Read Car_Nicobarese T. YÔHAN 8 Bible Online

T. YÔHAN 8 - Car_Nicobarese bible

T. YÔHAN 8

²Ngaich ka-euilökūö tö peuheū Anga-aṅ nö hēk nö yihtöre nö el ök töhet chūök; ngaich ṙòkhöre yik tarik nö yihtöre nö in Ò. Ngaich ūichngöre Anga-aṅ nö haköpten cha.

³Ngaich yik mahaköptö chöngö, tö yik Feresī inrē, nö kēḵ tök kikānö tökôti nö asĕhka; ngaich asöklen ò nö ellōn;

⁴Ngaich ngö ṙô cha-a tö Ò, Mahaköphöti; tökôti ön ngòh kikānö nö asĕhka, ṙònghöichṙen.

⁵Ngaich Môsös nö im chöngö nö hōten ih kulehngökui töngatī; Sitih ṙô Öm Me-eṅ tö e?

⁶Angū-ö ṙô cha nö kalahan; pòn hòṅ löknyuṙô nö vënyen Ò. Sōntöre pöri Yēsū, ngaich kūich el tumlat, nö aṅtī tö kuntīre.

⁷Höng iṙuhöṙô cha-a nö hatönan; hōklöre Anga-aṅ, ngaich ngö ṙô tö cha. Öp tötfāluṙen nö in yīö, höktö tī ò yēḵ, nö urēhĕ tī nö kulëhan.

⁸Ngaich hēk Anga-aṅ nö sōntöre, nö kūich el tumlat.

⁹Ngaich hē cha nö hāngö e, kö chanuhure cha-a ngaich, urĕh yik maṙöinylö, ngaich hēk yik ṙālö. Höng ṙā-ai Yēsū nöng hĕng tit tak, i chūökre ök kikānö nö sökhaka nö ellōn.

¹⁰Hōklöre Ang Yēsū, ngaich ngö ṙô tö ò, Me-eṅ kikānö; isuh yip vamënyen meh?

¹¹Ngaich ngö ṙô anga-aṅ Hö-ö, Mā. Ngaich ngö ṙô Yēsū, Öt rēhĕn Chin Chū-ö kahòkken meh. Kuṙòh ngaich man; töngamuhangen um hēk köölö fālen.

¹²Hēk Yēsū nö ve-ekūö cha, nö ngö ṙô, Chū-ö Chin Hanātö ngih Panam; ngòh tamömrit Chu öt lök el sinngūlö; hanātuvö pöri tö ngam nômö.

¹³Ngaich ngö ṙô yik Feresī tö Ò. Höng kahngôre Man eūköre, öt tökô-en an ngam aheūkö Meh.

¹⁴Ngaich ngö ṙô Yēsū, nö sapṙô cha, Yē Chu pòrô kahngôre eūköre, tökô-en an ngam aheūkö Chu, pò Chu akahalōn tö ṙāngöre, chuhure inrē. Öt akahalōn pöri yī-ö tö ṙāngö Chu, hēk chuhu Chu.

¹⁵Kahôka yin yī-ö, sā matre; öt kahòkken tarik Chin Chū-ö.

¹⁶Yē Chu öre kahôka, tökô-en ngam kinṙôka aṅ in Chu; pò Chu öt höng hĕng tak, tön Chū-ö tö ngam Yöng inrē, ngam tamīnten Chu.

¹⁷Kūichi an inrē nö im chöngö yīö, tö aheūkö tönët tak nö tökô-en.

¹⁸Chū-ö Chin ameūköre kahngôre, eūken Chu inrē ngam Yöng, ngam tamīnten Chu.

¹⁹Ngaich ngö ṙô cha-a tö Ò; I suh Ap Yöng Meh? Ngaich ngö ṙô Yēsū, nö sapṙô Cha, Öt rēhĕn yin ahakūö töm Yöng Chu. Yē yīö akahakūö tö Chu, ngaich kô-òren öi akahakūö töm Yöng inrē.

²⁰Anū-ö ṙô Ò nö el chūök tökētuvö, hē Ò nö haköphöti nö el ök töhet chūök. Ngaich öt tarīku kamëḵ an; pòn öl tö yihih ök ṙētak Ò.

