Read Car_Nicobarese T. YÔHAN 9 Bible Online

T. YÔHAN 9 - Car_Nicobarese bible

T. YÔHAN 9

¹Ngaich hē Ò nö chööḵöng muh, hĕng taka ök tarik maheuṅk Ò, töt meuk tö finötnyöre.

²Ngaich yik haköptö Ò nö hatönan, nö ngö ṙô, Rappī; achīö öp tököölö fālen, ngòh tarik? Nap yöng ò ṙöng? Töp lökten ò nö ötmeuk, nö fötnyu?

³Ngaich ngö ṙô Yēsū, nö sapṙô cha, Ötrēhĕn nö ngòh tarik, rö-ö nö rēhĕn nap yöng ò, tököölö fālen. Hōtu pöri minë la-en ngam Tēv nö hameuktu nö in ò.

⁴Hòṅ la-evṙen in ayī-ö tö la-en ngam tamīnten Chu, yē e nö ṙòngmö sakāmö. Yih an ngam hatööm, hē tarik nö öt kô nö la-evṙen.

⁵I saha Chu ing panam, Chū-ö Chin Hanātö ngih panam.

⁶Keuheūthëṙô Anga-aṅ tö e, ngaich kösnyö pēngöre nö el tumlat; ngaich kalūöich ök tilin tö e; ngaich lūöp tö mat ò tö ngam tilin.

⁷Ngaich ngö ṙô tö ò, Kuṙòh; söich matre man, el ap mak Sīlōm. (Ngam töngö, Tīniyö.) Lökten ò nö kiröönngöre, ngaich söich matre; ngaich yih nö meuk.

⁸Ngaich ngö ṙô yik hol ò, yik mameūkan nö lā-urĕh nöng havëḵa, Röh ang nö ngòh amūichhak, nöng havëḵa?

⁹Anga-aṅ an, ngö ṙô yik tahëng; Rö-ö höng sā ò an, ngö yik inrē. Chū-ö chini, ngö ṙô pöri anga-aṅ.

¹⁰Sitih lökten pömri, löpnyörekūö mat? Ngö ṙô cha-a, nö hatönan.

¹¹Ngaich ngö ṙô anga-aṅ nö sapṙô cha, Yēsū Minënyö öp tarik, vamī tilin; ngaich lūöp tö mat chu; ngaich ngö ṙô tö chu, Kuṙòh; söich matre man i Sīlōm. Kiröönngöre Chū-ö ngaich öich söich matre, ngaich meuk.

¹²Ngaich hatönan cha-a, nö ngö ṙô, Isuh Apa? Hö-ö chin akahlōn, ngö ṙô anga-aṅ.

¹³Ngaich kēten ò cha-a, nö i yik Feresī, ök tötmeuk nö lā-urĕh.

¹⁴Töhet ök nö sakāmö, hē Yēsū nö vī tilin nö löpnyökūö mat ò.

¹⁵Lökten yik Feresī nö hēk nö hatönan, töp lökten ò nö meuk. Ngaich ngö ṙô anga-aṅ tö cha, Hapātö mat chu öp tö tilin; söich matre Chū-ö; ngaich meuk.

¹⁶Rēvre yik Feresī tö ngö ṙô, Rö-ö öp tarik Anga-aṅ, nö aṅ im Tēv; tön öt haköp töhet sakāmö ap. Ngö ṙô pöri yik tahëng, Sitih kanô-òṅ ang ngòh tarik tököölö fālen, nö ngatī la-en tö minkahngö?

¹⁷Ngaich cha-a nö kö harīkngöre lōn. Lökten cha nö ngö ṙô nö hēk, tök tötmeuk sin tarīk, Sitih ṙô öm me-eṅ tö Ò, i tī Ò nö löpnyökūö mat meh? Ngaich ngö ṙô anga-aṅ Lohten Öp nö pròfĕt.

¹⁸Öt nyātölōn yik Yahūti tö ò sin nö tötmeuk, ngaich meuk nö hēk; höng havëtö nak yöng ò cha-a.

¹⁹Ngaich hatönö cha, nö ngö ṙô, Kūön nāṅ ang ngòh, ngòh töfötnyu nö ötmeuk, tö ṙô yīö? Sitih lökten ang nö meuk töngamuh?

²⁰Ngaich ngö ṙô nak yöng ò, nö sapṙô cha, Akahakūö an, tö ngòh nö kūön ai; tö ò inrē nö fötnyu nö öt meuk.

