Read Car_Nicobarese T. YÔHAN 6 Bible Online

T. YÔHAN 6 - Car_Nicobarese bible

T. YÔHAN 6

¹Unôichrit u, Yēsū nö chuh i tahëng lā ap mai Keleli; mai Tipĕriös minënyö ap inrē.

²Maṙôngö yik tarik tamömrit Ò, pò cha nö meuk nuk pinngangkūö tī Ò, nö i yik tövahav.

³Ngaich yônlö Yēsū nö i kui ṙôngö, ngaich ūichngöre nö holtö yik mahaköp.

⁴Ngaich ngam paratīn yik Yahūti nö röhta, ngam tö paska invëka.

⁵Chingôhòl kūöre Yēsū, ngaich ngëichkö yik tömaṙôngö nö yihtöre nö in Ò; ngaich ngö ṙô tö Filip, Isuh öivöh havah ròtī, hòṅ vē nö nyā?

⁶Ṙô Ò an angū-ö nö kalahan; pòn akahalōn Anga-aṅ töp tīre.

⁷Ngaich ngö ṙô Filip, nö sapṙô Ò, Nëtòng nup öre rupīö, ṙāi ròtī, ngaich öt kô-òrekūö cha-a, nöng kö rahëchvat öre.

⁸Hĕng taka ök mahaköp nö in Ò, Antarū, kahëm Sīmōn Pītör, tö ngö ṙô tö Ò.

⁹Hĕng taka öp ihih nyīö, tö taneūyö aṅ-in tö parli ròtī, nët nòng kun kāḵ inrē. Asuh nup anū-ö nö i töngatī ṙôngö?

¹⁰Ngaich ngö ṙô Yēsū, Tölṙô më tarik nö ūichngöre. Töpōyen nuk umuh tingūyö in e, Ūichngöre ngaich më tarik; taneūi köṅny tum taka.

¹¹Kēḵ minë ròtī ngaich Yēsū, keuheūthëṙô ngaich nö ha-öiny ngam Tēv, ngaich katölhökūö cha yik tö ūichhaka, i ṙôken lōn cha.

¹²Ngaich hē cha nö tööḵngen, ngaich ngö ṙô Anga-aṅ tö yik mahaköp. Hamūl nup tölaköla, nup chööḵkūö, hòn öt tömëchiyö.

¹³Ngaich hamūlö u cha-a, nët sīön kumvôkö, nuk nö tööḵlö tö nuk tölaköla, aṅ i nuk tö taneui parli ròtī, nuk chööḵkūö yik tö ngaich nö nyā.

¹⁴Ngaich hē më tarik nö meuk ngam minkahngö tī Ò, ngö ṙô cha-a, Kô ön ngòh nö pròfĕt, ngòh yamih nö ing panam.

¹⁵Akahalōn Ang Yēsū tö cha nöng hòṅ kētöre tö Ò, nö vīlen Ò nö rācha; lökten Anga-aṅ nö ṙūöhöngre nö hēk, nöng hĕng taka, nö i kui rôngö.

¹⁶Haraptöre ngam harap, ngaich chuh ik mai yik mahaköp.

¹⁷Ngaich yôklö cha-a nö el kupòk, hòṅ havāngngöre nö i Kafarnahum. Sangūla angū-ö; ngaich nöng öl Yēsū nö yihtöre nö in cha.

¹⁸Ëlu inrē ngam mai; pòn kalēḵ ök kuföt.

¹⁹Ngaich hē cha nö lūöi, fën mail rô-òlkūö nö keūtöre; meūkö Yēsū cha-a nö kiröönngöre nö i kui mai; ngaich haröhtöre nö im kupòk; ngaich pa-ekūö cha-a.

²⁰Ngö ṙô pöri Anga-aṅ tö cha, Chū-ö Chini; ui pa-ekūö.

²¹Hòṅ hayôklen Ò cha-a ngaich nö el kupòk; ngaich iṙūö im panam ngam kupòk, ngam chahuhu cha.

²²Im huṙöich yik tömaṙôngö töngngöh nö im tahëng lā kaha ngam mai, nö öt maheūṅku tö tahëng nòng kupòk umuh, höng humeng nòng; rö-ö pöri Yēsū nö ël ò, nö i yik mahaköp; öt hōlu pöri tö Ò yik mahaköp nö ngaich.

²³(Yih pöri nuk kupòk nö ṙā-ang Tipĕriös röhta nö ik chūök cha nö nyā ròtī, unôichrit ngam Mā nö ha-öiny ngam Tēv.)

²⁴Ngaich hē më tömaṙôngö nö öt meūkö Yēsū nö umuh, öt rēhĕn yik haköptö Ò; yôklö cha-a ngaich nö el kupòk, ngaich yih nö i Kafarnahum, nö chöhö Yēsū.

