Read Car_Nicobarese T. YÔHAN 5 Bible Online

T. YÔHAN 5 - Car_Nicobarese bible

T. YÔHAN 5

¹Unôichrit në, ök paratīn yik Yahūti; ngaich chuh Yerūsalem Ang Yēsū.

²Ngaich i Yerūsalem ap mak töhachūöki, ranghö lökhöt pököre, Pĕtsata ap, tö ṙô yip Yahūti, tö taneūyö rittūi.

³Ël u nö hulalhaka yik tömaṙôngö tö vahavö, tötmeuk, tökaròk, tölum; hökkö kintövö ngam mak.

⁴Pòn ip ṙētak, nö hĕng tak ap ma-ahānga yāmônti nö el ngam mak, nö kitöv ngam mak. Ngaich unôichrit kintövö ngam mak, ap mu-urĕhti nö yôkti nö el ngam mak, ngaich lööken tö nup töng vahre.

⁵Hĕng taka ök umuh tarik tölūöi anāi hëvhör samyeūheu nö vahavö.

⁶Hē Yēsū nö meūkan nö hulalhaka, ngaich akahalōn tö ò nö ngaich nö marô-òten nö ngatī, ngö ṙô Anga-aṅ tö ò, Hòṅ lööken ömeh?

⁷Ngaich ngam tövahavö nö ngö ṙô, nö sapṙô Ò, Mā! Öt tarīku chamālten chu ël ngam mak, yē ngam mak nö kitövö; ṙòngmö yihtöre lang Chū-ö, ngaich hĕng tak mu-urēhĕkūö tö yamôkti.

⁸Ngaich ngö ṙô Yēsū tö ò, Choholre man; kēḵ ngam chamamre; kiröönngöre.

⁹Ilööṙen ngaich ngam tarik nö lööken; kēḵ ngam chamamre, ngaich kiröönngöre.

¹⁰Töhet ök angū-ö sakāmö; lökten yik Yahūti nö ngö ṙô tö ò, ök tölööken nö ngaich, Töhet ön ngih sakāmö. Öt kô man kēḵ ngam chamamre.

¹¹Ngö ṙô pöri anga-aṅ, nö sapṙô cha, Ngö ṙô Ap taheui, tölööken tī tö chu, Kēḵ ngam chamamre; ngaich kiröönngöre.

¹²Ngaich ngö ṙô cha-a nö hatönan, Achīö ap taheui tarik tö ngö ṙô tö meh, Kēḵ ngam chammre man; ngaich kiröönngöre?

¹³Öt akahakūö pöri ngam tölööken nö ngaich, tö Ò; pò Yēsū nö kiröönngöre; maṙôngö inrē yik tarik umuh.

¹⁴Unôichngöre Yēsū nö kôktökūö tö ò nö el ök töhet chūök; ngaich ngö ṙô tö ò, Yĕh meuk: ngaich man lööken; uh pömchö hēk köölö fālen hòṅ meh öt ṙūöngenre.

¹⁵Kiröönngöre ngaich ngam tarik, ngaich ve-eny nang yik Yahūti, tö Yēsū nö Anga-aṅ tölööken tī tö ò.

¹⁶Angū-ö lökten yik Yahūti, nö öthakôlò Yēsū, pòn la-evṙen Anga-aṅ hē el töhet sakāmö, nö ngatī.

¹⁷Ngaich ngö ṙô Yēsū tö cha, La-evṙen An ngam Yöng Chu nö örheūheu, ngatī Chū-ö la-evṙen.

¹⁸Angū-ö lökten yik Yahūti nö ṙuhöllōnre nö hòṅ fëlngen Ò; pò Ò nö öt höng filalngö ngam töhet sakāmö, tön Yöngrevö ṙô tö ngam Tēv, vīlöre inrē nö sā ngam Tēv.

¹⁹Lökten Yēsū nö ngö ṙô tö cha, Tökô-ò ṙô Chin tö yīö, Öt kô An ngam Kūön nö kanahnguṙen tö la-enre, nup la-en ngam Yöng pöri maheuṅk Ò, ngatī ngam Kūön, nö sā ngam Yöng.

²⁰Pò ngam Yöng nö hāngenlōn tö ngam Kūön; ngaich hameukhömat Ò tö nup taṙòkhöre la-enre. Mööḵlö nup la-en min hameuktö Ò nö im Kūön, hòṅ yīö min pingangkūö.

²¹Pòn sā ngam Yöng nö hachohlö tökapah, ngaich ha-aṅhaṅ cha, ngatī ngam Kūön inrē nö ha-aṅ yip lōnre.