²¹Ngaich hēk Anga-aṅ nö ngö ṙô tö cha, Kiröönngöre Chin; chöhö Chu min yī-ö; ngaich kapah i nup tököölre; öt kô yin chuh ip chahūhu Chu.

²²Ngaich ngö ṙô yik Yahūti, Fëlngöre Angvöh min, töp lökten Ò nö ngö ṙô, Öt kô yin chuh ip chahūhu Chu?

²³Ngaich ngö ṙô Anga-aṅ tö cha, Ṙama-ang lataṙeū yin yī-ö; ṙamā-ang lātulöng Chū-ö Aṅ ngih panam yin yī-ö; rö-ö Chū-ö aṅ ngih panam.

²⁴Lökten Chu ngö ṙô tö yīö, Kapah yin min i në tököölre. Pò yīö, yē yīö, öt ṙātö ellōnre tö Chu Öich Anga-aṅ, kapah yī-ö min i nup tököölre.

²⁵Ngaich ngö ṙô cha-a nö hatönan, Achīö Öm Me-eṅ? Ngö ṙô Ang Yēsū tö cha, Höng sā ngam ṙô Chu ngaich tö yīö.

²⁶Pōitöre ṙô Chin in yīö, kahôka inrē. Tökô-en An ngam tamīnten Chu; nup ahang Chu in Ò, anū-ö ṙô Chu ing panam.

²⁷Öt akaha elnang cha-a tö Ò nö ṙô tö ngam Yöng.

²⁸Lökten Yēsū nö ngö ṙô; Yē yīö min hatamlö ngòh Kūön Tarik, ngaich möl yī-ö min akahalōn tö Chu Öich Anga-aṅ, öt kanahnguṙen Chin tö la-enre; sā ṙô ngam Yöng pöri nö haköpten Chu, ngatī ṙô Chū-ö tö në.

²⁹Holtöṙah Chu An ngam tamīnten Chu; rö-ö An nö ṙāngen Chu höng hĕng taka; pò Chu örheūheu la-evṙen tö nup lōn Õ.

³⁰Hē ṙô Ò tö u, maṙôngö ngaich yik ṙamātö ellōnre nö in Ò.

³¹Lökten Yēsū nö ngö ṙô tö yik Yahūti, ṙamātö ellōnre nö in Ò, Yē yīö ngöhören ing ṙô Chu, ngaich yī-ö tökô-en mahaköp in Chu.

³²Akahalōn yī-ö min tö ngam kanô-en, ngaich ngam kanô-en, min nö luhnyen yīö.

³³Ngö ṙô cha-a, nö sapṙô Ò, Kūön Aprahām in ihö; öt hĕng heuh inkövö in tö töng tarik. Sitih Öm ngö ṙô, Luhnyu yin min?

³⁴Ngaich sapṙô cha Yēsū, nö ngö ṙô, Tökô-òṙô Chin tö yīö, Ṙòkhöre yin vē tököölö fālen, nö töhakövö töm tökööl.

³⁵Rö-ö an ngam töhakövö nö örheūheu nöngngöh nö i patī; ngam kūön pöri tö-örheūheu nöngngöh.

³⁶Lökten yē ngam Kūön nö luhnyen yīö, ngaich luhnyu takô yī-ö.

³⁷Akahalōn Chin tö yīö kūön Aparahām; ngaich sönngenre yī-ö hòṅ fëlö Chu, pò ngam ṙô Chu nö öt chūöku nö ellōn yīö.

³⁸Ṙô tö nup maheuṅkre Chin Chū-ö im Yöngre; ngatī inrē yī-ö la-evṙen tö nup ahang yīö ip yöng yīö.

³⁹Ngaich ngö ṙô cha-a nö sap ṙô Ò, Aprahām ap yöng ih. Ngaich ngö ṙô Yēsū tö cha, Yē yīö öre kūön Aprahām, ngaich la-evṙen öre yī-ö, tö la-en Aprahām.

⁴⁰Ngaich pöri yī-ö töngamuh hòṅ fëlngen Chu, pöich vame-eny nang yīö töm kanô-en, ngam ahang Chu im Tēv. Öt ngatī ök Aprahām. La-evṙen yin yī-ö tö la-en ap yöngre.

