Read Car_Nicobarese T. YÔHAN 4 Bible Online

T. YÔHAN 4 - Car_Nicobarese bible

T. YÔHAN 4

¹Lökten hē ngam Mā nö akahalōn tö yik Feresī nö hang, tö Yēsū nö maṙôngö haköptö, vahōk inrē, tö Yôhan.

²(Öt hakôtenre pöri Yēsū nö vōk tarik; höng yik mahaköp.)

³Ṙā-ang Anga-aṅ tö Yūtā, ngaich hēk nö chuh Kelelī.

⁴Ngaich öt kô Anga-aṅ nö öt lök Samariā.

⁵Yih ngaich Anga-aṅ nö ip tö kiröng elpanam Samariā, i Sīkör; ranghö ap taṙeū kahëtö Yāköp nö ik kūön Ò, Yôsĕf.

⁶Umuh ök mak Yāköp. Uichngöre Yēsū ngaich, nö i kui ök mak, nöng ngatī; pòn chei töm kinröönngöre.

⁷Hĕng tak ök kikānö aṅ Samariā, yamihtöre nö fòk mak; ngaich Yēsū nö ngö ṙô tö ò, Kētö òk Chu man.

⁸Pò yik haköptö Ò nö chuh im panam, nö havah nya-aṅkūö cha.

⁹Lökten ngam aṅ Samariā kikānö nö ngö ṙô tö Ò, Sitih Ömeh havëkö òkre in chu, öich kikānö aṅ Samariā, yē Meh öm Yahūti? (Pò vē Yahūti nö öt holre tö aṅ Samariā.)

¹⁰Ngaich ngö ṙô Yēsū, nö sapṙô ò, Yē meh akahalōn tö ngam tö ngö ṙô inrē, tö meh, Kētö òk Chu man, havë-a öre me-eṅ in Ò; ngaich kô-òren Anga-aṅ nö kē-ĕkūö meh tö tö-aṅ mak.

¹¹Ngaich ngö ṙô ngam kikānö tö Ò, Mā! Öt chūökutī Man fòk mak; aṙū-uti inrē ngam mak, Aṅ yih aṅ-in Öm tö tö-aṅ mak?

¹²Tömööḵlö Öm me-eṅ tök muvöhngö ih, Yāköp, ök kamëtö ngih mak nö in ih; òk aṅ e inrē anga-aṅ, tö yik kūön ò, tö nuk nūā ò inrē.

¹³Ngaich ngö ṙô Yēsū, nö sapṙô ò, Haṙëhe nômö yip min nö hēk, amòk ngih mak.

¹⁴Öthētu pöri nö haṙëhe nômö, yip amòk öp kahëtö Chu min mak. Ngam mak kahëtö Chu in ò, vīngöre nö töhëmlö nö ellōn ò, nö mak ngam nômö tö-örheūheu-aṅ.

¹⁵Ngaich ngö ṙô ngam kikānö tö Ò, Mā! Kētö e Man; angū-ö mak, in chu; hòṅ chu öt haṙëhe nômö, öt yihtöre inrē öich ngih rô-òlkūö fòk mak.

¹⁶Ngaich ngö ṙô Yēsū tö ò, Kuṙòh, havëkö ap pīhöre man; ngaich yihtöre hēk.

¹⁷Hö-ö chin pīhövö, ngö ṙô ngam kikānö, nö sapṙô Ò. Ngaich ngö ṙô Yēsū tö ò, Huveū-eu ṙô man, öm ngatī ṙô, Hö-ö chin pihövö;

¹⁸Pò meh öm tö taneui tak pihö sin; ngaich ap mi-in meh töngamuh, nö öt pihö meh. Angū-ö an kanô-òṅ ṙô meh.

¹⁹Ngö ṙô ngam kikānö tö Ò, Mā, akahalōn chin ngaich tö Meh Öm pròfĕt.

²⁰I kui ngih rôngö yik muvöhngö ih nö ve-ekūötēv; ngaich ngö ṙô yī-ö tö tarik nöng i Yerūsalem chūök nö ve-ekūötēv.

²¹Ngaich Yēsū nö ngö ṙô tö ò, Me-eṅ kikānö; haköp ṙô Chu man; yih an ngam ṙētak, hē yīö min ve-ekūö ngam Yöng, öt i kui ngih rôngö, öt rēhĕn i Yerūsalem.

²²Öt akahakūö yin yī-ö tö ngam vahe-ekūöre. Ve-ekūö ngam mikahkūöre in īhö; pò ngam inyööken nö lamökten yip Yahūti.

²³Yih pöri ngam ṙētak, ngaich an töngamuh, hē yip tökô-en ve-ekūö ngam Yöng min, nö ve-ekūö Ò nö holtö ellōnre, kanô-en inrē. Pò yip töngatī nö lōn ngam Tēv nö vame-eṅkūö Ò.

²⁴Ötmaneūken (Ma-alaha) An ngam Tēv; ngaich yip vame-eṅkūö Ò, nö hòṅ holtö ellōnre, kanô-en inrē nö ve-ekūö Ò.

²⁵Akahalōn chin, ngö ṙô ngam kikānö tö Ò, tö Mesayā min nö yih, Öp tö Kristū invëḵa; ve-eny nang ih Öp min tö taṙòhöre, yē Ò nö yih.

²⁶Chū-ö Chin Anga-aṅ, vame-eṅkūö meh, ngö ṙô Yēsū tö ò.

²⁷Hē e, yik haköptö Ò nö yih, ngaich cha-a nö uṙeh tö Ò nö ve-ekūö kikānö; örhĕng tak pöri, tö ngö ṙô, Asuh ap lōn meh? Hēk, Kūöyòh Öm ve-ekūö ngam kikānö?

