el ök patī mahayöng ngaich ngö ṙô tö Yēsū, Aṅ yih Öm Me-eṅ? Ngaich nöng öt sapṙô ò Yēsū.

¹⁰Lökten Pailĕt nö ngö ṙô tö Ò, Öt hòṅ ve-ekūö chu Ömeh? Öt akahalōn Ömeh tö chu mihôiṅ ṙānyen Meh, mihôiṅ inrē harāten Meh?

¹¹Ngaich Yēsū nö ngö ṙô, nö sapṙô ò, öt minhôinyu man in chu, yĕn Öt aṅ lātulöng nö kinëḵeṅkūö meh. Lökten öp kamëten Chu nö in meh, nö töpōyen tökööl.

¹²Ngaich Pailĕt nö lukkenre nö ṙāngen Ò, kūö e. Hūḵa pöri yik Yahūti, nö ngö ṙô, Yē meh ṙālö ngòh tarik, öt hol Kaisör me-eṅ. Ngòh tö hòṅ vī-il re nö rācha, ngaich tökunyahaṅelmat anga-aṅ tö Kaisör.

¹³Hē Pailĕt nö hang minë ṙô, kēḵngen Yēsū ngaich anga-aṅ, ngaich ūichngöre nö el chūök kamhôṅka, ök Tö-ihōngu Ël invëka; Kapata pöri, tö ṙô Heprai.

¹⁴Inlēnken ngam Paska angū-ö; nët sīön köṅny ṙô hē e. Ngö ṙô anga-aṅ tö yik Yahūti, Meuk ngam Rācha yin.

¹⁵Lökten cha nö hūḵa, nö ngö ṙô, Hachuhngen Ò; hachuhngen Ò, harāten Ò! Ngaich ngö ṙô Pailĕt tö cha. Harātö ngòh Rācha yīö, öich kòh? Ngaich ngö ṙô yik mākūö kūönṙô, Öt rāchavö in īhö, tö tahëng, höng Kaisöör.

¹⁶A Lökten anga-aṅ nö kēten Ò, nö harātu. b Ngaich kēḵngen Yēsū cha-a.

¹⁷Kunyī-inyre ngaich anga-aṅ, keun ök töhakālöre, nö chuh ip chūök kui kupah; ök Kòlkòta, tö ṙô Heprai.

¹⁸I chūök cha, nö harāten Ò, nët tak nak tahëng hol Ò; ahëmlen Yēsū cha-a.

¹⁹Ngaich Pailĕt nö kūich ngih ineūkö, nö i rōi ök töhakālö, Yēsū, an Nāsaret; Rāchakūö Yahūti, ngö ök tökūichi.

²⁰Ngaich ve-evkūö angū-ö tö yik tömaṙôngö Yahūti; pò ök chūök Yēsū nö harātu, nö röhta nö im panam. Kūichi angū-ö inrē, nö i ṙô Heprai, Rōma, Krīk inrē.

²¹Lökten yik mākūö kūönṙô, yik Yahūti inrē, nö ngö ṙô tö Pailĕt, Rāchakūö Yahūti, um ngö tī; kūich ṙô Ò pöri, nö ngö, Rāchakūö Yahūti Chin Chū-ö.

²²Ngaich ngö ṙô Pailĕt. Ngaich tī chin tö ngam kahūichre.

²³Ngaich yik kumyung, hē cha nö harāten Yēsū, nö kēḵ nuk hilā Ò; ngaich fën it tī, kö kahĕng vat më kumyung. Kēḵĕ inrē ök inyut Ò; ök töt taseūṙu inyut, tökupātö nö löktökūö lātulöng nö keuheūtngöre.

²⁴Lökten cha nö ngö ṙô tö höö, Ta-a, ui tikāchö e. Kalah öp töteūngen pöri tö e, öp töchehevṙen min tö e. Hòn kinheūṅtngen ṙô ngam töhet līpöre, tö ngö Katölhökūöre cha-a tö nuk hilā Chu; kalah taneūngenre tök in yut Chu. Ngaich yik kumyung nö ngatī tī.

