Read Car_Nicobarese INLAHEN 10 Bible Online

INLAHEN 10 - Car_Nicobarese bible

INLAHEN 10

¹Hĕng taka ök umuh tarik i Kaisarī, Kòrnēli ök mine-eny ò; yönṙen yik tö hēngòng Kumnyung aṅ Italī invëka, tö-akaha ök nö tarik, tö pa-ekūö inrē tö ngam Tēv, nö holtö yik aṅ patīre nö ṙòkhöre.

²Tö pōyen tī ök nö alōntö tarik ve-ekūötēv inrē nö örheūheu.

³Hĕng taka ök ma-ahānga aṅ im Tēv tölöökö mineūkö tö ò, nö yihtöre nö in ò, ik tö lūöi köṅny ṙô tö harap; ngaich ngö ṙô tö ò, Kòrnēli.

⁴Ngaich haköpmatre anga-aṅ nö ngëichken ò; ngaich ngö ṙô, tö pinhe-eṅkūöre, Mā! Asuāpa? Ngaich ngö ṙô anga-aṅ tö ò, Söllö nup ṙô meh ve-ekūötēv, nup tī meh inrē inlōnti, nö inköpkölōn nö i kūö ngam Tēv.

⁵Tīnngö tarik man ngaich i Yòppa; kē-ĕrkūö Sīmōn, öp tö Pītör invëka.

⁶Iyöng in Simōn ap, ap yōm uk, ap töpatī-ivö tap i kūö mai. Anga-aṅ ap min vame-eny nang meh tö la-en meh.

⁷Ngaich hē chanūhu ök ma-ahānga vame-eṅkūö ò; nët tak havë-eti ngaich anga-aṅ tö nak mahalanṙen aṅ patī ò, hĕng tak ök kumyung, töpa-ekūö tö ngam Tēv, aṅ i yik töngngöh nö in ò.

⁸Keuheūthöṙô anga-aṅ nö ve-eny nang cha, ngaich tīnngen cha nö i Yòppa.

⁹Ngaich im huṙöich, hē cha nö ṙòngmö el talöökö, ngaich röhta nö ip panam; yòhlö Pītör nö i kui patī, nö ve-ekūötēv, im tö nët sīön köṅny ṙô.

¹⁰Ngaich kapahare anga-aṅ, nö hòṅ nyā. Ṙònghöichṙen pöri yik vamī nya-aṅkūö, ngaich heūv anga-aṅ.

¹¹Meuk ngam halīöngö anga-aṅ nö löpnyörekūö; ngaich hĕng ök yamônti tö sā töpōi tāk intĕh, i nuk tö fën nangre hinôti angū-ö nö el tumlat.

¹²Ök tö-aṅhaṅvmat tö nup tökeuheūttöre mihëṅṙö töfënö kalröön, töṙeūla chehen aṅ ngih panam, nup chehechōn lamātulöng inrē.

¹³Ngaich ngö ṙô tö ò, Choholre Pītör; fël nya-aṅkūöre. Ngö ṙô pöri ang Pītör,

¹⁴Hö-ö; Mā; öt hĕng heuh chin nya-aṅvkūö tö töhuich.

¹⁵Ngaich hēk ök ṙô, nö ngö, im innët heuh, Në tölöök tö tī ngam Tēv, un töhuich, tö ṙô meh,

¹⁶Lūöi heuh angū-ö nö ngatī; ngaich nönglūk ök intĕh nö kēḵlöngö nö el halīöngö.

¹⁷Ngaich hē Pītör nö ṙòngmö öt akahalōn tö manah ngam heūvö re, ngaich yik tarik tahīntö Kòrnēli, nö sökhaka nö i kūö inkūp, tö kinheūṅtenre nö hatön chūök patī Sīmōn;

¹⁸Ngaich hūḵa cha-a nö hatön, yē Sīmōn ök tö Pītör invëka, nö iyöng umuh.

¹⁹Ṙòngmö afēḵngen ök heūvöre Pītör, ngaich ngö ṙô ngam Töhet Fanöinylö tö ò, Meuk yip tarik lūöi tak chamöhö meh.

²⁰Choholre man; yòhngö. Kiröönngöre in cha; um piyū-en, tön tanīntö Chu yip.

²¹Yòhngö ngaich Pītör nö i yik tarik; ngaich ngö ṙô, Chū-ö chin chahöh yīö. Asuh ap chööḵnyö yīö yih?

²²Ngaich ngö ṙô cha-a hĕng taka ap yöngṙen töhēngòng kumyung, ang Kòrnëli, talöök ap nö tarik tö pa-ekūö inrē tö ngam Tēv, tö eūnyu inrē tö vē Yahūti; ve-evkūö ap tö ngam Tēv, nö lökten ik töhet ma-ahānga, nö hōtu nö tīnngö mahavëten meh i patī ò; hōtu inrē nö hang nup ṙô meh. Havëhötnen cha ngaich anga-aṅ, ngaich hachūöklen cha.

²³Ngaich im huṙöich anga-aṅ nö kiröönngöre nö in cha; rēvre yik Kristīön aṅ Yòppa hamòl ò.

²⁴Ngaich im huṙöich cha-a nö sölta nö i Kaisarī. Höng hökken cha Kòrnēli; ngaich nö havëtö yik mak alahare nö ṙòkhöre, yik milālö hol ò inrē.

²⁵Ngaich hē kunhēthöt Pītör, höngkūö ò ngaich Kòrnēli; ngaich afukngöre nö i röön ò, nö salāman.