²¹Öt akahlōn pöri töngamuh töp lökten ò nö meuk. Hatönan; pōyö an; kô-òren nö kahngôre.

²²Pa-ekūö nak yöng ò tö yik Yahūti; lökten cha nö ngatī ṙô; pò yik Yahūti nö ha-ehangen, nö hōtö ngòh tarik ma-akahngen Yēsū nö Kristū, ngaich ahōṙi anga-aṅ nö ṙā-ang ik māṅ cha.

²³Lökten nak yöng ò nö ngö ṙô, Pōyö an; hatönan.

²⁴Lökten cha nö havëtö ök tötmeuk sin tarik, nö hēk; ngaich ngö ṙô tö ò, Ha-öiny ngam Tēv man; akahalōn in töp tarik anga-aṅ nö tököölö fālen.

²⁵Ngaich ngö ṙô anga-aṅ nö sapṙô cha, Öt akahalōn chin Chū-ö, yē ò nö tököölö fālen. Höng hĕng öp mikahlōn chu, tö chu sin tötmeuk, ngaich meuk töngamuh.

²⁶Lökten cha nö ngö ṙô tö ò, Sitih tī öp tö meh? Sitih inlahen öp nö löpnyökūö mat meh?

²⁷Ngaich ngö ṙô anga-aṅ nö sapṙô cha, Fömngöre ṙô chin taheui tö yīö; ngaich yī-ö öt hang. Kūöyòh öi hòṅ hāngö e hēk? Hòṅ mahaköp öi yī-ö inrē in Ò?

²⁸Me-eṅ man mahaköp in Ò, ngö ṙô cha-a, nö miyëḵṙô, mahaköp in ihö, in Môsös.

²⁹Akahalōn in tö ngam Mā Tēv nö ṙô-òv nö in Môsös; öt akahalōn pöri tö ṙāngö ngòh tarik.

³⁰Ngaich ngö ṙô ök tarik, ngö sapṙô cha, Tötohhë ön ngih, tö yīö öi öt akahalōn tö ṙāngö Ò; ngaich yih Anga-aṅ nö löpnyökūö mat chu.

³¹Akahalōn in, tö ngam Tēv nö öt hang ṙô tököölö fālen, Yē ngòh tarik pöri nö töpa-ekūö tö ngam Tēv, lök lōn Ò inrē, anga-aṅ töhāngö ṙô tö Ò.

³²Hēten tö ranehlö ngih panam, öt hĕng heuh öi hang tö hĕng tak nö löpnyukūö mat, töfötnyu nö ötmeuk.

³³Yē öp tarik öre nö öt aṅ im Tēv, ngaich öt kanô-òṅvö.

³⁴Ngaich ngö ṙô cha-a, nö sapṙô ò; Höng töfötnyu man me-eṅ i tökööl; ngaich öm haköpten ih hòng? Ngaich ahōngen ò cha-a, nö ṙā-ang ik māṅre.

³⁵Hāngö cha Ang Yēsū, nö ahōngen ò; ngaich kôtökūö tö ò, ngaich ngö ṙô, Ṙātö ellōnre ömeh i ngòh Kūön Tarik?

³⁶Ngaich ngö ṙô anga-aṅ nö sap ṙô Ò, Achīö Öp Anga-aṅ Mā? Hòṅ chu ṙātö ellōnre in Ò.

³⁷Ngaich ngö ṙô Yēsū tö ò, Meūkan man ngaich; Anga-aṅ An vame-eṅkūö meh töngamuh.

³⁸Ngaich ngö ṙô anga-aṅ Mā; ṙātö ellōnre chin. Ngaich sōntökūöre, nö i kūö Ò.

³⁹Ngaich ngö ṙô Yēsū, Kamlah Chin yih ing panam, hòṅ yip tötmeuk nö meuk; hòṅ yip tömeuk inrē nö vīngöre nö öt meuk.

⁴⁰Ngaich ngö ṙô tö Ò, yik rēvre Feresī, hamang në ṙô Ò, Öt meuk öi ihö inrē?

⁴¹Ngaich ngö ṙô Yēsū tö cha, Öt inu yin öre tö tökööl, yē yīö öt meuk. Ngö ṙô pöri yī-ö töngamuh; Meuk in; ngaich höngngòh ngam tökööl yīö.