²⁵Sökhaka nö umuh, nö ranghö ök töhakālö Yēsū, ök kikānö yöng Ò, ök kahëm ök kikānö yöng Ò kikānö inrē, Mariā ök pihö Klopas, Mariā aṅ Mektelā inrē.

²⁶Lökten hē Yēsū nö meuk ök yöngre, sökhaka inrē ök mahaköp, ök hanāngenlōn Ò, nö ranghen ò, ngö ṙô Anga-aṅ tök yöngre, Meuk ngam kūönre man.

²⁷Ngaich ngö ṙô Anga-aṅ tök mahaköp, Meuk ngam yöngre man. Hēten tö e ök mahaköp nö kēḵ an nö in re.

²⁸Keuheūthëṙen angū-ö, akahalōn ngaich Yēsū tö nup taṙòkhöre nö keuheūten, ngaich ngö ṙô, Haṙëhe nômö Chin. Nö kinheūṅtngen ṙô ngam töhet līpöre.

²⁹Hĕng milöichö ök neū-euṅ umuh, tötööḵlö tö töhikīölhu vāin. Ngaich cha-a nö lòktö ök ṙòng ihong tö-aṅhaṅv alaha tö töhikīölhu vāin, nö i kūö ök chōn hissòp; ngaich kētu angū-ö nö elvāng Ò.

³⁰Keuheūthëkūö Ang Yēsū tö ngam töhikīölhu vāin ngaich ngö ṙô Anga-aṅ, Keuheūten an nö ngaich. Sōntökūöre Anga-aṅ; ngaich kēḵngö ök ma-alahare.

³¹Inlēnken angū-ö, lökten yik Yahūti nö sōtö nuk alaha cha nöngngöh nö i rōi nuk töhakālö, hē ngam töhet sakāmö, pò ngam töhet sakāmö nö tökiröng nö sakāmö. Ngaich ve-ekūö Pailĕt nö hōtö nuk kalröön cha nö liköli, ngaich kē-ĕyö cha-a.

³²Yihtöre ngaich yik kumyung; ngaich likölngö kalröön ök mu-urĕh, ök tahëng inrē, töharātu nö hol Ò.

³³Hē cha pöri nö yihtöre nö in Yēsū, ngaich meūkö Anga-aṅ nö ha-ehangen nö kapah; ngaich öt likölngö kalröön Ò cha-a.

³⁴Hĕng tak pöri ök kumyung tö aṅtī tö vöi nö sapnyö elkël Ò; ngaich ilöö hëmnyi nuk mahām, holtö mak.

³⁵Ngaich ök mameūkö e nö eū-a; tökô-en an ngam aheūkö ò, Akahalōn ang-aṅ töre nö kô-ò ṙô; hòṅ yīö inrē ṙātö ellōnre.

³⁶Pò u anū-ö nö ngaichngen nö kinheūṅtngen ṙô ngam töhet līpöre, tö ngö, Öt hĕng min tangëḵ Ò töliköli.

³⁷Ngö ṙô inrē ngam tahëng līpöre, Ngëichkökūö ngam sahapngöre yip min.

³⁸Keuheūthëṙen anū-ö ngaich Yôsĕf aṅ Arimatiā, nö havëtôre nö in Pailĕt, pòn hòṅ kēḵngö ök alaha Yēsū; ök mahaköp nö in Yēsū, höng ulāikenre pöri, pòn pa-ekūö tö yik Yahūti Ngaich Pailĕt nö halöngten ò. Kēḵngö ök alaha Ò ngaich anga-aṅ.

³⁹Yih inrē ang Nikòtimös, ök yamihtöre nö in Yēsū tö hatööm, kumtö tökatēhĕ mūr, tö alō, hēngòng kinlaha.

⁴⁰Kēḵ ök alaha Yēsū cha-a ngaich; ngaich haṙūngö e tö hilā, nö holtö tötahūsa; sā falngen tī Yahūti, nö lāpö.

⁴¹Röhta ök panô-òṅ, nö i chūök Yēsū nö harātu, ök tö-aṅhavö tök tufömngöre anūlö, tö-öluvö nö chaphötvö aṅ tö kupah.

⁴²Pò e nö Inlēnken yik Yahūti, röhta ök anūlö inrē; ngaich cha-a nö chaphöt Yēsū nö in e.