Read Car_Nicobarese T. YÔHAN 7 Bible Online

T. YÔHAN 7 - Car_Nicobarese bible

T. YÔHAN 7

¹Lök i Kelelī Ang Yēsū, unôichrit u pòn sōḵ nö lök i Yūtā, pò yik Yahūti nö lukkenre nö hòṅ fëlngen Ò.

²Röhta ök paratīn yik Yahūti, paratīn Inrūkui invëka.

³Lökten yik mëm Ò, kahëm Ò inrē, nö ngö ṙô tö Ò, kiröönngöre Man, kuṙòh, chuh Yūtā, hòṅ yip haköptö Meh nö meuk nup la-en Meh.

⁴Pòn öt tarīkuvö mu-ulāikenre nö la-evṙen, ngaich lukkenre nö hòṅ eūka. Yē Meh la-evṙen tö u, hameuktöre Man yēḵ ing panam.

⁵Pò yik mëm Ò, kahëm Ò inrē, nö öt rĕhēn nö ṙātö ellōnre nö in Ò.

⁶Ngaich ngö ṙô Yēsū tö cha, Öl ap ṙētak Chu nö yih, tö örheūheu pöri ngam ṙētak yīö ihih.

⁷Öt kô ön ngih panam nö surīkhen yīö; surīkhen Chu pöri angū-ö; pò Chu hameukhömat e tö nup la-en e nö tötlöök.

⁸Kuṙòh, kiröönngöre yin yī-ö im paratīn; öl Chin Chū-ö kiröönngöre, i ngih paratīn; pòn öl tö yihih ngam ṙētak Chu.

⁹Keuheūthëṙô Anga-aṅ tö cha, ngaich nöngngöh nö i Kelelī.

¹⁰Hē yik mëm Ò kahëm Ò inrē, nö ngaich nö chuh im paratīn, ngaich möl Anga-aṅ nö kiröönngöre, öt hangāṅlkenre, höng ulāikenre.

¹¹Lökten yik Yahūti nö chöhan, nö im paratīn; ngaich ngö ṙô, Isuh Apa?

¹²Ngaich ulāikôre yik tömaṙôngö; rēvre yik tö ngö ṙô, Tömaṙôngö; rēvre yik tö ngö ṙô, Tölöök An nö tarik. Hö-ö, ngö ṙô yik inrē; hachōḵngö vē tö maṙôngö An, nö lō-ongkūö.

¹³Öt hĕng tak tarik mahangāṅlnyôre tö Ò; pòn pa-ekūö tö yik Yahūti.

¹⁴I ranòngti ngam paratīn pöri, Ang Yēsū nö chuh ël ök töhet chūök; ngaich haköphöti.

¹⁵Ngaich pingang kūö yik Yahūti, ngö ṙô cha-a, Sitih huneū-euṅ ṙô Ang ngòh Tarik, nöng töt mahaköp?

¹⁶Ngaich sapṙô cha Yēsū, nö ngö ṙô, Öt aṅ in Chu an ngam inköphöti; tön aṅ im tamīnten Chu.

¹⁷Yĕn tarīkuvö tö hōḵ nö la-ev-ṙen tö lōn Ò; ngaich kô-òren Anga-aṅ nö akahalōn tö ngam inköphöti, yĕn aṅ im Tēv, hēk yĕn ṙô Chu kahngenre.

¹⁸Ngòh töng ṙô töre, lamukkenre nö hòṅ eū-eu. Ngòh lamukkö ineū-euṅ ngam tamīntöre, anga-aṅ tökô-en; öt īnu anga-aṅ tö michūṙen.

¹⁹Röh ang nö Môsös kame-eṅkūö yīö tö ngam chöngö? Ngaich öt hĕng tak tö yīö, tö la-evṙen tö e, kūöyòh öi lukkenre hòn fëlö Chu?

²⁰Ngaich ngö ṙô yik tö maṙôngö, Sī-u aṅ-in Man. Achīö ap lamukkenre nö hòṅ fëlö Meh?

²¹Ngaich ngö ṙô Yēsū tö cha, Hĕng ök la-en Chu; ngaich yī-ö ṙòkhöre pinngangkūö.

²²Angū-ö an lökten Môsös nö kē-ĕkūö yīö tö ngam tunnyinyngö; (Rö-ö pöri angū-ö nö aṅ i Môsös; tön aṅ i yik muvöhngö hī;) ngaich hē el sakāmö yī-ö tunyinyngö tarik.

²³Yē ngòh tarik nö tunyīnyi hē el töhet sakāmö, pòn sōtu ngam chöngö Môsös nö filāli; līn öi in Chu, pò Chu lööken tī tö tarik hē el töhet sakāmö?

²⁴Ui kahôka sā matre; ngam tötmichūṙen pöri kinṙôka.

²⁵Hē e yik rēvre aṅ Yerūsalem nö ngö ṙô. Röh Ang nö ngòh tarik, ngòh lōn cha nö fahël cha?

²⁶Yĕh meuk; hangāṅlnyöṙôre An; ngaich cha-a nö öt ṙô-òvö tö Ò. Akahalōn yip vöh mahayöng tö Ò, nö Anga-aṅ Kristū?

