Read Car_Nicobarese T. YÔHAN 21 Bible Online

T. YÔHAN 21 - Car_Nicobarese bible

T. YÔHAN 21

¹Unôich hēk Ang Yēsū nö hameuktöre nö i yik mahaköp nö ip mai Tipēriös. Ngö inlahen Anga-aṅ nö hameuktöre;

²Hēḵ Sīmōn Pītör yik umuh; Tômös inrē ök tö Tītimös invëka, Netenīel ök aṅ Kānā i Kelelī, nak kūön Sepetī, nët tak nak tahëng inrē mahaköp.

³Ngö ṙô Sīmōn Pītör tö cha, Kiröönngöre chin el mai. Ngaich ngö ṙô cha-a tö ò, In meh in īhö inrē. Kiröönngöre cha-a, ngaich yôklö nö el kupòk; ngaich im hatööm cha-a nöng öt pô-òv.

⁴I hanatlö ngam peuheū, sökhaka Ang Yēsū nö i kuyāyö; rö-ö pöri cha-a nö akahakūö tö Ò nö Yēsū.

⁵Ngaich ngö ṙô Yēsū tö cha, Yī-ö nyīö; nya-aṅvkūö öi yih? Ngaich ngö ṙô cha-a nö sapṙô Ò, Hö-ö.

⁶Ngaich ngö ṙô Anga-aṅ tö cha, Kavalngö ngam inhāṅl, lāhāmö ngam kupòk; ngaich pô-òvö yī-ö min. Kavalhang cha-a ngaich; ngaich öt kô nö tūökö e, kūö ṙôken nuk kāḵ.

⁷Ngaich ök mahaköp, ök hanāngenlōn Yēsū, nö ngö ṙô tö Pītör, Ngam Mā An. Ngaich hē Sīmōn Pītör nö hāngan nö ngam Mā, kafanlöre anga-aṅ ngaich; pò ò sin nö öt hilāṙu; ngaich sūtöre nö el mai.

⁸El kun kupòk pöri yik tahëng mahaköp nö kuhēt, nö tūök ök inhāṅl, nö tööḵlö tö kāḵ. Öt marô-òiny cha-a, höng taneui anāi tasöm rô-òiny.

⁹Hē cha nö ngaich nö el tanyô, ngaich meuk nuk ta-ök kūö tameūyö cha-a; kāḵ nuk i kūö e, ròtī inrē.

¹⁰Ngaich ngö ṙô Yēsū tö cha, Kētö nup pôre yin kāḵ.

¹¹Yôklö ngaich Sīmōn Pītör, ngaich tūökhöt ök inhāṅl nö el tanyô, tööḵlö tö tökiröng kāḵ, hēngòng taneui anāi lūöi tum nòng. Öt takaich ngam inhāṅl, pòrô anū-ö nö pōyen.

¹²Ngaich ngö ṙô Yēsū tö cha, Ta-ih; nyā yin. Öthĕng tak tö yik mahahöp, tö hòṅ hatönan, nö ngö, Achīö Öm Me-eṅ? Pò cha nö akahakūö tö Ò nö ngam Mā.

¹³Yihtöre Ang Yēsū; ngaich kēḵ ṙòtī, ngaich kē-ĕkūö cha; ngatī inrē tö nuk kāḵ.

¹⁴Linūöi heuh Yēsū an angū-ö, nö hameuktöre nö i yik mahaköp, unôichrit chanôhòl Ò, nö ṙā-ang i yip tökapah.

¹⁵Keuheūthëkūö cha-a nö nyā, ngaich ngö ṙô Yēsū tö Sīmōn Pītör, Sīmōn, me-eṅ kūön Yôna; mööḵlö hanāngenlōn öm tö Chu, tö vē? Ngaich ngö ṙô anga-aṅ tö Ò, Hòṅ; Mā; akahalōn Man tö chu hāngenlōn tö Meh. Ngaich ngö ṙô Anga-aṅ tö ò, Ha-aṅlö në kun pököre Chu man.

¹⁶Ngö ṙô hēk Ang-aṅ tö ò, im innët heuh, Sīmōn, me-eṅ kūön Yôna; hāngenlōn öm tö Chu? Ngaich ngö ṙô anga-aṅ tö Ò, Hôṅ; Mā; akahalōn Man tö chu hāngenlōn tö Meh. Ngaich ngö ṙô Anga-aṅ tö ò, Meukkö në pököre Chu man.

¹⁷Ngö ṙô Yēsū tö ò, īm linūöi heuh, Sīmōn, me-eṅ kūön Yôna; hāngenlōn öm tö Chu? Haṙivlōn ngaich ang Pītör, pòn linūöi heuh ṙô Ò, nö ngö, Hāngenlōn öm tö Chu? Ngaich ngö ṙô Pītör tö Ò. Mā! Tökeuheūttöre mikahlōn Man; akahalōn Man, tö chu hāngenlōn tö Meh. Ngaich ngö ṙô Ang Yēsū tö ò, Ha-aṅlö në pököre Chu man.

¹⁸Tökô-ò ṙô Chin tö meh, Hē meh misī ayal, kahngenre me-eṅ kafanlöre; kiröönngöre inrē ip kū-ö lōn meh. Yē meh pöri min ngaich köṅny, hateutnyö minë këlre min me-eṅ; ngaich kafānö min tö tahëng tak; kēḵngen meh inrē ip töt kū-ö lōn meh.

¹⁹Ṙô Yēsū an angū-ö nö hameuktö inlahen kinpaha ò, nö ha-öiny ngam Tēv. Keuheūthë ṙô Yēsū tö e, ngaich ngö ṙô tö ò Tā-a, tömrit Chu.

²⁰Havöölökūöre Pītör, ngaich meuk ök mahaköp, ök hanāngelōn Yēsū nö tömrit cha; ök maharônlöre nö in Ò, hē ök nyinā-aṅ, ngaich ngö ṙô, Mā; achīö ap kamëḵngen Meh?

²¹Höng meuktöre Pītör tö ò, ngaich ngö ṙô tö Yēsū Mā; Sitih min ngòh tarik ngòh?

²²Ngaich Yēsū nö ngö ṙô tö ò, Yē Chu lōnuvö tö ò nöngngöh hanöng saha yanīhih Chu, asuh öng angū-ö nö in meh? Ta-a tömrit Chu man me-eṅ.

²³Ngaich a ngū-ö nö hāngö tö yik hol cha, tö ò anga-aṅ mahaköp nö töthōḵ nö kapah. Rö-ö pöri Yēsū nö ṙô-òv tö ò nö töthōḵ nö kapah, tön höng ngö ṙô. Yē Chu lōnuvö tö ò nöngngöh hanöng saha yanīhih Chu, asuh öng angū-ö nö in meh?

²⁴Anga-aṅ ön ngòh mahaköp ameūkö në taṙòkhöre, kūichngö u inrē. Akahalōn īhö tö ngam aheūkö ò nö tökô-en.

²⁵Pōyen nup inrē tahëng tī Yēsū, kūichi öre anū-ö nö ṙòkhöre, ngaich öt kô ngih panam, tö lōn chu, nö chūök nup līpöre tökūichiyö.