²⁸Ṙāngö ök chūök mak ngaich ngam kikānö; ngaich chuh im panam; ngaich ngö ṙô tö yik tarik,

²⁹Ta-a ngëichkö Öp tarik. Öp tökeuheūtnyöre ṙô tö fālen chu. Röh Ap nö Kristū?

³⁰Ngaich kunyī-inyre yik tarik, nö ṙā-ang im panam; ngaich yihtöre nö in Ò.

³¹Hē e yik mahaköp nö ve-ekūö Ò, nö ngö ṙô, Rappī; nyā Man yēḵ.

³²Ngö ṙô pöri Anga-aṅ tö cha, Nyahaṅav Chin tö nya-aṅkūö, öp öt mikahlōn yīö.

³³Ngaich ngö ṙô yik mahaköp tö höö, Tarīku hòng uvöh kamëtö nya-aṅkūö Ò?

³⁴Ngaich ngö rô Yēsū tö cha, Ngam la-en lōn ngam tamīnten Chu, angū-ö an nya-aṅ Chu; ngam kinheūṅtngen ngam la-en Ò inrē.

³⁵Röh öi ṙung ngö ṙô, Fëntöre chumngëṅtö ap, ngaich yih ngam kanöinyö? Yĕh meuk, ve-eny nang yīö Chin, Môklökūöre yin ngëichkö elngāṙö, tö u nö ngaich nö isoh nö köiny.

³⁶Teūngen an ngam mahamūl nö ngaich tö raneushöre; ngaich hamūl ṙòng nö im nômö tö-örheūheu-aṅ; hòṅ ngam tameūich, tö ngam mahamūl inrē, nö ṙāmölōnnyöre.

³⁷In e an ngam inchōḵoṙô nö teungta, Hĕng tak ngam tameūich; tahëng ngam mahamūl.

³⁸Tīnten yīö Chin hamūl nup tötla-en yīö; tahëng tak yik töla-evṙen, ngaich yī-ö höng yihtöre i nup la-en cha.

³⁹Maṙôngö yik ṙamātö ellōnre aṅ im panam Samariā, nö in Ò; kūö ṙô ngam kikānö, ngam ameū-a, nö ngö ṙô, Ve-eny nang chu An, tö nup taṙòkhöre fālen chu.

⁴⁰Lökten hē yik aṅ Samariā nö yihtöre nö in Ò, ngaich ve-ekūö Ò cha-a, nöngngöh nö in cha. Ngaich nët sumkam Anga-aṅ nö iyöng umuh,

⁴¹Ṙuhölre ṙôngö hēk yik ṙamātö ellōnre nö in Ò, tökūö ṙô Ò;

⁴²Ngaich ngö ṙô cha-a tök kikānö, Ṙātö ellōnre in ngaich, öt kūö ṙô meh; pò ih īhö ngaich hang, ngaich akahalōn tö Ò nö kô nö Anga-aṅ Mahayööken ngih panam.

⁴³Unôichrit tö nët sumkam, Anga-aṅ nö ṙā-ang umuh, nö chuh Kelelī;

⁴⁴Pò Yēsū nö ve-eny tö ngòh pròfĕt nö öt kanôluṙô nö i panamre.

⁴⁵Ngaich hē Ò nö yih nö i Kelelī, ṙòkhöre ngaich yik aṅ Kelelī nö ha-öiny tö yīhih Ò pòn meuk nuk tī Ò nö i Yerūsalem, nö ik paratīn; pò cha cha-a inrē nö chuh im paratīn.

⁴⁶Yihtöre Anga-aṅ hēk nö i Kānā i Kelelī, i chūök Ò nö vīngö mak nö vāin. Hĕng taka ök umuh, tarik ök rācha ök tökūönu tök tövahavö, i Kafarnahum.

⁴⁷Ngaich hē Ò nö hāngö Yēsū, nö yih nö i Këlelī, nö ṙā-ang Yūtā, chuh in Ò ngaich anga-aṅ; ngaich ve-ekūö Ò nö hōten Ò nö yihtöre nö halanken ök kūön ò; pòn hòṅ kapah anga-aṅ.

⁴⁸Lökten Yēsū nö ngö ṙô tö ò, Öt hōḵ yin ṙātö ellōnre, yē yīö öt meuk minkahngö, pinngangkūö inrē.

⁴⁹Ngaich ngö ṙô ök tarik ngam rācha tö Ò, Mā yih tal Man urēhĕkūö ap kūön chuh nö kapah.

⁵⁰Ngaich Yēsū nö ngö ṙô tö ò, Kuṙòh ngaich man; aṅ ap kūön meh. Ṙātö ellōnre ngam tarik, tö ṙô Yēsū nö ve-ekūö ò; ngaich kiröönngöre.

⁵¹Ngaich hē ò nö ngaich nö peūtöre, asaha ngaich anga-aṅ tö yik mahalanṙenre, yik tö ngö ṙô, Aṅ ap kūön meh.

⁵²Ngaich hatönö cha anga-aṅ, tö ṙētak ranehten ò nö ĕhten. Ngaich ngö ṙô cha-a tö ò, Ik sinat köṅny ṙô, ök anūöyö ò nö ṙāngen ò, vahë.

⁵³Ngaich akahalōn ngam yöng ò tö e, nö angū-ö ṙētak Yēsū, nö ngö ṙô, Aṅ ap kūön meh. Ṙātö ellōnre ngaich anga-aṅ, ṙòkhöre yik aṅ patī ò inrē.

⁵⁴Innëtö minkahngö ön ngih, tī Yēsū, hē Ò nö yih nö i Këlelī, nö ṙa-ang Yūtā.