²²Pò ngam Yöng nö öt kahòkken tarik, i ngam Kūön tī pöri Anga-aṅ tö nup taṙòkhöre kinṙôka;

²³Pòn hōtu taṙòkhöre tarik nö ha-öiny ngam Kūön, sā cha nö ha-öiny ngam Yöng.

²⁴Tökô-ò ṙô Chin tö yīö, Ngòh hamang ṙô Chu ane inrē ṙamātö ellōnre nö im tamīnngen Chu, nômuvö anga-aṅ tö ngam tö-örheūheu-aṅ; öt yihtöre inrē nö im ötinkôlò; chööḵngö ngam kinpaha pöri; nö im nômö.

²⁵Tökô-ò ṙô Chin tö yīö, Yih an ngam ṙētak, ihih an töngamuh; hē vē tökapah min nö hang ṙô ngam Kūön ngam Tēv; ngaich cha-a yip hamang nö aṅ min.

²⁶Pòn sā ngam Yöng nö in re nômö; ngati tī Anga-aṅ inrē nö kē-ĕkūö ngam Kūön nö nômuvö nö in re.

²⁷Ngaich pòn Kūön Tarik Anga-aṅ, ngaich kē-ĕvkūö tö Ò tö chöngö nö kahôka.

²⁸Ui pingangkūö tö ngih, tön yih an ngam ṙētak, hē yip taṙòkhöre el anūlö nö hang ṙô Ò min, ngaich kunyī-inyre.

²⁹Yip tölöökö la-en ngaich im invanlö nômö; yip tötlöökö la-en pöri, im invanlö kinṙôka.

³⁰Öt kô Chin Chū-ö kanahnguṙen tö la-enre; kahôka Chin sā inköptö Chu; tökô-en an ngam kinṙôka Chu, pò Chu öt kēḵ lōnre, tön lōn Ò pöri ngam tamīnten chu.

³¹Yē Chu kahangenre eūköre, ngaich ngam aheūkö Chu nö tötkô-en,

³²Tahëngö ameūka Chin; ngaich akahalōn Chū-ö tö ngam aheūkö ò nö tökô-en.

³³Tīnhang yin yih yī-ö in Yôhan; ngaich anga-aṅ nö eū-a im kanô-en.

³⁴Rö-ö pöri nö aṅ i tarik, ngam ineūkö Chu; ṙô Chu pöri në, hòṅ yīö hayöökaṙen.

³⁵Anga-aṅ ap ëāṅvö tö hū, yang inrē; ngaich yī-ö sin ṙāmölōn rahëchtaṙen hōḵ im yanāngö ò.

³⁶Mööḵlö pöri ngam ineūkö Chu, tö ngam aheūkö Yôhan; pò në la-en në kahëtö ngam Yöng Chu la-en Chu, minë la-en Chu ameū-a tö Chu tīntu tö ngam Yöng.

³⁷Ngam yöng, ngam tamīnten chu eūken Chu Anga-aṅ, Örhĕng heuh yin yī-ö hang ṙô Ò; öt rēhĕn meūkan.

³⁸Ngaich ngam ṙô Ò inrē nö öt köp nö in yīö; pò yīö ötṙātö ellōnre im tahīntö Ò.

³⁹Chöh nup töhet līpöre yī-ö, pò yīö in u tö lōnre öi nômu tö tö-örheūheu-aṅ; anū-önun inrē ameūken Chu.

⁴⁰Ngaich öt hòṅ yihtöre yī-ö in Chu, hòṅ yīö nômu.

⁴¹Rö-ö Chin Chū-ö aṅ i tarik ineū-euṅ.

⁴²Akahalōn Chū-ö tö yīö, öi öt īnu tö hanāngenlōn ngam Tēv.

⁴³Yih Chū-ö i Mine-eny ngam Yöngre; ngaich rö-ö yī-ö hōḵen Chu. Tahëng öre yamih nö i mine-enyre; ngaich hōḵen ò yī-ö.

⁴⁴Sitih kanô-òṅ öi ṙātö ellōnre, yē yīö höng kö eū-eu höö, ngaich yī-ö öt hōḵ tö ngam ineū-euṅ aṅ im töng hĕng Tēv.

⁴⁵Uh yin ngö lōn tö Chu min vënyen yīö im Yöng; hĕng taka ap vamënyen yīö, ang Môsös, ngam chūök yīö hayönglenre.

⁴⁶Yē yīö öre ṙātö ellōnre im Môsös, ngaich ṙātö ellōnre öre yī-ö in Chu; pòn kūichö Chu anga-aṅ.

⁴⁷Yē yīö pöri öt ṙātö ellōnre i nup kahūich ò, Sitih kanô-òṅ öi ṙātö ellōnre i në ṙô Chu?