Read Car_Nicobarese T. YÔHAN 20 Bible Online

T. YÔHAN 20 - Car_Nicobarese bible

T. YÔHAN 20

¹Im ranehtökūö minë tö sat sumkam, ka-euilökūö ang Mariā aṅ Mektelā, nö yihtöre nö ik anūlö, ṙòngmö sangūla angū-ö. Ngaich meuk ök ihong nö kē-ĕyö nö ṙā-ang i kūö ök anūlö.

²Faltöre anga-aṅ ngaich; ngaich yihtöre nö in Sīmōn Pītör, ik tahëng inrē mahaköp, ök hanāngenlōn Yēsū; ngaich ngö ṙô tö cha, Kē-ĕyö Ök Mā nö ṙā-ang ël öp anūlö. Ötakahalōn ihö tö chūök tī cha nö ṙāten Ò.

³Kiröönngöre ngaich Pītör, tök tahëng inrē mahaköp, ngaich kū-ö tö ök anūlö cha-a.

⁴Kö fālönyöre cha-a; ngaich ök tahëng mahaköp nö urĕh tö Pītör; urĕhtö yihih ngaich nö ik anūlö

⁵Môkhötkūöre anga-aṅ, ngaich meuk nuk hilā nö hulalhaka; öt kuhēthötre pöri.

⁶Tömrit ò ang Pītör, kuhēthötre anga-aṅ ngaich nö ël ök anūlö; ngaich meuk nuk hilā nö hulalhaka.

⁷Ök mi-i kui Ò inrē hilā, öt hulalhaka nö i nuk tahëng; lömi pöri angū-ö, nöng hĕng.

⁸Ngaich kuhēthötre ngam tahëng mahaköp, ngam mu-urĕhtö yihih nö ik anūlö; ngaich meuk anga-aṅ, ngaich ṙātö ellōnre.

⁹Pò cha nö öl nö akahalōn tö ṙô ngam töhet līpöre, tö Ò nö chamôhòlre nö hēk, nö ṙā-ang yip tökapah.

¹⁰Havantöre ngaich nak mahaköp nö in yik holre.

¹¹Höng sökhak pöri Mariā, nö elkahôyö, ranghö ök anūlö, nöng peuny. Hē ò nö ṙòngmö peuny, ngaich môktökūöre nö ël ök anūlö.

¹²Ngaich nët tak nak ma-ahānga, maheuṅk ò, tö isōho inyut, nöng ūichhaka; hĕng taka lā kui, hĕng taka lā röön, i chūök ök alaha Yēsū nö ṙātu.

¹³Ngaich ngö ṙô cha-a tö ò, Kūöyòh öm peuny? Ngaich ngö ṙô anga-aṅ, nö sapṙô cha, Pò cha nö kēḵngö ök Mā chu; öt akahalōn Chū-ö tö chūök tī cha nö ṙāten Ò.

¹⁴Keuheūthëṙô anga-aṅ, havöölökūöre ngaich; ngaich meūkö Yēsū nö sökhaka; öt akahakūö pöri anga-aṅ tö Ò nö Yēsū.

¹⁵Ngaich ngö ṙô Yēsū tö ò, Me-eṅ kikānö; kūöyòh öm peuny? Achīö ap chahöh meh? Yōm panô-òṅ Anga-aṅ, tö lōn Mariā, ngaich ngö ṙô tö Ò, Mā; yē Meh kēḵngen Ò nö ṙā-ang hih, ve-eny nang chu Man yēk, tö chūök tīre ṙāten Ò; hòṅ chu kēḵ an.

¹⁶Mariā! Ngö ṙô Ang Yēsū tö ò. Ngaich havöölökūöre anga-aṅ, ngaich ngö ṙô tö Ò, nö i ṙô Heprai, Rapponi! Ngam tö ngö, Mahaköphöti.

¹⁷Ngaich ngö ṙô Yēsū tö ò, Uh Chin lūölka, tön öl Chin yônlö im yöng. Kiröönngöre pöri, kuṙòh; ve-eny nang yip hol Chu tö Chu yônlö im Yöngre, Yöng yīö inrē; im Tēv Chu, Tēv yīö inrē.

¹⁸Yihtöre ngaich Mariā aṅ Mektelā nö ve-eny nang yik mahaköp, tö ò nö meukkūö ngam Mā, tö Ò inrē nö ṙô tö në nö in ò.

¹⁹Ngaich hē e nö harap, im ranehtökūö minë tö sat sumkam öphakkūö nuk inkūp, i chūök yik mahaköp, pòn pa-ekūö tö yik Yahūti; yihtöre Ang Yēsū, ngaich söklöre nö ellōn cha; nö ngö ṙô tö cha, Kumchikṙen yēḵ in yīö.

²⁰Keuheūthëṙô Anga-aṅ tö e, ngaich hameuktö eltīre, elkëlre inrē nö in cha. Lökten yik mahaköp nö ṙāmölōn, hē cha nö meuk ngam Mā.

²¹Ngaich hēk Ang Yēsū nö ngö ṙô tö cha, Kumchikṙen yēḵ in yīö. Sā ngam Yöng nö tīnngen Chu, ngatī Chū-ö tīnngen yīö.

²²Keuheūthë ṙô Anga-aṅ tö e, uhômnyökui cha Anga-aṅ tö e, nö ngö ṙô tö cha, Kē ngam Töhet Fanöinylö yin.

²³Vē tö-aṙēlöng tökööl tö yīö, aṙēlöngö cha-a nö ngaich; vē tö haköpi tökööl tö yīö, haköpiyö anū-ö nö in cha.

²⁴Rö-ö pöri ang Tômös, ök aṅ i yik tö nët sīön, ök tö Titimös invëka, nö hol cha, hē Yēsū nö yih.

²⁵Lökten yik tahëng mahaköp nö ngö ṙô tö ò, Meuk Ök Mā in īhö taheui. Ngö ṙô pöri anga-aṅ tö cha, Yē chu öt meuk chūökkūö nuk kīny eltī Ò, sëphöt kuntīre inrē i kūö nup chūökkūö nuk kīny; sëphö tīre inrē i elkël Ò, hö-ö chin hòṅ ṙātö ellōnre.

²⁶Unôichrit töhëvhör sumkam hēk, yik mahaköp nö el patī, in cha inrē Tômös. Yihtöre Ang Yēsū höng löphakkūö nuk inkūp; söklöre ngaich nö ellōn: ngaich ngö ṙô Kumchikṙen yēḵ in yīö.

²⁷Ngaich ngö ṙô Anga-aṅ tö Tômös, Ṙēptö kuntīre man ihih; ngëichkö eltī Chu, ṙēptö tīre inrē, sëphöt tīre i elkël Chu. Um öt mikahavö; ṙātö ellōnre pöri.

²⁸Ngaich ngö ṙô Tômös, nö sapṙô Ò, Mā Chu, Tēv chu inrē!

²⁹Ngaich ngö ṙô Yēsū tö ò, Kūöre man me-eṅ ngaich meūkö Chu, ngaich öm ṙātö ellōnre röh? Tökôlò yip cha-a, yip töt mameuk, ngaich nöng ṙātö ellōnre.

³⁰Pōyen nup tahëng minkahngö tī Yēsū nö i kūö yik mahaköp, nup töt kūichiyö nö i mat ngih līpöre.

³¹Kūichyö pöri në, hòṅ yīö ṙātö ellōnre tö Yēsū nö Kristū, ngam Kūön ngam Tēv, hòṅ yīö inrē, lökten im ṙinātö ellōnre i Mine-eny Ò, öi nômuvö.