Read Car_Nicobarese INLAHEN 15 Bible Online

INLAHEN 15 - Car_Nicobarese bible

INLAHEN 15

¹Ngaich rēvre yik tarik yamih nö ṙā-ang Yūtā; ngaich haköptö yik māṅ, nö ngö ṙô, Yē yīö öt tunyīnyi, asā chöngö Môsös; öt kô yī-ö hayöökaṙen.

²Ngaich hē nā Pôl, nāṅ Parnöpas, nö kilṙô cha, hatöntöre inrē nö in cha; ngaich hōtu nā Pôl, nāṅ Parnöpas, rēvre inrē yik tahëng aṅ in cha, chamuh Yerūsalem, nö i yik tanīnöṙô, mā inrē, nö ve-ekūö cha tö ngam ṙô. Ngaich ngam māṅ nö meukṙen el talöökö cha.

³Ngaich lök Pòinikē cha-a, Samaria inrē; vënyö invöötö ellōn yik tahëng mihëṅṙö tarik.

⁴Ngaich ṙòkhöre yik Kristīön nö ṙāmölōn. Chalô cha-a nö i Yerūsalem; ngaich höngö tö ngam māṅ, tö yik tanīnöṙô, yik mā inrē; ngaich ahangnyö elnang cha tö ngam Tēv, nö lökten in cha.

⁵Rēvre yik umuh aṅ i yik Feresī, ṙamātö ellōnre, tö ngö ṙô, Öt kô yip nö öt tunyīnyi; hōtu inrē nö haköp ngam chöngö Môsös.

⁶Ngaich yik tanīnöṙô, yik mā inrē, nö hamūlöre, nö ve-ekūöre tö ngam ṙô.

⁷Keuheūthë ṙô cha-a nö ve-ekūöre, söklöre Pītör, ngaich ngö ṙô tö cha, Kahōlö; akahalōn yin tök misī tī ngam Tēv nö katölhöl nö in hī, pòn hōtu vē tahëng mihëṅṙö, nö löknyö elvāng chu ahang tö ngam ṙô ngam tölöök inhānga; ngaich ṙātö ellōnre.

⁸Eūken cha inrē ngam Tēv, ngam tö akahalōn; tö ellōn; i tī Ò nö kē-ĕkūö cha tö ngam Töhet Fanöinylö, sā tī Ò nö in hī ayī-ö.

⁹Öt harīkngöre tī An tö hī, tö cha inrē; halööktö ellōn cha, lökten im mikah.

¹⁰Lökten, kūöyòh öi kalah ngam Tēv; öi hakeunlö elranôṙö yip mahaköp, tö ngam töt rēhĕn nö kanô-òṅ yik muvöhngö hī öt rēhĕn ayī-ö kô keūnö e?

¹¹Ṙātö ellōnre pöri ayī-ö, tö hī min hayöökaṙen lökten im inlōnti ngam aṅ im Mā Yēsū; sā cha cha-a.

¹²Ṙòkhöre ngaich yik tömaṙôngö nö ṙangôre; ngaich hangihtöre tö ṙô nā Parnöpas, nāṅ Pôl, nö ahangnyö elnang cha tö nuk minkahngö, pinngangkūö inrē tī ngam Tēv nö i yik tahëng mihëṅṙö tarik nö lökten in cha.

¹³Keuheūthë ṙô cha-a, kaknyöre ngaich Yāköp, nö ngö ṙô, Kahōlö; hangihtöre yin tö ṙô chu.

¹⁴Ngaichô an taheui Sīmōn, nö ahangnyö elnang yīö tö tī ngam Tēv nö urĕh nö chöhkö yik tahëng mihëṅṙö tarik, nö kēḵ tarikre tö aṅ in cha, nö tarik Ò.

¹⁵Hōḵen höö nun tö e, tö ṙô yik pròfĕt, sā kinūichngö e, nö ngö,

¹⁶Unôichrit u Chū-ö min Öich havantöre; ngaich Chū-ö min hēk mānlö ngam inrūkui Tāvit, ngam tö taṙēhĕi. Hēk Chin min mānlö nup töfukngö, ngaich asöklö e min;

¹⁷Hòṅ yip chööḵvē tarik, nö chöh ngam Mā Tēv, ṙòkhöre inrē vē tahëng mihëṅṙö tarik, yip tö havëka tö Minënyö chu.

¹⁸Ngatī ṙô ngam Mā Tēv, ngam mumkahtölōn tö u, hēten tö ranehlö ngih panam.

