Read Car_Nicobarese INLAHEN 1 Bible Online

INLAHEN 1 - Car_Nicobarese bible

INLAHEN 1

¹Ngam mu-urĕh līpöre kahūich chu, Ō Tĕ-òfilös, inlahen Yēsū nö la-evṙen, ane inrē haköphöti.

²Söl ngam sakāmö hē Ò nö kēḵlöngö; keuheūthëṙen Anga-aṅ, lökten im Töhet Fanöinylö, nö kētö chöngö yik tanīnöṙô tö katöllöngö tö Ò.

³Yik tö hameukhumat tö Ò nö aṅ, unôichrit kanihngen Ò, nö pōiyen minkahngö; meūkö tö cha nö fën anāi tum sumkam; nö ṙôtö inlahen ngam pūlngö ngam Tēv.

⁴Hamūltöre nö in cha; ngaich sōten cha Anga-aṅ nö kiröönngöre, nö ṙā-ang Yerūsalem; höngkökūö ngam kinlēḵngô ngam Yöng pöri, ngam ahang yīö in Chu.

⁵Pò Yôhan nö aṅtī tö mak nö vōk; aṅtī tö ngam Töhet Fanöinylö pöri yī-ö min vōk, öt ṙōl töre sumkam.

⁶Lökten hē cha nö hamūlöre, ngaich ngö ṙô nö hatönan, Mā; ngaich Öm töngamuh havantö ngam pūlngö in Israĕl?

⁷Ngaich ngö ṙô Anga-aṅ tö cha, Rö-ö yin yī-ö hōtu akahalōn tö ṙētak, hēk hē, ngam mī-im chöngö ngam Yöng.

⁸Teūngen pöri min yī-ö tö kanô-òṅ, hē ngam Töhet Fanöinylö nö i kui yīö. Ngaich yī-ö min ameūken Chu, i Yērusalem, keuheūtngöre chūök i Yūtā, Samariā, ane inrē söl ip manā-angkūö ngih pangam.

⁹Keuheūthëṙô Anga-aṅ tö u, ṙòngmöng hötīöna cha-a, ngaich kēḵlöngö Anga-aṅ, ngaich ök taṙul nö kēḵ An nö i kūö cha.

¹⁰Hē cha nö ṙòngmö haköpmatre nö el halīöngö, tö chanūhu Ò; nët tak nak tarik samökhaka nö ranghen cha, tö isōhö hilā; nak tö ngö ṙô,

¹¹Yī-ö tarik aṅ Kelelī; kūöyòh öi höng sökhaka, hatīönkö el halīöngö? Ngatī yanihih ön ngòh Yēsū min, ngam tö kēḵlöngö nö el halīöngö, nö ṙā-ang in yīö, sā mat yīö meūkan nö yônlö nö el halīöngö.

¹²Havantöre ngaich cha-a, nö i Yerūsalem, nö ṙā-ang kui ap rôngö Ôliv, ap töröhta nö i Yerūsalem, höng rô-òlkūö kinröönngö hē el töhet sakāmö.

¹³Ngaich hē cha nö yih, yòhlö cha-a ngaich nö el öp lātulöng urôhò, i chūök cha nö höngngöh, hēḵ Pītör, Yôhan, Yāköp, Antaru, Filip, Tômös, Partòlòmai, Mëtiv, Yāköp ök kūön Alfāi, Sīmōn Sēlòt Yūtā inrē ök kūön Yāköp.

¹⁴Ṙòkhöre cha-a vē nö hamūlöre, kamnipkūö nö ve-ekūötēv, holtö yik kikānö, Mariā inrē ök yöng Yēsū kikānö, tö yik kahëm Ò inrē.

¹⁵Lohten nö hēngòng nët anāi yik tömaṙôngö nö hamūlöre; hē e Pītör nö söklöre nö ellōn cha, ngaich ngö ṙô tö cha,

¹⁶Kahōlö; tö hòṅ keuheūtiṙen ṙô an ngam Töhet Līpöre, ngam ṙô ngam Töhet Fanöinylö nö urĕh nö löknyö elvāng Tāvit, tö inlahen Yūtā, ök mahachōkūö yik kameḵeṅ Yēsū.

¹⁷Pòn kaheuktu anga-aṅ nö in hī; ngaich nö teūngen tö kintölöre nö i ngih la-en hī.

¹⁸(Anga-aṅ ngòh tarik mahavah panam nö ṙāi tö nuk raneushö ötlanöökö; ngaich lāinylörit nö suktöre, lakukköṅnykūö, ngaich talīnköṅny nuk aṅ ellōn ò.

¹⁹Ngaich ṙòkhöre yip mī-iyöng Yerūsalem nö akahalōn tö e; tön i ëlô cha, ap panam nö kaheūkö nö Akeltama, ngam tö ngö, Panam Mahām.)

²⁰Pòn ngö kinūichngö nö i mat öp līpöre Salmai, Hökngen ngam elyöngö ò nö ötkôlò, ane inrē un tarīku mī-iyöng in e; hēk ngö öp inrē, Hökngen ngam inyōmö in ò nö kē-ĕ tö tahëng.

²¹Lökten i yip tarik hamòl hī, i rô-òten ngam Mā Yēsū nö havötköre nö in hī,

²²Hēten tö ngam vinôkö tī Yôhan, söl im sakāmö hē Ò nö kēḵlöngö, nö ṙā-ang in hī; hòṅ hĕng taka öp tö cha, vame-eny ngam invanlö Ò, nö hol hī.

²³Ngaich nët tak nak töhalāḵnyu tö cha; nāṅ Yôsĕf ök tö Parsapas, Yustös invëka inrē; nāṅ Mātī.

²⁴Ngaich ve-ekūötēv cha-a, nö ngö ṙô, Ō Me-eṅ Mā, tö akahalōn tö ellōn taṙòkhöre tarik; hĕng tak hameukti Man i nāṅ tö nët tak, töp katöllö Meh.

²⁵Nö kamëḵ ngih chūök i ngih la-en tanīnöṙô, ngam töṙā-ayö tö Yūtā, hòn chuh im chūökre anga-aṅ.

²⁶Ngaich cha-a nö kalah taneūngen; ngaich Mātī nö teūngen; ngaich kaheuktu anga-aṅ nö i yik tö kahuk sīön tak tanīnöṙô.