²⁶Hachohlen ò pöri Pītör, nö ngö ṙô, Choholre man; tarik chin chū-ö inrē, öich sā meh.

²⁷Kuhēthötre anga-aṅ, nöng vanëḵngöre tö kūö ò; ngaich kôtökūö tö yik tömaṙôngö nö hamūlöre.

²⁸Ngaich ngö ṙô anga-aṅ tö cha, Akahalōn yin tö vē Yahūti nö tökööl nö hamūltöre nö i tahëng mihëṅṙö tarik; kööl inrē nö yihken cha. Hameukhumat pöri chū-ö tö ngam Tēv, öich sōtu töhuich ngö, tö tarik.

²⁹Lökten chin yih, öich öt sahōḵngu, hē linukkö chu.

³⁰Lökten chin hatönö yīö töp lökten linukkö chu tö yīö. Ngaich ngö ṙô ang Kòrnēli, Fën hang sumkang ngaich, töng töngamuh, öich ve-ekūötēv i patīre, i tö lūöi köṅnyṙô. Ngaich hĕng tak ök tarik samökhak nö i kūö chu, tö ayānga mat inyut. Ök tö ngö ṙô,

³¹Kòrnēli; hāngö nup ṙô meh ve-ekūö Tēv; söllö inrē nup inlōnti tī meh, nö inköpkölōn nö i kūö ngam Tēv.

³²Lökten man tīnngö chamuh Yòppa, nö havëten Sīmōn nö in meh, ap tö Pītör invëka; i yöng patī Sīmōn ap, ap yōm uk, nö i kūö mai; anga-aṅ ap min vame-eny nang meh.

³³Ngaich ilööṙen chū-ö tīnngö lamukken meh; ngaich me-eṅ löök öm yih. Ṙòkhöre in īhö ngaich ihih, i kūö ngam Tēv; öi hòṅ hang nup taṙòkhöre tinöölô meh tö ngam Mā Tēv.

³⁴Ngaich Pītör nö kaknyöre nö ngö ṙô, Akahalōn takô chin ngaich tö ngam Tēv nö töt atöltuṙen tö tarik;

³⁵I tum mihëṅṙö vē tarik pöri, ngòh töpa-ekūö tö Ò, töla-evṙen inrē tö tölöök anga-aṅ tö hōḵov tö Ò.

³⁶Ngam ṙô tahīntö Ò i yip kūön Israĕl, minkahten tölöök inhangkö kumchiḵṙen, lökten in Yēsū Kristū; (Anga-aṅ An Mā taṙòkhöre;)

³⁷Akahalōn yin yī-ö tö e angū-ö ṙô, ngam tö keuheūtngöre chūök nö ahangka nö i Yūtā; urĕh nö i Kelelī, unôich tö ngam minkahten vinôkö tö Yôhan;

³⁸Tö Yēsū aṅ Nāsaret, ngam tö hachāmö elkui tö ngam Tēv, tö ngam Töhet Fanöinylö, minhôiṅyö inrē. Ök kumröönköre nö la-evṙen tö tölöök, halanken yik taṙòkhöre töt hakôlöngṙô tö ngam sī-ö, pò ngam Tēv nö in Ò.

³⁹Ihö in mameuk nuk taṙòkhöre la-en Ò i panam yip Yahūti, i Yerūsalem inrē. Ök töfëli inrē tö cha, kilöllöngö nö i rōi chōn.

⁴⁰Anga-aṅ töhachohlöngö tö ngam Tēv, im linūöi sumkum;

⁴¹Ngaich hōten Ò nö hameuktu, öt i taṙòkhöre tarik, i yip tökatöllöng pöri tö ngam Tēv mameuk, in ih öi nyamā, òk inrē holkūö Ò, unôichrit Ò nö choholre, nö ṙā-ang i yip tökapah.

⁴²Ngaich hōten ih Anga-aṅ, öi mumkahten tarik tö Ò nö Anga-aṅ vahīlö ngam Tēv, nö kamòkken tö-aṅ, tökapah inrē.

⁴³Anga-aṅ An ha-eūkö yik taṙòkhöre pròfĕt, tö ngòh ṙamātö ellōnre nö in Ò, nö teūngen min tö inṙē-ĕl tököölre, lökten i Mine-eny Ò.

⁴⁴Ṙònghöichṙô ang Pītör tö u, teungtöre ngaich ngam Töhet Fanöinylö nö i kui cha nö ṙòkhöre, yik hamang ngam ṙô.

⁴⁵Ngaich yik tö tunyīnyi, yik ṙamātö ellōnre, nö uṙeh, yik hamòlröön Pītör; pò ngam inlōnti aṅ im Töhet Fanöinylö, nö hōngtu nö i më tahëng mihëṅṙö tarik.

⁴⁶Pò cha nö hang ṙô cha nö ṙô tö tahëng ëlô, ha-öiny ngam Tēv inrē.

⁴⁷Ngaich ngö ṙô ang Pītör, Tarīku hòng tö kô nö sōtö ngam mak, hòṅ vē nö öt vōkö, vē tö ngaich nö teūngen tö ngam Töhet Fanöinylö, nö sā hī ayī-ö?

⁴⁸Ngaich hōten cha anga-aṅ nö vōkö, i Mine-eny Yēsū Kristū. Ve-ekūö ò ngaich cha-a, nö höngngöh nö haroh tum sumkam nö in cha.