²⁵Ngaich hē cha nö kôtökūö tö Ò, nö ik tahëng lā kaha ngam mai; ngaich ngö ṙô cha-a tö Ò, Rappī! Ĕhē tö yihih Öm ihih?

²⁶Ngaich ngö ṙô Yēsū tö cha, Tökô-ò ṙô Chin tö yīö, Chöhö Chu yin, öt kūö yīö meuk nuk minkahngö, tön kūö yīö nyā nuk ròtī, ngaich tööḵngen.

²⁷Un harëtnyö elmatre tökūö chamuhngöre nya-aṅkūö; harëtnyö elmatre pöri tökūö ngam töngngöh nya-aṅkūö, im nômö tö-örheūheu-aṅ, ngam kahëtö ngam Kūön Tarik min nö in yīö; pòkūö Ò An ngam Yöng, ngam Tēv nö minkahngö.

²⁸Ngaich ngö ṙô cha-a tö Ò, Asuh ap la-en ih, hòṅ ih la-evṙen tö la-en ngam Tēv?

²⁹Ngaich ngö ṙô Yēsū, nö sapṙô cha, Ngih ön yih la-en ngam Tēv, Ṙātö ellōnre yin im tahīntö Ò.

³⁰Ngaich ngö ṙô cha-a tö Ò, Asuh ap tī Meh minkahngö, hòṅ ih meuk, ngaich ṙātö ellōnre in Meh?

³¹Asuh ap la-en Meh? Nyā manna yik muvöhngö ih, nö el-inchōnngö; sā kinūichngö e, nö ngö Kētö nya-aṅkūö cha Anga-aṅ, nö ṙā-ang el halīöngö.

³²Lökten Yēsū nö ngö ṙô tö cha, Tökô-ò ṙô Chin tö yīö, Rö-ö ök nö Môsös kamëtö nya-aṅkūö yīö, nö ṙā-ang el, halīöngö; tön ngam Yöng Chu kamëtö ngam tökô-en nya-aṅkūö, aṅ el halīöngö.

³³Ngih ön nya-aṅ aṅ im Tēv, yamih nö ṙā-ang el halīöngö, ngaich kētö nômö nö ing panam.

³⁴Ngaich ngö ṙô cha-a tö Ò, Mā! Örheūheu Man yēḵ, kētö e angū-ö nya-aṅ in ih.

³⁵Ngaich ngö ṙô Yēsū tö cha, Chū-ö Chin Ròtī nômö. Ngòh yamihtöre nö in Chu, öt kapahare min; ngòh ṙamātö ellōnre nö in Chu inrē, öt haṙëhe nômö min.

³⁶Sā ṙô Chu an ngaich tö yīö, Meūkö Chu yin ngaich, ngaich rö-ö ṙātö ellōnre,

³⁷Ṙòkhöre yip kahëtö ngam Yöng nö in Chu, nö yihtöre min nö in Chu, öt löktu nö havööṙökūö.

³⁸Pò Chu yih ṙā-ang el halīöngö, öt töla-evṙen tölōnre, höng lōn Ò ngam tamīnten Chu.

³⁹Ngih ön lōn Ò ngam tamīnten Chu, tö yip taṙòkhöre kahëtö Ò nö in Chu, nö öt hĕng tak tölöhlö; hachohlöng pöri mīnö ip manā-aṅ sakāmö.

⁴⁰Pò e nö lōn ngam Yöng Chu, tö yip taṙòkhöre mameuk ngam Kūön, ṙātö ellōnre inrē nö in Ò, nö nômuvö tö ngam tö örheūheu-aṅ, ngaich hachohlen cha Chū-ö min, ip manā-aṅ sakāmö.

⁴¹Angū-ö lökten yik Yahūti nö uyëken Ò, pò Ò nö ngö ṙô, Chū-ö Chin Ròtī yamônti, ṙā-ang el halīöngö.

⁴²Ngaich ngö ṙô cha-a, Röh Ang ngòh nö Yēsū, nö Kūön Yôsĕf; akahakūö in tö nap Yöng Ò? Sitih Ang nö ngö ṙô, Yônti Chin, ṙā-ang el halīöngö?

⁴³Ngaich Yēsū nö ngö ṙô tö cha, Uh yin uyëḵa in re.

⁴⁴Öt hĕng tak tarik tö kô nö yihtöre nö in Chu, yē ngam Yöng ngam tamīnten Chu, nö öt tūökten ò, ngaich hachohlen ò Chū-ö min ip manā-aṅ sakāmö.

⁴⁵Ngö kinūichngö an, tö ṙô yip pròfĕt, Ngaich ṙòkhöre min cha-a nö haköptu tö ngam Tēv Ṙòkhöre yip hamang ṙô ngam Yöng, ngaich haköp, nö yihtöre nö in Chu.

⁴⁶Öt hĕng tak tö ngaich nö meuk ngam Yöng; höng Anga-aṅ ngam ṙamā-ang im Tēv, mameuk ngam Yöng.