⁴¹Ngaich ngö ṙô cha-a tö Ò, Rö-ö in ihö kūön tö ṙōl tak; höng hĕng tak An ngam Yöng ih, ngam Tēv.

⁴²Ngaich Yēsū nö ngö ṙô tö cha, Yē ngam Tēv öre nö Yöng yīö, ngaich öre yī-ö hāngenlōn tö Chu; pò Chu yih ngaich, ṙā-ang im Tēv. Öt rēhĕn Chin kahngenre yih; tön tīnten Chu Anga-aṅ.

⁴³Kūöyòh öi öt akaha elnang tö ṙô Chu? Tön kūö yīö öt kô hang ṙô Chu.

⁴⁴Ngam sī-ö an yöng yīö; ngaich la-evṙen yī-ö tö nup lōn ngam yöngre. Famël tarik an ik raneh; öt mi-im kanô-en, pòn öt kanô-envö nö in ò. Ṙô-òvö anga-aṅ nö minyôiny-aṅ, yōm minnyôiny-aṅ inrē.

⁴⁵Ṙô tö ngam kanô-en Chū-ö; lökten yīö öt ṙātö ellōnre in Chu.

⁴⁶Achīö öp tö yīö, vamënyö tökööl in Chu? Yē Chu Öich kô-ò ṙô, kūöyòh öi öt ṙātö ellōnre in Chu?

⁴⁷Ngòh aṅ im Tēv, hang ṙô ngam Tēv anga-aṅ; angū-ö an lökten yīö yī-ö öt hang, pò yīö öt aṅ im Tēv.

⁴⁸Ngaich ngö ṙô yik Yahūti tö Ò, Röh öi huveū-eu ṙô tö Meh, Öm aṅ Samariā, tö sī-u aṅ in?

⁴⁹Ngaich sapṙô cha Yēsū, nö ngö ṙô, Öt sī-u aṅ in Chin. Milēḵṙen pöri tö ngam Yöng re; ngaich yī-ö öt milēḵṙen tö Chu.

⁵⁰Rö-ö Chin lukkö kanôlòre; hĕng taka An ngam lamūka, kamhôṅka inrē.

⁵¹Tökô-ò ṙô Chin tö yīö, Yĕn hĕng tak tarik mahaköp ṙô Chu, öt hōḵ min anga-aṅ nö kapah.

⁵²Ngaich ngö ṙô yik Yahūti tö Ò, Akahalōn takô in ngaich, tö Meh sī-u aṅ in. Kapah ök yih Aprahām tö yik pròfĕt inrē; ngaich Me-eṅ ngö ṙô, Yĕn hĕng tak tarik mahaköp ṙô Chu, öt hōḵ min anga-aṅ nö kapah.

⁵³Tömööḵlö ṙôkö Öm Me-eṅ tök yöng ih Aprahām, ök tökapah? Kapah inrē yik pròfĕt. Achīö Öm Me-eṅ vī-ilre?

⁵⁴Ngaich sapṙô cha Yēsū, nö ngö ṙô, Yē Chu eū-eure, höng tö rö-ö ngam ineū-euṅ Chu. Ngam Yöng Chu An ameū-euṅ Chu, ngam Tēv yīö, tö ṙô yīö.

⁵⁵Ngaich rö-ö yī-ö akahakūö tö Ò; akahakūö pöri Chū-ö tö Ò. Yē Chu öre ngö ṙô, öt akahkūö Chin tö Ò; ngaich Chū-ö öre, sā yīö, töminyôiny-aṅ, Tön akahakūö Chin tö Ò; ngaich haköp ṙô Ò.

⁵⁶Töṙāmölōn ök yöng yīö Aprahām, nö meuk ngih sakāmö Chu. Ngaich meūkö e anga-aṅ ngaich ṙāmölōn.

⁵⁷Lökten yik yahūti nö ngö ṙô tö Ò, Öl Man taneui anāi samyeūheu; ngaich Öm meūkö Aprahām hòng?

⁵⁸Ngaich Yēsū nö ngö ṙô tö cha, Ngaich Chin misī, urēhĕkūö finötnyö Aprahām.

⁵⁹Kēḵ ihong cha-a ngaich nö hòṅ kulehan; hanyatngöre ngaich Yēsū, ngaich kunyī-inyre, nö ṙā-ang el ngam töhet chūök.