Read Car_Nicobarese INLAHEN 13 Bible Online

INLAHEN 13 - Car_Nicobarese bible

INLAHEN 13

¹Pròfĕt yik umuh, mahaköphöti inrē, ik māṅ i Anti-òk, hēḵ Parnapas Sumōn ök tö Nikēr invëka, Lukīös ök aṅ Kurēnī, Mana-ēn inrē ök hol inruklö ök kun rācha Heròt, Sôl inrē.

²Ngaich hē cha nö ve-ekūötēv, ahik inrē; ngaich ngö ṙô ngam Töhet Fanöinylö, haköhngen nāṅ Parnapas, nāṅ Sôl, nö ip la-en invëkö cha tö Chu.

³Keuheuthëṙen cha-a nö ahik, ve-ekūötēv inrē; ṙēptö tīre ngaich nö i kui cha, ngaich tīnngen cha.

⁴Tīni cha-a tö ngam Töhet Fanöinylö, ngaich chuh Seleuki; ngaich ṙā-ang umuh cha-a nö hatēhĕngre nö chuh Saiprös (kuprös).

⁵Ngaich hē cha nö i Salamis, ngaich ahangkö ngam ṙô ngam Tēv cha-a, nö el chūök vine-eṅkūötēv yik Yahūti. In cha inrē ang Yôhan nö hamòlṙen.

⁶Ngaich hē cha nö keuheūt nö chuh i nup panam; yihtöre cha-a ngaich nö i Pafòs. Ngaich hĕng tak ök kanôtökūö cha, tömilūönö, samūöichköre nö pròfĕt, Yahūti ökuh; Paryēsū minënyö.

⁷Ök mi-ik mahayöng; Sĕrkīös Pôlös, ök tö-akaha nö tarik. Havëten nā Parnapas, nāṅ Sôl, anga-aṅ nö in ò; ngaich hòṅ hang ṙô ngam Tēv.

⁸Ngaich pöri Ēlimas ök tömilūönö, (pòn töngatī manah ngam mine-eny ò) nö tahngen cha; hòṅ havööngökūö ök mahayöng, nö ṙā-ang im mikah.

⁹Ngaich pöri ang Sôl, ök tö Pôl ngö invëka inrē, nö īnu tö ngam Töhet Fanöinylö, ngaich haköpmatre nö in ò; ngaich ngö ṙô,

¹⁰Ō me-eṅ tö īnu tö nup taṙòkhöre inchīlö, huneū-en inrē; me-eṅ kūön ngam sī-ö; tökunyahaṅ el mat tö nup taṙòkhöre tölöök; öt hòṅ ṙāngenre ömeh öm havööngökūö tarik nö ṙā-ang im tö chip talöökö ngam Mā Tēv?

¹¹Yĕh meuk man; i kui meh an ngam eltī ngam Mā Tēv; ngaich öt meuk ngam tavūöi me-eṅ min, rĕh rô-angen. Ngaich iṙūö suktöre kui anga-aṅ, tö pinṙeūmö, sinngūlö inrē; ngaich ṙēpkö holre anga-aṅ nö hòṅ sarōkö kël.

¹²Ngaich hē ök mahayöng nö meūkö e, ṙātö ellōnre ngaich anga-aṅ; pòn pingangkūö tö ngam inköphöti aṅ im Mā Tēv.

¹³Ngaich Pôl tö nak hol ò inrē, nö hatēhĕngre nö ṙā-ang Pafòs; ngaich yih nö i Pörka, i Pampuli. Ṙāngen cha ngaich Yôhan, ngaich havantöre nö i Yerūsalem.

¹⁴Iṙūöhöröön cha-a nö ṙā-ang Pörka, ngaich yih nö i Anti-òk, i Pisitī. Ngaich chuh el chūök vine-eṅkūötēv cha-a, hē el töhet sakāmö, ngaich Ūichngöre.

¹⁵Keuheūt hë vine-eṅkūö ngam chöngö, nup līpöre yik pròfĕt inrē; ngaich ngö ṙô yik mākūö chūök vine-eṅkūötēv, Kahōlö; yē nāṅ ṙahônyu tö ṙinuöhöl alaha vē tarik, yĕh ṙô-òv nan.