⁴⁷Tökô-ò ṙô Chin tö yīö, Ngòh ṙamātö ellōnre nö in Chu, nômuvö tö ngam tö örheūheu-aṅ.

⁴⁸Chū-ö Chin Ròtī nômö.

⁴⁹Ṙòkngöre yik muvöhngö yīö nö kapah, yik nyamā manna nö el-inchōn.

⁵⁰Ngih ön Ròtī yamih nö ṙā-ang el halīöngö, nyahāṅ ngòh tarik, ngaich öt hōḵ nö kapah.

⁵¹Chū-ö Chin tö-aṅ Ròtī, yamônti ṙā-ang el halīöngö. Yē öp tarik nyamā ngih Ròtī, örheūheu min nö aṅ. Alaha Chu an ngam kahëtö Chu min Ròtī, nö nômö ngih panam.

⁵²Hē e yik Yahūti nö lā-alkūö höö, nö ngö ṙô, Sitīh kanô-òṅ Ang ngòh tarik nö kētö nya-aṅkūö hī tö Alahare?

⁵³Lökten Yēsū nö ngö ṙô tö cha, Tökô-ò ṙô Chin tö yīö, yē yīö öt nyā Alaha ngam Kūön Tarik, òk Mahām Ò inrē, öt nômuvö yī-ö in re.

⁵⁴Ngòh nyamā ngih Alaha Chu, òk Mahām Chu inrē, nômuvö tö ngam tö örheūheu-aṅ; ngaich hachohlen ò Chū-ö min, ip manā-aṅ sakāmö.

⁵⁵Pò ngih Alaha chu nö nya-aṅkūö takô; ngih Mahām Chu inrē nö òk takô.

⁵⁶Ngòh nyamā ngih Alaha Chu, òk ngih Mahām Chu inrē, köp nö in Chu, in ò Chū-ö inrē.

⁵⁷Sā ngam tö-aṅ Yöng nö tīnten Chu, ngaich sā Chu Chū-ö aṅ im Yöng; ngatī ngòh nyamā-aṅ Chu, nö aṅ lökten in Chu.

⁵⁸Ngih ön Ròtī yamônti nö ṙā-ang el halīöngö; öt sā nya-aṅ yik muvöhngö yīö, yik tökapah nö ngaich. Ngòh nyamā ngih Ròtī, örheūheu min nö aṅ.

⁵⁹Ṙô Yēsū nun anu-ö, hē Ò nö el chūök vine-eṅkūötēv, nö i Kafarnahum.

⁶⁰Maṙôngö yik haköptö Ò tö ngö ṙô, hē cha nö hāngö e, Tökihngen ön ngih ṙô. Achīö öp tökô nö hāngö e?

⁶¹Akahaiṙen pöri Yēsū, tö yik haköptö Ò nö uyëkö e; ngaich ngö ṙô tö cha, Angū-ö öng insökngö yīö?

⁶²Sitīh öi min, yē yīö meuk ngòh Kūön Tarik nö yônlö nö im chūökre nö lā-urĕh?

⁶³Ngam ma-alaha an tö aṅhaṅ tī; öt kanôluṙô an ngam alaha. Ma-alaha nun në ṙô Chu tö yīö, nômö inrē.

⁶⁴Rēvre pöri yip in yīö, töt ṙamātö ellōnre. Pò Yēsū nö ha-eheten mikahlōn tö yik tötṙamātö ellōnre, tö öp kamëḵngen Ò inrē.

⁶⁵Ngaich ngö ṙô Anga-aṅ tö cha, Angū-ö an löknyö ṙô Chu tö yīö. Öt hĕng tak tarik tö kô nö yihtöre nö in Chu, yĕn öt kine-eṅkūö ò tö ngam Yöng.

⁶⁶Maṙôngö yik haköptö Ò ṙamāngen Ò, unôichrit e; ngaich öt holröön Ò nö kiröönngöre.

⁶⁷Lökten Yēsū nö ngö ṙô tö yik tö nët sīön, Hòṅ ṙāngen Chu öi yī-ö inrē?

⁶⁸Ngaich ngö ṙô Sīmōn Pītör, nö sapṙô Ò, Mā! Chuh in chīö öi min? I minë ṙô Meh, an ngam nômö tö örheūheu-aṅ.

⁶⁹Ṙātö ellōnre īhö ngaich, akahalōn inrē, tö Meh Öm Töhet aṅ im Tēv.

⁷⁰Ngaich ngö ṙô Yēsū tö cha, Röh Öich katöllen yīö, yī-ö tö nët sīön tak? Ngaich hĕng tak öp aṅ in yīö nö sī-ö.

⁷¹Ṙôten Yūtā Anga-aṅ ök kūön Sīmōn Iskaryôt; pòn anga-aṅ kamëḵngen Ò, tö hĕng tak aṅ i yik tö nët sīön.