Read Car_Nicobarese INLAHEN 14 Bible Online

INLAHEN 14 - Car_Nicobarese bible

INLAHEN 14

¹Ngaich cha-a nö i Ikôniöm, kuhēthötre cha-a nö el chūök vine-eṅkūötēv yik Yahūti, ngaich pōyen yik ṙamātö ellōnre, tö kūö ṙô cha, Yahūti, hĕnghöre Krīk inrē.

²Ngaich pöri yik Yahūti, yik tö sōḵ nö hang, nö haruh ellōn yik Tahëng mihëṅṙö tarik, ngaich vītö ötlanöökö ellōn cha nö im māṅ,

³Marô-òten cha-a nö höngngöh nö umuh; ngaich öt pa-ekūö ṙô cha-a, pòn hayönglenre nö im Mā Tēv, ngam mahameukhöti nö im ṙô Ò inlōnti, kētö minkahngö, pinngangkūö inrē nö eltī cha.

⁴Ngaich pöri yik tarik aṅ ngam panam nö harēvöre; rēvre yik mahaköpngöre nö i yik Yahūti, rēvre yik mī-i nak tanīnöṙô.

⁵Ngaich hē yik tahëng mihëṅṙö, yik Yahūti inrē, tö yik mākūö, nö hòṅ chökhuṙen tö cha, hòṅ sumrōngngökūö cha, hòṅ kulehe cha inrē;

⁶Akahalōn cha-a ngaich tö e; afalngöre ngaich nö i nup panam Likônī, Listra, Törpī inrē; i nup töng i chīṙö u inrē.

⁷In u cha-a ngaich nö ahangkö ngam tölöök inhānga.

⁸Hĕng taka ök tarik i Listra, tötkôlò kalröön, tökaròk nö ṙā-ang ellōn yöngre, ök töng öt hĕng heuh nö kiröönngöre.

⁹Anga-aṅ hamang ṙô Pôl; ngaich Pôl nö haköpmatre nö ngëichken ò; ngaich akahalōn tö ò nö mikahavö, töp lökten lanööken ò.

¹⁰Ngaich ngö ṙô ang Pôl nö pōitô, Hachiplöre man; söklöre. Ngaich tisòklöre anga-aṅ; ngaich kiröönngöre.

¹¹Ngaich hē yik tömaṙôngö nö meuk tī Pôl, kaknyöre cha-a ngaich nö hūḵa, nö ngö ṙô, nö i ëlô aṅ Likônī, Yônti yin vē tēv nö in hī, ngaich nö sā tarik.

¹²Yupitör ang Parnöpas tö ṙô cha; Mökuiri ang Pôl, pòn yöngkūö ṙô cha anga-aṅ.

¹³Ngaich ök kūönṙô Yupitör, ök lamatunyī tök panam, nö kētö nuā, tö aneūmu, nö i kūö inkūp; ngaich hòṅ kētö tö tökētu, nö holtö yik tömaṙôngö.

¹⁴Hē nak tanīnöṙô pöri, nā Parnöpas, nāṅ Pôl, nö hāngö e, tikaichngö hilāre cha-a ngaich, ngaich faltöre nö i yik tömaṙôngö; nö hūḵa, nö ngö ṙô,

¹⁵Mah! Kūö yòh öi ngatī? Tarik an āyö inrē, tö sā yīö; kamëtö ngih tölöök inhānga in yīö, hòṅ yīö havööngökūöre, ṙā-ang i në töng rö-ö, öi im tö aṅ Tēv, ngam Vamī-iṅl halīöngö, panam, mai, nup taṙòkhöre mī-in u.

¹⁶Ngam mahalöngten vē tahëng mihëṅṙö tarik sin mīsī, nö lök i nup talöököre.

¹⁷Rö-ö pöri Anga-aṅ nö öt ameūku, i tī Ò tö nup taṙòkhöre tölöök, löktö el halīöngö tī Anga-aṅ nö kē-ĕkūö yīö tö kumṙah, hē ṙòng inrē; ngaich hatööḵngen yīö tö nya-aṅkūö, ṙanāmölōn inrē.

¹⁸Anū-ö ṙô cha nö pītnyöre nö tahngö yik tarik, nö kētö tökētu nö in cha.

¹⁹Chalô ngaich yik Yahūti ṙamā-ang Antiòk, Ikônī inrē; ngaich hōtö yik tömaṙôngö cha-a nö kulehe Pôl; ngaich tūöknyen ò nö latunyī tök panam; pòn kapah anga-aṅ tö lōn cha.

²⁰Ngaich pöri yik mahaköp nö havīlen ò; ngaich choholre anga-aṅ; ngaich kuhēthötre nö im panam, Ngaich im huṙöich anga-aṅ, nö holten Parnöpas, nö Chuh Törpī.

²¹Keuheūthëṙen cha-a nö ahangkö ngam tölöök inhānga nö im panam, ngaich maṙôngö haköpti; havantöre ngaich cha-a nö i Listra, Ikôniöm, Antiòk inrē;

²²Hangëkö ellōn yik mahaköp; ṙuhöl alaha cha inrē nö haköpngöre nö im mikah; ve-eny nang cha inrē tö hī, lökten i kanihngen, öi kuhēthötre im pūlngö ngam Tēv.

²³Ngaich hē cha nö vī-il yik mā i nuk māṅ, ve-ekūötēv cha-a, ahik inrē; ngaich cha-a nö kēten cha nö im Mā Tēv, ngam chūök cha nö ṙātö ellōnre.

²⁴Ngaich cha-a nö lök Pisitī, ngaich yihtöre nö i Pampuli.

²⁵Keuheūthëṙô cha-a tö ngam ṙô nö i Pörka, ngaich chuh Attalia.

²⁶Ngaich ṙā-ang umuh cha-a nö hatēhhĕngre nö chuh Antiòk, ngam chūök cha nö kētu nö im inlōnti tī ngam Tēv, nö im la-enre ngam tökeuheūten nö ngaich.

²⁷Chalô cha-a, ngaich hamūl ngam māṅ; ngaich keuheūtnyöre ṙô nö ahangnyö elnang cha, tö nuk taṙòkhöre tī ngam Tēv, tö tī Ò inrē nö löpnyökūö inkūp mikah nö i yik tahëng mihëṅṙö tarik.

²⁸Ngaich marô-òten cha-a nöngngöh nö i yik mahaköp.