Read Car_Nicobarese T. YÔHAN 2 Bible Online

T. YÔHAN 2 - Car_Nicobarese bible

T. YÔHAN 2

¹Ik linūöi sumkam ök inpīhö i Kānā i Kelelī; umuh inrē ök yöng Yēsū kikānö.

²Ngöönka inrē Yēsū, tö yik mahaköp inrē nö in Ò, nö im inpihö.

³Ngaich hē ök vāin nö keuheūt, ngö ṙô ök yöng Yēsū kikānö tö Ò, Ngāichen vāin yin.

⁴Ngaich Yēsū nö ngö ṙô tö ò, Suh ap lōn meh, la-en Chu? Öltö yihih an ngam ṙētak Chu.

⁵Ngaich ngö ṙô ök yöng Ò kikānö tö yik mahalanṙen, Höng hōḵ pöichö, yē ṙô Ò tö yīö.

⁶Tafūöl nuk ihong neū-euṅ umuh, tinīöchhaka; sā fālen vē Yahūti nö söichöre; nët, lūöi kinlaha aṅ tö hĕng.

⁷Ngaich Yēsū nö ngö ṙô tö cha, Hatööḵlö minë neū-euṅ yin tö mak. Ngaich cha-a nö taṙēchi tī nö hatööḵöl u.

⁸Ngaich ngö ṙô Anga-aṅ tö cha, Yĕh pöchö fòkhöl: kē-ĕkūö ngam yōm nāhaṅl.

⁹Ngaich kētö e cha-a. Ngaich hē ngam yōm nāhaṅl nö kalah ngam mak tövingöre nö vāin, (öt akahalōn pöri yik mahalanṙen, yik famòklö mak;) ngaich ngam yōm nāhaṅl nö havëtö ngam kikōnyö töhapīhö;

¹⁰Ngaich ngö ṙô ò, Urĕhtö tī yin ṙung vē tarik tö tökuchik vāin; ngaich yē tarik nö tööḵöng kūö, ngaich möl ngam tökunyah. Ngaich me-eṅ söl ing töngamuh tī öm halinngen ngam tökuchik vāin.

¹¹Ngih ön raneh minkahngö tī Yēsū, nö i Kānā, i Kelelī, nö hameuktö kanôlòre; ngaich ṙātö ellōnre yik mahaköp nö in Ò.

¹²Unôichrit e Anga-aṅ nö chuh Kafarnahum, Anga-aṅ tök yöng Ò kikānö inrē; holtö yik mëmre, kahëmre, tö yik mahaköp inrē. Öt ṙōl sumkam cha-a nö umuh.

¹³Ngaich ngam pasaka yik Yahūti nö röhten; ngaich chuh Yerūsalem Ang Yēsū.

¹⁴El ök töhet chūök Anga-aṅ nö meuk yik mi-inyihkö nuā, pököre, nyö-öṅ inrē; ūichhak inrē yik mahaṙīkö rupīö.

¹⁵Ngaich vī fanòhre Anga-aṅ tö kupāt; ngaich ahōngen cha, nö ṙā-ang ël ök töhet chūök tö nuk pököre, nuā inrē. Hōngngö nuk töhaṙīka Anga-aṅ rupīö; kuringngö nuk mīs cha inrē.

¹⁶Ngaich ngö ṙô Anga-aṅ tö yik mī-inyihkö nyö-öṅ, Kēḵngö u, nö ṙā-ang ihih. Un vītu ngih patī ngam Yöng Chu, nö chūök mi-inyih.

¹⁷Fëḵĕlre ngaich yik mahaköp tö ṙô ngam töhet līpöre, Ngeūktu Chin min, tö ngam kumlēḵlōn töm patī Meh.

¹⁸Lökten yik Yahūti nö ngö ṙô tö Ò, Asuh ap minkahngö hameuktö Meh in ih, Öm ngatī la-en tö u?

¹⁹Ngaich Yēsū nö ngö ṙô nö sapṙô cha, Tiṙōlngö ngih töhet chūök; ngaich Chū-ö min asöklö e i tö lūöi sumkam.

²⁰Lökten yik Yahūti nö ngö ṙô, Fën anāi tafūöl samyeūheu rô-òten vinī-i an ngam töhet chūök; ngaich kô-òren hòng Me-eṅ höng lūöi sumkam asöklö e?

²¹Ṙôtö ngam alahare pöri Anga-aṅ, nö töhet chūök.

²²Lökten hē Ò nö choholre, nö ṙā-ang i yik tökapah; fēḵĕlre ngaich yik haköptö Ò, tö ngam ṙô Ò, ngaich ṙātö ellōnre nö i ṙô ngam töhet līpöre, tö ṙô Yēsū inrē tö cha.

²³Hē Ò nö i Yerūsalem nö ik paska parātin, maṙôngö yik mameuk nuk minkahngö tī Ò, ngaich nö ṙātö ellōnre nö i Mine-eny Ò.

²⁴Rö-ö pöri Yēsū nö nyātölōn nö in cha pòn akahalōn tö taṙòkhöre tarik;

²⁵Öt hòṅ kusīknyô tö hĕng tak Anga-aṅ nö eūkö inlahen tarik; pò Ò Anga-aṅ nö akahalōn tö ellōn tarik.