²⁷Akahalōn in yih ayī-ö tö ṙāngö ngòh tarik; hē Kristū pöri nö yih, öt hĕng tak tö-akahalōn tö ṙeūngö Ò.

²⁸Lökten Yēsū nö ngö ṙô, nö pōitô nö haköphöti, nö ël ök töhet chūök, Akahakūö yin tö Chu; hĕnghöre akahalōn inrē tö ṙeūngö Chu. Rö-ö Chin kahngenre yih; tökô-en pöri ngam tamīnten Chu, ngam öt mikahkūö yīö.

²⁹Akahakūö Chū-ö tö Ò; pò Chu ṙā-ang in Ò; Anga-aṅ tamīnten Chu.

³⁰Ngaich hòṅ kēḵ An cha-a; öt tarīku pöri lamūöltö tīre nö in Ò; pòn öl ngam ṙētak Ò nö yih.

³¹Maṙôngö pöri yik ṙamātö ellōnre aṅ i yik tömaṙôngö; ngaich ngö ṙô cha-a, Yē Kristū min nö yih; mööḵlö tī Öp min Anga-aṅ tö minkahngö, tö në tī ngòh tarik?

³²Hang ṙô yik tömaṙôngö yik Feresī, nö ulāikôre tö inlahen Ò; lökten yik mākūö kūönṙô, yik Feresī inrē, nö tīnngö tösökhak nö kamëḵ an.

³³Ngaich ngö ṙô Yēsū, Rahëchtören Chin in yīö; ngaich chuh im tamīntöre.

³⁴Chöhö Chu yin min; ngaich öt kôtökūö min tö Chu; öt kô yin yih im Chūök Chu.

³⁵Lökten yik Yahūti nö ngö ṙô nö in re, Chuh yih Angvöh min ngòh tarik, töp lökten hī öt kôtökūö min tö Ò? Chuh i yip töparāti Angvöh min, i yip tahëng mihëṅṙö tarik, nö haköpten cha?

³⁶Asuh öng ngih ṙô Ò, Chöhö Chuh yin min; ngaich öt kôtökūö min tö Chu. Öt kô yin yih im chūök Chu?

³⁷Im manā-aṅ tökiröng sakāmö ngam paratīn sökhaka Ang Yēsū, ngaich pōitô nö ngö ṙô, Yĕn tarīkuvö töhaṙëhe nômö, hökngen ò nö yihtöre nö in Chu, nö òk.

³⁸Ngòh ṙamātö ellōnre nö in Chu, sā ṙô ngam tö het līpöre, lök nyö ellōn ò nup min tahël tö hëmnyi nö tö aṅ mak.

³⁹Ṙô Ò ön ngih tö ngam Töhet Fanöinylö, ngam taneūngen yip ṙamātö ellōnre nö in Ò. Pò ngam Töhet Fanöinylö nö öl nökētu; pòn öl Yēsū nö hapōilöngö.

⁴⁰Rēvre yik tömaṙôngö tö ngö ṙô, hē cha nö hang në ṙô; Kô Ön ngòh nö ngam pròfĕt.

⁴¹Ngö ṙô yik tahëng tak, Anga-aṅ An Kristū. Rēvre pöri yik tö ngö ṙô, Löknyö i Kelelī ap Kristū.

⁴²Röh öng ngam töhet līpöre nö ngö ṙô, tö Kristū nö lamökngörit in Tāvit, nö ṙā-ang Petlihem, ngam panam Tāvit, misī?

⁴³Ngaich yik tömaṙôngö nö kö harēvngöre tö pòkūö Ò.

⁴⁴Rēvre tö cha yik tö hòṅ kēḵ An, öt tarīku pöri lamūöltö tīre nö in Ò.

⁴⁵Hē yik tösökhaka nö yih nö i yik mākūö kūönṙô, yik Feresī inrē; ngaich ngö ṙô cha-a tö cha, Kūöyòh öi öt kumten Ò?

⁴⁶Ngaich ngö ṙô yik tösökhaka, Öt tarīkuvö töngatī ṙô, nö kahôka.

⁴⁷Ngaich ngö ṙô yik Feresī tö cha, Ngaich öi yī-ö inrē halō-oikūö?

⁴⁸Mā-av hòng ṙamātö ellōnre nö in Ò? Feresīṙu hòng?

⁴⁹Tötkôlò yip tömaṙôngö, yip tötakahalōn tö ngam chöngö.

⁵⁰Ngaich ngö ṙô Nikòtimös tö cha, ök yamihtöre nö in Yēsū tö hĕng tak nö aṅ in cha,

⁵¹Kahòkken tarik öng ngih chöngö hī yĕn öl nö hang, akahalōn inrē töp inlahen ò?

⁵²Ngaich ngö ṙô cha-a tö ò, Aṅ Kelelī öm me-eṅ inrē? Ngëicha man yēḵ, tön öt pròfĕt tu lamöknyö i Kelelī,

⁵³Ngaich cha-a nöng kö chuh patīre.