¹⁹Lökten ön ngih chöngö chu, uh in hakihten cha yip aṅ i yip tahëng mihëṅṙö tarik mahavöötökūöre nö im Tēv;

²⁰Höng kūichtö līpöre cha pöri, hòṅ cha nö ṙāngenre i nup tö hachōchi tö insa tēv, i chinô-òṅkānö i nyinā-aṅvkūö tö hanlöiny hang likeun, mahām inrē.

²¹Pò ngam chöngö Môsös nö misī-iten nö ahangka, ve-evkūö inrē nö el chūök vine-eṅkūötēv, örheūheu hē el töhet sakāmö.

²²Ngaich yik tanīnöṙô, tö yik mā, ṙòkhöre inrē ngam māṅ, nö hōtö kintöllö tarik aṅ in cha, nö tīni nö i Anti-òk, nö hol nāṅ Pôl, nāṅ Yūtās nak tö tīni, ök tö Pārsöpas invëka, Sailes inrē; nak mākūö yik Kristīön.

²³Ngaich ngö tī cha-a nö kūichtö kum cha, Salām yip aṅ Antī-òk, Siriā, Kilikī inrē, yip tahëng mihëṅrö Kristīön, vē tanīnöṙô, tö vē mā inrē.

²⁴Pò ih hang tö yip rēvre aṅ in ih, tö hòṅ hakihten yīö tö nup ṙô cha, kumtöngngölōn yīö, nö hōten yīö tunyīnyi, ngaich haköp chöngö Môsös: yip tö rö-ö nö tölô tö ih;

²⁵Tölöök an nö ngaich, tö lōn ih ngaich hĕngrelōn, öi katöllö tarik nö tintu nö in yīö nö hol nā Parnöpas, nāṅ Pôl.

²⁶Nāṅ tarik kamëtö nômöre tö pòkūö ngam Mā hī Yēsū Kristū.

²⁷Lökten in ngaich tīnten nā Yūtās, nāṅ Sailes, nāṅ vamë-eny nang yīö min tö e, nö hakôtôre nö in yīö.

²⁸Tölöök an nö im Töhet Fanöinylö, nö in ih inrē, öi rö-ö hòṅ hakeunlen yīö tö tömötlö lumngan, tö në töt ṙanāngen;

²⁹Hòṅ yīö ṙāngenre i nup tökētu nö i insā tēv, i nyinā-aṅvkūö inrē tö mahām, nup tö hanlöiny hang likeun inrē, i chinô-òṅkānö. Lööken yin min, yē yīö haköpngöre öt in u. Lööken yin yēḵ.

³⁰Ngaich hē tinīnngö cha, yih cha-a ngaich nö i Anti-òk; ngaich hamūl yik tömaṙôngö; kēḵ tök līpöre cha-a ngaich, nö in cha.

³¹Keuheūthëṙô cha-a nö ve-ekūö e, ngaich ṙāmölōn tök ṙinuöhöl alahare.

³²Pròfĕt nak inrē nā Yūtās, nāṅ Sailes;

³³Ngaich ṙōlö ṙô nö ṙuhöl alaha ök māṅ, nö hangëken cha. Rĕh rô-òten cha-a nö umuh; ngaich tīniyö tök māṅ nö holtö kumchikṙen, nö chuh i yik tamīnngöre.

³⁴Höng hòṅ ngöh pöri Sailes nö umuh.

³⁵Höngngöh inrē nā Pôl, nāṅ Parnöpas, nö i Anti-òk; ngaich haköphöti, ane inrē ahangkö ngam ṙô ngam Mā Tēv; maṙôngö yik hol cha tahëng.

³⁶Rĕh rô-òngen, ngaich ngö rô Pôl tö Parnöpas, Ta-a tai hēk havantöre chöhkö yip Kristīön i nup panam, chūök hā ngaich ahangkö ngam ṙô ngam Mā tēv, ai ngëichkö inlahen cha.

³⁷Ngaich ang Parnöpas nö hòṅ ngô-òṅ Yôhan, nö hol cha inrē; ök tö Mākös invëka.

³⁸Rö-ö pöri angū-ö nö tölöök tö lōn Pôl. Ngam nginô-òṅ ò; pòn ṙamāngen cha sin, nö ṙā-ang Pampuli; öt iṙuhöröön nö in cha, nö im la-en.

³⁹Ngaich cha-a nö lā-alkūöre; lökten cha nö ngaich nö kö köhngen tö höö. Ngô-òṅ Mākös ang Parnöpas, ngaich chuh Saiprös/Kūprös.

⁴⁰Katöllen Sailes pöri ang Pôl ngaich kiröönngöre; kētu cha-a tö ngam māṅ nö im inlōnti aṅ im Tēv.

⁴¹Ngaich kiröönngöre anga-aṅ nö lök Siriā Kiliki inrē, hangëkö nuk māṅ.