¹⁶Söklöre ngaich ang Pôl; ngaich hachônglö këlre anga-aṅ, nö ngö ṙô, Yī-ö tarik aṅ Israĕl; yī-ö inrē tö pa-ekūö tö ngam Tēv; hangihtöre.

¹⁷Katöllö yik muvöhngö hī An ngam Tēv vē tarik Israĕl; ngaich hapōilö yik tarik, hē cha nö iyöng ip panam tahëng, Aikup; aṅtī tö minhôiṅyöre Anga-aṅ nö kēḵnyen cha, nö ṙā-ang in e,

¹⁸Fën anāi samyeūheu Anga-aṅ nö haruklen cha nö elinchōn.

¹⁹Keuheūthë tī Anga-aṅ nö öthakôlò nuk tö sat pumnāmö panam i Kanā-an; ngaich kētö ngam panam cha nö amin Israĕl, fënòng taneui anāi samyeūheu rô-òten.

²⁰Unôichngöre Anga-aṅ nö kē-ĕkūö cha tö kamhôṅka, Samuĕl ök manā-aṅ, ök pròfĕt.

²¹Hēk unôich cha-a nö havëkö rācha, ngaich kē-ĕkūö cha ngam Tēv tö Sôl, ök kūön Kis, ök lamökngörit Penyamin, fën anāi samyeūheu.

²²Ngaich hē Ò nö kēḵngen ò, ha-ūichlen Tāvit ngaich Anga-aṅ, nö rāchakūö cha; ök aheūkö Ò, nö ngö ṙô, I ngòh kūön Yēsī chin kôtökūö tö Tāvit nö tarik tö sā lōn Chu, ngòh tö la-evṙen min tö nup lōn Chu.

²³Lökngörit ò, tī ngam Tēv, nö a sā ngam kinlēḵngô, nö kē-ĕkūö Israĕl tö Mahayööken, Ang Yēsū.

²⁴Urēhĕkūö yanihih Ò, ang Yôhan nö ahangkö ngam vinôkö invöötö ellōn, i yip taṙòkhöre tarik aṅ Israĕl.

²⁵Hē Yôhan nö ngaich nö hòṅ keuheūten tök la-enre; ngaich ngö ṙô anga-aṅ Achīö öich chu-ö, tö lōn yīö? Rö-ö chin chū-ö Anga-aṅ. Yĕh meuk, hĕng taka ap yamih nö unôich tö chu; öt kô chin rēhĕn luhnyökūö rehen kunröpö Ò.

²⁶Kahōlö, yī-ö kūön Aprahām, yip mī-in yīö inrē tö pa-ekūö tö ngam Tēv; in hī an ngam ṙô inyööken nö tīntu.

²⁷Pò cha yip mi-inyöng i Yerūsalem, yip yöngṙen cha inrē, kūö cha nö öt akahalōn tö Ò, öt rēhĕn tö nup ṙô yik pròfĕt, nö tö örheūheu nö ve-evkūö hē el töhet sakāmö; hateungngö u cha-a ngaich, nö öthakôlò Ò.

²⁸Ngaich pòrô cha-a nö öt kôtökūö tö lökngen kinpaha Ò; ngaich ve-ekūö Pailĕt cha-a, nö hōtö finëlngö Ò.

²⁹Ngaich hē cha, nö keuheūten tö nuk taṙòkhöre tökūichi inlahen Ò; kēḵ an cha-a ngaich nö ṙā-ang rōi ök chōn; ngaich ṙāten Ò nö el anūlö.

³⁰Ngaich hachohlen Ò pöri ngam Tēv.

³¹Ngaich ṙōl sumkam Anga-aṅ nö meūkö tö cha, yip yamih nö hol Ò nö i Yerūsalem, nö ṙā-ang Kelelī; yip ameūken Ò töngamuh nö i vē tarik.

³²Ngaich ahangken yīö īhö, tö ngam tölöök inhānga, kinlēḵngô nö i yik muvöhngö hī.

³³Tö tī ngam Tēv nö hateungngö e, in hī ayī-ö kūön cha, i tī Ò nö hachohlen Yēsū; sā kinūichngö e inrē nö im innëtö Salmai, nö ngö Me-eṅ Man Kūön Chu; i ngih sakāmö Man Öm lökngörit Chu.

³⁴I ngam tī Ò nö hachohlen Ò, nö ṙā-ang i yip tökapah, öt hēk nö kapah tö ngamuhöten, sā ṙô Ò nö ngö ṙô, Kē-ĕkūö Meh Chin min tö ngam töhet, tököp inrē, kinlēḵngô in Tāvit.

³⁵Ngatī inrē angū-ö nö i mat öp tahëng Salmai, nö ngö, Öt halöngten ngam Töhetre Man min nö meuk chinhūngö.

³⁶Pò Tāvit nö ngaich nö kapah, ngaich holtöṙah yik muvöhngöre, ngaich chahū-uyö; tö kinheūṅten ò nö lök la-en ngam Tēv, ik hē ò.

³⁷Öt chahu-uyö pöri Anga-aṅ, ngam hachohlö ngam Tēv.

³⁸Lökten yin yēḵ akahalōn, kahōlö, tö e, nö lökten i ngòh Tarik nö ahangka nö in yīö, ngam inṙē-ĕl tökööl.

³⁹Ṙòkhöre yip ṙamātö ellōnre, nö lökten in Ò, nö halööklöngö i nup tökeuheūttöre, nup tötkô nö halööklöng nö in yīö nö lökten im chöngö Môsös.

⁴⁰Haṙēmngenre yin lökten, hòṅ ngih nö öt teunghökui yīö, ngih ṙô yip pròfĕt, tö ngö.

⁴¹Yĕh meuk yin, yī-ö tömiyëḵ; pingangkūö, ngaichngen inrē pò Chu Öich la-evṙen i në sakāmö yīö tö ngam la-en chūök yīö rö-ö ṙātö ellōnre, pòrô angū-ö nö vënyu nö in yīö töp tö hĕng tak.

⁴²Ngaich hē cha nö kunyī-inyre, ngaich yik tarik nö ve-ekūö cha, nö hōten cha nö hēk nö mumkahten cha ip tahëng töhet sakāmö.

⁴³Hē pinyāingö yik tö mūl tarik, maṙôngö yik Yahūti yik tö-akaha tö vītuṙen nö Yahūti inrē, nö tömrit nā Pôl, nāṅ Parnapas, nak vame-eṅkūö cha, hōten cha nöngngöh nö im inlōnti aṅ im Tēv.

⁴⁴Ngaich im unôich töhet sakāmö, öhten nö hĕng pumnāmö yik tarik nö hamūlöre, nö hòṅ hang ṙô ngam Tēv.

⁴⁵Hē yik Yahūti pöri nö meuk yik tömaṙôngö; ngaich cha-a nö īnu tö kumnyahlōnre; ngaich ahôngö ṙô Pôl, ötlēkôre inrē.

⁴⁶Ngaich hēk nā Pôl, nāṅ Parnöpas, nö hakôḵnyôre, nö ngö ṙô, Tö hòṅ urĕh an ngam ṙô ngam Tēv nö vënyu nö in yīö. Ngaich pöri yī-ö sōḵo e, ngaich an havöötökūöre i vē tahëng mihëṅṙö tarik.

⁴⁷Pòn angū-ö chöngö ngam Mā Tēv tö ai; nö ngö ṙô, Vīten Meh Chin, Öm ëāṅvö mat vē tahëng mihëṅṙö; hòṅ Meh Öm inyööken söl ip manā-angkūö ngih panam.

⁴⁸Ngaich hē yik tahëng mihëṅṙö tarik nö hāngö e, ṙāmölōn cha-a ngaich; ngaich ha-öiny ngam Mā Tēv. Ngaich yik tö hōtu nö im nômö tö örheuheū-aṅ, nö ṙātö ellōnre.

⁴⁹Ngaich ngam ṙô ngam Tēv nö pōiti pinrātngö nö im panam.

⁵⁰Ngaich pöri yik Yahūti nö harunlö alaha yik tökôlò kikānö tö pa-ekūö tö ngam Tēv, yik mākūö panam inrē ngaich chöngu tö ötinkôlò nā Pôl, nāṅ Parnapas; ngaich ahōngen cha nö ṙā-ang ip panam cha.

⁵¹Pitōngngö pitung röönre pöri cha-a; ngaich yihtöre nö i Ikôniöm.

⁵²Ngaich yik mahaköp nö ṙāmölōn, īnu inrē tö ngam Töhet Fanöinylö.